.jpg)
ដំបូលព្រះវិហារវត្តពោធិរោង ដែលកំពុងវាយយកការ៉ូចេញ ដើម្បីប្រក់ក្បឿងវិញម្តង ក្រោមការផ្តួចផ្តើមរបស់ព្រះតេជគុណ នួន ចន្ទតារា។ រូបថត ឈន ណន
ភ្នំពេញ៖ ព្រះតេជគុណញាណនីបកោ នួន ចន្ទតារា ព្រះចៅអធិការវត្តមង្គលវ័ន នៅសហរដ្ឋអាមេរិក បានផ្តួចផ្តើមគំនិតរៀបចំពិធីបុណ្យផ្កាប្រាក់សាមគ្គី ដើម្បីកៀរគរថវិកាពីពុទ្ធបរិស័ទទាំងក្នុងស្រុក និងក្រៅស្រុកសម្រាប់ជួលជុលដំបូលព្រះវិហារនៅវត្តពោធិរោងស្ថិតនៅភូមពោធិរោង ឃុំព្រះបាទជាន់ជុំស្រុកគិរីវង់ ខេត្តតាកែវ ដែលជាកន្លែងព្រះអង្គបានបួសរៀន តាំងពីឆ្នាំ ១៩៩៥ ដោយព្រះតេជគុណមានសង្ឃដីកាថា ការជួសជុលនេះ ត្រូវធ្វើឡើងជា ៣ ដំណាក់កាល ដោយគ្រោងចំណាយថវិកាជាង ២០ ម៉ឺនដុល្លារអាមេរិក។
ដោយមានស្រុកកំណើត នៅភូមិពោធិរោង ឃុំព្រះបាទជាន់ជុំ ស្រុកគិរីវង់ ខេត្តតាកែវ យុវជនដែលចូលចិត្តដើរលេងសប្បាយ នួន ចន្ទតារា បានសម្រេចចូលសាងផ្នួសជាសាមណេ នៅវត្តពោធិគិរីវង្សា ហៅវត្តពោធិរោង នៅថ្ងៃទី ១២ ខែវិច្ឆិកាឆ្នាំ ១៩៩៥ ក្នុងជន្មាយុ ១៧ ឆ្នាំ និងបានបំពេញឧបសម្បទាចារ្យ នៅថ្ងៃទី ៧ ខែមេសា ឆ្នាំ ១៩៩៩ ហើយមាននាមប្បញ្ញត្តិថា ជាញាណទិកោ នួន ចន្ទតារា បន្ទាប់ពីព្រះអង្គ បានទៅសិក្សាបន្ថែម នៅវត្តកល្លកព្រឹក្សជង្រុក ខេត្តកំពង់ស្ពឺ ក្នុងឆ្នាំ ១៩៩៦ ព្រមទាំងវត្តអង្គចង្អរ ខេត្តតាកែវ នៅឆ្នាំ ១៩៩៨ និងវត្តបល្ល័ង្ក ខេត្តបាត់ដំបង ក្នុងឆ្នាំ ១៩៩៨។
បន្ទាប់ពីទទួលបាននាមប្បញ្ញត្តិថា ជាញាណទិកោ នួន ចន្ទតារា ស្ថិតនៅភូមិរោងឃុំព្រះបាទជាន់ជុំនេះហើយ ព្រះអង្គ បាននិមន្តចាកចេញពីស្រុកកំណើត ដើម្បីទៅសិក្សាបន្តនៅរាជធានីភ្នំពេញ ដោយគង់នៅ វត្តនន្ទមុនី រហូតដល់ឆ្នាំ ២០០០ រួចបន្តទៅគង់នៅវត្តប្រជុំសារនគរខ្សុំ នៅកៀនស្វាយ ក្នុងឆ្នាំ ២០០១ មុនពេលព្រះតេជគុណ វិលមកគង់នៅវត្តលង្កា ហើយនៅថ្ងៃទី ១៣ ខែកញ្ញាឆ្នាំ ២០១១ ព្រះអង្គ នួន ចន្ទតារា បាននិមន្តទៅសហរដ្ឋអាមេរិក និងគង់នៅវត្តមង្គលវ័ន ព្រមទាំងទទួលបានសិទ្ធិគ្រប់គ្រងវត្តនេះ ក្នុងនាមជាព្រះចៅអធិការវត្តមង្គលវ័ន រហូតមកដល់បច្ចុប្បន្ននេះ។
បើទោះបីជាព្រះអង្គ នួន ចន្ទតារា មានវាសនា បានទៅគង់នៅវត្តមង្គលវ័ន លើទឹកដីដ៏ស្តុកស្តម្ភ នៃសហរដ្ឋអាមេរិក ប៉ុន្តែព្រះតេជគុណ នៅតែចងចាំមិនភ្លេច នៅគំនិតចង់ផ្លាស់ប្តូរដំបូលព្រះវិហារវត្តពោធិគិរីវង្សា ហៅវត្តពោធិរោង ដែលត្រូវបានកសាងឡើង តាំងពីឆ្នាំ១៩៨៣ នៅស្រុកកំណើតមួយនេះ ដើម្បីឱ្យស្របទៅតាមវិន័យ និងក្រឹត្យក្រម នៃព្រះពុទ្ធសាសនា។
