ភ្នំពេញៈ ទោះបីជាក្នុងពិភពលោកសព្វថ្ងៃ មាននិន្នាការទៅរកការអបអរ ភាពចម្រុះ និងការរួមបញ្ចូលគ្នាក៏ដោយ ប៉ុន្តែការរើសអើង និងការគំរាមកំហែងចំពោះមនុស្សនៅតែមាន។ ដូច្នេះគេនៅតែចង់ស្តាប់រឿងរ៉ាវ បទពិសោធ និងការបញ្ចេញមតិ ពីសំឡេងរបស់សិល្បករ អ្នកនិពន្ធ អ្នកគិត ក៏ដូចជាយុវជនទូទៅ តាមរយៈការបង្កើតស្នាដៃជាគំនិតច្នៃប្រឌិតនានា។
ដើម្បីឆ្លើយតបនឹងបរិបទនេះ អង្គការសិល្បៈខ្មែរអមតៈប្រកាសជ្រើសរើសរកសា្នដៃ «អក្សរសិល្ប៍ច្នៃប្រឌិត» លើកទី២ សម្រាប់ចម្រាញ់យកជយលាភីចំនួន ៤ រូបចុងក្រោយ ដើម្បីចូលរួមក្នុងកម្មវិធីរដូវវប្បធម៌ ឆ្នាំ ២០២៣ ខាងមុខនេះ ក្រោមប្រធានបទ «តែឯង តែយើង»។
លោក ប៉ូ សាគុណ អ្នកសម្របសម្រួលកម្មវិធីចំណេះដឹងបណ្តាញ និងគោលនយោបាយអង្គការសិល្បៈខ្មែរអមតៈ ឱ្យដឹងពីគោលបំណងនៃការជ្រើសរើសស្នាដៃអក្សរសិល្ប៍ច្នៃប្រឌិតនេះថា៖ «មូលហេតុបង្កើតការជ្រើសរើសរកស្នាដៃ «អក្សរសិល្ប៍ច្នៃប្រឌិត» នេះ គឺចង់ផ្តល់ការលើកទឹកចិត្តទៅដល់អ្នកនិពន្ធ ដែលមានក្តីស្រឡាញ់ទៅលើការនិពន្ធ មានលក្ខណៈបែបប្រើគំនិតច្នៃប្រឌិតថ្មីៗ ដើម្បីចូលរួមលើកស្ទួយដល់វិស័យអក្សរសាស្រ្ត និងអក្សរសិល្ប៍ខ្មែរផងដែរ ដោយស្នាដៃទាំងនោះអាចជាប្រលោមលោកខ្នាតខ្លី រឿងខ្លី កំណាព្យ កំណាព្យអមដោយរូបភាព កំណាព្យបែបទំនើបនិយម»។
លោកសាគុណបន្តថា៖ «ម្យ៉ាងទៀត នេះក៏ជាការបើកចំហទៅដល់អ្នកនិពន្ធ ដែលចូលចិត្តការសរសេរបែបសេរី មិនចង់មានការកំណត់លើប្រធានបទ។ នេះគឺជាការជ្រើសរើសស្នាដៃអក្សរសិល្ប៍ច្នៃប្រឌិតលើកទី២ ដែលមានកាលបរិច្ឆេទឈប់ទទួលពាក្យនៅត្រឹមថ្ងៃទី ៣០ ខែកញ្ញា ឆ្នាំ ២០២២។ យើងនឹងធ្វើការជ្រើសរើសយកបេក្ខភាពជយលាភីចំនួន ៤ រូប សម្រាប់យកចូលរួមក្នុងកម្មវិធីរដូវវប្បធម៌ ឆ្នាំ ២០២៣ ខាងមុខ»។
លោកអ្នកអាចផ្ញើពាក្យស្នើសុំរបស់ខ្លួនមកកាន់ការិយាល័យសិល្បៈខ្មែរអមតៈ អាសយដ្ឋានលេខ ១២៨-G៩ ផ្លូវសុធារស ភ្នំពេញ ឬអាចផ្ញើទៅកាន់អុីម៉ែល sakun@cambodianlivingarts.org ឬតាមរយៈលេខទូរស័ព្ទ ០១២ ៤៣២ ២០១។
