.jpg)
ការបម្រើសេវាអាហារសម្រន់នៅហាង Nutty Bakery ជិតផ្សារទួលទំពូងកន្លងមក។ ហុង មិនា
ភ្នំពេញ: ស្ថិតនៅខាងកើតផ្សារទួលទំពូង ជាទីកន្លែងសម្បូរជនបរទេស ភោជនីយដ្ឋាន Nutty Bakery មានបម្រើមុខម្ហូបសាំងវិចបែបបស្ចិមប្រទេសជាមួយការប្រើនំប៉័ងរសជាតិជាច្រើនប្រភេទ រួមទាំងនំប៉័ងផលិតពីម្សៅសត្វចង្រិតទៀតផង។
ថ្វីដ្បិតតែនៅលើនំប៉័ងរួមទាំងបន្លែ និងសាច់មិនបានរំលេចនូវជើងសត្វល្អិតច្រូងច្រាងមែន តែក៏នំប៉័ង ១ ប្រភេទរបស់លោក ជានីហៅសុខនីផលិតពីសត្វល្អិត ដែលអាចផ្គាប់ចិត្ដអ្នកយល់ឃើញថាសត្វល្អិតផ្ដល់ប្រូតេអ៊ីននិងអ្នកដែលខ្ពើមរអើមសត្វល្អិតក៏មិនសូវឆ្អើមពីវាដែរ។
លោក ជា នី ហៅ សុខនី អាយុ ២៧ ឆ្នាំ មានបទពិសោធផ្នែកចុងភៅជាច្រើនឆ្នាំនៅ Kinin Restaurant ពេលល្ងាច បានឱ្យដឹងថា៖ «ខ្ញុំមានលក់នំប៉័ងសាំងវិចជាច្រើនប្រភេទ រួមមាននំប៉័ងផលិតពីបន្លែដូចជា ល្ពៅ ដំឡូងការ៉ុត ឬមើមយេន នំប៉័ងចង្រិត នំប៉័ងស្រូវសាឡី នំប៉័ងប្រោន និងនំប៉័ង ធ្វើពីគ្រាប់ធញ្ញជាតិដូចជា គ្រាប់ឈូករ័ត្នឪឡឹក និងល្ង ដែលខ្ញុំធ្វើខ្លួនឯង»។
ចំពោះនំប៉័ងចង្រិតលោក នី ប្រើប្រភេទម្សៅដែលត្រូវបានលាយជាម្សៅនំប៉័ង ដើម្បីបង្កើនប្រូតេអ៊ីនដោយលោកទិញម្សៅសត្វល្អិតនេះនៅហាង Angkor Cricket។
នៅក្នុងបរិវេណហាងដែលតាំងទូឈើបែបបុរាណនៅអែបទ្វារកញ្ចក់ខាងក្នុងនិងមានក្ដារអុកខ្មែរលើតុតូចផ្នែកខាងស្ដាំអមដោយរុក្ខជាតិស្រស់ៗលោក Josh អង្គុយទទួលទានសាំងវិចរសជាតិនំប៉័ងផលិតពីម្សៅសត្វចង្រិតយ៉ាងឆ្ងាញ់ពិសា។
ដោយមានបរិយាកាសល្អ និងតន្ត្រីស្រទន់បន្លឺតិចៗលោក Josh ដែលធ្វើការផ្នែកប្រព័ន្ធផ្សព្វផ្សាយបាននិយាយប្រាប់ ភ្នំពេញ ប៉ុស្ដិ៍ អំពីហាងនំប៉័ងក្បែរតំបន់ប្រជុំជន។
លោកបាននិយាយថា៖ «មិត្តភក្តិរបស់ខ្ញុំម្នាក់បាននិយាយប្រាប់ខ្ញុំកាលពីថ្ងៃមុនថា ខ្ញុំមិនសូវរំភើបនឹងនំសាំងវិចទេប៉ុន្តែអ្នកគួរសាកល្បងនៅហាងមួយនោះខ្ញុំមកតាមផ្លូវទៅធ្វើការហើយក៏ឆៀងចូលទិញសាំងវិចឈីសសាច់ភ្លៅជ្រូកមកញ៉ាំនៅតុការងាររបស់ខ្ញុំអូ!វាពិតជាឆ្ងាញ់ណាស់! ខ្ញុំបានត្រឡប់មកទិញអាហារសម្រន់នេះបន្ថែមទៀតនៅ ២ ថ្ងៃជាប់ៗគ្នា»។
