ភ្នំពេញៈ ក្រោយពីទទួលបានការអនុញ្ញាតពីរដ្ឋមន្ត្រីក្រសួងវប្បធម៌ និងវិចិត្រសិល្បៈ គណៈគ្រប់គ្រង លោកគ្រូ អ្នកគ្រូ និងសិស្សានុសិស្ស នៃសាលាមធ្យមវិចិត្រសិល្បៈ ស្ថិតក្រោមឱវាទក្រសួងវប្បធម៌ មានការរៀបចំពិធីចុះហត្ថលេខាលើកិច្ចព្រមព្រៀង ស្តីពីការផ្លាស់ប្តូរសិល្បៈ ទស្សនីយភាព និងពង្រីកទំនាក់ទំនងមិត្តភាព រវាងសាលាមធ្យមវិចិត្រសិល្បៈ ជាមួយសមាគមអតីតនិស្សិតសាកលវិទ្យាល័យវិចិត្រសិល្បៈខ្មែរ នៅប្រទេសបារាំងដែលហៅកាត់ថា «AEKUBACF»។
ពិធីចុះហត្ថលេខាលើកិច្ចព្រមព្រៀងស្តីពីការផ្លាស់ប្តូរសិល្បៈទស្សនីយភាព និងពង្រីកទំនាក់ទំនងមិត្តភាពនេះ ត្រូវបានធ្វើឡើងនៅឯសាលមហោស្រពពិមានអាកាស នៃសាលាមធ្យមវិចិត្រសិល្បៈ កាលពីថ្ងៃទី ១៧ ខែ សីហា ឆ្នាំ ២០២២ ដោយមានការចូលរួមពីសំណាក់លោក ហេង កំសាន្ត ជានាយកសាលាមធ្យមវិចិត្រសិល្បៈ និងអ្នកស្រី អ៊ុង វ៉ានថា ជាប្រធានសមាគមអតីតនិស្សិតសាកលវិទ្យាល័យវិចិត្រសិល្បៈខ្មែរនៅប្រទេសបារាំង។
លោក ហេង កំសាន្ត ប្រាប់ ភ្នំពេញ ប៉ុស្តិ៍ថា៖ «សម្រាប់កិច្ចព្រៀមព្រៀងនោះ យើងមានកិច្ចពិភាក្សារួមគ្នាលើ ៩ ចំណុចផ្សេងៗ ដោយគោលបំណងសំខាន់គឺចង់បង្កើតឱ្យមានការផ្លាស់ប្តូរផ្នែកសិល្បៈរវាងសិស្សានុសិស្សសាលាមធ្យមវិចិត្រសិល្បៈនៅប្រទេសខ្មែរ និងសិស្សានុសិស្សជាកូនខ្មែរ ដែលកើត និងកំពុងតែរស់នៅប្រទេសបារាំង កំពុងតែខ្វះខាតធនធានគ្រូបង្ហាត់បង្រៀនផ្នែកសិល្បៈមួយចំនួន ដូចជា របាំ ល្ខោនបាសាក់ និងល្ខោនយីកេជាដើម»។
លោក កំសាន្ត បន្តថា៖ «ដោយសារមើលឃើញថា នារយៈពេល ១០-២០ ឆ្នាំចុងក្រោយនេះ វិស័យសិល្បៈខាងលើនេះ មានការស្រុតចុះនូវប្រជាប្រិយភាព ទើបនាំឱ្យមានការចុះកិច្ចព្រមព្រៀងគ្នារវាងសាលាមធ្យមវិចិត្រសិល្បៈ និងសមាគមសិល្បៈ AEKUBACF ប្រទេសបារាំង ដែលនឹងមានការរៀបចំនូវគម្រោងព្រឹត្តិការណ៍សម្តែងរួមគ្នារបស់សិស្សានុសិស្សទាំង ២ ភាគី ដោយចាប់ផ្តើមពីឆ្នាំ ២០២៣ តទៅ»។
គម្រោងព្រឹត្តិការណ៍សម្តែងសិល្បៈនោះ ផ្តោតសំខាន់លើការយកទស្សនីយភាពនៃការសម្តែងសាច់រឿងនានា ទៅតាមទម្រង់សិល្បៈល្ខោនបាសាក់ និងលោ្ខនយីកេ និងរបាំផងដែរ។ លើសពីនេះ ក៏នឹងមានការផ្លាស់ប្តូរគ្នារវាងគ្រូបង្រៀនសិល្បៈនៅសាលាមធ្យមវិចិត្រសិល្បៈក្នុងស្រុកខ្មែរ និងគ្រូខ្មែរបង្រៀនសិល្បៈនៅបារាំងទៀតផង។ ចំពោះគោលដៅនៃកិច្ចព្រមព្រៀងនេះ នឹងចូលរួមក្នុងការលើកស្ទួយទម្រង់សិល្បៈដែលស្រុតចុះប្រជាប្រិយភាពនេះឡើងមកវិញផងដែរ។ នេះបើតាមលោកហេង កំសាន្ត។
បើតាមលោក ហេង កំសាន្ត សមាគម AEKUBACF នៅប្រទេសបារាំង គឺមានទ្រង់ទ្រាយធំសម្រាប់បណ្តុះបណ្តាលសិល្បៈខ្មែរដល់យុវជន ឬកូនខ្មែររស់នៅប្រទេសបារាំង ដោយខាងសមាគម មានការបែងចែកជាផ្នែកសំខាន់ៗធំចំនួន ៣ គឺមានផ្នែកសិល្បៈទស្សនីយភាព ផ្នែកក្រុមគ្រូពេទ្យស្ម័គ្រចិត្ត និងផ្នែកស្រាវជ្រាវ។
នាយកសាលាមធ្យមវិចិត្រសិល្បៈរូបនេះ បញ្ជាក់ថា សម្រាប់វត្តមាន នៃក្រុមសមាគម AEKUBACF នៅប្រទេសបារាំង នៅប្រទេសកម្ពុជានាពេលថ្មីនេះ ក្នុងបេសកកម្មរយៈពេល២សប្តាហ៍បាននាំយកក្រុមទាំង៣ផ្នែកនោះមកតែម្តង។ ១ ក្រុម នៅក្នុងចំណោម៣ផ្នែក គឺជាក្រុមសម្តែងសិល្បៈ ដែលបានសម្តែងសិល្បៈទស្សនីយភាពនៅសាលមហោស្រពចុតមុខ កាលពីថ្ងៃទី ១៥ ខែ សីហា ឆ្នាំ ២០២២។
លោក កំសាន្ត ឱ្យដឹងថា៖ « ១ ក្រុមទៀតបានទៅធ្វើកិច្ចការពួកគេនៅខេត្តសៀមរាប និងក្រុមទី៣ ជាក្រុមបានជួយចាត់ចែងការងារ នៃពិធីចុះហត្ថលេខាលើកិច្ចព្រមព្រៀង ស្តីពីការផ្លាស់ប្តូរសិល្បៈ ទស្សនីយភាព និងពង្រីកទំនាក់ទំនង មិត្តភាព រវាងសាលាមធ្យមវិចិត្រសិល្បៈ ជាមួយនឹងសមាគមន៍សិល្បៈ AEKUBACF ប្រទេសបារាំង នៅសាលមហោស្រពពិមានអាកាសនៃសាលាមធ្យមវិចិត្រសិល្បៈ កាលពីថ្ងៃទី ១៧ ខែ សីហា ឆ្នាំ ២០២២»៕