ព្រះតេជគុណ នួន ចន្ទតារា បានសង្ឃដីកាថា៖ «ខ្ញុំព្រះករុណាអាត្មាភាព មានគំនិតចង់ផ្លាស់ប្តូរដំបូលព្រះវិហារនេះ តាំងពីនៅបួសជាសាមណេម្ល៉េះ ព្រោះបើយើងគិតទៅលើវិន័យ និងតាមក្រឹត្យក្រម គេមិនយកការ៉ូ ដែលគេដើរជាន់ ទៅប្រក់ធ្វើជាដំបូលព្រះវិហារនោះទេ គឺជារឿងមួយ ដែលមិនត្រូវ អ៊ីចឹងទើបអាត្មា មានឆន្ទៈតាំងពីបួសហើយ រហូតមកដល់បច្ចុប្បន្ន ហើយឥឡូវនេះ ក៏មានឱកាសប្រមូលចាស់ទុំ ពុទ្ធបរិស័ទ និងព្រះសង្ឃគង់នៅវត្តនេះ ដើម្បីមកធ្វើការងារនេះ ដោយយើងបានសុំច្បាប់គ្រប់គ្រាន់ ទៅកាន់អាជ្ញាធរ ព្រមទាំងក្រសួងធម្មការ និងសាសនា ដើម្បីធ្វើដំបូលព្រះវិហារនេះ»។
ជាមួយទឹកចិត្តចង់ចូលរួមចំណែកជួយអភិវឌ្ឍព្រះវិហារ នៅស្រុកកំណើត ដែលជាកន្លែងព្រះអង្គបានបួសរៀននេះ ព្រះតេជគុណញាណទិកោ នួន ចន្ទតារា បានផ្តួចផ្តើមគំនិតរៀបចំពិធីបុណ្យផ្កាប្រាក់សាមគ្គី កាលពីថ្ងៃទី ២២-២៣ ខែឧសភា ឆ្នាំ២០២២ ដើម្បីកៀរគរថវិកា សម្រាប់ជួសជុលដំបូលព្រះវិហារវត្តពោធិរោងនេះ ដែលប្រក់ពីការ៉ូ ទៅជាប្រក់ក្បឿងវិញ ហើយពិធីនេះមានការចូលរួមពីពុទ្ធបរិស័ទជិតឆ្ងាយជាច្រើន ព្រមទាំងអ្នកមកពីភ្នំពេញ ផងដែរ។
ព្រះតេជគុណ នួន ចន្ទតារា បានសង្ឃដីកាបន្ថែមថា៖ «ក្នុងនាមអាត្មាជាព្រះសង្ឃ បានប្រមូលអ្នកភូមិស្រុក ជាពិសេសកូនចៅលោកតានុប និងយាយមុំ ព្រោះនៅក្នុងស្រុកគិរីវង់ ជាពិសេសនៅភូមិពោធិរោង ភូមិជ្រោយ និងភូមិព្រៃធំ គឺសុទ្ធតែជាកូនចៅរបស់គាត់ទាំងអស់ អ៊ីចឹងហើយពួកគាត់ មានភាពសស្រោកសស្រាំ ក្នុងការចូលរួម ដូចជានៅថ្ងៃបុណ្យផ្កានេះជាដើម យើងមានអង្គផ្កាមកពីសហរដ្ឋអាមេរិកផង អូស្រ្តាលីផង ភ្នំពេញផង ព្រមទាំងពុទ្ធបរិស័ទចំណុះជើងវត្តផង និងមកពីគ្រប់ទិសទីផ្សេងៗទៀត»។
យ៉ាងណាក៏ដោយ ថវិកា ដែលទទួលបានតាមរយៈពិធីបុណ្យផ្កាប្រាក់សាមគ្គីនេះ នៅមិនទាន់គ្រប់គ្រាន់នៅឡើយទេ ព្រោះព្រះតេជគុណ នួន ចន្ទតារា បានគូសបញ្ជាក់ថា ការជួលជុលព្រះវិហារខាងលើនេះ ត្រូវធ្វើឡើងជា៣ដំណាក់កាល ដោយគ្រោងចំណាយថវិកាសរុបជាង២០ម៉ឺនដុល្លារអាមេរិក ហើយថវិកាទាំងនេះ នឹងត្រូវចំណាយទៅលើការជួសជុលដំបូលព្រះវិហារ ដែលមាន៧០២ម៉ែត្រការ៉េ ដោយ១ម៉ែត្រការ៉េតម្លៃ៨០ដុល្លារ, ការលើកកម្ពស់ជញ្ជាំងព្រះវិហារពីឥដ្ឋ ១០ ទៅឥដ្ឋ ២០ ដើម្បីឱ្យកាន់តែមានភាពរឹងមាំ និងមានអាយុកាលបានយូរ ព្រមទាំងការលាបថ្នាំ និងការរៀបចំហេដ្ឋារចនាសម្ព័ន្ធ នៅខាងក្រៅព្រះវិហារ និងថ្លៃជាងផងដែរ គឺអ្វីៗត្រូវរុះរើនឹងធ្វើថ្មីវិញទាំងអស់។
