ភ្នំពេញៈ ក្រោយពីបានសម្ពោធកាលពីថ្ងៃទី ១៦ ខែឧសភា និងកំពុងតែចាក់បញ្ចាំងតាមរោងកុននានាក្នុងប្រទេសកម្ពុជា ចាប់តាំងពីថ្ងៃទី ១៩ ខែ ឧសភា ឆ្នាំ ២០២២ កុនជីវិតរឿង «គ្រោះជីវិតកូវីដ ១៩» វណ្ណកម្មលោក ហ៊ុយ យ៉ាឡេង ដែលខិតខំសម្រាំងដកស្រង់ចេញពីស្ថានភាពជីវិតពិតៗ នាគ្រាមនុស្សជាតិជួបវិបត្តិសកលដ៏ស្មុគស្មាញទូទាំងពិភពលោកបង្កឡើងដោយជំងឺកូវីដ ១៩ នោះ ក៏មានគ្រោងនាំយកទៅជ្រៀតចូលទីផ្សារកុនទីក្រុងប៊ូសាន ប្រទេសកូរ៉េខាងត្បូង នៅចុងឆ្នាំឆាប់ៗនេះ។
បើទោះបីការចាក់បញ្ចាំងតាមរោងកុនក្នុងស្រុកនៅមិនទាន់ដឹងពីកម្រិតនៃសម្ទុះគាំទ្រយ៉ាងណាក្តីក៏បុរសដែលជាចាងហ្វាង ផលិតករ និងតួសម្តែងខ្លួនឯងលោក ហ៊ុយ យ៉ាឡេង មានគម្រោងនាំយកកុនរឿង «គ្រោះជីវិតកូវីដ ១៩» នេះទៅចាក់បញ្ចាំងនៅទីផ្សារក្រៅស្រុកផងដែរដូចជានៅប្រទេសអាមេរិក ទីក្រុងហុងកុង ម៉ាឡេស៊ី និងកូរ៉េខាងត្បូងជាដើម។
លោក ហ៊ុយ យ៉ាឡេង ប្រាប់ ភ្នំពេញ ប៉ុស្តិ៍ កាលពីថ្ងៃសម្ពោធកុនកន្លងមកថា៖ «ទោះបីទីផ្សារក្រៅប្រទេសនៅអាមេរិក ឬក្រុងហុងកុង មិនទាន់អាចចេញបានស្រួលបួល ដូចកាលពីមុនមានវិបត្តិកូវីដ ១៩ មែនក្តី តែខ្ញុំនឹងខំរកវិធីដើម្បីនាំយកខ្សែភាពយន្តមួយនេះទៅប្រជែងទីផ្សារខាងក្រៅឱ្យបាន។ ដំបូងនេះ ខ្ញុំមានគម្រោងយកកុនយើងនេះ ទៅប្រកួតក្នុងទីផ្សារលក់កុននៃទីក្រុងប៊ូសាន ប្រទេសកូរ៉េខាងត្បូង នៅអំឡុងខែកញ្ញា និងខែតុលា ឆ្នាំ ២០២២»។
កុនរឿង «គ្រោះជីវិតកូវីដ ១៩» ដែលផលិតកអះអាងថា ចង់ឱ្យអ្នកទស្សនាអាចទទួលបានគំនិតបែបអប់រំទៅវិញ ប្រើក្នុងជីវិតផ្ទាល់ខ្លួន ក្រោយពីទស្សនាចប់នោះ នឹងត្រូវចាក់បញ្ចាំងនៅគ្រប់រោងភាពយន្តក្នុងប្រទេសកម្ពុជា នៅថ្ងៃទី ១៩ ឧសភា ២០២២ ខណៈការកាត់ខ្សែបូសម្ពោធត្រូវបានធ្វើឡើងតាំងពីថ្ងៃទី ១៦ ខែ ឧសភា ឆ្នាំ ២០២២ នៅរោងកុនលេជេន ផ្សារទំនើបអេដេនហ្គាដេន ក្រោយពីបានពន្យារពេលជិត ២ ឆ្នាំមកនោះ។
លោក ហ៊ុយ យ៉ាឡេង ប្រាប់ ភ្នំពេញ ប៉ុស្តិ៍ ពីមូលហេតុ និងដំណើរនៃការផលិតកុន ដែលចំណាយទុនសរុបចំនួន ៨ ម៉ឺនដុល្លារ (ចំណាយថត ៧ ម៉ឺនដុល្លារ និងចាយ ១ ម៉ឺនដុល្លារ ផ្នែកទីផ្សារផ្សព្វផ្សាយ) ថា៖ «មូលហេតុ ដែលខ្ញុំផលិតខ្សែភាពយន្តរឿង «គ្រោះជីវិតកូវីដ ១៩» នេះឡើងដោយសារជំងឺកូវីដ ១៩ ជាវិបត្តិសកលពិភពលោកបានជួបប្រទះនៅចុងឆ្នាំ ២០១៩ ដែលមនុស្សគ្រប់រូបគួរតែចងចាំ។ ម្យ៉ាងទៀត ការរៀបចំផលិតកុននេះ ដោយសារតែមានវិបត្តិកូវីដ ១៩ ហើយរោងកុននានាក៏ត្រូវបានបិទទ្វារទៀត។ កុននេះបានថត ២ ដំណាក់កាល គឺដំណាក់កាលទី១ ពេលបិទខ្ទប់ទីក្រុងឆ្នាំ ២០២១ និងដំណាក់កាលទី២ ថត នាពេលជំងឺកូវីដមានស្ថានភាពប្រសើរបន្តិច និងត្រូវគេអនុញ្ញាតឱ្យដើរហើរវិញនោះ។ សាច់រឿងថតចប់ត្រឹមពេលមានព្រឹត្តិការណ៍ឆ្លងសហគមន៍ធំ ដែលប្រើពេលថត ១ ខែ ហើយយើងក៏បានទុកពេលចោលជិត ២ ឆ្នាំ»។
រឿង «គ្រោះជីវិតកូវីដ ១៩» ក៏មានចំណុចពិសេស និងមានឧបសគ្គផងដែរ មុននឹងយកមកត្រៀមចាក់បញ្ចាំងតាមរោងកុន។ លោក ហ៊ុយ យ៉ាឡេង បានពន្យល់ថា៖ «ចំណុចពិសេសថ្មីនោះ គឺយើងមានការបញ្ចូលអក្សររត់ពីក្រោម ២ ភាសា (Chinese & English subtitles) ហើយក៏បញ្ចូលតួអង្គ ជាអ្នកវិនិយោគចិន ដែលកំពុងតែមករកស៊ីនៅស្រុកខ្មែរជាមួយតួប្រុសក្នុងរឿង។ ឯឧបសគ្គនៃការផលិតកុននេះវិញ កត្តាចម្បងនោះ គឺដោយសារវិបត្តិកូវីដ ១៩ រយៈពេល ២ ឆ្នាំនេះ សម្រាប់អ្នកមានមុខរបរជាអ្នកផលិតកុនដូចជារូបខ្ញុំ ដែលពុំមានមុខរបរផ្សេងក្រៅ គឺត្រូវខ្ចីលុយពីធនាគារ ដើម្បីបន្តផ្គត់ផ្គង់ជីវិតនៃការថតខ្សែភាពយន្តនេះ ឱ្យបានចប់ និងត្រៀមចាក់បញ្ចាំងក្រោយពេលស្ថានភាពប្រសើរ ឬរោងកុនបើកឡើងវិញ។ តែប្រសិនបើកុន មិនមានអ្នកគាំទ្រនោះ មានន័យថា ផលិតករនឹងត្រូវប្រឈមរឿងធំគឺផលិតកម្មយើងដួលតែម្តងដោយភាពក្ស័យធន»។
លោកក៏បានប្រាប់ពីស្ថានភាពនៃការសហការ ឬជួយពីស្ថាប័នរដ្ឋលើវិស័យភាពយន្តក្រៅប្រទេសដូចជាប្រទេសថៃ និងសិល្បៈ K-POP នៅឯប្រទេសកូរ៉េខាងត្បូង នោះផងដែរថា៖ «យ៉ាងណាយើងក៏អរគុណដែរ ដោយរាជរដ្ឋាភិបាលយើងបានបើកទូលាយឱ្យវិស័យថតកុន ១០០ ភាគរយ ដើម្បីឱ្យវិស័យនេះដើរទៅមុខ ខណៈវិស័យផលិតភាពយន្តខ្មែរក្នុងដំណាក់កាលនេះ ត្រូវការជំនួយពីខាងរាជរដ្ឋាភិបាល។ ដូចជាខ្ញុំបាននិយាយអ៊ីចឹងថា សម្រាប់វិស័យភាពយន្តនៅប្រទេសថៃ គេមានក្រសួង ៥ ដើម្បីជួយស្ទួយវិស័យភាពយន្តគេគឺក្រសួងព័ត៌មាន ក្រសួងអប់រំ ក្រសួងវប្បធម៌ ក្រសួងពាណិជ្ជកម្ម និងក្រសួងសេដ្ឋកិច្ច។ បើនៅប្រទេសកូរ៉េ រដ្ឋាភិបាលជួយវិស័យភាពយន្ត គេជួយផលិតករ ដោយគេជួយឱ្យលុយកម្ចីដែលមានការប្រាក់ទាប ឬពេលកុនផលិតហើយខាតនោះ គេជួយចេញថ្លៃខាតទៀតផង ដើម្បីធ្វើយ៉ាងណាឱ្យវិស័យភាពយន្ត ឬវិស័យសិល្បៈ K-POP របស់គេមានភាពរីកចម្រើន»៕