.jpg)
អ្នកស្រី អូន សុគន្ធា ជូនប្រេងកូឡាលោកនាយករដ្ឋមន្ត្រីក្នុងពិព័រណ៍កន្លងមក។ រូបថត សហការី
បាត់ដំបងៈ ជាមួយក្ដីស្រមៃចង់ឱ្យគ្រប់ផ្ទះប្រជាពលរដ្ឋខ្មែរមានប្រេងកូឡា និងប្រេងខ្យល់ផលិតក្នុងស្រុក អ្នកស្រី អូន សុគន្ធា បានប្រែក្លាយផលិតផលរូបមន្តតត្រកូលពីមុខរបរគ្រួសារទៅជាអាជីវកម្មខ្នាតតូចអស់រយៈកាលជាង ១០ ឆ្នាំ ដោយរំពឹងថា នឹងទទួលបានការគាំទ្រកាន់តែច្រើន ដើម្បីពង្រីកខ្លួនជាអាជីវកម្មស្ដង់ដាធំជាងមុន។
អគ្គនាយិកាសហគ្រាសវ័យ ៥០ ឆ្នាំ បានប្រាប់ ភ្នំពេញ ប៉ុស្ដិ៍ថា៖ «ការគាំទ្ររបស់អតិថិជន និងការជួយជ្រោមជ្រែងពីអ្នកទាំងអស់គ្នាជាកម្លាំងជំរុញចិត្តឱ្យខ្ញុំក៏ដូចជា ក្រុមគ្រួសារមានកម្លាំងចិត្តក្នុងការបន្តដឹកនាំសហគ្រាសជាមួយនឹងចក្ខុវិស័យដ៏វែងឆ្ងាយ និងការប្តេជ្ញាចិត្តយ៉ាងមុតមាំ»។
ប្រេងកូឡា និងប្រេងខ្យល់រូបនាគ ត្រូវបានបង្កើតឡើងនៅឆ្នាំ ២០០៩ ដោយចុះបញ្ជីក្នុងក្រសួងពាណិជ្ជកម្ម ក្រសួងសុខាភិបាល និងក្រសួងឧស្សាហកម្ម និងសិប្បកម្ម។
រូបមន្តគ្រួសារ ៣ ជំនាន់
យោងតាមស្ថាបនិកសហគ្រាសប្រវត្តិនៃការផលិតមានរូបមន្តពីប្រេងប្រទាលពុទ្ធមន្ត ១០៨ មុខ។ ប្រទាលខ្មែរគឺជាមើមរុក្ខជាតិឱសថដែលត្រូវបានបុព្វបុរសខ្មែររកឃើញថា មានរាប់រយប្រភេទជាមួយ មុខងារព្យាបាលជំងឺជាច្រើនមុខ។
វត្ថុធាតុដើមប្រទាលពុទ្ធមន្ត ១០៨ មុខត្រូវបានដាំដុះសម្រាប់ផ្គត់ផ្គង់នៅទឹកដីខេត្តបាត់ដំបង ដោយប្រើពេលយ៉ាងតិច ២ ឆ្នាំដើម្បីឱ្យរុក្ខជាតិមានប្រេងអាចចម្រាញ់បាន។ រុក្ខជាតិជាវត្ថុធាតុដើមក៏ត្រូវបានប្រមូលទិញពីកំពូលភ្នំគូលែន ភ្នំក្រវាញ និងភ្នំដងរែក ខេត្តព្រះវិហារ ផងដែរ។
អ្នកស្រី សុគន្ធា បានឱ្យដឹងថា៖ «ប្រទាលក៏យើងប្រមូលបានតែ ១ ឆ្នាំម្ដងដែរ ប្រមូលខុសរដូវក៏មើមវាខ្ចីគ្មានប្រសិទ្ធភាពដែរ។ យើងប្រមូលបានតែខែប្រាំងទេ»។ អ្នកស្រីបន្តថា៖ «វាមានវិធីវាចម្រាញ់យូរ យើងអត់ទាន់ទំនើបកម្មអីទេ។ យើងចម្រាញ់បែបបុរាណ។ ការទុកដាក់ កាលណាយើងចម្រាញ់អស់ជាតិទឹក យើងទុកដាក់បាន ១ ឆ្នាំ»។