បេក្ខជនដាក់ពាក្យចូលរួមប្រកួតជ្រើសរើសស្នាដៃអក្សរសិល្ប៍ច្នៃប្រឌិត ត្រូវបំពេញឯកសារស្នើសុំមួយចំនួន រួមមាន ពាក្យស្នើសុំពេញលេញ ប្រវត្តិស្នាដៃពាក់ព័ន្ធនឹងវិស័យតែងនិពន្ធ (ធ្លាប់បោះពុម្ព ឬបកប្រែសៀវភៅ ប្រសិនបើមាន) សំណៅ ឬស្នាដៃអក្សរសិល្ប៍ ដែលបានកែ និងពិនិត្យអក្ខរាវិរុទ្ធរួចរាល់។ ចំពោះអត្ថប្រយោជន៍ និងប្រាក់ជយលាភី ក្នុងការបង្កើតស្នាដៃអក្សរសិល្ប៍ច្នៃប្រឌិតនេះ បេក្ខជនជយលាភី នឹងទទួលបានប្រាក់រង្វាន់ចំនួន ៥០០ ដុល្លារ និងទទួលបានឱកាសក្នុងការសរសេរបែបច្នៃប្រឌិត និងដំណើរទស្សនាចររដូវវប្បធម៌ នៅតាមបណ្តាខេត្តនានាផងដែរ។
ចំពោះពាក្យស្នើសុំ អាចធ្វើឡើងជាភាសាខ្មែរ ឬអង់គ្លេស សម្រាប់អ្នកកាន់ទិដ្ឋាការ K-Visa ឬជាភាសាជនជាតិដើម។ ប្រសិនបើអត្ថបទអក្សរសិល្ប៍ ជាភាសាអង់គ្លេស និងជាភាសាជនជាតិដើម បេក្ខជននឹងតម្រូវឱ្យមានការបកប្រែអត្ថបទជាភាសាខ្មែរ។ សម្រាប់បេក្ខជនជយលាភី និងបេក្ខជន ដែលមិនត្រូវបានជ្រើសរើសលើកនេះ នឹងត្រូវជូនដំណឹងនៅសប្តាហ៍ទី២ ខែតុលា ឆ្នាំ ២០២២។
កញ្ញាឡាយ ឈុនយី អតីតអ្នកទទួលជយលាភីអត្ថបទអក្សរសិល្ប៍ច្នៃប្រឌិត លើកទី១ ក្នុងចំណោមជយលាភីទាំង ៤ រូប សម្រាប់រដូវវប្បធម៌ឆ្នាំ ២០២២ បានបង្ហាញចំណាប់អារម្មណ៍ផ្ទាល់ខ្លួនថា៖«ក្នុងនាមជាមនុស្សស្រមើស្រមៃម្នាក់ ខ្ញុំមិនសូវហ៊ានបញ្ចេញការគិតចម្លែកៗរបស់ខ្ញុំឡើយ ព្រោះខ្ញុំគិតថា គ្មានអ្នកណាយល់។ ប៉ុន្តែអង្គការសិល្បៈខ្មែរអមតៈ បានធ្វើការផ្លាស់ប្តូរគំនិតបរបស់ខ្ញុំទាំងស្រុង ក្រោយជាប់ការប្រកួតអក្សរសិល្ប៍ច្នៃប្រឌិត។ ខ្ញុំពិតជាមានភាពរីករាយណាស់ នៅទីបំផុតគំនិតស្រមើស្រមៃរបស់ខ្ញុំ ត្រូវបានអានជូនអ្នកទាំងអស់គ្នាស្តាប់»។
ចំណែក លោក ជា តុងហៃ អតីតក៏ជាអ្នកទទួលជយលាភីអត្ថបទអក្សរសិល្ប៍ច្នៃប្រឌិតលើកទី១ ក្នុងចំណោមជយលាភីទាំង ៤ រូប សម្រាប់រដូវវប្បធម៌ឆ្នាំ ២០២២ បានថ្លែងថា៖ «អក្សរសិល្ប៍ច្នៃប្រឌិត ផ្តល់សេរីភាពឱ្យខ្ញុំបង្កើតសាច់រឿងទៅតាមចំណូលចិត្តបានពេញលេញ។ ខ្ញុំអាចប្រើប្រាស់ការស្រមើស្រមៃ ក្នុងការតាក់តែងសាច់រឿងឱ្យថ្មីប្លែក និងផ្តល់ការកម្សាន្តខ្ពស់ ខណៈសាច់រឿងនោះ នៅរក្សាបាននូវតម្លៃអប់រំដដែល។ នេះជាការប្រកួតប្រជែងអក្សរសិល្ប៍ដែលខ្ញុំទទួលអារម្មណ៍ថា ខ្ញុំបានសរសេរសាច់រឿង ដែលខ្លួនឯងពេញចិត្ត ជាជាងព្យាយាមតម្រូវចិត្តគណៈកម្មការ»។
លោក កន្យា ប៉ុបអែណេ អតីតអ្នកទទួលជយលាភីអត្ថបទអក្សរសិល្ប៍ច្នៃប្រឌិតលើកទី១ ម្នាក់ទៀត ក្នុងចំណោមជយលាភីទាំង ៤ រូប សម្រាប់រដូវវប្បធម៌នេះដែរ ប្រាប់ថា៖ «អក្សរសិល្ប៍ច្នៃប្រឌិត អនុញ្ញាតឱ្យអ្នកនិពន្ធគិតក្រៅប្រអប់ ដោយមិនបារម្ភពីក្បួនខ្នាតនៃការតែងនិពន្ធ ខណៈដែលរក្សាអត្ថន័យ អត្ថរូប និងអត្ថរសរបស់រឿង។ ជាការពិតយើងត្រូវអភិរក្សអក្សរសិល្ប៍ ដែលបុព្វបុរសរបស់យើងបានបន្សល់ទុកមក ប៉ុន្តែមិនមានន័យថា យើងមិនត្រូវអភិវឌ្ឍវានោះទេ»។
