.jpg)
លោក ម៉ៃ វឌ្ឍនា ជាកវីនិពន្ធទំនុកច្រៀង ដែលកំពុងមានឈ្មោះបោះសំឡេង។ រូបថត សហការី
ភ្នំពេញៈ ឆ្លងកាត់ជីវភាពកម្សត់ក្នុងគ្រួសារក្រីក្រ តាំងពីក្មេង និងភ្លក្សរសជាតិជីវិតដើរលើផ្លូវលំបាកដ៏ច្រើននិងវែងឆ្ងាយ ទើបលោក ម៉ៃ វឌ្ឍនា អាចប្រែក្លាយខ្លួនជាកវីនិពន្ធទំនុកច្រៀង មានឈ្មោះបោះសំឡេង ១ រូប តាមបណ្តាញសង្គមហ្វេសប៊ុក និងឆាណែលយូធូប ហើយនាពេលបច្ចុប្បន្ន ជាគ្រូបង្រៀនផ្នែកវិជ្ជានិពន្ធចម្រៀង នៅសមាគអ្នកនិពន្ធខ្មែរ ដើម្បីបន្តចំណេះដឹងទៅដល់ធនធានជំនាន់ក្រោយ។
ដោយសារក្តីស្រឡាញ់ និងទឹកចិត្តចង់រក្សាក្បួនខ្នាត នៃទម្រង់សិល្បៈតែងនិពន្ធចម្រៀង និងតន្ត្រីសម័យ ឱ្យមានភាពត្រឹមត្រូវតាមក្បួនតម្រាខ្មែរនោះ ទើបក្រុមកវីនិពន្ធចម្រៀង ក៏ដូចជាកវីទំនុកភ្លេង ដែលមានចិត្តស្របគ្នា សម្រេចបង្កើតឆាណែលមួយ ដើម្បីទុកជាឃ្លាំង រក្សានូវបណ្តុំស្នាដៃបទចម្រៀងមនោសញ្ចេតនាខ្មែរពិតៗ និងមានក្បួនតែងនិពន្ធទំនុកច្រៀងគឺ Mai Vathana Channel YouTube ពីសំណាក់អ្នកនិពន្ធទំនុកច្រៀង មានរហស្សនាម «កវីជនបទ» ម៉ៃ វឌ្ឍនា។
ឆាណែលដែលជាបណ្តុំនៃបទចម្រៀងមនោសញ្ចេតនាបែបខ្មែរពីរោះៗ ជាសំនៀង របស់សិល្បករ-សិល្បការិនីល្បី ដោយមានក្រុមអ្នកនិពន្ធទំនុកច្រៀង ទំនុកភ្លេង និងសម្រួលតន្ត្រី សុទ្ធតែមានកិត្តិស័ព្ទល្បីក្នុងសង្គមសិល្បៈយូរឆ្នាំនោះ ឈ្មោះ Mai Vathana Channel YouTube https://www.youtube.com/results?search_query=mai+vathana ដែលបានបង្កើតឡើងដោយកវីនិពន្ធទំនុកច្រៀងស្ទាត់ជំនាញ តាមក្បូនខ្នាតខ្មែរលោក ម៉ៃ វឌ្ឍនា តាំងពីឆ្នាំ២០១៧ មក។
លោក ម៉ៃ វឌ្ឍនា (Mai Vathana) ជាអ្នកមានស្រុកកំណើត នៅភូមិស្តីក្រោម ឃុំព្រែកហ្លួង ស្រុកឯកភ្នំ ខេត្តបាត់ដំបង។ លោកមានប្រវតិ្តកម្សត់ក្នុងជីវភាពនៃគ្រួសារក្រីក្រ ដោយធ្លាប់បានផ្អាកការសិក្សា១រយៈនាអំឡុងពេលកំពុងរៀនថ្នាក់ទី១១នៅវិទ្យាល័យស្រុកឯកភ្នំ។
