.jpg)
រូបតំណាង៖ ពេលនេះបុរសនេះកំពុងជាប់ឃុំបន្ទាប់ពីត្រូវបានចាប់ខ្លួន «ដោយសង្ស័យថាបានបំពានច្បាប់ក្លែងបន្លំតាមប្រព័ន្ធកុំព្យូទ័រ»។
ក្រុងតូក្យូ៖ ប៉ូលិសបាននិយាយកាលពីថ្ងៃព្រហស្បតិ៍ថា បុរសជនជាតិជប៉ុនម្នាក់ដែលទទួលបានប្រាក់ចំនួន ៣៦ ម៉ឺនដុល្លារជាជំនួយ Covid-19 ដោយភ័ន្តច្រឡំត្រូវបានចាប់ខ្លួនបន្ទាប់ពីជនរូបនោះនិយាយថា ខ្លួនបានចាញ់ប្រាក់នោះអស់តាមរយៈល្បែងស៊ីសងតាមអ៊ីនធឺណិត។
អាជ្ញាធរក្នុងតំបន់កាន់តែអស់សង្ឃឹមក្នុងការទទួលបានប្រាក់របស់ពួកគេមកវិញពីបុរសអាយុ ២៤ឆ្នាំ ដែលបាននិយាយថា លោកនឹងប្រគល់សាច់ប្រាក់វិញ «ទោះបីជាវានឹងត្រូវចំណាយពេលបន្តិចម្ដងៗក៏ដោយ»។
កំហុសដោយអាជ្ញាធរនៅទីក្រុងអាប៊ូដាច់ស្រយាល និងការខកខានមិនបានសងប្រាក់វិញបានបង្កឱ្យមានការខឹងសម្បានៅក្នុងប្រទេសជប៉ុន ដោយកម្មវិធីជជែកពិភាក្សាជាច្រើនបានវែកញែកអំពីភាពស្មុគស្មាញនៃស្ថានភាពហិរញ្ញវត្ថុរបស់បុរសជប៉ុនរូបនោះ។
បុរសរូបនោះត្រូវបានផ្ទេរប្រាក់ចំនួន ៤៦,៣លានយ៉េន ដោយកំហុសឆ្គងបច្ចេកទេសកាលពីខែមុនដោយមន្ត្រី ដែលកំពុងរៀបចំការចែកសាច់ប្រាក់សម្រាប់អ្នក ដែលមានប្រាក់ចំណូលទាប និងរងផលប៉ះពាល់ដោយជំងឺរាតត្បាត។
បន្ទាប់ពីការទៅសួរសុខទុក្ខការហៅទូរស័ព្ទ និងសំបុត្រមិនអាចបញ្ចុះបញ្ចូលបុរសនោះឱ្យសងប្រាក់វិញអាជ្ញាធរបានដាក់ពាក្យបណ្ដឹងកាលពីសប្តាហ៍មុន ដើម្បីព្យាយាមទទួលសំណងដែលភ័ន្តច្រឡំ។
បុរសជនជាតិជប៉ុនម្នាក់ ដែលទទួលបានប្រាក់ចំនួន ៣៦ម៉ឺនដុល្លារជាជំនួយ Covid-19 ដោយភ័ន្តច្រឡំត្រូវបានចាប់ខ្លួន។ AFP
ពេលនេះបុរសនេះកំពុងជាប់ឃុំបន្ទាប់ពីត្រូវបានចាប់ខ្លួន «ដោយសង្ស័យថាបានបំពានច្បាប់ក្លែងបន្លំតាមប្រព័ន្ធកុំព្យូទ័រ» មន្ត្រីនៅនាយកដ្ឋានប៉ូលិសនៃតំបន់យ៉ាម៉ាហ្គូឈី ភាគខាងលិចប្រទេសជប៉ុនបានប្រាប់ AFP។
បុរសនោះបានប្រាប់ប៉ូលិសថាលោកបានចំណាយប្រាក់ខុសច្បាប់នៅក្នុងកាស៊ីណូអនឡាញហើយត្រូវបានគេសង្ស័យថាបានផ្ទេរប្រាក់មួយចំនួនទៅគណនីផ្សេងទោះបីជាជនរូបនោះដឹងពីកំហុសឆ្គងក្នុងការវេរប្រាក់ក៏ដោយ។
អភិបាលក្រុងអាប៊ូ លោក ណូរីហ៊ីកូ ហាណាដា បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា ការចាប់ខ្លួននេះគឺជា «ជំហានឆ្ពោះទៅរកការពិត»។
លោកបាននិយាយថា៖ «ខ្ញុំមិនជឿទាល់តែសោះ (ថាគាត់បានប្រើវាទាំងអស់) ហើយខ្ញុំគិតថាវាអាចទៅរួច (មានលុយ) នៅលាក់កន្លែងណាមួយ»។
លោកបានបន្ថែមថា បុគ្គលិករបស់លោកហត់នឿយពីការហៅទូរស័ព្ទនិងអ៊ីមែលពីសាធារណជនជជីកសួរពីបញ្ហានេះណាស់៕ AFP/HR