លោក Josh បានបន្ដថា៖ «ខ្ញុំបានកត់សម្គាល់ឃើញនំប៉័ងចង្រិតនៅលើមុខម្ហូបហើយខ្ញុំបានឮមនុស្សម្នាគេតែងតែនិយាយថា សត្វល្អិត គឺជាប្រភពប្រូតេអ៊ីនច្រើនដោយពួកវាមិនបំផ្លាញធនធានកសិកម្មច្រើនទេខ្ញុំបានសាកល្បងចង្រិតជាអាហារសម្រន់ ប៉ុន្តែខ្ញុំមិនប្រាកដថាត្រូវរំពឹងពីអ្វីនៅក្នុងនំប៉័ងដុតនោះទេវាជានំប៉័ងទន់ៗដ៏មានឱជារសឆ្ងាញ់ដោយមិនមានរសជាតិ ឬល្បាយរំលេចជាជើងនិងខ្លួនសត្វល្អិតទាំងមូលដែលធ្វើឱ្យអ្នកគិតថា អ្នកកំពុងញ៉ាំមេរោគនោះទេ»។
លោក សុខនី មានបទពិសោធការងារជាចុងភៅនៅតាមភោជនីយដ្ឋានជាច្រើនដូចជា Plantation សណ្ឋាគារ Qeenco ក្រុងព្រះសីហនុជាមួយជំនាញម្ហូបក្ដៅត្រជាក់ និងខាងដុតនំ។
លោកចាប់អារម្មណ៍បើកភោជនីយដ្ឋានបែបបស្ចិមប្រទេសតាំងពីមុនសម័យកូវីដម៉្លេះ តែពេលវិបត្ដិរោគរាតត្បាតសកលវាយលុកផែនការរបស់បុរសចុងភៅរូបនេះត្រូវបានផ្អាក។
ដោយមើលឃើញថា ស្ថានភាពកូវីដបានធូរស្បើយច្រើនហើយ លោកនីចាប់ផ្ដើមរៀបចំភោជនីយដ្ឋានរបស់ខ្លួនទៅតាមផែនការនៅម្ដុំសម្បូរជនបរទេសច្រើនក្បែរផ្សារទួលទំពូងរយៈពេលជាង ១ ខែ។
លោក នី បានប្រាប់ ភ្នំពេញ ប៉ុស្ដិ៍ថា៖ «Nutty Bakery បម្រើមុខម្ហូបសាំងវិច និងប៊ឺហ្គ័រជាមួយភេសជ្ជៈទឹកផ្លែឈើស្រស់ៗនិងកាហ្វេជាដើម»។
ដោយសារ Nutty Bakery ទើបបើកដំណើរការលោក នីមិនទាន់មានអតិថិជនច្រើនប៉ុន្មានទេ។ដូច្នេះលោកមិនសូវផលិតនំប៉័ងទុកសន្ធឹកសន្ធាប់ឡើយ។ លោកធ្វើនំប៉័ងល្មមសម្រាប់លក់ ២-៣ ថ្ងៃ និងតាមការកុម្ម៉ង់ពីភោជនីយដ្ឋានផ្សេងៗ។
ជាបច្ចេកទេសសម្រាប់រក្សាទុកបានប៉ុន្មានថ្ងៃម្ចាស់ភោជនីយដ្ឋានអាហារសម្រន់ ដុតវាត្រឹម ៧០ ភាគរយ ហើយនៅពេលភ្ញៀវកុម្ម៉ង់ លោកត្រូវកម្ដៅវាប្រមាណ ១០ នាទីទៀតវាគ្រប់ល្មមសម្រាប់ហូបតែម្ដង។
នំប៉័ង៥រសជាតិដែលត្រូវបានរុំខ្ចប់ក្រដាស សម្រាប់ដាក់លក់ផងនិងសម្រាប់ប្រើជានំប៉័ងសាំងវិចដែលមានតម្លៃចាប់ពី ៥,៧៥ ដល់ ៦,៧៥ ដុល្លារ។