លោក ម៉ៃ វឌ្ឍនា បង្ហើបឱ្យដឹងថា ដោយសារតែជីវភាពខ្វះខាត លោកបានផ្អាកការសិក្សាកម្រិតវិទ្យាល័យត្រឹមថ្នាក់ទី១១ មួយរយៈក្នុងឆ្នាំសិក្សាឆ្នាំ ១៩៩៤-១៩៩៥។
ក្រោយមកលោកក៏បានសុំឪពុកម្តាយមកស្នាក់នៅ «វត្តស្វាយជ្រំ» ជាមួយព្រះសង្ឃ ឆ្ងាយពីភូមិកំណើត ដែលស្ថិតនៅស្រុកឯកភ្នំដដែល ដើម្បីបន្តការសិក្សារហូតចប់ថ្នាក់ទី១២ នៅឆ្នាំបន្ទាប់។
តែលោកក៏បានបោះបង់ការសិក្សារយៈពេល ៤ ប្រាំ បន្តទៀតដែរ ក្រោយពីចប់ថ្នាក់ទី១២ ដោយសុំឪពុកម្តាយ ទៅធ្វើការងារជាពលករ នៅប្រទេសថៃប៉ុន្មានឆ្នាំ។
លុះដល់ចុងឆ្នាំ ១៩៩៩ ទើបលោកបានវិលមកស្រុកខ្មែរ និងដើមឆ្នាំ ២០០០ បានចេញពីស្រុកកំណើត មករកការងារធ្វើ នៅទីក្រុងភ្នំពេញ ដោយបានចាប់ផ្តើមការងារដំបូងជាជាងសំណង់ ជាអ្នកស្តារលូ ជាអ្នកជួសជុលបង្គន់ និងជាជាងរៀបឥដ្ឋការ៉ូឡា ដោយផ្ញើជីវិតស្នាក់នៅតាមសំយាបផ្ទះជួលគេ ព្រោះតែជីវភាពខ្វះខាត គ្មានប្រាក់ជួលផ្ទះស្នាក់នៅ។ បន្ទាប់មកទៀត លោក ម៉ៃ វឌ្ឍនា បានរៀនវិជ្ជាកាត់ដេរ បន្ទាប់ពីបានស្គាល់ស្រ្តីមានចិត្តធម៌ម្នាក់។
លុះឆ្នាំ ២០០១ លោកបានចូលបម្រើការងារជាកម្មកររោងចក្រមួយ នៅម្តុំអូរបែកក្អម និងក្រោយពីបានបម្រើការនៅក្រុមហ៊ុនមួយ បានប្រាក់ខែដំបូង ៤០ ដុល្លារ ក្នុងនាមជាតំណាងឱ្យកម្មកររោងចក្រ និងជាពេលវេលា ដែលលោក ម៉ៃ វឌ្ឍនា បានសន្សំ និងសង្វាតបន្តការសិក្សា នៅមហាវិទ្យាល័យ ដោយបានបញ្ចប់ការសិក្សាបរិញ្ញាបត្រផ្នែកនីតិសាស្រ្តឆ្នាំ ២០១០។
ចំពោះការតែងនិពន្ធចម្រៀងវិញលោក ម៉ៃ វឌ្ឍនា មានចំណូលចិត្ត និងបានរៀនតាក់តែងដោយខ្លួនឯងតាមចំណេះចេះតាមសៀវភៅ តាំងពីកាលនៅរៀនវិទ្យាល័យមកម្ល៉េះ តែការប្រឡូកមកជាអ្នកនិពន្ធចម្រៀងបែបផ្លូវការ គឺបានកើតឡើង នាអំឡុងឆ្នាំ ២០១៤-២០១៥។
