ភ្នំពេញ៖ នៅទីបំផុតរកឃើញបេក្ខជន និងបេក្ខនារី ដែលម្ចាស់តំណែងស្រីស្អាត និងប្រុសស្អាត នៃកម្មវិធីការប្រកួតប្រជែងរូបសម្រស់ និងទេពកោសល្យសិល្បៈមានឈ្មោះថា «ស្រីស្អាត និងប្រុសស្អាត-Freshie Girls & Boys» ដែលទើបបានប្តូរឈ្មោះជា «Freshie Girls & Boys Cambodia 2022» វិញ នៅជំនាន់ទី២១ សម្រាប់ឆ្នាំ ២០២២។
បើតាមសេចក្តីប្រកាសពីគេហទំព័រផ្លូវការ Freshie Girls & Boys Cambodia 2022 ដែលប្រកួតផ្តាច់ព្រ័ត្រកាលពីថ្ងៃទី ១៩ ខែ ឧសភា ឆ្នាំ ២០២២ កន្លងមកនេះ បានឱ្យដឹងថា៖ «យុវជនឈ្មោះ លី ដេវីដ អាយុ ១៩ ឆ្នាំ ជានិស្សិតរៀននៅសាកលវិទ្យាល័យភូមិន្ទភ្នំពេញមានស្លាកលេខសម្គាល់ B8 និងយុវតី ឈ្មោះ គុណ កន្និកា អាយុ ១៧ ឆ្នាំ ជាសិស្សរៀននៅសាលាប៊ែលធីអន្តរជាតិ មានស្លាកលេខសម្គាល់ G6 បានក្លាយជាជយលាភីនៃការប្រកួត Freshie Girls & Boys Cambodia 2022។ ចំណែកឯយុវតីឈ្មោះ មាស ចរិយា ដែលមានស្លាកលេខសម្គាល់ G13 និងយុវជន ជាតិ សុវណ្ណដា មានស្លាកលេខសម្គាល់ B5 បានជាប់ជាជយលាភីលេខ ២ រីឯយុវតីឈ្មោះ អ៊ូ បញ្ញាពេជ្រ មានស្លាកលេខសម្គាល់ G7 និងយុវជនឈ្មោះ ហេង សុងហៃ មានស្លាកលេខសម្គាល់ B1 ជាប់ជាជយលាភីលេខ ៣»។
កម្មវិធីប្រកួត Freshie Girls & Boys Cambodia 2022 គឺជាកម្មវិធីប្រកួតដើម្បីស្វែងរកបេក្ខភាពតំណាងកម្ពុជា ចូលរួមប្រកួតបន្តនៅក្នុងកម្មវិធីប្រកួត Freshie Girls & Boys ASEAN 2022 ដែលនឹងធ្វើឡើងជាលើកដំបូងនៅកម្ពុជានាចុងឆ្នាំ ២០២២ នេះដែលគឺជាការនាំយកយុវជន-យុវតី Freshie Girls & Boys នៃប្រទេសនីមួយៗ ក្នុងតំបន់អាស៊ាន មកប្រកួត។
គួររំឭកដែរថា កម្មវិធីប្រកួតជ្រើសរើសស្រីស្អាត និងប្រុសស្អាត ជំនាន់ទី២០ ប្រចាំឆ្នាំ ២០២១ ម្ចាស់ម្ចាស់ជយលាភីលេខ ១ ជាយុវតីមានស្លាកលេខ G5 ឈ្មោះ ទ្រី ស្រីនិច មកពីទីក្រុងភ្នំពេញឯយុវជនមានស្លាកលេខ B9 ឈ្មោះ ពៅ សៀវហ្វុង មកពីខេត្តត្បូងឃ្មុំ ជាប់ចំណាត់ថ្នាក់លេខ ១ ហើយលេខ ២ បានទៅយុវតីមានលេខសម្គាល់ G11 ឈ្មោះ សុខុម សុធាវី មកពីខេត្តកណ្តាល និង យុវជនមានលេខសម្គាល់ B11 ឈ្មោះ ប៊ែល ប៊ុនហ៊ាង មកពីភ្នំពេញជាប់លេខ ២៕