.jpg)
មហោស្រពសិល្បៈសៀកអន្តរជាតិផ្ដើមពីថ្ងៃអាទិត្យនេះ។ រូបថត Jeremie Montessuis
បាត់ដំបង: នៅឆ្នាំនេះ បន្ទាប់ពីរដ្ឋាភិបាលបានលុបចោលការរឹតបន្តឹងទាំងអស់ប្រឆាំងជំងឺកូវីដ ១៩ ហ្វារសៀកកម្ពុជា និងហ្វារពន្លឺសិល្បៈបានប្រកាសពីការត្រឡប់មកវិញនៃការប្រារព្ធពិធីសៀកសហសម័យពីជុំវិញពិភពលោក។
លោក អូស្មាន់ ខាវ៉ាចា នាយកអង្គការហ្វារពន្លឺសិល្បៈបាននិយាយថា៖ «យើងពិតជារំភើបណាស់ដែលហ្វារ ដោយមានការគាំទ្រពីអភិបាលខេត្តបាត់ដំបង អាចរៀបចំពិធីមហោស្រពសិល្បៈសៀកអន្តរជាតិ ទីនេះ ទីនោះ បន្ទាប់ពីលុបចោលការប្រារឰឆ្នាំ ២០២០ ដោយសារជំងឺរាតត្បាត។
លោក ខាវ៉ាចា បានប្រាប់ ភ្នំពេញ ប៉ុស្តិ៍ថា៖ «ខ្ញុំជឿថា មហោស្រពនេះភាគច្រើនរៀបចំនៅបរិវេណខាងក្រៅដោយកម្មវិធីខ្លះធ្វើឡើងនៅលើក្នុងរោងសៀក»។
ជាគំនិតផ្តួចផ្តើមរួមគ្នារវាងហ្វារពន្លឺសិល្បៈ និងវិទ្យាស្ថានបារាំង មហោស្រពសិល្បៈសៀកអន្តរជាតិ ទីនេះ ទីនោះ ជាព្រឹត្ដិការណ៍នាំសិល្បករមកពីកម្ពុជា ថៃ តៃវ៉ាន់ និងបារាំងសម្រាប់ឆ្នាំ ២០២២ នេះ។
មហោស្រពត្រូវបានបង្កើតឡើងក្នុងឆ្នាំ ២០០៣ ដោយមានការរៀបចំ ១០ លើករួចមកហើយ។ តាំងពីឆ្នាំ ២០០៨ មក វាត្រូវបានរៀបចំឡើងមិនទៀងទាត់ដោយហ្វារ ហើយមហោស្រពចុងក្រោយបំផុតបានធ្វើនៅឆ្នាំ ២០១៦។
លោក ខាវ៉ាចា រំឭកថា មហោស្រពដំបូងធ្វើឡើងតែនៅខេត្តបាត់ដំបង និងបានពង្រីកដល់ទីក្រុងភ្នំពេញ ហើយពេលហ្វារនៅខេត្តសៀមរាប ត្រូវបានកសាងរួចរាល់វាក៏ត្រូវបានប្រារឰនៅខេត្តសៀមរាបផងដែរ នៅក្នុងឆ្នាំ ២០១៤ ២០១៥ និង ២០១៦។
សិល្បករនឹងប្រមូលផ្ដុំគ្នានៅក្រុងបាត់ដំបង ដើម្បីសម្ដែង និងបើកកិច្ចសន្ទនាប្រកបដោយផលិតភាព។ រូបថត Oyen Roadriguez
នៅឆ្នាំ ២០១៨ វាត្រូវបានលុបចោលដោយសារតែបញ្ហាប្រឈមផ្នែកហិរញ្ញវត្ថុ ហើយមហោស្រពនេះត្រូវបានគ្រោងម្តងទៀតនៅឆ្នាំ ២០២០ ប៉ុន្តែនៅពេលវីរុសថ្មីបានវាយប្រហារពិភពលោក វាបណ្តាលឱ្យព្រំដែនអន្តរជាតិទាំងអស់បិទ និងថែមទាំងមានការបិទខ្ទប់នៅទូទាំងប្រទេស។
កម្មវិធីស្វាគមន៍ការត្រឡប់មកវិញសិល្បករនឹងប្រមូលផ្តុំគ្នានៅក្រុងបាត់ដំបង ដើម្បីសម្តែង និងបើកកិច្ចសន្ទនាប្រកបដោយផលិតភាពជាមួយសិស្សសៀកជាមួយការបំផុសឱ្យពួកគេបន្តក្តីសុបិនតាមវិស័យសិល្បៈ។
លោក ខាវ៉ាចា និយាយថា៖ «ការរៀបចំមហោស្រពសិល្បៈ គឺជាផ្នែកមួយនៃយុទ្ធសាស្ត្ររបស់ហ្វារ ដើម្បីនាំយកសិល្បៈមកជូនប្រជាជន និងចូលរួមជាមួយសហគមន៍ ដើម្បីកសាងអត្តសញ្ញាណវប្បធម៌ជុំវិញបេតិកភណ្ឌរួមគ្នា»។