លោក ម៉ៃ វឌ្ឍនា បានបញ្ជាក់ពីការចាប់ផ្តើមសរសេរបទចម្រៀង និងរៀនបន្ថែម នូវវិជ្ជានិពន្ធរបស់ខ្លួនថា៖ «ចន្លោះឆ្នាំ ២០១៤-២០១៥ ខ្ញុំមានទឹកចិត្ត រំឭកការសរសេរ ចងក្រងស្នាដៃនិពន្ធ ដែលខ្ញុំបានបាត់បង់ក្នុងកំណត់ត្រារបស់ខ្ញុំ បានតាក់តែងក្នុងសៀវភៅសរសេរដៃ ដែលមាននៅសេសសល់កាលពីខ្ញុំ នៅធ្វើការងារជាងសំណង់នោះ។ នៅឆ្នាំ ២០១៧ ទើបបានខ្ញុំមកចូលរៀនបន្ថែម នូវវិជ្ជានិពន្ធជាមួយសមាគមអ្នកនិពន្ធខ្មែរ។ នាពេលនេះ ខ្ញុំបានរៀនសូត្រអំពីមូលដ្ឋាន នៃការតែងនិពន្ធច្រើន កាន់តែយល់ច្បាស់លើវិស័យនេះ»។
លោក វឌ្ឍនា រំឭកពីបទចម្រៀងដំបូង ដែលនាំអារម្មណ៍មហាជនទទួលស្គាល់ស្នាដៃលោក ក្រោយពេលបានដាក់បញ្ចូលទៅក្នុងបណ្តាញសង្គមហ្វេសប៊ុក និងយូធូបថា៖ «ដំបូង ខ្ញុំបានចាប់ផ្តើមសាកល្បងនិពន្ធបទចម្រៀង ហើយស្វែងរកអ្នកសហការ ដែលមានស្ទូឌីយោថត ហើយក៏បានជួបមិត្តភក្តិឈ្មោះ ឆាយ សុភ័ណ្ឌ និងបានជួបលោក យ៉ង ពៅ ដែលជាអ្នកសម្រួលតន្រ្តី និងអ្នកនិពន្ធភ្លេងដ៏ល្បីម្នាក់ និងបានផ្តល់ឱកាសឱ្យខ្ញុំបានបញ្ចេញស្នាដៃ»។
សម្រាប់ការថតចម្រៀង ៤ បទដំបូងនោះ រួមមានបទ «ពេជ្ឃឃាតអាស៊ីត» បទ«អង្រឹងឪពុក» បទ«ម្លប់ស្នេហ៍ក្រោមដំបូលរោងចក្រ» ដែលជាពេលលោក បានស្គាល់លោកគ្រូភ្លេងដ៏ល្បី គឺលោកគ្រូ អ៊ុក សំអាត និងបទ «ឈាមប្រុសសាមាន្យ» គឺជាពេលវេលាបានស្គាល់ តារាចម្រៀងស្រីមានសំឡេងពីរោះ ពេជ្រ ចរិយា។
គួរបញ្ជាក់ដែរថា បទ«ឈាមប្រុសសាមាន្យ» គឺជាចំណងជើងបទចម្រៀងមួយ ដែលលោក ម៉ៃ វឌ្ឍនា បានសរសេរកាលពីថ្ងៃទី ២៤ ខែ កុម្ភៈ ឆ្នាំ ២០១៦ ស្តីអំពីជីវិតស្នេហា របស់នារីកម្មករកាត់ដេរម្នាក់ បម្រើការនៅរោងចក្រកាត់ដេរ ស្ថិតក្នុងភូមិសាស្ត្រផ្សារសំណង់ ១២ សង្កាត់ទឹកល្អក់៣ ខណ្ឌទួលគោក ទីក្រុងភ្នំពេញ។ ដ្បិតតែនេះគ្រាន់តែជាផ្ទាំងទស្សនីយភាពដ៏តូចមួយក៏ពិតមែន តែសង្គមកម្មកររោងចក្រ ស្ថិតនៅក្រោមក្រសែភ្នែកដ៏តូចទាបរបស់អ្នកមានប្រាក់។ នារីកាត់ដេរ ត្រូវក្លាយជាជន ដែលគេប្រមាញ់តណ្ហាក្រោមអំណាចទឹកប្រាក់ បោកបញ្ឆោត ដោយប្រែឈ្មោះថាជា «ស្រីរោងចក្រ»។
