.jpg)
អង្គការ BSDA ស្ថិតក្នុងចំណោមអង្គការទទួលការបរិច្ចាគពីហ្គេម WordsBy2។ រូបថត សហការី
ភ្នំពេញៈ ឱកាសក្នុងការលេងហ្គេមកម្សាន្ត ឈ្នះរង្វាន់លើកទឹកចិត្ត និងអាចជួយអ្នកដទៃ ជាកម្មវិធីមួយប្លែកបង្កើតឡើងដោយក្រុមហ៊ុនបច្ចេកវិទ្យា និងការអប់រំ Apptessence ដែលមានស្ថាបនិកជាជនជាតិកាណាដា លោក ដេន ដូណាល់សាន់។ លោកទើបបានបញ្ចប់ការសាកល្បងក្រកួតហ្គេមកាលពីថ្ងៃទី ៧ ខែ ឧសភា ឆ្នាំ ២០២២ និងទទួលបានលទ្ធផលល្អលើសការរំពឹងទុក ដោយអាចប្រមូលប្រាក់ពីអ្នកចូលរួមលេងហ្គេមបរិច្ចាគទៅអង្គការចំនួន ៤ ដែលផ្ដោតលើការសិក្សារបស់កុមារ។
លោក ដូណាល់សាន់ ប្រាប់ ភ្នំពេញ ប៉ុស្តិ៍ថា៖ «តាមរយៈឈ្មោះ អ្នកអាចដឹងហើយថា យើងធ្វើទាក់ទងទៅនឹងបច្ចេកវិទ្យា និងការអប់រំ ជាពិសេសសម្រាប់អ្នកដែលមានឱកាសទាបក្នុងការទទួលបានការអប់រំ ឬសហគមន៍ប្រទេសសេដ្ឋកិច្ចកំពុងអភិវឌ្ឍន៍»។
ចូលរួមបរិច្ចាគនេះ គឺធ្វើឡើងដោយអ្នកលេងត្រូវចំណាយ ១០ ដុល្លារ ក្នុងការលេងប៉ុន្មានដងតាមចិត្តចង់ រហូតដល់ពេលកំណត់នៃការប្រកួតរយៈពេល ៣៦ ម៉ោង ដើម្បីឱ្យអ្នកចំណូលថ្មី អាចសាកល្បងលេង ដោយមិនចាំបាច់ត្រូវបង់ប្រាក់ច្រើន។
ប៉ុន្តែ ទៅថ្ងៃអនាគតស្ថាបនិកដែលស្វ័យសិក្សាបច្ចេកវិទ្យាខ្លួនឯងរូបនេះថា ក្រុមហ៊ុននឹងកំណត់ចំនួនដងនៃការលេងហ្គេម ដើម្បីបើកផ្លូវរកចំណូលបន្ថែមជូនទៅដល់អង្គការ។
បច្ចុប្បន្ន លោកថា អ្នកលេងអាចទាញយកកម្មវិធីពី Apple Store។
លោក ដេន ដូណាល់សាន់ ជនជាតិកាណាដា និងស្ថាបនិក Apptessence។ រូបថត សហការី
លោកនិយាយថា៖ «ក្រុមយើងមានគ្នាតិច មិនទាន់មានសមត្ថភាពអាចអភិវឌ្ឍទៅលើប្រព័ន្ធច្រើនទេ។ តែទៅថ្ងៃអនាគត បើមានអ្នកបង្កើតកម្មវិធីខាង Android ចាប់អារម្មណ៍ក្នុងភាពជាដៃគូ យើងក៏រីករាយ»។
ហ្គេមដែលលេងនេះភាគច្រើន គឺជាហ្គេមទាក់ទងនឹងការទាយពាក្យ ការផ្គុំពាក្យ ដែលលោកបានអភិវឌ្ឍពីបទពិសោធលេងលើរូបរាងពិតប្រាកដជាង ២០ ឆ្នាំមុន។ ល្បែង «ក្រ័រស៍» (Crosses Game) ក៏កំពុងស្ថិតក្នុងគម្រោងអភិវឌ្ឍន៍បន្ថែមផងដែរ។
