​ចម្រាញ់​​ពី​​ការ​សម្ភាស ​៥ ០០០​ បេក្ខភាព​ អ្នកអង្គម្ចាស់ នរោត្តម រស្មីខែមមុន្នី គ្រង​តំណែង​តួ​សម្តែង​ភាពយន្តតន្ត្រី​នៅ​ហូលីវូដ​ ​

អ្នកអង្គម្ចាស់ នរោត្តម រស្មីខែមមុន្នី ព្រះជន្ម ២៤ វស្សា នឹងសម្ដែងក្នុងភាពយន្តតន្ត្រី 1660 Vine។ Facebook/muninorodom

ភ្នំពេញ៖ សម្រិតសម្រាំងពីការសម្ភាសបេក្ខភាពប្រមាណ ៥ ០០០ នាក់ អ្នកអង្គម្ចាស់ នរោត្តម ខែមមុនី សមាជិកនៃព្រះរាជវង្សានុវង្សកម្ពុជា នឹងចូលសម្តែងនៅក្នុងគម្រោងភាពយន្ត 1660 Vineប្រភេទភាពយន្តតន្ត្រីនៅហូលីវូដនាពេលខាងមុខ។

ជាមួយតំណែងតួអង្គភាពយន្តតន្ត្រីនេះ អ្នកអង្គម្ចាស់ព្រះជន្ម ២៤ វស្សារូបនេះ បានសរសេរថា លើបណ្ដាញសង្គមជាភាសាអង់គ្លេសដែលសម្រួលជាខ្មែរថា៖ «អា...នេះពិតជាគួរឱ្យរំភើបខ្លាំងណាស់។ ខ្ញុំពិតជាមានអារម្មណ៍ដូចអណ្ដែតហោះហើរ និងជាកិត្តិយសណាស់ ។ នេះគឺជាតួអង្គដ៏គួរឱ្យរីករាយ។ វានឹងក្លាយជាក្ដីសុបិនដ៏ពិតៗមួយ!»។

ភាពយន្តតន្ត្រីថ្មីនេះនឹងមានការចូលរួមពីតារាចម្រៀង Pia Toscano ពីការប្រកួតAmerican Idol''s តារា TikTok លោក Chris Olsen និងអ្នកអង្គម្ចាស់ នរោត្តម ខែមមុន្នី សមាជិកនៃព្រះរាជវង្សានុវង្សកម្ពុជា នេះបើយោងតាមវេបសាយ broadwayworld.com។

អ្នកដឹកនាំរឿង Patricia McGregor បាននិយាយថា៖ «1660 Vine ជាភាពយន្តតន្ត្រីពោរពេញដោយភាពរីករាយ និងរំលេចនូវសំណួរស៊ីជម្រៅពីអត្ថន័យនៃ «ការពិត» នៃយុគសម័យបណ្ដាញសង្គម»។

អ្នកនាងបានបញ្ជាក់ទៀតថា៖ «តួអង្គដ៏ពោរពេញដោយថាមពលរបស់យើងត្រូវបានជ្រើសរើសពីការសម្ភាសចំនួន ៥០០០នាក់ ហើយពួកគេនឹងធ្វើឱ្យភាពយន្តរស់រវើកតាមរយៈការរំលេចនូវគុណសម្បត្តិ និងគុណវិបត្តិនៃការតស៊ូសម្រេចក្ដីសុបិនរបស់ពួកគេ នៅក្នុងសាច់រឿងដែលទទួលឥទ្ធិពលពី Rent and Hamilton។ ទស្សនិកជនរបស់យើងនឹងចូលចិត្តសមិទ្ធផលដែលយើងធ្វើរួមគ្នាលើកនេះ»។

យោងតាមវេបសាយ playbill.com ដំណើរការចម្បងនៃការថតរឿងនឹងចាប់ផ្ដើមនៅខែមិថុនា ឆ្នាំ ២០២២ នៅទីក្រុងឡូសអេនជើលេស ជាមួយនឹងកាលបរិច្ឆេទចេញបញ្ចាំងនៅខែវិច្ឆិកា ឆ្នាំ២០២២។

វេបសាយ Variety.com បានបង្ហាញឈ្មោះតារាចម្រៀង និងសម្ដែង Paula Abdul (American Idol, X Factor) នឹងធ្វើការដឹកនាំបង្កើតចង្វាក់រាំក្នុងភាពយន្តតន្ត្រីនេះផងដែរ។

ភាពយន្តតន្ត្រីសម្ដែងដោយ Pia Toscano ពី American Idol's តារា TikTok Chris Olsen និងអ្នកអង្គម្ចាស់ ខែមមុន្នី។