លោក ម៉ៃ វឌ្ឍនា បានបរិយាយក្នុងហ្វេសប៊ុកពីការតែងនិពន្ធបទ «ឈាមប្រុសសាមាន្យ» នេះថា៖ «កាលនោះ ខ្ញុំមានគំនិតថា និពន្ធបទនេះឡើង នៅក្នុងគោលបំណងបង្ហាញពី ផ្នែកមួយនៃដំបូលរោងចក្រ និងលើកឡើងក្នុងន័យ តស៊ូមតិការពារសេចក្តីថ្លៃថ្នូរ របស់នារីរោងចក្រ និងទាររកសេចក្តីមេត្តាពីបុរសទាំងនោះផង។ បទនេះ ខ្ញុំយកទៅដាក់ជូនលោក យ៉ង ពៅ និងបានផលិតនៅថ្ងៃទី ២៦ ខែមីថុនា ឆ្នាំ២០១៦ នៅឯ BOSABA STUDIO»។
លោក ម៉ៃ វឌ្ឍនា ក៏បានប្រាប់ភ្នំពេញប៉ុស្តិ៍ ពីការបង្កើតឆាណែលដំបូងនៅឆ្នាំ ២០១៧ ថា មានបទចម្រៀងប្រហែល ៤-១០ បទតែប៉ុណ្ណោះ បានបង្ហោះតាមគណនីហ្វេសប៊ុកខ្លួនឯង។
តែក្រោយពីទទួលបានការពិគ្រោះពីកវីទំនុកភ្លេង និងសម្រួលតន្ត្រីលោក យ៉ង់ ពៅ មកក៏សម្រេចបង្កើតជាឆាណែលយូធូបមួយទៀត ដើម្បីបញ្ចូលបទចម្រៀង ដែលជាការរក្សាទុកនូវស្នាដៃខ្លួនបានខំបង្កើត។ ដោយពេលនោះលោក យ៉ង ពៅ គាត់ប្រាប់ថា ក្រែងលោបទចម្រៀងទាំងអស់នេះ អាចបានផលប្រយោជន៍ខ្លះពីក្រុមហ៊ុន YouTube ហើយនៅឆ្នាំ ២០១៨ ក៏ទទួលបានការគាំទ្រពីអ្នកគាំទ្រតាមរយៈឆាណែល Mai Vathana Channel YouTube។
មកដល់ពេលនេះ បទចម្រៀងនៅឆាណែលវឌ្ឍនា មានប្រហែលជាង ៥០-៦០ បទ ដោយមានទាំងបទចម្រៀងជាប្រភេទ Audio ប្រហែលជាង ២០-៣០ បទ ហើយគឺជាបទចម្រៀង ដែលមានការថតសម្តែងកាយវិការ (MV) តាមអត្ថន័យនៃបទនីមួយៗ។ បទភាគច្រើន នៅក្នុងឆាណែល Mai Vathana Channel YouTube គឺបានផ្តោតសំខាន់ ទៅលើការផលិតបទចម្រៀង បែបមនោសញ្ចេតនា ស្នេហាស្រុកស្រែចម្ការ និងលក្ខណៈបែបជាតិខ្មែរ។
ព្រោះតែបទចម្រៀងនីមួយៗ ទាមទារលក្ខណៈផ្ចិតផ្ចង់តាមក្បួនខ្នាតនោះ ការចំណាយពេលវេលាទាំងនិពន្ធទំនុកច្រៀង ទំនុកភ្លេង ការសម្រួលតន្ត្រី ការថតសំឡេង និងការថតសម្តែងផងដែរនោះ ត្រូវស៊ីពេលចន្លោះពីកន្លះខែទៅ១ខែ ទើបអាចផលិតបានចម្រៀង ១ បទពេញលេញ។
