.jpg)
ផ្ទាំងព័ត៌មានពីមន្ទីរពេទ្យកុមារអង្គរនិងកុមារកំពុងសម្រាកព្យាបាល។ លោកសាយ នឹងដឹកនាំការរត់ពីភ្នំពេញទៅសៀមរាប ដើម្បីរៃអង្គាសប្រាក់យកទៅជួយមន្ទីរពេទ្យនេះ។ រូបថត សហការី
ភ្នំពេញៈតារាចម្រៀង លោក អ៊ួន បឋម ហៅ សាយ កាលពីថ្ងៃទី ០២ ខែតុលា បានប្រារព្ធពិធីសម្ពោធជាផ្លូវការ កម្មវិធី «រត់ជាមួយសាយ ៤ សែនជំហាន» ពីរាជធានីភ្នំពេញ ទៅកាន់ខេត្តសៀមរាប ដោយកម្មវិធីនេះ រៀបចំធ្វើឡើងនៅរោងភាពយន្ត Major Cineplex ដើម្បីរៃអង្គាសប្រាក់ជូនមន្ទីរពេទ្យកុមារអង្គរ។
មន្ទីរពេទ្យកុមារអង្គរ ត្រូវបានបង្កើតឡើងតាំងពីឆ្នាំ ១៩៩៩ និងបានផ្ដល់សេវាព្យាបាលជំងឺដល់កុមារកម្ពុជាដោយឥតគិតថ្លៃ។
កាលពីឆ្នាំ ២០២០ លោកអ៊ួន បឋម ហៅសាយ បានរៀបចំកម្មវិធីរត់រយៈពេល ៩៧ ថ្ងៃ ជុំវិញប្រទេសកម្ពុជា និងរៃអង្គាសប្រាក់បានចំនួន៥០ម៉ឺនដុល្លារ សម្រាប់ជួយដល់មន្ទីរពេទ្យកុមារអង្គរ ដែលប្រឈមនឹងការខ្វះខាតថវិកា ដើម្បីផ្ដល់សេវាព្យាបាលជំងឺដល់កុមារ។
សម្រាប់កម្មវិធីនៅក្នុងឆ្នាំ ២០២២ នេះ លោកអ៊ួន បឋម គ្រោងរត់ពីរាជធានីភ្នំពេញទៅកាន់ខេត្តសៀមរាប ចាប់ពីថ្ងៃទី ២២ ដល់ថ្ងៃទី ៣០ ខែតុលា ឆ្នាំ ២០២២។
លោក អ៊ួន បឋម រំពឹងទុកថា ថវិកាដែលរៃអង្គាសបានពីការរត់របស់លោកលើកនេះ នឹងអាចជួយដល់មន្ទីរពេទ្យកុមារអង្គរ ដែលកំពុងត្រូវការជំនួយក្នុងការសង្គ្រោះកុមារកម្ពុជា ដែលមានជំងឺ ជាពិសេសជំងឺមហារីក ដែលមន្ទីរពេទ្យសង្កេត ឃើញថា មាននិន្នាការកើនឡើងគួរឱ្យព្រួយបារម្ភ។
លោកស្រី ស៊ិន កេតអរុណ ប្រធានការិយាល័យទំនាក់ទំនងសាធារណៈនៃមន្ទីរពេទ្យកុមារអង្គរបានថ្លែងថា មន្ទីរពេទ្យកុមារអង្គរ បានធ្វើរោគវិនិច្ឆ័យឃើញជំងឺមហារីកលើកុមារមានដូចជា ជំងឺមហារីកបាតភ្នែក មហារីកឆ្អឹងខ្នង មហារីកជាលិកា មហារីកខួរក្បាល និងជំងឺមហារីកគ្រាប់ឈាម។
ដ្បិតតែមន្ទីរពេទ្យកុមារអង្គរ មានវេជ្ជបណ្ឌិតដែលមានជំនាញក្នុងការព្យាបាលជំងឺ មហារីកទាំងនេះក៏ពិតមែន ប៉ុន្តែបើតាមលោកស្រីស៊ិន កេតអរុណ ការព្យាបាលជំងឺមហារីក ត្រូវការថវិកាច្រើនជាងការព្យាបាលជំងឺ ប្រភេទដទៃទៀត ដោយសារតែវាទាមទារនូវបច្ចេកទេសចាំបាច់មួយចំនួនដូចជាការវះកាត់ ការចាក់ថ្នាំគីមី ការបាញ់កាំរស្មីឡាស៊ែរ ការចាក់ថ្នាំបង្កក ជាលិកានិងការគ្រប់គ្រងការឈឺចាប់ជាដើម។