មហោស្រពនៅខេត្តបាត់ដំបង នឹងប្រព្រឹត្តទៅចាប់ពីថ្ងៃទី ២៩ ខែឧសភា ដល់ថ្ងៃទី ៣ ខែ មិថុនា ឆ្នាំ ២០២២ សម្រាប់លើកទី១១ របស់ខ្លួនដោយបម្រើជាវេទិកាមួយដែលសិល្បករអាចចែករំលែកបទពិសោធ ចូលរួមក្នុងសិក្ខាសាលា និងសំខាន់បំផុត គឺបំផុសយុវជនចូលរួមសហគមន៍មូលដ្ឋាន និងលើកកម្ពស់សិល្បៈក្នុងសង្គមកម្ពុជានាំមកនូវឯកភាព និងការយល់ដឹងពីតម្លៃរួម។
លោកបន្តថា៖ «យើងសង្ឃឹមថា មហោស្រពបែបនេះនឹងលើកមុខមាត់ខេត្តបាត់ដំបង ជាមជ្ឈមណ្ឌលសិល្បៈច្នៃប្រឌិត និងវប្បធម៌របស់កម្ពុជា»។
លោកថា បាត់ដំបងជាទីក្រុងដ៏ល្អឥតខ្ចោះសម្រាប់មហោស្រពសិល្បៈដោយសារទំហំធំនៃខេត្ដ ភាពច្នៃប្រឌិត និងចំនួនសិល្បករច្រើន។ លោកសង្ឃឹមថា មហោស្រពសិល្បៈសៀក នេះអាចជួយខេត្តបាត់ដំបង ទទួលបានងារប្រវត្តិសាស្ត្រជាមជ្ឈមណ្ឌលសិល្បៈ និងវប្បធម៌នៅកម្ពុជា។
បូកបញ្ចូលទាំងការផ្លាស់ប្តូរមតិយោបល់សិក្ខាសាលាសៀកទាំងអស់ ពិធីដង្ហែអាយ៉ង និងសៀកកម្មវិធីសម្ដែង និងការប្រគំតន្ត្រីមានសិល្បករប្រហែល ១៥០ នាក់ចូលរួម។
សិល្បករប្រហែល ១៥០ នាក់នឹងចូលរួមមហោស្រពនេះ។ រូបថត Jeremie Montessuis
មហោស្រពរយៈពេល ៦ ថ្ងៃ នឹងមានការសម្ដែងសៀកផ្សេងៗរៀងរាល់ល្ងាចនៅសាខាអង្គការហ្វារពន្លឺសិល្បៈ ដែលលើសពីនេះអ្នកនឹងអាចចូលរួមជាមួយសកម្មភាពសិល្បៈទស្សនាការសម្តែងដោយឥតគិតថ្លៃ និងភ្លក្សរសជាតិអាហារក្នុងស្រុក។
ឆ្នាំនេះ ដោយសារមានពេលតិចតួច និងទាមទារការឧបត្ថម្ភធំសម្រាប់ការរៀបចំនៅទីក្រុងចំនួន ៣ កម្មវិធីមានតែនៅខេត្តបាត់ដំបងទេ។
ហ្វារ បានឱ្យដឹងថា វាជាឱកាសដ៏ស័ក្តិសមក្នុងការទទួលក្រុមសិល្បៈ និងក្រុមអន្តរជាតិម្តងទៀត ដោយលើកទឹកចិត្តភ្ញៀវទេសចរឱ្យត្រឡប់មកខេត្តបាត់ដំបងវិញ។
មហោស្រពសិល្បៈសៀកអន្ដរជាតិទីនេះ ទីនោះ នឹងចាប់ផ្តើមនៅថ្ងៃអាទិត្យ ទី ២៩ ខែឧសភា ជាមួយនឹងពិធីដង្ហែអាយ៉ង និងការសម្ដែងសៀកទូទាំងទីរួមខេត្តបាត់ដំបង។
ការប្រារឰនេះនឹងបិទនៅថ្ងៃសុក្រ ទី ៣ ខែមិថុនា ជាមួយនឹងការប្រគំតន្ត្រីចុងក្រោយ ដែលសម្ដែងដោយក្រុមតន្ត្រីករ Hip Hop និង Alternative Music Label Klapyahandz។
មហោស្រពសិល្បៈសៀកអន្តរជាតិ ទីនេះ ទីនោះ នឹងប្រារឰឡើងរៀងរាល់ ២ ឆ្នាំម្តង (បន្ទាប់នៅឆ្នាំ ២០២៤) ឆ្លាស់គ្នាជាមួយនឹងមហោស្រពសិល្បៈ S''Art Urban Art Festival ដែលត្រូវបានដាក់ឱ្យដំណើរការដោយហ្វារក្នុងឆ្នាំ ២០១៩ ជាមួយនឹងការរៀបចំបន្ទាប់នៅឆ្នាំ ២០២៣។
ប្រជាពលរដ្ឋអាចកក់សំបុត្របានតាមរយៈ reservations@phareps.org ឬលេខទូរស័ព្ទ ០៧៧/៩៣ ៥៥៤ ៤១៣។
ព័ត៌មានបន្ថែមអំពីហ្វារមាននៅគេហទំព័រ http://www.phareps.org ឬទំព័រហ្វេសប៊ុក @phareponleuselpak៕
