.jpg)
កញ្ញា សេរី វណ្ណកុសន ជាសិល្បករម្នាក់ក្នុងចំណោម ៣ រូប ដែលជាប់អាហារូបករណ៍
ភ្នំពេញៈ កម្មវិធីរដូវវប្បធម៌ដែលជាគំនិតផ្ដូចផ្ដើមរបស់អង្គការសិល្បៈខ្មែរអមតៈតាំងពីឆ្នាំ ២០១៨ គឺជាបណ្ដុំនៃកម្មវិធីសិល្បៈវប្បធម៌រួមមាន ការសម្ដែងស្នាដៃសិល្បៈទស្សនីយភាព សិក្ខាសាលា តថកថា និងភាពយន្តឯកសារខ្លីៗជាដើម។
កម្មវិធីរដូវវប្បធម៌នេះតែងធ្វើឡើងក្រោមប្រធានបទមួយជាក់លាក់ខុសគ្នាជារៀងរាល់ឆ្នាំ ដើម្បីលើកទឹកចិត្តឱ្យសិល្បករគ្រប់រូបកាន់តែមានគំនិតច្នៃប្រឌិតបង្កើតស្នាដៃនិងសកម្មភាពថ្មីជុំវិញប្រធានបទនីមួយៗតាមរយៈ «មូលនិធិដំឡើងស្នាដៃថ្មី» របស់អង្គការ។
បន្ទាប់ពីបញ្ចប់កម្មវិធីរដូវវប្បធម៌កាលពីខែឧសភាកន្លងទៅ អង្គការបានចាប់ផ្ដើមបន្តផ្សព្វផ្សាយឱ្យសិល្បករដាក់ពាក្យ ដើម្បីទទួលបានមូលនិធិធ្វើស្នាដៃរបស់ខ្លួនបង្ហាញជូនដល់ទស្សនិកជនទាំងនៅរាជធានីភ្នំពេញ និងតាមបណ្ដាខេត្តសម្រាប់ឆ្នាំ ២០២៣ ខាងមុខ ដោយថ្ងៃផុតកំណត់គឺរហូតដល់ថ្ងៃទី ១៥ ខែ សីហា ឆ្នាំ ២០២២។
កញ្ញា យ៉ុន សុខខន ជាប្រធានកម្មវិធីអភិវឌ្ឍសិល្បៈនៃអង្គការសិល្បៈខ្មែរអមតៈបានប្រាប់ ភ្នំពេញ ប៉ុស្តិ៍ថា៖ «មែនទែនទៅកម្មវិធីរដូវវប្បធម៌ជាកម្មវិធីប្រចាំឆ្នាំហើយយើងធ្វើតាំងពីឆ្នាំ ២០១៨ មកម្ល៉េះ។ ប៉ុន្តែក៏មានការខកខានក្នុងឆ្នាំ ២០១៩ និងឆ្នាំ ២០២១ ដូចនេះ ឆ្នាំ ២០២៣ ខាងមុខ នឹងជាលើកទី៤ របស់យើង»។
កញ្ញាឱ្យដឹងដែរថា គោលបំណងធំនៃកម្មវិធីរដូវវប្បធម៌ចែកចេញជា ២ ធំៗ។ ទី១ គឺប្រើកម្មវិធីជាវេទិកាសម្រាប់បង្ហាញពីទេពកោសល្យនិងគំនិតច្នៃប្រឌិតរបស់សិល្បករតាមរយៈរឿងរ៉ាវដែលមានអត្ថន័យពាក់ព័ន្ធនឹងសង្គមកម្ពុជានាពេលបច្ចុប្បន្ន។
បើតាមកញ្ញា យ៉ុន សុខខន ក្នុងនោះភាគច្រើនស្នាដៃដំឡើងដោយសិល្បករវ័យក្មេងដែលអង្គការដើរតួដូចជាក្បាលមេក្រូសម្រាប់ពួកគាត់ ដើម្បីឱ្យសំឡេងរបស់គាត់កាន់តែឮនិងជំរុញសិល្បៈពួកគាត់ឱ្យទៅ ១ កម្រិតទៀតដែលនិយាយពីបញ្ហាពិភពលោក។
ទី២ គឺអង្គការចង់បង្កើតជាកន្លែងដែលឱ្យសិល្បករ ប្រតិបត្តិករ ផ្នែកសិល្បៈវប្បធម៌ដូចជាអ្នកពាក់ព័ន្ធផ្សេងទៀត មានឱកាសក្នុងការដេញដោលផ្លាស់ប្តូរគំនិតយោបល់ ទស្សនៈផ្សេងៗនៅជុំវិញប្រធានបទដែលបានលើកឡើង។
