.jpg)
ជាងកាត់សក់ ២ នាក់ក្នុងពេលកំពុងកាត់សក់ជូនអតិថិជននៅហាងមួយកាលពីកន្លងមក ។ រូបថត សហការី
ភ្នំពេញ: យុវជន ជីម ប៉ូលី បានបញ្ចប់ការសិក្សាបរិញ្ញាបត្រផ្នែកធនាគារហិរញ្ញវត្ថុ និងផ្នែកភាសាអង់គ្លេសសម្រាប់អាជីវកម្មនៅក្នុងស្រុករួចបន្ដការសិក្សាអនុបណ្ឌិតផ្នែកគ្រប់គ្រងពាណិជ្ជកម្មពីប្រទេសអូស្ត្រាលី។ លើសពីនេះ ពេលវិលមកមាតុភូមិវិញ លោក ប៉ូលី បានធ្វើជានាយកគ្រប់គ្រងក្រុមហ៊ុនជាច្រើន។
យ៉ាងណាមិញ គ្មាននរណាជឿថា នាយកគ្រប់គ្រងក្រុមហ៊ុន TADA ប្រធានផ្នែកនៅធនាគារវីង ក្រុមហ៊ុន Uber ក្រុមហ៊ុន Cellcard និងក្រុមហ៊ុន Ezecom បោះបង់ចំណូលរាប់ពាន់ដុល្លារក្នុង ១ ខែ មកបើកហាងកាត់សក់ដោយគ្មានជំនាញផ្នែកនេះទាល់តែសោះនោះទេ។
លោក ប៉ូលី ដែលកាន់តំណែងជាប្រធានគ្រប់គ្រងនៅក្រុមហ៊ុន Cellcard ពេលបញ្ចប់ការសិក្សានៅបរទេសបានប្រាប់ ភ្នំពេញ ប៉ុស្ដិ៍ថា៖ «ការជំរុញចិត្ដខ្ញុំក្នុងការបង្កើតមុខរបរកាត់សក់នេះ ដោយសារមើលឃើញពីកង្វះខាតស្តង់ដា និងឱកាសរីកចម្រើនខ្ពស់បើប្រៀបនឹងប្រទេសអភិវឌ្ឍន៍ ហើយណាមួយខ្ញុំមានទឹកចិត្តចង់ជួយបណ្តុះបណ្តាលជំនាញ និងបង្កើតការងារធ្វើដល់កូនខ្មែរ»។
ឆ្លើយតបនឹងទស្សនៈមួយចំនួនដែលយល់ថា ជាងកាត់សក់ជារបរមិនពិតប្រាកដ ឬរបរសម្រាប់មនុស្សទាល់ច្រក លោក ប៉ូលី បច្ចុប្បន្ន អាយុ ៣៣ ឆ្នាំ បានឱ្យដឹងថា តាមពិតបើនៅប្រទេសអភិវឌ្ឍន៍ វាជារបរមួយដ៏ថ្លៃថ្នូរ ពិបាកធ្វើ និងតម្រូវឱ្យមានទេពកោសល្យខ្ពស់ វាអាចរកចំណូលបានច្រើន។
យុវជនដែលមើលឃើញឱកាសខ្ពស់ចំពោះរបរកាត់សក់នៅកម្ពុជារូបនេះបាននិយាយថា៖ «ដូច្នេះយើងឃើញបញ្ហានេះជាឱកាសមួយក្នុងការអភិវឌ្ឍវិស័យកាត់សក់ឱ្យមានការរីកចម្រើន»។
ដោយចាប់ផ្ដើមដំណើរការហាងកាត់សក់ផ្ទាល់ខ្លួននៅពាក់កណ្ដាលឆ្នាំ ២០១៩ លោក ប៉ូលី បានអះអាងថា លោកខ្លួនឯងគ្មានជំនាញខាងកាត់សក់នោះទេ តែលោកចាប់ផ្ដើមដោយក្ដីស្រឡាញ់ និងមានជំនឿចិត្ដថា លោកអាចធ្វើបាន ទោះបីជាមិនទាន់មានជំនាញលើវិស័យនេះយ៉ាងណាក៏ដោយ។
