.jpg)
លោក ឈុនលី សន្សំប្រាក់ជាង ១០ ឆ្នាំ ទើបអាចទិញកាមេរ៉ាថតកុនខ្លួនឯងសម្រាប់ហ្វឹកហាត់ជំនាញផលិតកុនរបស់ខ្លួន។ រូបថត ហ្វេសប៊ុក
ភ្នំពេញៈ ក្រោយវិលត្រឡប់ពីរៀនជំនាញសិល្បៈភាពយន្តនៅប្រទេសបារាំង និងបានប្រឡូកការងារអាជីពសិល្បៈចម្រុះដូចជាធ្វើជាគ្រូបង្រៀនសិល្បៈគំនូរ និងគំនូរជីវចលនៅឯសាលាហ្វារពន្លឺសិល្បៈ រួមផ្សំនឹងកង្វះខ្វះខាតធនធានផ្ទាល់ខ្លួននោះ ទើបបានជំនាញជាក្តីស្រឡាញ់ធំលើវិស័យផលិតភាពយន្តត្រូវបានដំអក់ ហើយសន្សំចិត្តរង់ចាំរហូតដល់ជាង ១០ ឆ្នាំ ទើបបានចាប់ផ្តើមដំណើរការ។
នាពេលថ្មីៗនេះ គេឃើញបុរសមានជំនាញសិល្បៈចម្រុះ ដែលជាកូនចៅអ្នករស់នៅខេត្តបាត់ដំបង មានភិនភាគនៃមុខមាត់ស្រដៀងគ្នានឹងកីឡាករប្រដាល់លំដាប់ពិភពលោក ជាជនជាតិហ្វីលីពីន ម៉ានី ប៉ាក់គីអៅ ឬធ្លាប់មហាជនប្រសិទ្ធនាមថា «ម៉ានី ប៉ាក់គីអៅខ្មែរ» ខណៈឈ្មោះពិត លោក ប៉ោយ ឈុនលី បង្ហើរសារតាមហ្វេសប៊ុកបែបចម្លែកស្តីពីសកម្មភាពការងារប្រចាំថ្ងៃដែលលើសម៉ោង ក៏ព្រោះតែចង់សម្រេចក្តីប្រាថ្នាធំរបស់ខ្លួន។
លោក ប៉ោយ ឈុនលី បច្ចុប្បន្នវ័យ ៤១ ឆ្នាំ បង្ហើបថា៖ «ថ្ងៃចន្ទ ដល់ថ្ងៃសុក្រ ចុះថតនៅទីជិតឆ្ងាយ និងពេលយប់កាត់តគម្រោងក្នុងស្ទូឌីយោ តូចមួយនេះ ដើម្បីរកលុយចិញ្ចឹមជីវិតដល់ថ្ងៃចុងសប្តាហ៍ ធ្វើការដើម្បីសង្គម បង្រៀនជំនាញតែងនិពន្ធនៅវត្តពោធិវាល ដល់ព្រោះសង្ឃ និងយុវជន ព្រោះជាការងារដែលខ្លួនស្រឡាញ់ពេញបេះដូងតែម្តង។ ធ្វើការ ៧ ថ្ងៃ ក្នុង ១ សប្តាហ៍ ១៨ ម៉ោង ក្នុង ១ ថ្ងៃ ហត់បន្តិចមែន តែពិតជាសប្បាយណាស់ព្រោះបានប្រើពេលវេលាដ៏មានតម្លៃឱ្យមានប្រយោជន៍ បន្សល់ស្នាដៃដល់មនុស្សជំនាន់ក្រោយ ប្រទេស ១ ខ្លាំង ព្រោះមានប្រជាជនខ្លាំងរស់នៅ»។
លោក ប៉ោយ ឈុនលី ហៅ ម៉ានី ប៉ាក់គីអៅខ្មែរ ក៏បានបញ្ជាក់បន្ថែមពីក្តីបំណងធំ ដែលរូបលោកបានសន្សំទាំងចិត្ត និងទ្រព្យធនទុកអស់រយៈពេលជាង ១០ ឆ្នាំមកហើយ ក្នុងវិស័យសិល្បៈភាពយន្តដែលរូបលោករៀនមកពីបារាំង និងជំនាញជាទីស្រឡាញ់ដ៍មុតមាំមិនទាន់បានសម្រេចបំណងនោះឡើយ ទាំងជាការផលិតស្នាដៃថតកុន និងទាំងចង់បង្កើតឱ្យមានជាសាលាបង្រៀនថតកុនមួយនៅក្នុងខេត្តបាត់ដំបង នាពេលអនាគតទៀតផង។
លោក ប៉ោយ ឈុនលី បានបង្ហើបប្រាប់ ភ្នំពេញ ប៉ុស្តិ៍ថា៖ «ដោយសារខ្វះធនធាន ហើយទម្រាំសន្សំប្រាក់ទិញសម្ភារថតកុនមួយសម្រាប់នេះបាននោះ ខ្ញុំត្រូវសន្សំពេល និងប្រាក់តាំងពីឆ្នាំ ២០០៨ មក។ ឧបករណ៍នេះទើបបានទិញ នាដើមឆ្នាំ ២០២២ នេះ គឺ១សម្រាប់ដែលមានគុណភាពជាខ្នាតល្មម។ បច្ចុប្បន្នវាត្រូវបានប្រើសម្រាប់ការផលិតកុនលើគម្រោងចំនួន ២ ជាបណ្តើរៗ និងឆ្លៀតថតសម្រាប់ការផលិតកុនខ្នាតវែងខ្លួនឯងបណ្តើរ ដើម្បីត្រៀមយកទៅប្រកួតក្រៅស្រុក»៕
