ជីវិតកុមារភាពក្រីក្រលំបាករបស់កញ្ញា ប្រ៊េនឌី មេយ័រស៍ (Brandy Myers) ត្រូវបានកំដរបរិយាកាសឱ្យស្រាកស្រាន្តដោយបទចម្រៀងខ្មែរនៅទឹកដីសហរដ្ឋអាមេរិក។ ការចងចាំងដ៏ដិតដាមនេះបានធ្វើឱ្យកញ្ញា ប្រ៊េនឌី ចង់ចេះភាសាខ្មែរ និងជម្នះរៀនវាខ្លួនឯង ទាំងពិបាករកសៀវភៅសិក្សា និងគ្មាននរណាជួយបង្រៀនទាល់តែសោះ។
បទពិសោធនេះបានធ្វើឱ្យកញ្ញាបង្កើត Khemara Kids ដើម្បីត្រួសត្រាយផ្លូវដល់កូនខ្មែរជំនាន់ក្រោយនៅសហរដ្ឋអាមេរិក ងាយស្រួលស្វែងរកសៀវភៅ និងសម្ភាររៀនភាសាខ្មែរ បន្តអត្តសញ្ញាណពូជពង្សសាវតារមិនថា ពួកគេស្ថិតនៅទីណាឡើយ។
កើតក្នុងឆ្នាំ ១៩៩៣ និងធំធាត់នៅក្នុងសហគមន៍មិនសូវសម្បូរខ្មែរនៃទីក្រុងកូឡុំប៊ើស រដ្ឋអូហាយ៉ូ កញ្ញា ប្រ៊េនឌី មានម្ដាយជាជនជាតិខ្មែរដែលកើតនៅទឹកដីខេត្តកំពង់ឆ្នាំង ដែលបានជម្លៀសខ្លួនតាំងពីកុមារមកកាន់សហរដ្ឋអាមេរិកក្នុងទសវត្សរ៍ទី៨០ បន្ទាប់ពីរបបប្រល័យពូជសាសន៍ដួលរំលំ។ ឪពុករបស់កញ្ញាជាជនជាតិអាមេរិកដើមកំណើតអាហ្វ្រិក។
ក្នុងនាមជាស្ត្រីខ្មែរកាត់ អាហ្វ្រិក និងអាមេរិក នាងបានប្រឈមនឹងបញ្ហាជាច្រើនតាំងពីក្មេងរហូតដល់ធំពេញវ័យសព្វថ្ងៃ ចាប់តាំងពីការរើសអើងជាតិសាសន៍ និងពណ៌សម្បុរ រហូតដល់ជីវភាពក្រីក្រ។
ស្ត្រីសហគ្រិននៅទីក្រុងឡុងប៊ិក រូបនេះបានប្រាប់ ភ្នំពេញ ប៉ុស្ដិ៍ថា៖ «មានប្រជាជនខ្មែរជាច្រើនមិនសូវគោរពផ្ដល់តម្លៃដល់ខ្ញុំទេ ព្រោះខ្ញុំមានជាតិសាសន៍ដើមកំណើតពាក់កណ្តាលស្បែកខ្មៅ ដូច្នេះគេមើលមិនឃើញ មិនចាត់ទុកខ្ញុំជាខ្មែរទេ»។
កញ្ញា ប្រ៊េនឌី ដែលធ្លាប់ធ្វើដំណើរមកកម្ពុជាជាច្រើនលើកមកហើយនោះ បានរំឭកប្រាប់ទៀតថា៖ «សូម្បីតែពេលខ្ញុំទៅស្រុកខ្មែរ ក៏ខ្ញុំតែងតែពន្យល់ប្រាប់អ្នកដទៃថា ខ្ញុំពិតជាខ្មែរមែន» ។
ក្រៅពីប្រឈមនឹងការរើសអើង កញ្ញាមិនអាចបំភ្លេចបានទេនូវកុមារភាពធំធាត់ក្នុងគ្រួសារក្រីក្រក្រោមការចិញ្ចឹមបីបាច់ពីអ្នកម្ដាយជាស្ត្រីមេម៉ាយ ដែលត្រូវធ្វើការជាច្រើនដើម្បីរកប្រាក់មកផ្គត់ផ្គង់គ្រួសារ។
យ៉ាងណាមិញ កញ្ញា ប្រ៊េនឌី ក៏ចងចាំនូវរឿងរ៉ាវល្អៗដូចជាអារម្មណ៍រីករាយនឹងសំឡេងតន្ត្រីខ្មែរដែលចាក់កំដរការជួបជុំក្រុមគ្រួសាររបស់នាង។