សាំងវិចទាំងនោះ រួមមានត្រីសាលម៉ុងឈួលផ្សែងជាមួយក្រូចនិងមើមយេន សាំងវិចសាច់គោឆួលផ្សែង ទ្រូងទាឆួលផ្សែង ប៉េស្ដូសាច់មាន់ សាច់ភ្លៅជ្រូក និងឈីសម្រេចកំពត។
ចំពោះសាំងវិចបន្លែមានដូចជា ឈីសម៉ូហ្សារ៉េឡាប៉េងប៉ោះនិងជីក្រហម សាំងវិចបន្លែដុតជាមួយឈីសទឹកដោះពពែ និងជម្រើសបន្លែតាមចំណូលចិត្តភ្ញៀវ។
ឈរនៅក្បែរតុមុខផ្ទះបាយក្នុងបរិវេណហាងមិនសូវជាធំប៉ុន្មាន លោក នី បានបន្ដថា៖ «អតិថិជនអាចជ្រើសរើសប្រភេទនំប៉័ងណាមួយក្នុងចំណោម ៥-៦ ប្រភេទរបស់ហាង ដូចជា គាត់ចង់បាននំប៉័ងបន្លែនំប៉័ងប៊ឺហ្គើរក៏យើងមាននិងនំប៉័ងចង្រិត ក៏យើងមានដែរ»។
នៅក្នុងទូតាំងអតិថិជននឹងប្រទះឃើញកែវជាច្រើនដែលម្ចាស់ហាង Nutty Bakery ប្រើសម្រាប់ដាក់ទឹកផ្លែឈើស្រស់ៗជូនភ្ញៀវទាំងអ្នកមកទទួលទាននៅហាងនិងខ្ចប់ទៅក្រៅ។
ថ្វីដ្បិតតែគ្រឿងផ្សំទិញចូលមានការវេចខ្ចប់ប្លាស្ទិកដែលអាចបង្កផលប៉ះពាល់ដល់បរិស្ថានខ្លះយ៉ាងណាក៏ដោយក៏លោក សុខនី អះអាងថា លោកព្យាយាមចៀសវាងការប្រើប្រាស់ប្លាស្ទិក ដោយប្រើប្រភេទក្រដាសសម្រាប់វេចខ្ចប់ និងច្រកសាំងវិចកែវដាក់ភេសជ្ជៈ និងបំពង់បឺត ជាឫស្សី ជំនួសវិញផងដែរ។
លោកបានបន្ដថា៖ «ការប្រើដបកែវដាក់ទឹកផ្លែស្រស់ៗទាំងនេះភ្ញៀវអាចយកទៅបាន ប៉ុន្ដែភាគច្រើនភ្ញៀវបរទេសតែងតែប្រមូលត្រឡប់មកវិញនៅពេលណាមួយដោយពួកគាត់មិនចង់បោះចោលក្នុងធុងសំរាមដែលបង្កផលប៉ះពាល់ឡើយ។ ពេលខ្លះពួកគាត់ទុកឱ្យអ្នកដើរទិញដបកែវ ដោយថែមលុយឱ្យពួកគេទៀត»។
ចំពោះនំប៉័ងផលិតពីម្សៅសត្វល្អិត លោក នី បានឱ្យដឹងថា វាអាស្រ័យទៅលើភ្ញៀវ ដោយភ្ញៀវខ្លះធ្លាប់ភ្លក្ស ភ្ញៀវខ្លះចង់សាកល្បងជាលើកដំបូងតែភ្ញៀវខ្លះទៀតក៏មានការភ្ញាក់ផ្អើល និងមិនហ៊ានប្រថុយទំពានំប៉័ងម្សៅចង្រិតនេះដែរ។
លោកបានប្រាប់ ភ្នំពេញ ប៉ុស្ដិ៍ថា៖«នំប៉័ងម្សៅចង្រិតគ្រាន់តែជាផលិតផលមួយក្នុងចំណោមប្រភេទនំប៉័ងសាំងវិចជាច្រើនរបស់ខ្ញុំប៉ុណ្ណោះ ខ្ញុំមិនបានផ្ដោតចម្បងលើអាហារសត្វល្អិតនោះទេ ហើយខ្ញុំក៏មិនមានបំណងបន្ថែមមុខម្ហូបសត្វល្អិតច្រើនដែរ»។