ក្រៅពីរុក្ខជាតិប្រទាលខ្មែរបុរាណជាគ្រឿងផ្សំវត្ថុធាតុដើម រូបមន្តប្រេងពុទ្ធមន្ត ១០៨ មុខជារូបមន្តលក្ខណៈគ្រួសារតត្រកូលពីបុរាណ ដោយគ្រាន់តែជំនាន់មុន ការវេចខ្ចប់បែបបុរាណ ហើយពុំមានការផ្សព្វផ្សាយ។
អ្នកស្រីសុគន្ធាបានថ្លែងថា៖ «ជំនាន់ខ្ញុំនេះគឺជំនាន់ទី៣ ហើយ។ មុន ប៉ុល ពត ព្រះគ្រូដើមជាព្រះសង្ឃ លោកផលិតចម្រាញ់នៅលើភ្នំ។ អ៊ីចឹងប្រជាពលរដ្ឋដែលជឿដែលដឹងឡើងទៅព្យាបាលបែបជាប្រេងប្រទាល មិនមែនជារូបភាពប្រេងកូឡា ប្រេងខ្យល់ទេ។ ហ្នឹងសម័យទី១ ឱសថជាប្រេងប្រទាលទេ»។
នៅជំនាន់ទី២ រូបមន្តគ្រួសារបានរំលេចរូបរាងជាប្រេងប្រទាលផង និងប្រេងកូឡា ប្រេងខ្យល់ផង រហូតដល់ជំនាន់ទី៣ ដែលត្រូវបានផលិតចេញពីសហគ្រាសនៅភូមិអូតាគាំ២ សង្កាត់ទួលតាឯក ក្រុងបាត់ដំបង។
ជាមួយរូបធាតុដើមដូចជា ប្រេងជីអង្កាម រមៀត ផ្កាឡាវេនឌឺព័រទុយហ្គាល់ ប្រេងរុក្ខជាតិ ម៉ង់តុល និងប្រេងខេមផរ ប្រេងកូឡា ប្រេងខ្យល់រូបនាគ មានធាតុចម្បងប្រហាក់ប្រហែលនឹងផលិតផលដទៃដែរ។
ប៉ុន្តែអ្វីដែលពិសេស គឺប្រទាលពុទ្ធមន្ត ១០៨ មុខ ដែលសំដៅលើប្រទាលខ្មែរបុរាណជាច្រើនផ្សំចូលគ្នា។
អ្នកស្រី សុគន្ធា លើកឡើងថា៖ «យើងដាំហើយ យើងយកមើម យកស្លឹក យកវល្លិ៍ មកចម្រាញ់យកប្រេង ហើយយកវាមកធ្វើធាតុផ្សំបន្ថែមទៀត ដើម្បីបង្កើនប្រសិទ្ធភាព»។
ប្រេងកូឡា អាចលាបបានពីវ័យ ៣ ឆ្នាំឡើងទៅដោយប្រើក្នុងបរិមាណសមល្មម រួចឈ្លីរយៈពេល ៥ ទៅ ១០ វិនាទី។ អ្នកប្រើប្រាស់ពុំគួរលាបលើភ្នែក មុខរបួសឬស្បែកដែលងាយរងប្រតិកម្មទេ។
សំណេរអំពីផលិតផលរបស់សហគ្រាសរូបនាគបានអះអាងថា វាអាចប្រើប្រាស់សម្រាប់លាបរឹត ដើម្បីបំបាត់អាការដូចជា ហើមជាំសាច់ សត្វល្អិតទិចឬខាំ រលាកភ្លើង រលាកទឹកក្តៅ ថ្លោះគ្រេច ឈឺតាមសន្លាក់ដៃជើង បំបាត់ការឈឺចាប់ ឈឺតាមសាច់ដុំ ឈឺក្បាល វិលមុខ ធេងធោង ពុលឡាន ផ្តាសាយ ហៀរសំបោរ ហើម ចុកឆ្អល់ ជាដើម។
អ្នកស្រី សុគន្ធា បញ្ជាក់ថា៖ «ប្រើដូចតែប្រេងកូឡាទូទៅ គ្រាន់តែប្រសិទ្ធភាពវាខ្ពស់ ដោយសារយើងផលិតពីប្រេងប្រទាលខ្មែរបុរាណ ព្រោះបរមបុរាណកាលជីដូនជីតាយើង ពីមុនគាត់ចូលចិត្តប្រើមើមប្រទាល មើមអី ពេលមានបញ្ហាសត្វពិស ពក ចុករួយអី គាត់ប្រើបែបបុរាណអ៊ីចឹង»។
