ភ្នំពេញៈ កញ្ញា ឱក សុចិន្ដា ជាស្ថាបនិកទំព័រ Zerow ដែលជាសហគមន៍អនឡាញរបស់អ្នកស្រលាញ់បរិស្ថាននៅលើបណ្ដាញសង្គម ដោយនៅលើទំព័រហ្វេសប៊ុករបស់ Zerow គេឃើញមាន មាតិកាជាច្រើន ពាក់ព័ន្ធនឹងការលើកកម្ពស់ការយល់ដឹងពីបញ្ហាបរិស្ថាន ដូចជាការរស់នៅបែបគ្មានសំណល់ដល់ប្រជាជន និងការកាត់បន្ថយការចោលសំរាមជាដើម។
ចាប់តាំងពីការបង្កើត Zerow នៅចុងឆ្នាំ ២០១៨ មក សុចិន្ដា បន្ដការផ្សព្វផ្សាយមាតិកាស្តីអំពីបរិស្ថាននៅលើទំព័រ Zerow ទាំងក្នុងបណ្តាញសង្គមហ្វេសប៊ុកនិងទាំង Tiktok ដល់អ្នកគាំទ្រពិសេសយុវជនជាង១១ម៉ឺននាក់។
សុចិន្ដាសង្កេតឃើញមានបញ្ហាបរិស្ថានធំៗជាច្រើនដូចជា ការប្រែប្រួលអាកាសធាតុ សំណល់ប្លាស្ទិកដែលជះឥទ្ធិពលដល់ជីវិតនៅលើផែនដី និងបរិស្ថាននៅលើផែនដី។ នេះជាហេតុផល ដែលជំរុញឱ្យសុចិន្តាសម្រេចចិត្តបង្កើតទំព័រ Zerow ឡើង ក្នុងនាមជាបុគ្គលម្នាក់ដែលគិតដល់ការថែរក្សាផែនដី។
សុចិន្តា បានចាប់ផ្ដើមពីការកាត់បន្ថយសំណល់ដោយខ្លួនឯង បន្ទាប់មក ធ្វើការផ្សព្វផ្សាយពីការអនុវត្តនូវវិធីងាយៗដល់សាធារណជន។ នេះអាចជាគំរូដល់អ្នកដែលចង់កាត់បន្ថយសំរាម ដើម្បីជាផ្នែកមួយនៃការយកចិត្តទុកដាក់ថែទាំបរិស្ថាន។
សុចិន្តាបានប្រាប់ពីគោលដៅរបស់ Zerow ថា៖ «Zerow ជាកន្លែងដែលសម្បូរដោយធនធាន ទាំងធនធានឌីជីថល ព័ត៌មានផ្សេងៗ ក៏ដូចជាធនធានមួយចំនួនដែលគាត់[អ្នកតាមដាន] អាចចង់ចាប់ផ្ដើមចូលរួមជួយបរិស្ថានដែរ ហើយថា គាត់ធ្វើវាតាមរបៀបណា។ ឧទាហរណ៍ពេលខ្ញុំចែករំលែកពីគន្លឹះរស់នៅមួយចំនួនដែលមិនប៉ះពាល់ដល់បរិស្ថានដល់ពួកគាត់ ពួកគាត់ចង់ចាប់ផ្ដើម ចង់ចូលរួមជាមួយខ្ញុំដែរ»។
គួរជ្រាបថា ការងារធំៗដែលសុចិន្តាបានធ្វើតាមរយៈ Zerow មានដូចជា ការបង្កើតមាតិកាពាក់ព័ន្ធនឹងការលើកកម្ពស់ការយល់ដឹងពីការថែរក្សាបរិស្ថាន ដែលបានផ្សព្វផ្សាយទៅដល់ប្រជាជនជិត ៧ម៉ឺនាក់ នៅលើហ្វេសប៊ុក និងជាង ៤ម៉ឺននាក់នៅលើ TikTok។ ក្រៅពីការតាមដាន អ្នកដែលគាំទ្រ Zerow បានចូលរួមជជែកពិភាក្សា ឬផ្ញើជាសារទៅ Zerow ពីសមិទ្ធផលដែលគេទទួលបានពីការផ្សព្វផ្សាយរបស់ Zerow។