ជាមួយការខ្វះខាត នៅចំពោះមុខនេះព្រះអង្គ នួន ចន្ទតារា បានសង្ឃដីកាថា៖ «ដើម្បីធ្វើឱ្យវត្តរបស់យើង មានភាពរីកចម្រើន និងរុងរឿងបាន មិនមែនតែអាត្មាភាពអង្គឯង ធ្វើបាននោះទេ គឺចាស់ទុំទាំងអស់គ្នា និងបងប្អូនទាំងអស់គ្នា ដែលធ្លាប់បានរៀនសូត្រនៅទីនេះ ហើយបានចាកចេញទៅរស់ឆ្ងាយ ទាំងនៅភ្នំពេញក្តី និងក្រៅស្រុកក្តី ត្រូវចូលរួមសាមគ្គីគ្នា ព្រោះឱ្យតែមានការសាមគ្គីគ្នាជាកម្លាំងហើយ យើងធ្វើអ្វីក៏បានសម្រេចដែរ»។
យ៉ាងណាក៏ដោយ ព្រះតេជគុណ នួន ចន្ទតារា ក៏បានសុំបិណ្ឌបាត ទៅដល់ពុទ្ធបរិស័ទជិតឆ្ងាយ ទាំងអ្នករស់នៅក្នុងស្រុក និងក្រៅប្រទេស ឱ្យចូលរួមជាបច្ច័យ ទៅតាមសទ្ធា ជាថវិកាក្តី ចូលការ៉េក្តី និងសម្ភារក្តី ដើម្បីទទួលបានអានិសង្ស ទៅជាតិក្រោយ ព្រោះការចូលរួមកសាង ឬជួសជុលព្រះវិហារនេះ ទទួលបានបុណ្យកុសលណាស់។
ព្រះតេជគុណ នួន ចន្ទតារា បានបញ្ជាក់៖ «អ្នកដែលធ្វើបុណ្យកុសល ក្នុងព្រះពុទ្ធសាសនា ជាពិសេសបុណ្យផ្កានេះ បានបុណ្យកុសលណាស់ គឺយើងសន្សំទ្រព្យសម្បត្តិទុកសម្រាប់អតីតជាតិផង។ បើនិយាយពីបុណ្យ គឺទី១ បានពណ៌សម្បុរស្អាតអាយុយឺនយូរកើតជាងណាៗ សម្បូរទ្រព្យជាស្តេចចក្រ ៥០០ ជាតិ និងកើតរហូត ដល់សម្រេចព្រះអរហន្តទៅខាងមុខ អ៊ីចឹងបុណ្យផ្កានេះ បើយើងធ្វើប្រកបដោយគុណភាព និងឃើញទិដ្ឋភាពកំពុងជួសជុលបែបនេះ ពិតណាស់ថា ពុទ្ធបុរិស័ទជិតឆ្ងាយទាំងនៅក្នុងស្រុកក្រៅស្រុក និងអ្នកនៅភ្នំពេញជាដើម ប្រាកដជាពួកគាត់ ចូលរួមមគ្គផលទៅតាមសទ្ធារៀងៗខ្លួនជាមិនខានឡើយ»។
ជាមួយគ្នានេះលោកតា ខេង និងលោកតា អ៊ាន ក្នុងនាមជាគណៈកម្មការអាចារ្យវត្ត និងក្នុងនាមប្រជាពលរដ្ឋ ព្រមទាំងពុទ្ធបរិស័ទចំណុះជើងវត្ត បានបង្ហាញការសាទរយ៉ាងខ្លាំង ចំពោះព្រះតេជគុណ នួន ចន្ទតារា ដែលបានផ្តួចផ្តើមគំនិត ក្នុងការកៀរគរថវិកា សម្រាប់ជួសជុលដំបូលព្រះវិហារនេះ ហើយលោកតាទាំង២ បានប្តេជ្ញាថា នឹងចូលរួមយ៉ាងសស្រោកសស្រាំជាមួយព្រះតេជគុណ ក្នុងការកៀរគរទុនសម្រាប់ជួសជុលព្រះវិហារនេះ។
ទន្ទឹមនឹងនេះ លោកតា ក៏បានស្នើឱ្យព្រះសង្ឃគ្រប់ព្រះអង្គ និងពុទ្ធបរិស័ទជិតឆ្ងាយ ចូលរួមសហការក្នុងការងារនេះផងដែរ ដើម្បីទទួលបានអានិសង្សរៀងៗខ្លួន ក៏ដូចជារួមចំណែក ក្នុងការលើកកម្ពស់ព្រះពុទ្ធសាសនា ព្រោះព្រះវិហារ និងវត្តអារាម ជាទីស្នាក់អាស្រ័យរបស់ព្រះសង្ឃ ដែលមិនអាចខ្វះបាន៕