កញ្ញា សុខខន បានបន្ថែមថា៖«ជារៀងរាល់ឆ្នាំយើងមានប្រធានបទផ្សេងៗហើយប្រធានបទហ្នឹងត្រូវបានប្រើជាទិសដៅក្នុងការរចនាសកម្មភាពក៏ដូចជាព្រឹត្តិការណ៍ទាំងមូលនៅក្នុងកម្មវិធី។ឧទាហរណ៍ក្នុងឆ្នាំ ២០២៣ ខាងមុខកម្មវិធីរដូវវប្បធម៌របស់យើងមានប្រធានបទ «តែឯង តែយើង»។ ដូចនេះរាល់ស្នាដៃ ឬកិច្ចពិភាក្សាអីនឹងត្រូវបានធ្វើឡើងជុំវិញប្រធានបទនេះ»។
កញ្ញាបានឱ្យដឹងដែរថា អ្វីដែលមានភាពខុសប្លែកសម្រាប់ឆ្នាំ ២០២៣ គឺកន្លងមក អង្គការតែងតែជាអ្នករៀបចំនិងរចនាកម្មវិធីខ្លួនឯង ប៉ុន្តែលើកនេះអង្គការបានជ្រើសរើសអ្នកជាប់អាហារូបករណ៍ដែលហៅថា «ទស្សនកម្មវិធីសិល្បៈ» ៣ រូប ដើម្បីឱ្យពួកគាត់ជាអ្នករៀបចំ និងរចនាកម្មវិធីរដូវវប្បធម៌ម្ដង។
សម្រាប់គោលដៅធំនៃ «ទស្សនកម្មវិធីសិល្បៈ» វិញ គឺចង់បណ្តុះបណ្តាលសក្តានុពលជំនាញនៃការរចនាកម្មវិធី ដល់អ្នកទទួលបានអាហារូបករណ៍ទាំង៣នាក់ដោយធ្វើការជាមួយអ្នកដឹកនាំដើម្បីកសាងសមត្ថភាពពួកគាត់ក្នុងការអនុវត្តការរចនាកម្មវិធីរដូវវប្បធម៌ខាងមុខ។
កញ្ញា សុខខន បញ្ជាក់ថា៖ «អ្នកជាប់អាហារូបករណ៍ទាំង៣រូប នឹងមានការអនុវត្តជាក់ស្ដែងដោយពួកគាត់នឹងជាអ្នកជ្រើសរើសប្រធានបទ ស្នាដៃ សកម្មភាពសិល្បករទាក់ទងនឹងប្រធានបទនិងចូលរួមជាផ្នែកមួយក្នុងការផ្សព្វផ្សាយជាមួយយើង។ ពួកគាត់ក៏មានទស្សនកិច្ចសិក្សាទៅឈៀងម៉ៃនិងបាងកក ហើយមានសកម្មភាព ទស្សនកិច្ចទៅទីតាំងសិល្បៈវប្បធម៌នៅក្នុងស្រុកដែរ»។
កញ្ញា សេរី វណ្ណកុសន ជាសិល្បករម្នាក់ក្នុងចំណោម៣រូបដែលទទួលបានអាហារូបករណ៍បាននិយាយថា កម្មវិធី «ទស្សនកម្មវិធីសិល្បៈ» នេះជាអ្វីដែលនៅក្នុងស្រុកខ្មែរមិនទាន់មាន ហើយកញ្ញាបានទទួលការបង្ហាត់បង្ហាញច្រើនពីអង្គការសិល្បៈខ្មែរអមតៈ។
ក្នុងនោះ គឺមានគ្រូដឹកនាំម្នាក់ជាអ្នកជួយណែនាំបន្ថែមទៅលើការងារដែលក្រុមកញ្ញាទាំង ៣ នាក់ (ស្រី ២ ប្រុស ១) ដូចជាការជ្រើសរើសប្រធានបទសម្រាប់កម្មវិធីធ្វើការជ្រើសរើសស្នាដៃឱ្យស្របទៅនឹងប្រធានបទដែលបានកំណត់ ហើយដើម្បីបញ្ចេញស្នាដៃរៀបចំកម្មវិធីទាំងមូល។
កញ្ញាបានចែករំលែកបន្ថែមទៅលើដំណើរការសិក្សាថា៖ «យើងបានទៅសិក្សាអំពីសិល្បករនៅថៃដែលគាត់មានជំនាញផ្នែករៀបចំបន្ទាប់មកយើងមកស្រុកខ្មែររៀនស្ដាប់ពីបទពិសោធវាគ្មិនក្នុងជំនាញរៀបចំហ្នឹងដែរមុននឹងយើងមានឱកាសអនុវត្តផ្ទាល់»។