ដោយយល់ឃើញថា ការរស់នៅដោយគ្មានសំរាម គ្រាន់តែជាផ្នែកមួយនៃបញ្ហាបរិស្ថានក្នុងពេលអនាគត Zerow នឹងពង្រីកមុំចំណេះដឹងរបស់ខ្លួន ទៅដល់បញ្ហាថាមពល ការប្រែប្រួលអាកាសធាតុ និងបញ្ហាដែលអាចប៉ះពាល់ដល់ជីវិតកក្នុងទឹក និងលើគោក។
គួរជ្រាបដែរថា Zerow មិនធ្វើការតែឯងនោះទេ មានពេលខ្លះ Zerow ក៏បានសហការជាមួយអង្គការនានាដែលជួយសិក្សាស្រាវជ្រាវបន្ថែម និងផ្គត់ផ្គង់ជាធនធាននានាដល់ Zerow ដើម្បីធ្វើឱ្យទំព័រមួយនេះ អាចបន្ដទៅមុខទៀត ប្រកបដោយមាតិកាប្រសើរជាងមុន និងមានឥទ្ធិពលបន្ថែមចំពោះសាធារណជនដែលតាមដាន Zerow។
រយៈពេលជិត៤ឆ្នាំកន្លងមក ទោះបីជាសហគមន៍មួយនេះ ជាសហគមន៍អនឡាញក៏ពិតមែន តែតាមរយៈការខិតខំប្រឹងប្រែង ស្ថាបនិក Zerow រូបនេះសង្ឃឹមថា គាត់នឹងអាចបន្ដចីរភាពរបស់ Zerow ឱ្យទៅជាកន្លែងដែលផ្ទុកដោយធនធាន ដែលអ្នកចង់រស់នៅដោយមិនប៉ះពាល់ដល់បរិស្ថានអាចរកបានធនធានទាំងនោះបានពី Zerow។
បើតាមសុចិន្តា Zerow ស្វាគមន៍ដល់សាធារណជនទាំងអស់ ឱ្យចូលរួមជាមួយ Zerow ទោះបីជាពួកគាត់មិននៅទីក្រុងភ្នំពេញក៏ដោយ។
សុចិន្តាបញ្ជាក់ថា៖«រាល់ថ្ងៃយើងធ្វើការទៅលើការលើកកម្ពស់ការយល់ដឹង និងបង្ហាញជាមធ្យោបាយងាយៗ ដែលទាំងអស់គ្នាអាចធ្វើបាន។ មាតិការបស់យើង ក៏បានទៅដល់អ្នកមួយចំនួននៅភ្នំពេញ និងអ្នកមួយចំនួននៅតាមខេត្តដែរ ដូច្នេះហើយបានជាយើងប្រើប្រាស់បណ្ដាញសង្គម។
តាមរយៈការបង្កើតមាតិកាលើទំព័រ Zerow សុចិន្តា នឹងខិតខំរកវិធីណាដែលងាយ ហើយជាគំរូ ដើម្បីឱ្យអ្នកតាមដានអាចយកជាបទពិសោធ និងអនុវត្តតាមបាន។ ក្រៅពីនេះ Zerow នឹងបន្ដបង្កើតជាយុទ្ធនាការផ្សេងៗ ដូចជាការតាំងពិព័រណ៍ ការធ្វើការចុះទៅដល់សហគមន៍ដើម្បីលើកទឹកចិត្តដល់សាធារណជនឱ្យចូលរួម។
ស្ថាបនិក Zerow ក៏សង្ឃឹមថា នាពេលអនាគត Zerow នឹងចុះទៅដល់ប្រជាជននៅតាមខេត្ត ហើយអាចផ្ដល់ចំណេះដឹងពីការថែរក្សាបរិស្ថានជាក់ស្តែងតាមរយៈ សិក្ខាសាលា វគ្គហ្វឹកហាត់ផ្សេងៗ ដើម្បីទៅដល់អ្នកដែលនៅទីនោះ ឬសិស្សសាលា៕