អ្នកស្រីបន្តថា៖ «លក្ខណពិសេសត្រង់ចំណុចថា ក្លិនឈ្ងុយ លាបលើស្បែកវាមិនក្ដៅ វាមិនរោល មិនរមាស់ មិនក្រហាយ មិនរបកស្បែកអីអ៊ីចឹង»។
ប្រេងកូឡា និងប្រេងខ្យល់ដែលវេចខ្ចប់ហើយ អាចរក្សាគុណភាពបាន ៥ ឆ្នាំ។ ចំពោះប្រេងប្រទាលធាតុផ្សំអាចរក្សាបាន ១ ឆ្នាំ ដោយសារសិប្បកម្មមិនបានដាក់សារធាតុគីមីរក្សាទុកបានយូរ។
ប្រេងកូឡា ប្រេងខ្យល់ក្រោមឥទ្ធិពលកូវីដសកល ក្រៅពីអតិថិជនក្នុងស្រុក សិប្បកម្មប្រេងកូឡា ប្រេងខ្យល់រូបនាគ មានអតិថិជនជាភ្ញៀវទេសចរ អ្នកចូលរួមពិព័រណ៍នៅក្រៅប្រទេស និងអ្នកជាវលក់បន្តតាមផ្សារ។
អ្នកស្រីថា៖ «ក្រៅប្រទេសហ្នឹងយើងធ្វើពិព័រណ៍អន្តរជាតិមុនកូវីដហ្នឹង វាបាន ១ ឆ្នាំ ២ ឆ្នាំ ហើយយើងមានវិញ្ញាបនបត្រទទួលស្គាល់គុណភាពប្រសិទ្ធភាព និងមេដាយគុណភាពពីរដ្ឋាភិបាលនៃប្រទេសចិនពីឆ្នាំ ២០១៨»។
តាមរយៈស្ថានទូតខ្មែរនៅបរទេស សហគ្រាសក៏បានតាំងពិព័រណ៍លក់ប្រេងកូឡា ប្រេងខ្យល់នៅប្រទេសចិន ឥណ្ឌានិងកូរ៉េខាងត្បូងផងដែរ។
ប៉ុន្តែមិនខុសពីអាជីវកម្មដទៃ ក្នុងអំឡុងពេលកូវីដ អ្នកស្រី សុគន្ធា បានផ្ដោតលើការលក់បែបឌីជីថល ដើម្បីទាក់ទាញអតិថិជនក្នុងស្រុក ខណៈការលក់ឱ្យភ្ញៀវទេសចរ និងទៅក្រៅប្រទេសបានធ្លាក់ចុះយ៉ាងគំហុក ដោយសារការផ្ញើទៅក្រៅប្រទេសមានការរឹតបន្តឹងច្រើន។ បុគ្គលិកត្រូវបានកាត់បន្ថយ ៥០ ភាគរយ ហើយពីជាង ២០ នាក់មកត្រឹមជាង ១០ នាក់ទាំងផ្នែកផលិត និងផ្នែកលក់។
ទោះជាពុំទាន់មានប្រព័ន្ធគ្រប់គ្រងតួលេខច្បាស់លាស់ ក៏សហគ្រាសសម្គាល់ថា ការលក់ប្រេងកូឡា ប្រេងខ្យល់មិនថេរទេ ដោយវាដាច់តាមរដូវកាល។ អ្នកស្រីថា៖ «យើងនៅផលិតដោយដៃនៅឡើយទេអត់ទាន់ផលិតខ្សែចង្វាក់ផលិតទេ។ អ៊ីចឹងកាលដែលផលិតចេញ ចំណុះចែកជាដប ចែកជាចំណុះអត់ទាន់ចេញទេ»។
អ្នកស្រីគ្រោងនឹងរៀបចំប្រព័ន្ធគ្រប់គ្រងតួលេខជាក់លាក់នៅឆ្នាំ ២០២៣ ជាមួយផែនការ និងបញ្ជីជាក់លាក់ថា ជាមធ្យម ១ ខែផលិតបានប៉ុន្មាន។