ស្ថាបនិក Khemara Kids វ័យ ២៩ ឆ្នាំរូបនេះ បានរៀបរាប់ទៀតថា៖ «អនុស្សាវរីយ៍កាលកុមារភាពរបស់ខ្ញុំគឺការស្ទូចត្រីជាមួយម៉ាក់ និងមីងរបស់ខ្ញុំ ហើយយើងស្តាប់ភ្លេងខ្មែរ ធ្វើម្ហូបខ្មែរជាមួយគ្នា និងលេងជាមួយបងប្អូនជីដូនមួយរបស់ខ្ញុំ»។
កញ្ញាបានប្រាប់ទៀតថា៖ «កាលនោះខ្ញុំមានអាយុប្រហែល ៨ ឆ្នាំ នៅពេលដែលខ្ញុំចាប់ផ្តើមស្គាល់ពាក្យជាភាសាខ្មែរនៅលើអេក្រង់ច្រៀងខារ៉ាអូខេ។ ពាក្យដំបូងដែលខ្ញុំរៀនអានដោយការចំណាំគឺពាក្យ «បង» និង «អូន»។
បទចម្រៀងខ្មែរបានបំផុសឱ្យកញ្ញា ប្រ៊េនឌី ចង់រៀនភាសាខ្មែរ ប៉ុន្តែគួរឱ្យសោកស្ដាយម្តាយរបស់កញ្ញាមិនអាចជួយបង្រៀនបាន ដោយសារតែអ្នកស្រីមានវ័យតូចពេកក្នុងរបបខ្មែរក្រហមជាវេលាខ្មៅងងឹត ដែលប្រព័ន្ធអប់រំជាតិត្រូវបានដួលរលំ។
ដោយគ្មានជម្រើសធនធានសិក្សា កញ្ញាបានរៀនភាសាខ្មែរដោយខ្លួនឯងតាមរយៈការមើលអក្សរខ្មែរលើវីដេអូខារ៉ាអូខេខ្មែរ ដែលកញ្ញាតែងតែចាក់តាំងពីព្រឹកដល់យប់។
កញ្ញា ប្រ៊េនឌី ស្រឡាញ់តន្ត្រីខ្មែរគ្រប់ទម្រង់ទាំងអស់ ចាប់តាំងពីបទចម្រៀងបុរាណរហូតដល់ប្រពៃណីរបាំប្រជាប្រិយដូចជា រាំវង់ និងកន្ទ្រឹមជាដើម។ កញ្ញាក៏ចូលចិត្តស្តាប់ចម្រៀងខ្មែរឆ្លងជំនាន់មិនថាបទចាស់ៗពីអធិរាជសំឡេងមាស ស៊ីន ស៊ីសាមុត និង រស់ សេរីសុទ្ធា រហូតដល់សិល្បករសម័យថ្មី ដូចជា តារារ៉េប វណ្ណដា ជាដើម។
កញ្ញាបានលើកឡើងថា៖ «ខ្ញុំមិនអាចនិយាយថា បទមួយណាជាបទដែលខ្ញុំចូលចិត្តបំផុតនោះទេ។ ខ្ញុំចូលចិត្តតន្ត្រីខ្មែរគ្រប់ចង្វាក់ គ្រប់ប្រភេទ គឺចូលចិត្តទាំងអស់។ តែក្នុងចំណោមនោះ អ្នកចម្រៀងដែលខ្ញុំចូលចិត្តជាងគេគឺ ទូច ស៊ុននិច ដែលខ្ញុំនៅតែចូលចិត្ត និងតែងតែស្ដាប់ចម្រៀងរបស់គាត់រហូតមកដល់សព្វថ្ងៃនេះ»។
ក្រៅពីការរៀនភាសាខ្មែរតាមបទចម្រៀង កញ្ញា ប្រ៊េនឌី នៅតែពិបាករកឯកសារ សៀវភៅ និងសម្ភាររៀនសូត្រដែលសរសេរជាភាសាខ្មែរ។ នៅសហរដ្ឋអាមេរិក នាងអាចរកបានត្រឹមតែអំពីប្រទេសកម្ពុជាក្នុងអត្ថបទដកស្រង់ខ្លីៗពីសៀវភៅ និងឯកសារមួយចំនួននៅបណ្ណាល័យឯទីនោះ។
