.jpg)
សន្និសីទសារព័ត៌មានមហោស្រពភាពយន្តអន្តរជាតិកម្ពុជា (CIFF) លើកទី១១ កាលពីថ្ងៃទី ២៥ ខែ ឧសភា ឆ្នាំ ២០២២។ សហការី
ភ្នំពេញ៖ រោងភាពយន្តប្រមាណជាង ១០ កន្លែង មានទីតាំងក្នុងរាជធានីភ្នំពេញ នឹងត្រៀមចាំការចាក់បញ្ចាំងខ្សែភាពយន្តទាំងឡាយ ដែលជាវណ្ណកម្មរបស់ផលិតករខ្មែរ និងបរទេស នាឱកាសប្រារព្ធកម្មវិធីមហោស្រពភាពយន្តអន្តរជាតិកម្ពុជា (CIFF) លើកទី១១ សម្រាប់ឆ្នាំ ២០២២ ក្រោយពីកម្មវិធីនេះ បានខកខានអស់រយៈពេល ២ ឆ្នាំ ដោយសារជំងឺកូវីដ ១៩។
ដើម្បីនាំយកមហោស្រពភាពយន្តមកបង្ហាញជូនទស្សនិកជនឡើងវិញឆ្នាំ ២០២២ នេះសម្រាប់កម្មវិធីមហោស្រពភាពយន្តអន្តរជាតិកម្ពុជា (CIFF) នឹងទទួលបានការគាំទ្រពីអង្គការយូណេស្កូ ស្ថានទូតអូស្រ្តាលី និងបន្តលើកទឹកចិត្តពីខាងក្រសួងទេសចរណ៍ ក្រសួងព័ត៌មាន និងក្រសួងអប់រំ យុវជន និងកីឡា។
មហោស្រពភាពយន្តអន្តរជាតិកម្ពុជា CIFF លើកទី១១ នេះ នឹងប្រព្រឹត្តទៅនៅតាមរោងភាពយន្ត ជាច្រើនជាង ១០ ទីតាំង នៅក្នុងរាជធានីភ្នំពេញ រួមមាន សាលសន្និសីទចតុមុខ រោងភាពយន្ត Major Cineplex រោងភាពយន្ត Legend Cinema សណ្ឋាគារ Rosewood មជ្ឈមណ្ឌលបុប្ផាណា វិទ្យាស្ថានបារាំង ហាងកាហ្វេ Java Creative និង Factory Phnom Penh ដែលនឹងចាប់ផ្ដើមពីថ្ងៃទី២៨ ខែមិថុនា ដល់ថ្ងៃទី៣ ខែកក្កដា ឆ្នាំ ២០២២។
លោក Cedric Eloy នាយកកម្មវិធី CIFF បានលើកឡើងនាឱកាសធ្វើសន្និសីទសារព័ត៌មានសម្រាប់បើកកម្មវិធីមហោស្រពភាពយន្តអន្តរជាតិកម្ពុជាលើកទី១១ ឡើងវិញ កាលពីថ្ងៃទី ២៥ ខែ ឧសភា ឆ្នាំ ២០២២ នេះថា៖ «២ ឆ្នាំចុងក្រោយនេះ គឺជាពេលវេលាមួយដ៏លំបាកចំពោះវិស័យទាំងឡាយ ដែលធ្វើការពាក់ព័ន្ធ នឹងការច្នៃប្រឌិត ទាំងសិល្បករ និងស្ថាប័នវប្បធម៌។ ដូច្នេះយើងចង់ថ្លែងអំណរគុណចំពោះទាំងអស់គ្នា និងចង់ឱ្យមានការគាំទ្រទាំងអស់គ្នា។ ថ្ងៃនេះគឺជាក្ដីសង្ឃឹមរបស់ពួកយើង និងជាក្ដីសោមនស្សធំបំផុតដែល CIFF នឹងនាំកម្លាំងនៃក្រុមច្នៃប្រឌិតទាំងអស់ឱ្យមកជួបជុំគ្នាជាថ្មី ហើយនាំមកនូវភាពសប្បាយរីករាយនៃការទស្សនាភាពយន្តនៅលើផ្ទាំងសំពត់សម្ដងទៀត។ ឆ្នាំទី១១ នេះ នឹងដើរតួសំខាន់មួយក្នុងការបញ្ឆេះម៉ាស៊ីន របស់ឧស្សាហកម្មភាពយន្តជាថ្មីម្ដងទៀត»។
លោក ជា សុភាព នាយកមជ្ឈមណ្ឌលធនធានសោតទស្សន៍បុប្ផាណា ផ្ដល់បទសម្ភាសពីមហោស្រពភាពយន្តអន្តរជាតិកម្ពុជា។ សហការី