ជាមន្ត្រីបម្រើការនៅសាលាភូមិន្ទវិចិត្រសិល្បៈហើយក៏ជាសិល្បករទម្រង់ក្បាច់បុរាណកញ្ញា វណ្ណ កុសន បានបកស្រាយពីហេតុផលដែលកញ្ញានិងក្រុមកញ្ញាជ្រើសរើសប្រធានបទ «តែឯង តែយើង»។
កញ្ញាបានរៀបរាប់ថា គឺដំបូងមើលទៅលើបទពិសោធរៀងៗខ្លួន អ្នកនៅជុំវិញខ្លួនក្នុងរង្វង់សិល្បៈនិងសង្គម ដូច្នេះក៏ចង់លើករឿងរ៉ាវទាក់ទងអំពីបុគ្គលិកភាពមកនិយាយ។
កញ្ញាបានបន្ថែមថា៖ «ផ្នត់គំនិតអវិជ្ជមានមួយចំនួនដែលមាននៅក្នុងសង្គមខ្មែរដែលកើតមានលើបុគ្គលឬមនុស្សដែលមានភាពខុសប្លែកពីគេបានជះឥទ្ធិពលទៅលើសកម្មភាពការគិតនិងប៉ះពាល់ផ្លូវចិត្តពួកគាត់ដោយរងសម្ពាធនូវការរើសអើង អាចទាំងខ្លួនគាត់ឬជំនាញរបស់ពួកគាត់។ ទោះជាយ៉ាងណា យើងជឿថា ប្រធានបទនេះនឹងបើកចំហឱ្យទាំងអស់គ្នាចូលរួមបកស្រាយទៅតាមការយល់ឃើញរៀងៗខ្លួនទាំងពីជ្រុងនៃគំនិតសិល្បករនិង អ្នកចូលរួមទស្សនាផងដែរ»។
ជាមួយនឹងការលើកឡើងដូចនេះ កញ្ញាក៏បានលើកទឹកចិត្តឱ្យសិល្បករចូលរួមដាក់ពាក្យក្នុង «មូលនិធិដំឡើងស្នាដៃថ្មី» ដែលតម្រូវឱ្យសិល្បករសាកល្បងអ្វីៗដែលថ្មីនិងដកពិសោធពីជំនាញខ្លួនឯងបន្ថែមទៀតដើម្បីឱ្យវាអាចកើតចេញជារូបរាងបាន។
ក្នុងនោះវណ្ណ កុសន បានឱ្យដឹងថានឹងមានការជ្រើសរើសយក ៤ ស្នាដៃ សម្រាប់គម្រោងសម្ដែងក្នុងអំឡុងខែ ២ នៅភ្នំពេញ និងខែមីនា ឆ្នាំ ២០២៣ តាមបណ្ដាខេត្ត។ សម្រាប់ «មូលនិធិដំឡើងស្នាដៃថ្មី» នេះសិល្បករនឹងទទួលបានថវិកាដល់ ៥ ០០០ ដុល្លារ សម្រាប់សា្នដៃទស្សនីយភាពបែបឌីជីថល និង ៤ ០០០ ដុល្លារ សម្រាប់សា្នដៃសម្ដែង។
ប្រសិនបើសិល្បករមានគំនិតថ្មីដែលចង់បង្ហាញ ឬការបកស្រាយអ្វីមួយដែលទាក់ទងនឹងប្រធានបទ «តែឯងតែយើង» អាចចូលរួមដាក់ពាក្យដែលនឹងផុតកំនត់នៅថ្ងៃ ១៥ ខែ សីហា ឆ្នាំ ២០២២។
កញ្ញា សុខខន បានបញ្ជាក់បន្ថែមដែរថា៖ «បើយើងមើលលើបរិបទរបស់យើង គឺសិល្បករយើងក៏មានគំនិតច្នៃប្រឌិតស្រាប់ហើយគ្រាន់តែខ្វះខាតថវិកាក្នុងការធ្វើឲ្យវាចេញជារូបរាង។ ជាជាងដែលយើងទៅរកស្នាដៃដែលមាន
ស្រាប់យើងស៊ូបង្កលទ្ធភាពឱ្យសិល្បករគិតហើយបង្កើតស្នាដៃថ្មី ដើម្បីឱ្យស៊ីចង្វាក់ជាមួយនឹងប្រធានបទរបស់យើងវិញ»៕
