សៀមរាបៈ ក្រសួងបរិស្ថានបានឱ្យដឹងថា ប្រជាជននៅខេត្តសៀមរាបភាគច្រើន ទទួលស្គាល់ថា ដំណាំចេកល័ក្ខ ជាដំណាំហូបផ្លែមានអត្តសញ្ញាណនៅលើខ្នងភ្នំគូលែន។ ចេកនេះមាន ផ្លែធំៗហើយនៅពេលទុំមានពណ៌ក្រមៅ លាយក្រហមស្រាល និងមានរសជាតិផ្អែមឈ្ងុយឆ្ងាញ់គួរចង់បរិភោគ។
តាមរយៈហ្វេសប៊ុកនៅថ្ងៃទី ២៣ ខែកក្កដានេះ ក្រសួងបរិស្ថានបានឱ្យដឹងថា ទេសចរទាំងឡាយ នៅពេលឡើងទៅកម្សាន្តលើភ្នំគូលែន នៃឧទ្យានជាតិព្រះជ័យវរ្ម័ន-នរោត្តម ភ្នំគូលែន ប្រាកដជាស្គាល់ដើមចេកល័ក្ខ។ ផ្លែរបស់វាបានដាក់លក់ជាហូរហែ តាមដងផ្លូវទៅកាន់តំបន់ខ្នងភ្នំ។
លោក ផាន់ ផុន ប្រធានសហគមន៍ព្រៃធំអន្លង់ធំ ដែលស្ថិតនៅលើខ្នងភ្នំគូលែននេះបានឱ្យដឹងថា ចេកប្រភេទនេះ គឺជាប្រភេទដំណាំរបស់អ្នកស្រុក ច្រើនតំណមកហើយ។ បច្ចុប្បន្ន ប្រជាពលរដ្ឋលើភ្នំគូលែន និយមដាំចេកល័ក្ខ ព្រោះអាចលក់បានតម្លៃខ្ពស់។
លោកប្រធានសហគមន៍ព្រៃធំអន្លង់ធំ បញ្ជាក់ថា៖ «ចេកល័ក្ខផ្លែវាពេលទុំ មានរសជាតិផ្អែម និងក្លិនក្រអូប។ គេអាចបរិភោគ វាបានពេលទុំហើយ វាមានរសជាតិផ្អែមឆ្ងាញ់ខុសពីចេកដទៃ។ តម្លៃចេកល័ក្ខមានតម្លៃថ្លៃជាងចេកផ្សេងទៀត»។
នៅតាមផ្លូងឡើងភ្នំគូលែន អ្នកភូមិលក់ចេកល័ក្ខមួយស្ទង ចាប់ពី ២៥០០០ ដល់ ៣០០០០រៀល។ បើទិញជាស្និតវិញ តម្លៃមួយស្និត ៤០០០-៧០០០ រៀលទៅតាមទំហំ តូចតាមធំ។
ក្រសួងបរិស្ថានបញ្ជាក់ថា ដោយសារកត្តាភូមិសាស្រ្តអំណោយផល សម្រាប់ដំណាំចេកនេះផង ប្រជាពលរដ្ឋរស់នៅខ្នងភ្នំគូលែនជាច្រើនគ្រួសារ និយមដាំចេកល័ក្ខ និងម៉្យាងទៀតដំណាំនេះ បានដុះនៅលើខ្នងភ្នំគូលែន តាំងតែពីយូរលង់មកហើយដែរ៕