លោក ម៉ៃ វឌ្ឍនា បញ្ជាក់ឱ្យដឹងថា៖ «យើងអាចនិយាយបានថា ចម្រៀង ១ បទ អាចស្មើនឹងសាច់រឿងកន្លះរឿង ឬ ១ រឿង ព្រោះស្នាដៃចម្រៀងខ្មែរយើង មានលក្ខណៈជាស្នាដៃសិល្បៈអក្សរសិល្ប៍។ អ៊ីចឹង ១ បទ ធ្វើយ៉ាងតិចប្រើពេលកន្លះខែ ទៅ ១ ខែ ខណៈការតែងនិពន្ធអាចប្រើពេល១ថ្ងៃទៅ ២ ថ្ងៃ តាក់តែងជាករណីមានអារម្មណ៍ល្អ»។
លោកបានបន្ថែមថា៖ «យើងមានតន្ត្រីករដ៏ចំណានលោក យ៉ង ពៅ ជាអ្នកបច្ចេកទេសសំឡេង ជាអ្នកលេងហ្គីតា បាស់ និងសូឡូ និងលេងព្យ៉ាណូ ខណៈលោកគ្រូ អ៊ុក សំអាត គឺជាអ្នកនិពន្ធបទភ្លេង និងសម្រួលតន្ត្រី ដ៏ប៉ិនប្រសប់ ហើយខ្ញុំ (ម៉ៃ វឌ្ឍនា) ជាអ្នកតែងទំនុកច្រៀង។ សម្រាប់បទចម្រៀងយើងថតនៅស្ទូឌីយោចំនួន ២-៣ កន្លែងតាំងពីដើម។ ក្នុងនោះមានស្ទូឌីយោ របស់លោក គង់ ពិសិដ្ឋ និងស្ទូឌីយោ Live Band សម្រាប់ថតបែបប្រគំជាក្រុម (Band) ផងដែរ»។
ទោះបីជាមិនមានតុល្យភាពនៃការផលិតបទចម្រៀង និងប្រាក់កម្រៃពីក្រុមហ៊ុន YouTube និងបានពីការជួយឧបត្ថម្ភពីសាមីខ្លួន ដែលចូលចិត្តការតាក់តែងបទចម្រៀងមនោសញ្ចេតនា បែបស្រុកស្រែនោះក្តី ក៏អ្នកនិពន្ធទំនុកច្រៀង មានរហស្សនាមថា «កវីជនបទ» រូបនេះ នៅតែចង់បន្តនូវឆន្ទៈខិតខំនិពន្ធ និងផលិតបទចម្រៀងបែបខ្មែរនេះ ក្នុងគោលបំណងធំរួមមួយរបស់ក្រុមកវីលោកឥតងាករេ។
លោក ម៉ៃ វឌ្ឍនា បានលើកឡើងថា៖ «គោលបំណងធំគឺយើងចង់រក្សាទុកជាឯកសារ ដែលបានធ្វើជុំគ្នា ទាំងអ្នកតែងនិពន្ធទំនុកច្រៀង និងភ្លេងហើយចង់សាបព្រោះនូវអ្វីជាគំរូ ចំណេះជំនាញនៃសិល្បៈវិធីតែងនិពន្ធបទចម្រៀងខ្មែរ ប្រកបដោយគុណធម៌ សីលធម៌ ហើយក៏ចង់ទប់ស្កាត់នូវការហៀរចូល ឬបាចសាចនូវឥទ្ធិពលវប្បធម៌ បរទេសមិនល្អផងដែរ នៅក្នុងវិស័យនិពន្ធនេះ»។
តាមការកត់សម្គាល់របស់លោក មើលឃើញថា រយៈពេល ២-៣ ឆ្នាំ ចុងក្រោយនេះ ក៏ឃើញមានភាពប្រែប្រួល ឬមានការកែទម្រង់ពី Channel YouTube របស់ក្រុមអ្នកផលិតបទចម្រៀងខ្មែរ ជំនាន់ក្រោយ ដែលមិនសូវមានវិធីសាស្ត្រតែងតាមបែបខ្មែរនោះដែរ គឺមានកែប្រែខ្លះ ទំនងជាអាចមកពីការផ្សព្វផ្សាយពី ឆាណែលរបស់លោក នាមួយរយៈពេលនេះហើយ។