កញ្ញាបានរំឭកប្រាប់ថា៖ «ពេលខ្ញុំអាយុប្រហែល ១០ ឆ្នាំ មានគេជូនសៀវភៅនិពន្ធដោយអ្នកស្រី លឿង អ៊ុង ចំណងជើងថា «មុនដំបូងគេសម្លាប់ប៉ារបស់ខ្ញុំ» ហើយវាក៏ជាសៀវភៅដំបូងបង្អស់ដែលខ្ញុំអានដោយខ្លួនឯង»។
ក្រៅពីក្ដីប្រាថ្នាចង់ចេះភាសាខ្មែរ កញ្ញា ប្រ៊េនឌី តែងតែមានអារម្មណ៍ថា ខ្លួនជាខ្មែរហើយមានក្ដីសុបិនចង់ធ្វើការជាមួយយុវជនកម្ពុជា។
កញ្ញាបានមកលេងប្រទេសកំណើតរបស់អ្នកម្ដាយជាច្រើនដងចាប់តាំងពីឆ្នាំ ២០១៥ និងលើកចុងក្រោយអំឡុងពេលបុណ្យចូលឆ្នាំប្រពៃណីខ្មែរក្នុងខែមេសាកន្លងទៅថ្មីៗនេះ។
សហគ្រិនរូបនេះបានអះអាងថា៖ «អ្វីដែលខ្ញុំស្រឡាញ់ពីឫសគល់សាវតាររបស់ខ្ញុំក្នុងនាមខ្ញុំជាជនជាតិខ្មែរ គឺភាពស្រស់ស្អាតនៃវប្បធម៌ និងប្រជាជនយើង ចេះតស៊ូតាំងពីបុរាណរហូតមកដល់បច្ចុប្បន្ន។ បុព្វបុរសខ្មែរពិតជាមនុស្សអស្ចារ្យគួរឱ្យទទួលស្គាល់»។
កញ្ញាមានបំណងចង់បើកសាលាសម្រាប់កុមារក្រីក្រនៅក្នុងប្រទេសកម្ពុជា ប៉ុន្តែនាងមិនទាន់មានស្ថិរភាពផ្នែកហិរញ្ញវត្ថុ សម្រាប់កិច្ចការធំដុំបែបនេះទេ។ ដូច្នេះ កញ្ញាក៏បង្វែរទៅគិតលើរឿងផ្សេងទៀតគឺការរួមចំណែកលើកកម្ពស់ការរៀនភាសាខ្មែរដល់មនុស្សជំនាន់ក្រោយនៅសហរដ្ឋអាមេរិក។
កញ្ញា ប្រ៊េនឌី បាននិយាយថា៖ «ខ្ញុំចាប់អារម្មណ៍លើបញ្ហាកង្វះធនធានរៀនភាសាខ្មែរ ដែលយើងមាននៅទីនេះ [សហរដ្ឋអាមេរិក] ក្នុងបណ្ដារដ្ឋមួយចំនួន។ ខ្ញុំក៏គិតថា ធ្វើដូចម្តេចទើបយើងអាចយកសម្ភារសិក្សាអក្សរខ្មែរមកដាក់ក្បែរដៃក្រុមគ្រួសារខ្មែរ ដើម្បីឱ្យពួកគេអាចបន្តឫសគល់ភាសានេះដល់ក្មេងជំនាន់ក្រោយ»។
ក្នុងអំឡុងពេលនៃការបិទខ្ទប់ក្នុងខែឧសភា ឆ្នាំ ២០២០ កញ្ញាក៏បានសម្រេចបើកហាងអនឡាញ Khemara Kids ដើម្បីផ្តល់ជូននូវសៀវភៅរឿងនិទាន និងរូបភាពពីរភាសា ជាភាសាខ្មែរ និងអង់គ្លេស ដោយអង្គការស៊ីប៉ា ដែលកញ្ញាបានចាត់ទុកថាជាកម្រងសៀវភៅកុមារគុណភាពល្អពីបូព៌ាប្រទេស។
ក្រៅពីសៀវភៅភាសាខ្មែរ នៅមានសម្ភារសិក្សារួមមាន អក្ខរក្រមឈើខ្មែរ និងល្បែងផ្គុំលេខ កាតរូបភាពរំលេចតួអក្សរ និងពាក្យ ព្រមទាំងសៀវភៅសំឡេងអេឡិចត្រូនិក។