លោកបន្ថែមថា៖ «ហើយនេះគឺជាអ្វី ដែលអក្សរសិល្ប៍ច្នៃប្រឌិតកំពុងធ្វើ តាមរយៈការផ្តល់សេរីភាពឱ្យកវីនិពន្ធហ៊ានស្រមៃ និងប្រឌិតរឿងខុសពីអ្វី ដែលជាទម្លាប់របស់អ្នកនិពន្ធ ស្នាដៃអក្សរសិល្ប៍ថ្មីៗប្លែកៗជាច្រើនបានមានរូបរាងឡើង»។
ចំពោះកម្មវិធីរដូវវប្បធម៌ អង្គការសិល្បៈខ្មែរអមតៈ បានរៀបចំទៀងទាត់ ចាប់តាំងពីឆ្នាំ ២០១៨ មក។កម្មវិធីរដូវវប្បធម៌ គឺជាបណ្តុំនៃការសម្តែងសិល្បៈទស្សនីយភាព សិក្ខាសាលា ពិព័រណ៍ បាឋកថា ដែលបង្ហាញជូនក្នុងរយៈពេល ២-៣ ខែ នៅទីក្រុងភ្នំពេញ។ ស្នាដៃមួយចំនួន ដែលបានបង្ហាញនោះ នឹងត្រូវជ្រើសរើស សម្រាប់កម្មវិធីទស្សនាចរតាមបណ្តាខេត្តចំនួន ៤ អំឡុងខែមីនា រៀងរាល់ឆ្នាំ។ ទស្សនិកជន ជាគោលដៅរបស់អង្គការសិល្បៈខ្មែរអមតៈ គឺជាយុវជន ជាពិសេស និស្សិតនៅសាកលវិទ្យាល័យ ដែលពួកគេអាចស្វែងយល់បន្ថែមអំពីកម្មវិធីរដូវវប្បធម៌។ ជារៀងរាល់ឆ្នាំ ប្រធានបទសម្រាប់កម្មវិធីរដូវវប្បធម៌ តែងតែបង្កើតឡើង ហើយប្រធានបទនេះត្រូវបានប្រើជាចំណុចចាប់ផ្តើមសម្រាប់សិល្បករ ក្នុងការដំឡើងរបាំ និពន្ធល្ខោន និងតន្ត្រីថ្មីៗ។
ក្រុមការងារសិល្បៈខ្មែរអមតៈ ក៏ប្រើប្រាស់ប្រធានបទនេះ ដើម្បីតម្រង់ទិស ក្នុងការរចនា និងរៀបចំកម្មវិធី ដែលគួរឱ្យចាប់អារម្មណ៍ ដើម្បីបំផុសទស្សនិកជន ធ្វើការពិភាក្សា និងបង្ហាញទស្សនៈពីជ្រុងផ្សេងៗគ្នាជុំវិញប្រធានបទ។
ចំពោះប្រធានបទ «តែឯង តែយើង» ត្រូវបានបកស្រាយតាមពាក្យ២ផ្នែកដាច់ពីគ្នា។ ពាក្យ «តែឯង» គឺតែងតែត្រូវបានឮជាញឹកញាប់នៅពេលបុគ្គលម្នាក់បង្ហាញគំនិត ឬការបង្ហាញចេញលេចធ្លោ ឬខុសគេក្នុងចំណោមអ្នកដទៃ។ រីឯ«តែយើង» គឺត្រូវបានប្រើ នៅពេលមនុស្ស ១ ក្រុមទទួលយកបុគ្គល ដែលមានគំនិតដូចគ្នា ហើយចាត់ទុកជាសំឡេងផ្សេងៗ។ ការរួមបញ្ចូលគ្នា «តែឯង តែយើង» អាចបកស្រាយថា ជាការផ្តាច់ខ្លួនចេញពីក្រុមមនុស្ស ដែលទទួលយកតែគ្នាឯង។ វាក៏អាចបកស្រាយបាន បើទោះបីបុគ្គលម្នាក់ខុសគេ គាត់ក៏អាចជាចំណែក ១ នៅក្នុងក្រុម។ ការបកស្រាយ «តែឯង តែយើង» ក៏អាចឆ្លុះបញ្ចាំងពីការគិតរបស់សង្គមមកលើបុគ្គលវិញផងដែរថា តើពួកគេជាដងខ្លួនឯករាជ្យ ឬផ្នែកនីមួយៗនៃដងខ្លួន ១៕