លោក ប៉ូលី បានយល់ស្របថា បើបើកហាងដើម្បីឆាប់ទាញយកចំណូលរយៈពេលខ្លី ប្រហែលជាលោកមិនហ៊ានប្រថុយនោះទេ តែលោកសម្លឹងមើលវែងឆ្ងាយ និងការរីកចម្រើនរយៈពេលយូរចំពោះរបរហាងកាត់សក់នេះ។
លោកបានឱ្យដឹងថា៖ «បើថ្ងៃក្រោយយើងអាចកសាងវិស័យនេះឱ្យរីកចម្រើន មិនត្រឹមតែយើងអាចទទួលផលចំណូលបានល្អនោះទេ តែថែមទាំងបានជួយកូនខ្មែរជាច្រើនមានការងារធ្វើ និងបានជួយដល់អតិថិជនជាច្រើនអាចទទួលបានសេវាប្រកបដោយស្ដង់ដាល្អ»។
លោកទទួលស្គាល់ថា នៅកម្ពុជាមានហាងកាត់សក់ជាច្រើនមិនអាចគិតថ្លៃខ្ពស់ពីភ្ញៀវបានដូចនៅបណ្ដាប្រទេសជឿនលឿននោះទេ។ លោកបានលើកឡើងថា៖ «ទី១ យើងមិនទាន់មានស្ដង់ដាច្បាស់លាស់ ទី២ ប្រជាជនក៏មិនទាន់ហ៊ានចំណាយខ្ពស់នៅឡើយ»។
ទោះជាយ៉ាងណា លោកបានអះអាងថា ទាំងអស់នេះនឹងមានការផ្លាស់ប្ដូរ ពីព្រោះនិន្នាការប្រទេសកម្ពុជាកំពុងតែអភិវឌ្ឍទៅមុខឥតឈប់ឈរ ហើយចំនួនអ្នកដែលត្រូវការស្ដង់ដាល្អកាន់តែច្រើន ហើយអ្នកត្រូវការការងារក៏កាន់តែច្រើន។ ដូច្នេះ ការបំពាក់បំប៉ន និងបណ្ដុះបណ្ដាលផ្នែកកាត់សក់មានសារៈសំខាន់ណាស់។
លោក ប៉ូលី បានបន្ដថា៖ «ចំពោះបញ្ហាស្ដង់ដាសម្រាប់ហាងរបស់យើង ដែលមានឈ្មោះខុសៗគ្នា តែហាងនីមួយៗសុទ្ធតែមានស្ដង់ដា ពីព្រោះទាំងការតុបតែង កម្រិតអនាម័យ កម្រិតជំនាញរបស់បុគ្គលិកសុទ្ធតែត្រូវបានគិតគូរ និងរៀបចំយ៉ាងយកចិត្ដទុកដាក់ដើម្បីធានាថា ពីហាងមួយទៅហាងមួយ មានស្ដង់ដាដូចគ្នា ហើយអតិថិជនពុំចាំបាច់មករកហាងដដែលៗក៏បាន ពោលគឺពួកគាត់អាចទៅទីណាក៏ទទួលបានបទពិសោធល្អដូចៗគ្នា»។
ចំពោះការចាប់ដៃគូជាមួយជាងកាត់សក់ក្នុងស្រុក លោក អេង ប៉ាវ ដែលបានសិក្សាជំនាញកាត់សក់នេះដំបូងនៅឆ្នាំ ២០០៩ លោកប៉ូលីបានអះអាងថា ជាងកាត់សក់ដែលលេងខ្លួនបែបទាន់សម័យ ជាមួយនឹងក្រវិលខ្មៅលើទងត្រចៀកទាំងសងខាង និងស្នាមសាក់លើដៃទាំងគូជាអ្នកមានជំនាញនិងមានទេពកោសល្យល្អឥតខ្ចោះ។