លោកក៏បានរំឭកពីប្រវត្តិនៃការរៀបចំ កម្មវិធីមហោស្រពភាពយន្តអន្តរជាតិកម្ពុជា (CIFF) ដែរថា៖ «CIFFចាប់កំណើតឡើងកាលពី ១២ ឆ្នាំមុនគឺនៅពេល ដែលឧស្សាហកម្មភាពយន្ត ទើបតែនឹងចាប់ផ្ដើមជាមួយនឹងការបង្កើតមជ្ឈមណ្ឌលបុប្ផាណា ដែលជាអង្គការភាពយន្តតែ ១ គត់ នៅកម្ពុជា និងការបង្កើតមជ្ឈមណ្ឌលបណ្ដុះបណ្ដាលជំនាញ និងការទទួលថតភាពយន្តបរទេស នៅកម្ពុជា (CFC)។ នេះជាចំណុចចាប់ផ្ដើម ដែលនាំឱ្យមានការបើករោងភាពយន្តទំនើបៗ ការបំផុសយុវជនកម្ពុជារាប់រយនាក់ ឱ្យចូលរួមក្នុងវិស័យភាពយន្ត និងផ្ដល់ឥទ្ធិពលដោយផ្ទាល់ ក្នុងការទាក់ទាញក្រុមថតភាពយន្តបរទេសមកកម្ពុជា»។
លោក ជា សុភាព នាយកមជ្ឈមណ្ឌលបុប្ផាណា មានប្រសាសន៍ថា៖ «ការរាតត្បាតនៃជំងឺកូវីដ១៩ បានប៉ះពាល់យ៉ាងខ្លាំង ដល់វិស័យភាពយន្តនៅកម្ពុជា ក៏ដូចជាទូទាំងពិភពលោកផងដែរ។ នៅកម្ពុជា សកម្មភាពវប្បធម៌ និងភាពយន្តត្រូវបានបិទហើយបន្ទាប់មកត្រូវបានរឹតត្បិតអស់ពេលជិត ២ ឆ្នាំ។ ដូច្នេះយើងពិតជារីករាយណាស់ ដែលអាចនាំយកព្រឹត្តិការណ៍ភាពយន្តដ៏ធំបំផុតមួយនេះនៅកម្ពុជា មកបង្ហាញឡើងវិញនៅឆ្នាំនេះ»។
នៅខែមិថុនា ឆ្នាំ២០២២ ខាងមុខនេះ រោងភាពយន្តនៅកម្ពុជា ត្រូវបានអនុញ្ញាតឱ្យបើកទ្វារឡើងវិញបន្ទាប់ពីការបិទអស់ ២ ឆ្នាំ ដោយអាចឱ្យទទួល អ្នកទស្សនាតែ ៥០% ប៉ុណ្ណោះនៃចំនួនកៅអីក្នុងរោងភាពយន្ត។ ប៉ុន្តែបន្ទាប់ពីមានកិច្ចប្រឹងប្រែងពីរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងជំងឺកូវីដ ១៩ នៅដើមខែឧសភា សំណើសុំរបស់ក្រសួងវប្បធម៌ និងវិចិត្រសិល្បៈ ដើម្បីឱ្យរោងភាពយន្ត អាចដំណើរការទទួលទស្សនិកជនបាន ១០០% ដូចធម្មតាឡើងវិញត្រូវបានរាជរដ្ឋាភិបាលកម្ពុជាអនុម័តយល់ព្រម។
លោក Cedric Eloy បានកត់សម្គាល់ថា៖ «ការរៀបចំ CIFF តែងតែមានឧបសគ្គ ត្រូវជម្នះជានិច្ច ហើយមិនអាចទៅរួចទេ ប្រសិនបើគ្មានការគាំទ្រ និងការស្រឡាញ់របស់ក្រុមការងារ ដៃគូសហការ មិត្តភក្តិ និងស្ថាប័នទាំងឡាយ ដែលបានផ្ដល់កម្លាំងចិត្តដល់ពួកយើង តាមរយៈការគាំទ្រការជួយ និងការណែនាំផ្សេងៗ ដើម្បីបង្កើតព្រឹត្តិការណ៍ ដ៏ពិសេសមួយនេះ សម្រាប់ប្រទេសកម្ពុជា និងប្រជាជនកម្ពុជា ហើយកម្មវិធី CIFF កាន់តែពេញនិយមឡើងៗ ពីមួយឆ្នាំទៅមួយឆ្នាំ ប៉ុន្តែយើងនៅតែត្រូវការកិច្ចគាំទ្របន្ថែម ខណៈពេលកម្មវិធីនេះ កាន់តែរីកធំឡើងៗ។ អាស្រ័យហេតុនេះ យើងអំពាវនាវដល់បណ្ដាក្រុមហ៊ុន ស្ថាប័នមូលនិធិផ្សេងៗ ដែលចាប់អារម្មណ៍ចូលរួមចំណែក ជួយពួកយើងធ្វើឱ្យ CIFF អាចវិលមកវិញបាននៅឆ្នាំនេះ»។
អ្វីកាន់តែមានភាពអស្ចារ្យក្នុងកម្មវិធីមហោស្រពភាពយន្តអន្តរជាតិកម្ពុជា ឆ្នាំ ២០២២ នេះគឺ នៅលើផ្ទាំងផ្សព្វផ្សាយកម្មវិធី CIFF លើកទី១១ ឆ្នាំនេះ គឺគេបានយកតាមផ្ទាំងគំនូរដើមរបស់វិចិត្រករស្ត្រី មកពីខេត្តបាត់ដំបង អ្នកស្រី ខ្ចៅ ទូច មានចំណងជើងថា «JUST BORN»៕
លោក Cedric Eloy (ឆ្វេង) នាយកកម្មវិធី CIFF ក្នុងសន្និសីទសារព័ត៌មានកម្មវិធីមហោស្រពភាពយន្តអន្តរជាតិកម្ពុជា។ សហការី