យ៉ាងណាមិញ កវីនិពន្ធមានសំនួនវោហារស័ព្ទណែងណង ក្នុងសំណេរបទចម្រៀង បែបមនោសញ្ចេតនាជ្រាលជ្រៅ ដែលមានស្រុកកំណើតនៅខេត្តបាត់ដំបង និងកើតនៅឆ្នាំ១៩៧៦ រូបនេះ ក៏មានសំណូមពរដល់កវីនិពន្ធជំនាន់ក្រោយៗដែរ ដើម្បីកសាងបាននូវគុណតម្លៃខ្លួនឯងផ្ទាល់ និងសង្គមជាតិ។
លោក ម៉ៃ វឌ្ឍនា លើកឡើងថា៖ «តាមរយៈការចាប់អាជីពនិពន្ធចម្រៀងតាំងពីឆ្នាំ ២០១៥ ដល់បច្ចុប្បន្ននេះ ខ្ញុំសូមផ្តាំផ្ញើសម្រាប់បងប្អូនថា មុននឹងចាប់អាជីពជាអ្នកនិពន្ធ១រូប (មិនថា និពន្ធចម្រៀង ឬនិពន្ធប្រលោមលោក) យើងត្រូវមានមូលដ្ឋាន ខាងវិជ្ជាតែងនិពន្ធ ឱ្យបានច្បាស់លាស់ដូចជា ទ្រឹស្តីអក្សរសាស្ត្រ អក្សរសិល្បិ៍ សិក្សាពីសិល្បៈតូរ្យតន្តី្រ ស្វែងយល់ទំនៀមទម្លាប់ប្រពៃណីវប្បធម៌ជាតិខ្លួន។ ត្រូវចេះរៀបចំ និងបង្កើតគំនិតថ្មីៗ សម្រាប់ការតែងនិពន្ធ ដែលមានលក្ខណៈជារបស់ខ្លួនឯង មិនមែនយករបស់គេមកច្នៃ ឬលុបសំណេរដើមគេខ្លះ ហើយបំពេញបន្ថែមថា ជារបស់ខ្លួននោះទេ។
លោក ម៉ៃ វឌ្ឍនា ដែលបានក្លាយជាសមាជិកនៃក្រុមប្រឹក្សាភិបាលនៃសមាគមអ្នកនិពន្ធខ្មែរ និងគ្រូបង្រៀនវិជ្ជាតែងនិពន្ធបទចម្រៀង ចាប់ពីឆ្នាំ ២០១៨ មកដល់បច្ចុប្បន្ន ក៏បានលើកឡើងអំពីចំណាប់អារម្មណ៍ថ្មីមួយទៀតរបស់លោក ទៅថ្ងៃអនាគតគឺការនិពន្ធរឿងប្រលោមលោកខ្លីៗ។
ដោយឡែកគេក៏ឃើញថា មានតារាចម្រៀងល្បីៗ ក៏បានបកស្រាយចម្រៀងនៅក្នុងឆាណែលយូធូប វឌ្ឍនា (Mai Vathana Channel YouTube) រួមមានដូចជាលោក ឯក ស៊ីដេ លោក ជិន វឌ្ឍនា លោក ឌី ថារ៉ែន នាយ ពែកមី អ្នកនាង ឆោម ច័ន្ទនេត និងអ្នកនាង ពេជ្រ ចរិយា ផងដែរ។
មានបទចម្រៀងមួយចំនួន ដែលទទួលបានភាពល្បីពីមហាជនដូចជាបទ«ផ្លែស្នេហ៍» បទ«អប្សរជ្រោះភ្នំគូលែន» «សុំពឹងអ្នកពាម» បទ«ស្វាយជ្រំទ្រនំខ្ញុំ» បទ«សំបុត្រមរណៈ» បទ«ព្រែកហ្លួងដួងចិត្ត» បទ«តួឯកជាយដែន» បទ«ម្ចាស់ កណ្តៀវស្នេហ៍» បទ«ទឹកឃ្មុំឦសាន» បទ«បណ្តាំភ្នំជីប៉ាង» និងបទ«បឹងធំ» ជាដើម រួមទាំងបទពីរោះៗជាច្រើនទៀត៕
