ភ្នំពេញៈ ដោយសារមើលឃើញកង្វះខាត នៃធនធានមនុស្សផ្នែកឧស្សាហកម្មភាពយន្ត និងចង់បំពេញតម្រូវការអ្នកចាប់អារម្មណ៍លើវិស័យផលិតភាពយន្តខ្មែរនោះ ទើបក្រុមផលិតករជំនាញភាពយន្តមានបទពិសោធជាច្រើនឆ្នាំ បានបើកវគ្គបណ្តុះបណ្តាលផលិតភាពយន្តខ្នាតខ្លី ដែលមានរយៈពេល ៤ ខែ។
វគ្គសិក្សាផលិតភាពយន្តខ្លីនេះ នឹងចាប់ផ្តើមចូលរៀននៅថ្ងៃទី ១៣ ខែសីហា បន្តរហូតដល់ថ្ងៃទី ២៧ ខែ វិច្ឆិកា ឆ្នាំ ២០២២ ដែលរៀបចំឡើង ដោយក្រុមផលិតករជំនាញភាពយន្ត នៃវិទ្យាស្ថានជំនាញកម្ពុជា (PIC) ដោយសហការជាមួយដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) នៃសាកលវិទ្យាល័យភូមិន្ទភ្នំពេញ។
ក្រោយពីបញ្ចប់វគ្គបណ្តុះបណ្តាលផលិតភាពយន្តខ្នាតខ្លី លើកដំបូងនេះ សិក្ខាកាម អាចនឹងទទួលបានវិញ្ញាបនបត្របញ្ជាក់ការសិក្សា និងយល់ដឹងពីជំនាញបច្ចេកទេសមួយចំនួនក្នុងវិស័យផលិតភាពយន្ត រួមមាន ជំនាញសរសេរអត្ថបទភាពយន្តខ្លី ជំនាញគ្រប់គ្រងការផលិត ជំនាញដឹកនាំរឿង បច្ចេកទេសកាមេរ៉ា បច្ចេកទេសពន្លឺ បច្ចេកទេសកាត់តភាពយន្ត និងកែពណ៌ និងការផលិតភាពយន្តខ្នាតខ្លីផ្ទាល់ខ្លួនរួមគ្នាមួយក្រោយពីចប់វគ្គ។ នេះបើតាមលោកអ៊ុង ប៊ុនអ៊ី ជាគ្រូបណ្តុះបណ្តាលសម្រាប់វគ្គសិក្សាការផលិតភាពយន្តខ្នាតខ្លីលើជំនាញគ្រប់គ្រងការផលិត នៃវិទ្យាស្ថានជំនាញកម្ពុជា(PIC)ថ្មីៗនេះ។
លោក អ៊ុង ប៊ុនអ៊ី មានបទពិសោធជាង ១០ ឆ្នាំ លើការបណ្តុះបណ្តាលជំនាញប្រព័ន្ធផ្សព្វផ្សាយនៅសាកលវិទ្យាល័យភូមិន្ទភ្នំពេញ និងជាអ្នកជំនាញផ្នែកផលិតវីដេអូ កម្មវិធីទូរទស្សន៍ ភាពយន្តឯកសារ និងភាពយន្តខ្នាតខ្លីតាំងពីឆ្នាំ ២០០៨ មក។ លោកប៊ុនអ៊ី បានបញ្ចប់ថ្នាក់បរិញ្ញាបត្រជាន់ខ្ពស់ ផ្នែកសារព័ត៌មានអន្តរជាតិ ពីសាកលវិទ្យាល័យ Hong Kong Baptist និងទទួលបានវិញ្ញាបនបត្រវិជ្ជាជីវៈផ្នែកពហុប្រព័ន្ធផ្សព្វផ្សាយពីវិទ្យាស្ថានសារព័ត៌មានអន្តរជាតិ ប្រទេសអាល្លឺម៉ង់។
លោកប្រាប់ពីគោលបំណងបើកវគ្គបណ្តុះបណ្តាល និងលក្ខខណ្ឌចូលរៀន របស់សិក្ខាកាមថា៖ «ដោយសារបានមើលឃើញពីភាពខ្វះខាតនៃធនធានមនុស្សក្នុងវិស័យឧស្សាហកម្មភាពយន្តខ្មែរនោះ ទើបក្រុមយើងបានរៀបចំបើកវគ្គបណ្តុះបណ្តាលផលិតភាពយន្តខ្នាតខ្លីជាលើកដំបូង ដើម្បីបំពេញទៅតាមតម្រូវការជាក់ស្តែងរបស់អ្នកនិយមស្រឡាញ់ ឬចាប់អារម្មណ៍លើវិស័យភាពយន្តដែលត្រូវការសិក្សារយៈពេលខ្លី តែទទួលបានចំណេះជំនាញអាចប្រែក្លាយខ្លួនឯងទៅជាអ្នកផលិតភាពយន្តខ្នាតខ្លីបាន»។
