.jpg)
អាយុទើបតែ២១ឆ្នាំ ជាអកុសលតារាស្រីឥណ្ឌា ឆេតថាណា រ៉ាយ បែរជាស្លាប់ដោយការបូមខ្លាញ់។
ក្រុងញូវដេលី៖ តារាស្រីឥណ្ឌាវ័យ ២១ ឆ្នាំម្នាក់បានស្លាប់ បន្ទាប់ពីក្រុមគ្រួសាររបស់នាងអះអាងថា ជាកំហុសនៃការវះកាត់បូមខ្លាញ់នេះបើយោងតាមប៉ូលិសកាលពីថ្ងៃពុធ។
ការវះកាត់បូមខ្លាញ់ដែលជាវិធីសាស្ត្រវេជ្ជសាស្ដ្រដើម្បីយកខ្លាញ់ចេញ ដែលជាទូទៅមានថោកបំផុតនៅក្នុងប្រទេសឥណ្ឌា ប៉ុន្តែការអនុវត្តភាគច្រើននៅតែមិនមានការគ្រប់គ្រងត្រឹមត្រូវពីមន្ទីរពេទ្យឯកទេស។
តារាស្រី ឆេតថាណា រ៉ាយ ដែលសម្តែងក្នុងរឿងភាគទូរទស្សន៍ និងភាពយន្តជាច្រើននៅក្នុងស្រុកកំណើតរបស់នាងឯរដ្ឋខារណាតាកា បានទទួលមរណភាពកាលពីថ្ងៃអង្គារ។
លោកយាយរបស់នាង ណារ៉ាយ៉ាណាម៉ា បានប្រាប់ប្រព័ន្ធផ្សព្វផ្សាយក្នុងស្រុកថាតារាស្រីរូបនេះបានសុំប្រាក់ចំនួន១៥ម៉ឺនរូពី (ប្រហែល១៩០០ដុល្លារ) សម្រាប់ការវះកាត់ ប៉ុន្តែក្រុមគ្រួសារបានបដិសេធ។
កាសែត Times of India បានដកស្រង់សម្តីលោកយាយរបស់នាងថា៖ «យើងមិនបានលើកទឹកចិត្តឱ្យនាងធ្វើការវះកាត់នោះទេព្រោះនាងមានសុខភាពល្អនិងមើលទៅមិនធាត់ទេ» ។
តារាស្រី ឆេតថាណា រ៉ាយ អាយុ២១ឆ្នាំ ដែលសម្តែងក្នុងរឿងភាគទូរទស្សន៍ និងភាពយន្តជាច្រើននៅរដ្ឋខារណាតាកា។
កញ្ញា រ៉ាយ បានប្រមូលលុយដោយខ្លួនឯងហើយបានទៅគ្លីនិកមួយក្នុងទីក្រុងប៊េងហ្គាល័រភាគខាងត្បូងដោយមិនប្រាប់ឪពុកម្តាយរបស់នាងឡើយ។
ប៉ុន្តែនាងស្រាប់តែកើតមានផលលំបាកក្រោយបូមខ្លាញ់នាងត្រូវបានបញ្ជូនទៅមន្ទីរពេទ្យជាបន្ទាន់ ហើយនាងក៏ត្រូវបានគេប្រកាសថាស្លាប់។
លោក វីណាយ៉ាក ប៉ាទីល ស្នងការរងប៉ូលិសបានប្រាប់ AFP ថាក្រុមមន្ត្រីបានចុះបញ្ជីករណីនៃការស្លាប់ខុសពីធម្មជាតិ បន្ទាប់ពីឪពុករបស់ស្ត្រីរូបនេះបានចោទប្រកាន់គ្លីនិកថាបានបំពានបែបបទវេជ្ជសាស្ត្រ។
គេហទំព័រ News Minute បានដកស្រង់សម្តីឪពុករបស់នាងគឺលោកហ្គូវីនដារ៉ាយថា៖ «កូនស្រីរបស់ខ្ញុំបានស្លាប់ដោយសារតែការធ្វេសប្រហែសរបស់មន្ទីរពេទ្យ»។
លោកបានពោលថា៖ «កូនស្រីរបស់ខ្ញុំមានសុខភាពនិងទឹកចិត្តល្អណាស់»៕ AFP/HR
