.jpg)
ក្រុមសិល្បករនៃអង្គការសម្អាតទន្លេសមុទ្រ រៀបចំស្នាដៃ ដែលច្នៃពីសំរាម ដើម្បីតាំងបង្ហាញនៅថ្ងៃទី ៦ កញ្ញា។ រូបថត Mekong Trashures
ភ្នំពេញៈ អង្គការសម្អាតទន្លេសមុទ្រ គ្រោងនឹងដាក់តាំងបង្ហាញស្នាដៃសិល្បៈដែលច្នៃចេញពីសំរាមដែលប្រមូលបានពីទន្លេក្នុងរាជធានីភ្នំពេញ ក្នុងពិព័រណ៍ជាសាធារណៈ នៅថ្ងៃទី ៦ ខែកញ្ញា បន្ទាប់ពីអ្នកស្ម័គ្រចិត្តចូលរួមកែច្នៃសំរាមជាង ១០ នាក់ បានបញ្ចប់ការងារកែច្នៃរបស់ខ្លួនជាបន្តបន្ទាប់។
កាលពីដើមខែសីហា អង្គការសម្អាតទន្លេសមុទ្រ បានប្រកាសស្វែងរកអ្នកស្ម័គ្រចិត្តចូលរួមកែច្នៃសំរាមដែលប្រមូលបានពីទន្លេទាំង ៣ ក្នុងរាជធានីភ្នំពេញប្រមាណ ៨០ តោន ឱ្យក្លាយទៅជាសិល្បៈនានា ក្នុងន័យចូលរួមចំណែកថែរក្សាបរិស្ថាន និងជំរុញឱ្យមានការយកចិត្តទុកដាក់ទៅលើបញ្ហាសំរាម។
ការជូនដំណឹងរបស់អង្គការសម្អាតទន្លេសមុទ្រ បានឱ្យ ភ្នំពេញ ប៉ុស្តិ៍ដឹងថា ការតាំងពិព័រណ៍សិល្បៈ ដែលបានកែច្នៃពីសំរាមនេះ មានគោលបំណងផ្លាស់ប្តូរទស្សនៈដែលខ្លួនមានមកលើសំរាម ខណៈសំរាម គឺជាផ្នែកមួយនៃបរិស្ថាន ហើយមិនគួរព្រងើយកន្តើយឡើយ។ តាមការប្រកាសរបស់អង្គការសម្អាតទន្លេសមុទ្រ ការតាំងពិព័រណ៍សិល្បៈដែលបានកែច្នៃពីសំរាម នឹងត្រូវធ្វើឡើងចាប់ពីម៉ោង ៦ ល្ងាច នៅផ្ទះមេត្តា រាជធានីភ្នំពេញ។ សាធារណជនអាចចូលទស្សនាបានដោយសេរី អំពីស្នាដៃរបស់អ្នកស្ម័គ្រចិត្ត ដែលបានចូលរួមកែច្នៃសំរាមទាំងនោះឱ្យទៅជាសិល្បៈដ៏មានតម្លៃ។
អង្គការនេះបញ្ជាក់ថា៖ «សម្ភារត្រូវបានចាត់ទុកថា ជាសំរាម ឬអត់ គឺវាអាស្រ័យលើតម្លៃ ដែលអ្នកបានផ្តល់ឱ្យទៅលើវត្ថុទាំងនោះ។ ទោះយ៉ាងណាក៏ដោយ មិនមែនគ្រប់គ្នា សុទ្ធតែមើលឃើញវត្ថុទាំងនោះដូចគ្នា តាមរបៀបដូចគ្នានោះទេ។ វិចិត្រករដែលមានវត្តមាននៅក្នុងពិព័រណ៍នេះ បានរកឃើញភាពស្រស់ស្អាតនៅក្នុងសំរាម ដែលប្រមូលបានពីទន្លេ និងតំបន់ជុំវិញរបស់អង្គការសម្អាតទន្លេសមុទ្រ»។
កញ្ញាភាព ច័ន្ទជាលីន ជំនួយការផ្នែកទីផ្សារ និងប្រព័ន្ធផ្សព្វផ្សាយសង្គម នៃអង្គការសម្អាតទន្លេសមុទ្រ ប្រាប់ ភ្នំពេញ ប៉ុស្តិ៍ថា ជំនួសឱ្យការគិតថា សំរាមជារឿងមួយដែលចៀសវាង គ្រប់គ្នាគួរតែចាត់វិធានការដោយចាប់ផ្តើមប្រមូលសំរាម ធ្វើការកែច្នៃឡើងវិញ និងធ្វើឱ្យការគ្រប់គ្រងសំរាមមានជាអាទិភាព។
កញ្ញាបន្តថា សម្ភារដែលហាក់គ្មានតម្លៃនៅពេលនេះ គឺត្រូវបានប្រែក្លាយទៅជាស្នាដៃសិល្បៈប្លែកៗតាមរយៈចក្ខុវិស័យរបស់សិល្បករ ហើយអាចផ្តល់នូវភាពរីករាយទៅដល់សាធារណជន ក្នុងការតាំងពិព័រណ៍ នាពេលខាងមុខនេះ។