លោកប៊ុនអ៊ី ឱ្យដឹងថា៖«វគ្គសិក្សានេះ យើងបើកទូលាយទៅដល់សាធារណជន សិស្ស និងនិស្សិតចូលរៀន។ យើងនឹងទទួលយកចំនួនត្រឹមចន្លោះពី ១៥ ទៅ ២០ នាក់ប៉ុណ្ណោះ សម្រាប់វគ្គបណ្តុះបណ្តាល១វគ្គៗ។ ចំពោះវគ្គដំបូងនេះ យើងនឹងចាប់ផ្តើមចូលរៀននៅថ្ងៃទី ១៣ ខែសីហា រហូតដល់ថ្ងៃទី ២៧ ខែ វិច្ចិកា ឆ្នាំ ២០២២ ក្នុងតម្លៃសិក្សាម្នាក់ចំនួន ៤៩៥ ដុល្លារ។ ហើយសិក្ខាកាមអាចទំនាក់ទំនងចុះឈ្មោះបានតាមលេខទូរស័ព្ទ 012 502 836/015 456767»។
លោក អ៊ឹង ប៊ុនអ៊ី ក៏បានបន្ថែមដែរថា ខាងសាលាក៏មានការបញ្ចុះតម្លៃ សម្រាប់ការចុះឈ្មោះរួមគ្នាជាក្រុម ដូចជា ក្រុមមានចំនួន ៣ នាក់ ទទួលបានការបញ្ចុះតម្លៃ ១៥ ភាគរយ និងក្រុមចំនួន៥នាក់ ទទួលបានការបញ្ចុះតម្លៃ ២០ ភាគរយ។ ហើយដើម្បីលើកទឹកចិត្តស្រ្តីក្នុងវិស័យភាពយន្ត សាលាក៏មានការបញ្ចុះតម្លៃពិសេស សម្រាប់សិស្សស្រីចំនួន ២០ ភាគរយ។
សម្រាប់ការសិក្សាវគ្គផលិតភាពយន្តខ្នាតខ្លីនេះ ស្ថិតក្រោមការបណ្តុះបណ្តាល របស់ក្រុមគ្រូបង្រៀន សុទ្ធតែជាអ្នកជំនាញផ្នែកភាពយន្ត និងវីដេអូផ្ទាល់ ដែលបានបញ្ចប់ការសិក្សា និងធ្លាប់ទទួលបានការបណ្តុះបណ្តាលពីសាកលវិទ្យាល័យល្បីៗទាំងក្នុងស្រុក និងក្រៅស្រុក និងមានបទពិសោធជាច្រើនឆ្នាំក្នុងវិស័យភាពយន្ត។
លោក ញ៉ែម ពិសិដ្ឋ ជាគ្រូបណ្តុះបណ្តាលម្នាក់លើជំនាញដឹកនាំរឿង ហើយបច្ចុប្បន្ន លោកពិសិដ្ឋ ជាគ្រូផ្នែកផលិតវីដេអូ នៅសាកលវិទ្យាល័យភូមិន្ទភ្នំពេញ និងជាអ្នកដឹកនាំរឿងឯករាជ្យសម្រាប់ភាពយន្តខ្នាតខ្នី ភាពយន្តឯកសារ វីដេអូផ្សព្វផ្សាយ និងមានបទពិសោធលើវិស័យនេះតាំងពីឆ្នាំ ២០១៣។ លោក ពិសិដ្ឋ បានបញ្ចប់ថ្នាក់បរិញ្ញាបត្រ ផ្នែកគ្រប់គ្រងប្រព័ន្ធផ្សព្វផ្សាយពីសាកលវិទ្យាល័យភូមិន្ទភ្នំពេញ។
