ភ្នំពេញៈ ក្រោយពីទទួលបានការឧបត្ថម្ភពីកម្មវិធី Voice តាមរយៈអង្គការអុកស្វាម (Oxfam) មជ្ឈមណ្ឌលធនធានសោតទស្សន៍បុប្ផាណា-(ARPAA) និងអង្គការជនជាតិដើមភាគតិចកម្ពុជា (CIPO) សហការគ្នាអនុវត្តគម្រោង មានឈ្មោះថា «សិល្បៈភាពយន្ត ដើម្បីការផ្លាស់ប្តូរជាវិជ្ជមាន-The Arts of Visibility and Positive Social Change» សម្រាប់រយៈពេល ២១ ខែ។
បើយោងតាមសេចក្តីប្រកាសព័ត៌មានពីបុប្ផាណាឱ្យដឹងថា៖ «គម្រោងនេះ នឹងផ្តល់ជូនអាហារូបករណ៍សិក្ខាកាមចំនួន ២៤ នាក់ ដោយបែងចែកជា ២ វគ្គ (វគ្គទី១ ចំនួន ១២ នាក់ និងវគ្គទី២ ចំនួន ១២ នាក់) ដើម្បីចូលរួមបណ្តុះបណ្តាលផ្នែកផលិតភាពយន្តឯកសារ និងពហុប្រព័ន្ធផ្សព្វផ្សាយ។
លក្ខខណ្ឌនៃការជ្រើសរើស ត្រូវជាយុវជនជនជាតិដើមភាគតិចមានអាយុពី ១៨ ឆ្នាំ ដល់ ៣០ ឆ្នាំ មកពីខេត្តមណ្ឌលគិរី និងរតនគិរី ជាអ្នកដែលស្រឡាញ់ និងចង់ចងក្រងឯកសារពីសហគមន៍ជនជាតិដើមភាគតិច និងជាអ្នកមានពេលគ្រប់គ្រាន់ចូលរួមវគ្គបណ្តុះបណ្តាលទាំងអស់ (បេក្ខនារី និងជនមានពិការភាព ត្រូវបានលើកទឹកចិត្ត)»។
ប្រភពដដែលបន្តថា៖ «ឯអត្ថប្រយោជន៍ សិក្ខាកាមនឹងទទួលបានពីការសិក្សា និងការប្រើប្រាស់សម្ភារប្រើប្រាស់សម្ភារថត ដោយឥតបង់ថ្លៃ ការធានារ៉ាប់រងផ្នែកសុខភាពក្នុងអំឡុងពេលសិក្សាទទួលបានវិញ្ញាបនបត្របញ្ជាក់ការសិក្សា និងឱកាសបង្ហាញស្នាដៃរបស់ខ្លួនក្នុងមហោស្រពភាពយន្តនៅក្នុង និងក្រៅប្រទេស ហើយចំណេះដឹង គឺទទួលបានទាំងផ្នែកទ្រឹស្តី និងផ្នែកបច្ចេកទេសពីគ្រូបង្រៀនដែលមានបទពិសោធច្រើនឆ្នាំនៅលើវិស័យការងារផ្នែកផលិតភាពយន្តឯកសារនេះ»។
ចំពោះការបរិច្ឆេទនៃការឈប់ទទួលពាក្យចូលរៀន គឺបានបញ្ចប់កាលពីថ្ងៃទី ១៥ ខែ ឧសភា ឆ្នាំ ២០២២ ខណៈការចូលរៀននឹងចាប់ផ្តើមនៅថ្ងៃទី ២៣ ខែ ឧសភា ឆ្នាំ ២០២២ ដែលមានទីតាំងសម្រាប់ការបណ្តុះបណ្តាល គឺនៅក្រុងបានលុង ក្នុងខេត្តរតនគិរី។ សម្រាប់ព័ត៌មានបន្ថែមសូមហៅទាក់ទងទៅកាន់លេខទូរស័ព្ទ ០១០ ៧៧ ៥១ ៥១/០៩៧ ៦១០ ១៩២០ (មជ្ឈមណ្ឌលធនធានសោតទស្សន៍បុប្ផាណា ហើយសូមរក្សាសិទ្ធិក្នុងការកែប្រែកម្មវិធីក្នុងករណីចាំបាច់)។
កម្មវិធីបណ្តុះបណ្តាល និងកសាងសមត្ថភាពយុវជនមកពីសហគមន៍ជនជាតិដើមភាគតិច គឺជាការផ្តល់ជូននូវជំនាញផលិតភាពយន្តឯកសារទាំងផ្នែកទ្រឹស្តី និងការអនុវត្តជាក់ស្តែង។ នេះបើតាមការអះអាងពីលោក ជា សុភាព ដែលជានាយកប្រតិបត្តិនៃមណ្ឌលធនធានសោតទស្សន៍បុប្ផាណា។
លោក ជា សុភាព ក៏ធ្លាប់បញ្ជាក់កាលពីលើកមុនដែរចំពោះការផ្តល់ជូននូវវគ្គបណ្តុះបណ្តាលជាអាហារូបករណ៍នេះថា យុវជននឹងសិក្សាពីដំណើរការនៃការផលិតភាពយន្តតាំងពីដំណាក់កាលដែលត្រៀមផលិត (Pre-Production) ដំណាក់កាលផលិត (Production) និងដំណាក់កាលក្រោយផលិត (Post-Production) ដើម្បីឱ្យយុវជនអាចផលិតភាពយន្តនោះជាភាសាដើមរបស់ពួកគាត់ ស្តីអំពីជីវិតរស់នៅប្រចាំថ្ងៃ និងវប្បធម៌ របស់សហគមន៍ជនជាតិដើមភាគតិចពួកគេតែម្តង។
លើសពីនេះ នាយកប្រតិបត្តិបុប្ផាណា លោក ជា សុភាព ក៏បានឱ្យដឹងហេតុផលដែលត្រូវជ្រើសរើសយកយុវជនជនជាតិដើមភាគតិច ដែលមកពីខេត្តមណ្ឌលគិរី និងខេត្តរតនគិរី ផងដែរថា៖ «ដោយសារតែខេត្តនេះ សម្បូរជនជាតិដើមភាគតិចច្រើនជាងគេ ហើយបើមើលទៅយើងឃើញថា ទំនៀមទម្លាប់ ប្រពៃណី វប្បធម៌ ជាពិសេសភាសារបស់ពួកគាត់ គឺកំពុងតែប្រឈមទៅនឹងការបាត់បង់ខ្លាំង ដូច្នេះហើយទើបយើងសម្រេចទទួលយកសិស្សនៅខេត្តទាំងនេះ (ខេត្តមណ្ឌគិរី និងខេត្តរតនគិរី ជាគោលដៅដំបូងគេ ដើម្បីឱ្យពួកគាត់ចូលរៀនសិន»៕