មន្ទីរពេទ្យកុមារអង្គរ ចាប់ផ្ដើមបើកទទួលការពិនិត្យព្យាបាលនិងថែទាំកុមារដែលមានជំងឺមហារីកតាំងពីឆ្នាំ ២០១២ មក។ ក្នុង ១ ឆ្នាំៗ មន្ទីរពេទ្យកុមារអង្គរ ត្រូវការថវិកាពី ៣៥០ ០០០ ដុល្លារទៅ ៤៥០ ០០០ ដុល្លារដើម្បីទ្រទ្រង់ការពិនិត្យព្យាបាល និងថែទាំកុមារ ដែលមានជំងឺមហារីកហើយបើគិតមកទល់ពេលនេះ មន្ទីរពេទ្យកុមារអង្គរបានព្យាបាលកុមារដែលមានជំងឺមហារីកចំនួន៥០៨នាក់រួចមកហើយ។
ក្រៅពីការបរិច្ចាគជាថវិកាលោក អ៊ួន បឋម ក៏លើកទឹកចិត្តឱ្យយុវជនឬអ្នកដែលមានចំណាប់អារម្មណ៍ ចូលរួមរត់ជាមួយលោកដើម្បីលើកកម្ពស់ស្មារតីកីឡានៅកម្ពុជាខណៈកម្ពុជានឹងធ្វើជាម្ចាស់ផ្ទះរៀបចំព្រឹត្តិការណ៍កីឡាស៊ីហ្គេមលើកទី៣២ នៅឆ្នាំក្រោយ។
ដោយឡែកលោក សុខ សប្បាយណា ប្រធានប្រតិបត្តិនៃ «យុទ្ធនាការ #BeyondTheGames» ដែលជាយុទ្ធនាការរបស់គណៈ កម្មាធិការជាតិ CAMSOC ដើម្បីផ្សព្វផ្សាយពីស៊ីហ្គេមនិងអាស៊ានប៉ារ៉ាហ្គេមនៅកម្ពុជា បានថ្លែងកោតសរសើរ ចំពោះការលះ បង់របស់លោក អ៊ួន បឋម ដែលបានរៀបចំកម្មវិធី «រត់ជាមួយសាយ ៤ សែនជំហាន» នេះឡើង ដើម្បីផ្សារភ្ជាប់សកម្មភាពមនុស្សធម៌ រួមជាមួយស្មារតីកីឡា។
លោកសង្ឃឹមថា កម្មវិធីនេះនឹងអាចបណ្ដុះទឹកចិត្តប្រជាជនខ្មែរ ជាពិសេសយុវជន ឱ្យងើបឡើងធ្វើសកម្មភាពសង្គមនានា ទៅតាមជំនាញចំណង់ចំណូលចិត្ត និងលទ្ធភាពរបស់ខ្លួនសម្រាប់ប្រជាជននិងប្រជាជាតិកម្ពុជា។
គួរបញ្ជាក់ដែរថា រាល់ការបរិច្ចាគទាំងអស់របស់សប្បុរសជន នឹងបញ្ជូនទៅកាន់គណនីធនាគាររបស់មន្ទីរពេទ្យកុមារអង្គរដោយផ្ទាល់។ តារាចម្រៀងលោក អ៊ួន បឋម ដែលនឹងចាប់ផ្ដើមបោះជំហានរត់ម្ដងទៀត នៅថ្ងៃទី ២២ ខែតុលាខាងមុខនេះ បានអំពាវនាវដល់សប្បុរស ជនជាតិនិងអន្ដរជាតិឱ្យជួយបរិច្ចាគថវិកាទៅតាមលទ្ធភាពរបស់ខ្លួន ដើម្បីរួមចំណែកក្នុងបេសកកម្មរបស់មន្ទីរពេទ្យកុមារអង្គរ ក្នុងការជួយសង្គ្រោះជីវិតកុមារកម្ពុជាឱ្យរួចផុតពីក្រញំាជំងឺមហារីកដ៏កាចសាហាវ។
សម្រាប់លោក អ៊ួន បឋម កុមារ គឺជាក្ដីសង្ឃឹម ជាពន្លឺ និងជាអនាគតរបស់កម្ពុជា ដែលទាមទារឱ្យខ្មែរគ្រប់គ្នារួមគ្នាជួយសង្គ្រោះនិងអប់រំបណ្ដុះបណ្ដាល ដើម្បីឱ្យពួកគេក្លាយជាសសរស្ដម្ភដ៏រឹងមាំសម្រាប់ប្រទេសជាតិនាពេលអនាគត៕