កញ្ញា សុធា អ៊ីណេស គ្រូបណ្តុះបណ្តាលលើជំនាញនិពន្ធអត្ថបទភាពយន្ត ដែលបច្ចុប្បន្ន កញ្ញាជាគ្រូផ្នែកផលិតវីដេអូនៅសាកលវិទ្យាល័យភូមិន្ទភ្នំពេញ និងជាផលិតករភាពយន្តឯករាជ្យ។ កញ្ញាមានបទពិសោធផ្នែកផលិតភាពយន្ត ដឹកនាំរឿង និងនិពន្ធអត្ថបទភាពយន្ត តាំងពីឆ្នាំ ២០១១។ កញ្ញា អ៊ីណេស បានបញ្ចប់ថ្នាក់បរិញ្ញាបត្រ ផ្នែកគ្រប់គ្រងប្រព័ន្ធផ្សព្វផ្សាយពីសាកលវិទ្យាល័យភូមិន្ទភ្នំពេញ។
លោក មុនី កណ្ណដារង្គ ជាគ្រូបណ្តុះបណ្តាលម្នាក់លើជំនាញដឹកនាំរឿង។ បច្ចុប្បន្នលោក ជាអ្នកដឹកនាំរឿងឯករាជ្យ សម្រាប់ភាពយន្តខ្នាតខ្លី និងវីដេអូផ្សព្វផ្សាយពាណិជ្ជកម្ម និងមានបទពិសោធក្នុងវិស័យនេះតាំងពីឆ្នាំ២០១២។ លោកកណ្ណដារង្គ បានបញ្ចប់ថ្នាក់បរិញ្ញាបត្រជាន់ខ្ពស់ផ្នែកភាពយន្ត និងវីដេអូ ពីសាកលវិទ្យាល័យ Dongseo ប្រទេសកូរ៉េខាងត្បូង។
លោក ហ៊ីម ធីដេត ជាគ្រូបណ្តុះបណ្តាលលើជំនាញ Cinematography និងបច្ចេកទេសកាត់តភាពយន្ត។ បច្ចុប្បន្នលោកជាអ្នក Cinematographer និងអ្នកកាត់ត សម្រាប់ភាពយន្តខ្នាតខ្លី ភាពយន្តខ្នាតវែង វីដេអូផ្សព្វផ្សាយពាណិជ្ជកម្ម។ លោកមានបទពិសោធក្នុងវិស័យនេះពីឆ្នាំ ២០១៧ មក។ លោកធីដេតបានបញ្ចប់ថ្នាក់បរិញ្ញាបត្រផ្នែក Cinematography ពីសាកលវិទ្យាល័យ Dongseo ប្រទេសកូរ៉េខាងត្បូង។
ប្រធាននាយកដ្ឋានភាពយន្ត នៃក្រសួងវប្បធម៌ និងវិចិត្រសិល្បៈ លោក ប៉ុក បូរក្ស បានសម្តែងការសាទរ និងគាំទ្រចំពោះការបើកវគ្គបណ្តុះបណ្តាលវគ្គខ្លី នៃការផលិតភាពយន្តខ្នាតខ្លីនេះផងដែរ ព្រោះថា សកម្មភាពនេះ គឺជាការចូលរួមចំណែកក្នុងការបណ្តុះធនធានមនុស្សផ្នែកវិស័យភាពយន្តនៅប្រទេសកម្ពុជា។
លោក បូរក្ស បញ្ជាក់ថា៖ «ទោះបីនេះ គឺជាវគ្គសិក្សារយៈពេលខ្លី មិនដូចជាការបណ្តុះបណ្តាលបែបកម្រិតឆ្នាំសិក្សានៅមហាវិទ្យាល័យផ្សេងៗទៀតក្តី ក៏វគ្គសិក្សានេះ មានសារៈសំខាន់ណាស់ក្នុងការបណ្តុះធនធានមនុស្សលើវិស័យភាពយន្តខ្មែរ»។
លោកបន្ថែមថា៖ «ការពិតទៅសម្រាប់ធនធាន នៃវិស័យភាពយន្តនេះ ក៏ពិបាកក្នុងការបណ្តុះបណ្តាលផងដែរ គឺទាមទារឱ្យសិក្ខាកាមមានទេពកោសល្យ និងស្រឡាញ់ចូលចិត្តផ្នែកនេះខ្លាំង ទើបអាចក្លាយជាគ្រាប់ពូជបន្តទៅថ្ងៃមុខ។ យើងពិតជាគាំទ្រ និងកោតសរសើរក្រុមផលិតករនៃវិទ្យាស្ថានជំនាញកម្ពុជា (PIC) ដែលបានបើកវគ្គបណ្តុះបណ្តាលនេះឡើង សម្រាប់បណ្តុះ និងបង្កើតធនធានមនុស្សលើវិស័យភាពយន្ត»៕