ភាពយន្ត 1660 Vine ត្រូវបានសរសេរ និងផលិតដោយដោយ Jackson Prince និងរួមជាមួយអ្នកនិពន្ធបទចម្រៀងមិនមានឈ្មោះ២០នាក់ផ្សេងទៀត ក្រោមការណែនាំពីអ្នកគ្រប់គ្រងតន្ត្រី David Lawrence និង Faye Greenberg (ពីស្នាដៃ ភាពយន្តតន្ត្រីដ៏ល្បីល្បាញ High School Musical)។

បង្កើតឡើងដោយក្រុមអ្នកនិពន្ធវ័យក្មេងចម្រុះ ទាំងបទចម្រៀង និងសាច់រឿង ហាក់ថ្លាថ្លែងទៅកាន់ស្រទាប់យុវវ័យនៃប្រព័ន្ធផ្សព្វផ្សាយសង្គមនាពេលបច្ចុប្បន្ននេះ។

ខ្សែភាពយន្ដនេះផ្ដោតលើរឿងរ៉ាវជីវិតតារាបណ្ដាញសង្គមប៉ុន្មាននាក់ ដែលរស់នៅក្នុងអគារផ្ទះល្វែងហូលីវូដដ៏ល្បីមួយដើម្បីបន្តក្ដីសុបិនរបស់ពួកគេក្នុងការកសាងល្បីល្បាញលើអាណាចក្រប្រព័ន្ធផ្សព្វផ្សាយសង្គម តាមរយៈការបង្កើតមាតិកា Vlogs ផ្សាយផ្ទាល់ការលេងហ្គេម វីដេអូបង្ហាញបច្ចេកទេសផាត់មុខ ក្បាច់រាំ TikTok ចម្រៀង និងវីដេអូបែបលេងពញ្ញាក់។

ក្នុងសាច់រឿង តារា ១ក្រុមនេះស្វែងរកអត្តសញ្ញាណ និងភាពខុសគ្នារវាងអ្វីដែលជាការពិត និងអ្វីដែលជាភាពប្រឌិត ក៏ដូចជាប្រឈមនឹងបញ្ហាជុំវិញភាពល្បីល្បាញ ឥទ្ធិពលបណ្ដាញសង្គម អត្តសញ្ញាណ និងបញ្ហាសុខភាពផ្លូវចិត្ត។ ភាពយន្តនេះត្រូវបានបំពេញន័យដោយបទចម្រៀងអូរីជីណលជាច្រើន ដែលសម្ដែងដោយតារាល្បី និងតារារលកក្រោយ។

ប្រសូតក្នុងឆ្នាំ១៩៩៧ អ្នកអង្គម្ចាស់ ខែមមុនី ជាបុត្រពៅរបស់អ្នកអង្គម្ចាស់ នរោត្តម អរុណរស្មី និងលោក កែវ ពុទ្ធរស្មី។

ក្រោយពីបញ្ចប់ការសិក្សាពីសាលាអន្តរជាតិភ្នំពេញ អ្នកអង្គម្ចាស់ ខែមមុនី បានទៅសហរដ្ឋអាមេរិកដើម្បីសម្រេចបំណងប្រាថ្នាលើវិថីសិល្បៈសម្ដែង និងបានបញ្ចប់ការសិក្សាពី American Academy of Dramatic Arts នៅឆ្នាំ ២០១៧។

ខ្សែភាពយន្តដែលសម្ដែងដោយអ្នកអង្គម្ចាស់ ខែមមុនី នេះនឹងត្រូវបានចេញបញ្ចាំងជាលើកដំបូងនៅលើអនឡាញតាមរយៈ StreamingMusicals.com និង BroadwayOnDemand.com ជាមួយនឹងការចេញផ្សាយនៅពេលក្រោយនៅលើបណ្តាញវីដេអូអនឡាញសំខាន់ៗ។

នៅឆ្នាំ២០២០ ភាពយន្តតន្ត្រី1660 Vine នឹងមានផ្ដល់អាជ្ញាប័ណ្ណសម្រាប់ជាឆាកតន្ត្រីដល់វិទ្យាល័យ មហាវិទ្យាល័យ ក៏ដូចជាសហគមន៍ ហើយរោងមហោស្រពអាជីពក៏គ្រោងសម្រាប់ការសម្ដែងទស្សនីយភាពនៅ Broadway ជាលើកដំបូងនៅឆ្នាំ ២០២៤៕

តារាចម្រៀង និងសម្ដែង Paula Abdul (American Idol, X Factor) នឹងធ្វើការដឹកនាំបង្កើតចង្វាក់រាំ។ AFP

ជីវិតកម្សាន្ត

ព័ត៌មានថ្មីៗ

វីដេអូ