កញ្ញាបញ្ជាក់ថា៖ «សម្រាប់យើង សំរាមមិនមានតម្លៃទេ តែវាជាធនធានសម្ភារ ដែលអាចមានប្រយោជន៍។ ជារៀងរាល់ថ្ងៃ យើងរកឃើញវត្ថុគួរឱ្យចាប់អារម្មណ៍ និងសម្ភារចម្រុះពណ៌នៅក្នុងសំរាមទាំងនោះ។ ដូច្នេះ យើងគិតថា យើងអាចសហការជាមួយសិល្បករក្នុងស្រុក ដើម្បីបង្ហាញកំណប់ក្នុងធុងសំរាមរបស់យើង»។
យុវជន សុខ សុភក្តី ជាសមាជិកម្នាក់ក្នុងចំណោមសមាជិក ២ នាក់ផ្សេងទៀត ដែលបានចូលរួមកែច្នៃសំរាមទៅជាសិល្បៈ ប្រាប់ ភ្នំពេញ ប៉ុស្តិ៍ នៅថ្ងៃទី ៣១ សីហាថា លោកពិតជាមានមោទនភាព ដែលបានចូលរួមចំណែកកែច្នៃសំរាមទាំងនេះឱ្យទៅជាសិល្បៈមានប្រយោជន៍។ ក្នុងនាមជាសិល្បករ ជាខ្មែរ ដែលភាគច្រើនសុទ្ធតែជាជនបរទេស យុវជនរូបនេះ រំពឹងថា ស្នាដៃដែលក្រុមខ្លួនបានកែច្នៃនេះ នឹងចូលរួមជំរុញឱ្យប្រជាពលរដ្ឋមានការយកចិត្តទុកដាក់ពីបញ្ហាសំរាម និងចូលរួមថែរក្សាបរិស្ថានទាំងអស់គ្នា។
យុវជនរូបនេះបន្តថា៖ «ស្នាដៃរបស់ខ្ញុំមិនទាន់រួចរាល់ ១០០ ភាគរយទេ គឺយើងកំពុងបន្តធ្វើនៅឡើយ។ ប៉ុន្តែវានឹងរួចរាល់មុនថ្ងៃតាំងពិព័រណ៍ខាងមុខ។ ស្នាដៃរបស់ខ្ញុំ គឺធ្វើជារូបអង្គរវត្ត ដោយយកចេញពីសំរាមដែលពួកគាត់បានបារចេញពីទន្លេ។ ខ្ញុំបានទៅប្រមូលសំរាមជា[ប្រភេទ]ខ្សែភ្លើង ដោយឆ្កឹះយកតែខ្សែជ័រៗ ហើយខ្ញុំត្រូវការរបស់ទាំងហ្នឹងពីគាត់ ដើម្បីយកមកច្នៃឱ្យចេញជារូបភាពអង្គរវត្ត»។
លោក នេត្រ ភក្ត្រា អ្នកនាំពាក្យក្រសួងបរិស្ថាន ធ្លាប់បានលើកឡើងថា ការផ្តល់ឱកាសឱ្យសាធារណជន បានចូលរូមកែច្នៃសំរាមដែលប្រមូលបានពីទន្លេ ហើយយកមកកែច្នៃជាវត្ថុសិល្បៈផ្សេងៗ គឺជារឿងល្អ ដែលបានចូលរួមចំណែកក្នុងការបង្ហាញ និងការអប់រំទៅដល់ប្រជាពលរដ្ឋអំពីផលប៉ះពាល់ពីសំរាម។ លោកចាត់ទុកថា បេសកកម្មរបស់អង្គការនេះ បានចូលរួមបង្ហាញពីអត្ថប្រយោជន៍របស់សំរាម ដែលអាចយកមកច្នៃជាប្រយោជន៍ និងប្រើប្រាស់ឡើងវិញបាន ដើម្បីលុបបំបាត់ផ្នត់គំនិតថា សំរាម គឺជារបស់គ្មានប្រយោជន៍។
លោកបញ្ជាក់ថា៖ «ការគ្រប់គ្រងសំរាមនេះគឺជាចំណុចសំខាន់ ដែលយើងអំពាវនាវឱ្យប្រជាពលរដ្ឋចូលរួមទុកដាក់សំរាមឱ្យបានត្រឹមត្រូវ និងញែកសំរាមឱ្យបានត្រឹមត្រូវទៅតាមប្រភេទរបស់វា។ ការងារនេះ មិនមែនជាការងារ ដោយឡែកណាមួយរបស់ស្ថាប័នពាក់ព័ន្ធនោះទេ គឺជាការរួមគ្នារបស់ប្រជាពលរដ្ឋ ស្ថាប័នពាក់ព័ន្ធ និងក្រុមហ៊ុនឯកជន ដែលទទួលសិទ្ធិក្នុងការប្រមូលសំរាម»។
បើតាមលោក នេត្រ ភក្ត្រា បច្ចុប្បន្នសំរាមដែលបង្កើតនៅកម្ពុជារាល់ថ្ងៃ គឺមានជាង ១ ម៉ឺនតោន ហើយក្នុង ១ ឆ្នាំ ជាង ៤ លានតោន ក្នុងនោះពី ៦៥ ទៅ ៦៨ ភាគរយ ជាសំណល់សរីរាង្គ ដែលអាចច្នៃជាជីកំប៉ុស និងសំរាមជាង ២០ ភាគរយ ជាសំណល់ប្លាស្ទិក ដែលអាចច្នៃប្រើប្រាស់ឡើងវិញបាន ខណៈ ១០ ភាគរយជាសំណល់រឹង៕