លោកបន្ដថា៖ «យើងគិតពីអារម្មណ៍ភ្ញៀវភាគច្រើន ដែលអ្នកខ្លះរអើមនឹងការមើលឃើញ ឬឮពីអាហារសត្វល្អិត ខ្ញុំក៏មិនចង់ឱ្យអតិថិជនគិតថាហាងរបស់ខ្ញុំជាហាងលក់ផលិតផលម្ហូបសត្វល្អិតដែរ» ។
យ៉ាងណាមិញ លោក នី ក៏បានលើកពីអត្ថប្រយោជន៍នៃប្រូតេអ៊ីនរបស់សត្វល្អិតដែលត្រូវបាននិយាយ និងផ្សព្វផ្សាយលើបណ្ដាញសារព័ត៌មានទូទាំងពិភពលោកដែរ។
យោងតាមវេបសាយ Buzzfeednews បានឱ្យដឹងថា អង្រ្កងកញ្ចែ និងចង្រិតស្ថិតក្នុងចំណោមសត្វល្អិតជិត ២ ១០០ ប្រភេទ ដែលអាចត្រូវបានទទួលស្គាល់ដែលមិនត្រឹមតែស្ទួយដល់ភពផែនដីដោយសារតែវាត្រូវការធនធានតិចជាងផលិតផលសាច់ប៉ុណ្ណោះទេ ប៉ុន្ដែវាក៏បានផ្ដល់គុណប្រយោជន៍ចំពោះសុខភាពផងដែរ។
ប្រភពដដែលបានបន្ដថា ប្រជាជនបណ្ដាប្រទេសជាច្រើន និងវប្បធម៌ផ្សេងៗបាននិងកំពុងតែទទួលទានសត្វល្អិតជាច្រើនជំនាន់មកហើយ ពីព្រោះពួកវាផ្ដល់ប្រូតេអ៊ីនខ្លាញ់ល្អវីតាមីននិងសារធាតុរ៉ែ។
អ្នកជំនាញផ្នែកជីវជាតិអាហារអ្នកស្រី Lisa Kilgour ត្រូវបានដកស្រង់សម្ដីដោយ Buzzfeednews ដោយបាននិយាយថា៖ «វាពិបាកវាយតម្លៃចំពោះសារធាតុប្រូតេអ៊ីនទាំងស្រុងណាស់ដូច្នេះយ៉ាងហោចណាស់វាផ្ដល់ប្រយោជន៍ចំពោះអ្នកស្វែងរកអាហារបែបស្ទួយផែនដីមិនមែនមនុស្សគ្រប់រូបសុទ្ធតែចូលចិត្ដទទួលទានអាហារពីបន្លែទាំងស្រុងនោះទេ ការស្វែងរកជម្រើសផ្សេងៗទៀតដែលអាចជួយដល់សុខុមាលភាព គឺជាអាហារមានប្រូតេអ៊ីនងាយស្រួលរកទាំងនេះ» ។
Josh បាននិយាយថា ទោះបីជានំសាំងវិចមានតម្លៃថ្លៃបន្តិចក៏ដោយ ប៉ុន្តែមួយដឹងមួយហើយមានប្រើគ្រឿងផ្សំល្អៗនិងមានរសជាតិឆ្ងាញ់។
លោកបានបន្ដថា៖ «ជាទូទៅខ្ញុំគ្រាន់តែទិញអាហារយកទៅញ៉ាំនៅតុធ្វើការហើយអាហារទាំងនេះគឺល្អឥតខ្ចោះ ដើម្បីឱ្យខ្ញុំធ្វើការពេញ ១ ថ្ងៃ ទឹកផ្លែឈើស្រស់មើលទៅគួរឱ្យចាប់អារម្មណ៍ខ្ញុំគិតថា ខ្ញុំនឹងត្រឡប់មកវិញនៅចុងសប្តាហ៍ និងទទួលទានអាហារនៅទីនោះទៀតវាជាល្បោយបន្ថែមនៅតំបន់ទួលទំពូងដែលខ្ញុំគួរតែបានឃើញវាតាំងពីដំបូង»។
សម្រាប់ព័ត៌មានលម្អិតសូមចូលទៅកាន់ទំព័រហ្វេសប៊ុក Nutty Bakery ដែលមានទីតាំងនៅផ្ទះលេខ ៦៥ ផ្លូវ ៤៤៦ ខាងកើតផ្សារទួលទំពូង ចម្ងាយ ១០០ ម៉ែត្រ៕