លើសពីនេះលោកបន្ដថា អេង ប៉ាវ ជាមនុស្សល្អមានភាពស្មោះត្រង់ និងមានចក្ខុវិស័យដូចគ្នាចំពោះវិស័យនេះ ជាពិសេសអ្នកទាំង ២ មានជំនាញខុសគ្នារៀងខ្លួន ដែលអាចបំពេញភាពខ្វះខាតឱ្យគ្នាទៅវិញទៅមក។
ថ្លែងស្រដៀងគ្នានេះដែរ លោក ប៉ាវ ស្ថិតក្នុងបន្ទប់តុបតែងដោយរូបថតនិងវត្ថុចាស់ៗបន្សល់ពីទសវត្សរ៍សម័យមាស ចង់ចាប់ដៃគូជាមួយលោក ប៉ូលី ដោយសារពួកគេចង់អភិវឌ្ឍវិស័យកាត់សក់នៅកម្ពុជាឱ្យមានកម្រិតស្ដង់ដា អាចប្រកួតប្រជែងទីផ្សារអន្ដរជាតិ ចង់ជួយជាងកាត់សក់បង្កើនប្រាក់ចំណូលខ្ពស់សមរម្យនិងកែប្រែវិស័យមួយនេះពីលក្ខណៈប្រពៃណីឱ្យទាន់សម័យ។
លោក ប៉ាវ អាយុ ៣០ ឆ្នាំ ដែលបញ្ចប់ការសិក្សាត្រឹមឆ្នាំទី២ ជំនាញសេដ្ឋកិច្ច នៅសាកវិទ្យាល័យ ចម្រើនពហុបច្ចេកវិទ្យាបានប្រាប់ ភ្នំពេញ ប៉ុស្ដិ៍ថា៖ «ដោយមើលឃើញពីសមត្ថភាព ស្នាដៃដឹកនាំអាជីវកម្ម និងមើលឃើញពីកខ្វះខាតក្រុមការងារដែលមានសមត្ថភាពខ្ពស់ក្នុងការជំរុញអាជីវកម្មឱ្យរីកចម្រើន លោក ប៉ូលី ជាជម្រើសដ៏ស័ក្ដិសមបំផុត។ គាត់មានការយល់ដឹងខ្ពស់ជាមួយបទពិសោធ រួមទាំងយើងទាំង២មានជំនាញផ្សេងៗដែលជួយបំពេញឱ្យគ្នា»។
ការកាត់សក់ទាំង៣សាខារបស់យុវជនទាំង ២ នាក់ រួមមាន ហាង Kambuja ជាហាងលំដាប់ខ្ពស់តម្លៃកាត់សក់ម្ដង ១៥ ដុល្លារ, ហាង Simple ជាហាងលំដាប់មធ្យមមាន ៦ សាខា តម្លៃ ៧ ដុល្លារ និងហាង 5 Barber ជាហាងលំដាប់ទាបមាន ២ សាខា តម្លៃ ២,៥ ដុល្លារ។
លោក ប៉ាវ ដែលទទួលបានការបណ្ដុះបណ្ដាលពីក្នុងនិងក្រៅប្រទេសក៏ដូចជា ការបំបែកស្ទីលម៉ូដសក់ផ្ទាល់ខ្លួនបានឱ្យដឹងថា បច្ចុប្បន្នលោកជាអ្នកគ្រប់គ្រងហាងកាត់សក់នៅគ្រប់សាខា និងឆ្លៀតពេលទទួលភ្ញៀវដែលណាត់ជួបមុន ដែលលោកកាត់នៅ Kambuja Barbarshop មានទីតាំងនៅទួលទំពូងក្នុងតម្លៃ ៣២ ដុល្លារ។