លោកបន្ថែមថា៖ «បច្ចុប្បន្ន ខ្ញុំកំពុងអាប់ដេត សូហ្វវែរបន្ថែមក្រោយពីទទួលបានបទពិសោធបន្ទាប់ពីសាកល្បង។ មិនលើសពី ២ អាទិត្យ វានឹងរួចរាល់។ បន្ទាប់ពីនោះ យើងនឹងរៀបចំឱ្យមានការប្រកួតជាបន្តបន្ទាប់ ដោយកំណត់ចំនួនរយៈពេល ២ ថ្ងៃ និងរង្វាន់ ២០០ ដុល្លារ សម្រាប់អ្នកឈ្នះ។ បន្ទាប់ពីពេលវាដំណើរការស្រួលបួលហើយ យើងនឹងបើកសម្រាប់អ្នក ដែលចង់រៀបចំការប្រកួតដើម្បីគោលបំណងផ្សេងៗ»។
លោក ដូណាល់សាន់ ឱ្យដឹងដែរថា Apptessence បង្កើតឡើងក្នុងឆ្នាំ ២០១៨ និងចាប់ផ្ដើមបង្កើតសូហ្វវែរនៅចុងឆ្នាំ ២០២០។ ទើបតែនៅថ្ងៃទី ៧ ខែឧសភានេះទេ ដែលមានការប្រកួតសាកល្បងជាផ្លូវការក្នុងការរៃអង្គាសប្រាក់ជួយដល់អង្គការ។
ត្រឹម ៣៦ ម៉ោង ក្រុមហ៊ុនទទួលបានប្រាក់ ៥៥០ ដុល្លារ លោកក៏សម្រេចចិត្តបរិច្ចាគទៅអង្គការចំនួន ៤ នៅកម្ពុជា និងថៃមានអង្គការ សកម្មភាពព្រះពុទ្ធសាសនាដើម្បីអភិវឌ្ឍសង្គម អង្គការ KAPE នៅខេត្តកំពង់ចាម អង្គការកុមារកំព្រា Baan Jing Jia និងអង្គការបាងកកប៉ុស្ដិ៍ ដោយលោកយល់ដឹងពីភាពសំខាន់នៃតួនាទីអង្គការតូចៗធ្វើចំពោះសហគមន៍។
សមាជិកក្រុម Khim និង Stella សាកល្បងហ្គេមមុនការប្រកួត។ រូបថត សហការី
លោកបន្ថែមថា៖ «មនុស្សភាគច្រើនផ្ដោតលើអង្គការធំៗដូចជា Oxfam Unicef ឬ World Vision តែពួកគេមិនបានមើលមកអង្គការតូចៗ ដែលព្យាយាមធ្វើដើម្បីភាពផ្លាស់ប្ដូរ។ យើងចង់ផ្ដោតលើការអប់រំអំពីការបង្កើតកម្មវិធី ឬការអភិវឌ្ឍហ្គេមដែលអាចនាំទៅរកឱកាសការងារល្អ»។
លោកបញ្ជាក់ថា៖ «អង្គការនឹងជាអ្វីដែលយើងនឹងជួយរហូតទៅ តែគម្រោងយើងធំបំផុត គឺពង្រីកវិស័យបង្កើតហ្គេមនៅអាស៊ីអាគ្នេយ៍»។
លោកបានបញ្ចប់ដែរថា៖ «ខ្ញុំមិនគិតថាគម្រោងនេះនឹងកើតឡើងទេ ប្រសិនបើខ្ញុំមិនមានសំណាងជាប់ក្នុងប្រទេសកម្ពុជា អំឡុងពេលមានជំងឺរាតត្បាត។ ខ្ញុំមានអារម្មណ៍មួយថា ចង់តបស្នងដល់ប្រទេសនេះ។ វាជាពេលវេលាដ៏អស្ចារ្យមួយក្នុងជីវិតរបស់ខ្ញុំ ទោះបីជាពេលខ្លះលំបាក តែខ្ញុំយល់ថា វារឹតតែលំបាកខ្លាំងសម្រាប់អង្គការក្នុងពេលនោះ ដូច្នេះ ខ្ញុំរីករាយដែលប្រទេសនេះជាផ្ទះ និងជាម្តាយ សម្រាប់គម្រោង WordsBy2 និងក្រុមហ៊ុន Apptessence»។
ព័ត៌មានបន្ថែមសូមចូលទៅទំព័រហ្វេសប៊ុក Apptessence តាមរយៈ ឈ្មោះ @Wordsby2 គណនីធ្វីតធើរ @apptessence និងវេបសាយ http://www.apptessence.com/howTo៕
លោក ដេន ដូណាល់សាន់ និងនាយិកាប្រតិបត្តិ BSDA ឆុន ស្រស់។ រូប សហការី