កញ្ញា ប្រ៊េនឌី បានលើកឡើងថា៖ «យើងក៏មានសម្ភាររៀនព្យញ្ជនៈ ស្រៈ និងលេខជាភាសាខ្មែរ និងបង្កើតខ្លឹមសារមាតិកាលើ YouTube ឆានែល Khemara Kids ជាភាសាខ្មែរ និងអង់គ្លេសសម្រាប់ស្វាគមន៍មនុស្សគ្រប់វ័យ»។
សព្វថ្ងៃសៀវភៅភាគច្រើនដែល Khemara Kids មានលក់ត្រូវបានជាវពីអង្គការស៊ីប៉ា ប៉ុន្តែសហគ្រិនរូបនេះគ្រោងនឹងបន្ថែមសៀវភៅបទនិពន្ធដើមមួយចំនួន ដូចជាសៀវភៅលំហាត់សម្រាប់កុមារ និងសៀវភៅរឿងនិទានប្លែកៗជាច្រើនទៀត។
ក្រោយពីដំណើរការបានជាង២ឆ្នាំ កញ្ញាបានបង្ហាញការគាំទ្រថា៖ «រហូតមកដល់ពេលនេះ ខ្ញុំទទួលបានមតិវិជ្ជមានទាំងអស់ ដែលភាគច្រើនជាគ្រួសាររីករាយក្នុងការទទួលបានធនធានសិក្សាជាភាសាខ្មែរ»។
ក្រៅពីជាសហគ្រិនផ្គត់ផ្គង់សៀវភៅ និងសម្ភារសិក្សាខេមរភាសា កញ្ញា ប្រ៊េនឌី ក៏ទើបតែបញ្ចប់វគ្គខ្លីភាសាខ្មែររយៈពេល ២ ខែ និងព្យាយាមនិយាយភាសាមរតកខាងម្ដាយឱ្យបានច្រើនតាមដែលអាចធ្វើទៅបាន។
កញ្ញាបានបញ្ជាក់ថា៖ «ខ្ញុំតែងតែខំនិយាយភាសាខ្មែរជាមួយមិត្តភក្តិ បងប្អូន និងក្រុមគ្រួសាររបស់ខ្ញុំគ្រប់ពេលវេលាឱ្យតែយើងអាចឆ្លៀតបាន ហើយខ្ញុំក៏កំពុងព្យាយាមបន្តបង្រៀនសមាជិកគ្រួសារជំនាន់ក្រោយ ដូចជាក្មួយៗរបស់ខ្ញុំ ដែលកំពុងតែរៀនភាសាខ្មែរពីខ្ញុំផងដែរ»។
កញ្ញាបានបន្តថា៖ «អ្វីដែលខ្ញុំអាចធ្វើបានគឺជំរុញលើកទឹកចិត្តឱ្យគ្រប់គ្នាមិនថាក្មេង មិនថាចាស់ ឱ្យរៀនភាសាខ្មែរ និងជួយឱ្យវប្បធម៌នេះរស់រានតាមដែលអាចធ្វើទៅបាន»។
ពេលនេះ កញ្ញា ប្រ៊េនឌី កំពុងតែអានសៀវភៅ Earth in flower អំពីរបាំបុរាណ និងរបាំព្រះរាជទ្រព្យខ្មែរ។
សារដែលកញ្ញាចង់ថ្លែងប្រាប់ទៅពលរដ្ឋខ្មែរអាមេរិកផ្សេងទៀត ក៏មិនឆ្ងាយពីអត្ថន័យបទមចម្រៀងដ៏ល្បីល្បាញមួយនៅកម្ពុជាដែរ។
ស្ថាបនិក Khemara Kids បាននិយាយថា៖ «សាររបស់ខ្ញុំទៅកាន់ខ្មែរអាមេរិកទាំងអស់គ្នាគឺ "Time to Rise” ជាវេលាដែលយើងគួរតែរះត្រដែតហើយ ដូចជាបទចម្រៀងរ៉េបរបស់ វណ្ណដា អ៊ីចឹង។ វាជាពេលដែលយើងត្រូវរួបរួមគ្នាជាមនុស្សជាតិ និងផ្ដល់តម្លៃដល់វប្បធម៌យើង ដោយសម្លឹងឆ្ពោះទៅ អនាគតនៃសង្គមយើងសព្វថ្ងៃនេះ»៕