ជាមួយការបើកហាងដែលមានតម្លៃកាត់សក់ចាប់ពី ២,៥ ដុល្លារ រហូតដល់ ១៥ ដុល្លារ ពួកគេចង់ឱ្យគ្រប់ប្រភេទអតិថិជនអាចទទួលបាននូវការកាត់សក់ស្ដង់ដាទៅតាមលទ្ធភាពរបស់អតិថិជនហើយពួកគេចង់ផ្ដល់ឱកាសដល់បុគ្គលិកមានជំនាញកម្រិតមធ្យមអាចមើលឃើញពីឱកាសអភិវឌ្ឍខ្លួនក៏ដូចជា អាចឡើងទៅកាត់នៅហាងមានស្ដង់ដាខ្ពស់បំផុត។
ពួកគេបានឱ្យដឹងពីភាពខុសគ្នារវាងហាងតម្លៃ ២,៥ ដុល្លារ និងហាងតម្លៃ ១៥ ដុល្លារថា វាខុសលើទំហំហាង ការរៀបចំតុបតែង កម្រិតស្ដង់ដាបុគ្គលិក ការផ្ដល់ជូនបន្ថែម ដូចជា កាហ្វេជាដើម។ ប៉ុន្ដែអ្នកទាំង ២ អះអាងថា ពីហាង ១ ទៅហាង ១ ទាំង ៦ សាខា ផ្ដោតលើស្ដង់ដារួមដែលល្អគ្រប់គ្រាន់សម្រាប់អតិថិជន។
ដោយមានមហិច្ឆតាពង្រីករហូតដល់ ១០០ សាខា អ្នកជំនាញផ្នែកគ្រប់គ្រងអាជីវកម្មនិងអ្នកជំនាញលេងម៉ូដសក់រូបនេះ រំពឹងថា នឹងប្រើរយៈពេល ២-៣ ឆ្នាំ។ ប៉ុន្ដែពួកគេបានបង្ហាញពីការយល់ឃើញថា វាមិនមែនជារឿងសំខាន់បំផុតនោះទេ អ្វីដែលស្ថិតក្នុងគំនិតស្នូលរបស់ពួកគេសេវាកម្មប្រកបដោយស្ដង់ដាឋិតឋេរនិងធានាឱ្យបាននូវការរីកចម្រើនរាល់ថ្ងៃ។
យោងតាមលោក ប៉ូលី បានឱ្យដឹងថា៖ «ម្យ៉ាងវិញទៀត យើងក៏គ្មានមហិច្ឆតាចង់កាន់កាប់ហាងទាំងអស់នោះទេ យើងគ្រាន់តែបង្កើតសាខា និងរៀបចំលក្ខណៈ Franchise ដើម្បីឱ្យប្រជាជន និងអតិថិជនទូទាំងប្រទេសអាចទទួលបាននូវស្ដង់ដានៃការកាត់សក់រួមមួយ»។
ដោយអះអាងថា បុគ្គលិកសម្រាប់សាខាហាងទាំង ៦ ត្រូវបានបណ្ដុះបណ្ដាលបន្ថែមពី៣ខែទៅ ១ ឆ្នាំទៅតាមបទពិសោធ និងភាពឈ្លាសវៃរបស់ពួកគេ លោកប៉ាវបានអះអាងថា លោកគ្មានហេតុផលអ្វីដែលត្រូវចាកចោលក្ដីស្រមៃបង្កើតហាង ១០០ សាខានោះទេ ដោយនេះជាការកំណត់គោលដៅរបស់ពួកគេ។
លោក ប៉ូលី បានបញ្ជាក់ថា៖ «ខ្ញុំគិតថាវិស័យនេះមិនមែនជាវិស័យថ្មីទេ តែឱកាសនៅតែខ្ពស់សម្រាប់ប្រទេសយើង។ ដូច្នេះខ្ញុំសូមអំពាវនាវឱ្យមានការចូលរួមពីសំណាក់អ្នកវិនិយោគនានា ជាងកាត់សក់ និងហាងផ្សេងៗនៅទូទាំងប្រទេសដើម្បីជួយគ្នាអភិវឌ្ឍឱ្យរីកចម្រើនទៅមុខ»៕