ការតស៊ូនៃផលិតផលក្នុងស្រុក
អស់រយៈពេលជាង ១០ ឆ្នាំនៃការផលិតប្រេងកូឡា ប្រេងខ្យល់ក្នុងស្រុក បញ្ហាប្រឈមរបស់អ្នកស្រី សុគន្ធា គឺវិបត្តិខ្វះការគាំទ្រពីប្រជាជនក្នុងស្រុក។ អ្នកស្រីនិយាយថា៖ «ឆ្នាំនេះហាក់ដូចជាមានប្រជាជនយើងទទួលស្គាល់បានច្រើនជាងមុនតែបើនិយាយកាលពី ៥-៦ ឆ្នាំមុន ពេលឮផលិតផលខ្មែរ ជួនកាលអត់និយាយរកយើងផង»។
បទពិសោធចូលរួមពិព័រណ៍ផលិតផលក្នុងស្រុក អ្នកស្រី សុគន្ធា បានឱ្យដឹងថា ការគាំទ្រពីប្រជាពលរដ្ឋក្នុងស្រុកនៅមានកម្រិតណាស់។
អ្នកស្រីថា៖ «ក្នុងហ្នឹងមាន ១ ភាគរយទេដែលគាត់និយាយថាដាក់ផលិតផលគេតាំងពេញៗហាង ពេញៗទូហើយ អ៊ីចឹងផលិតផលខ្មែរតិចតួចត្រូវជួយទិញគ្នា។ កន្លែងហ្នឹង អរណាស់ មានមោទនភាពណាស់ មានកម្លាំងចិត្តណាស់។ ប៉ុន្តែវាមានភាគតិចពេក»។
អ្នកស្រីថា៖ «ប្រសិនបើមានការសហការដាក់លក់នៅតាមបណ្ដាផ្សារឬម៉ាតនានាពួកខ្ញុំអ្នកផលិតហ្នឹងចេះតែប្រឹងទាំងអស់គ្នា»។
ចក្ខុវិស័យរបស់អ្នកស្រីគឺចង់អភិវឌ្ឍអាជីវកម្មតូចនេះឱ្យក្លាយជាសហគ្រាសមួយដែលមានបទដ្ឋានត្រឹមត្រូវ និងមានការទទួលស្គាល់។
ប៉ុន្តែការបំប្លែងពីអាជីវកម្មគ្រួសារជាសហគ្រាសខ្នាតតូចទើបតែថ្មីថ្មោងដែលត្រូវការពេលវេលា ចំណេះដឹង ដៃគូសហការ និងដើមទុនក្នុងការពង្រីកខ្លួន។
អ្នកស្រីបានថ្លែងថា៖ «ផលិតផលយើង យើងជឿជាក់ហើយ អំពីគុណភាព ប្រសិទ្ធភាពប្រេងកូឡាល្អឯក ដឹងច្បាស់ថានឹងអាចពង្រីកខ្លួនបាន ថាតើយើងពង្រីកដោយវិធីណា»។
ការវេចខ្ចប់ ការលក់ ការធ្វើទីផ្សារ និងការប្រកួតប្រជែងជាមួយផលិតផលនាំចូលនៅតែជាឧបសគ្គសម្រាប់សហគ្រាសប្រេងកូឡា ប្រេងខ្យល់រូបនាគ ដែលទាមទារឱ្យសហគ្រាសបន្តសិក្សាស្រាវជ្រាវផ្តោតទៅលើគុណភាព ប្រសិទ្ធភាពជាចម្បង ខ្សែចង្វាក់ផលិត ការវេចខ្ចប់ និងសេវាកម្មឱ្យកាន់តែប្រសើរជាងមុន។នេះបើតាមការបញ្ជាក់បន្ថែមពីអ្នកស្រី សុគន្ធា។
អ្នកស្រីនិយាយថា៖ «ដោយសារយើងបំប្លែងពីលក្ខណៈគ្រួសារ មានន័យថា ទីតាំងផលិតត្រូវការអាប់ដេតទៅលើប្រព័ន្ធការផលិតឱ្យវាមានស្ដង់ដាមួយសម្រាប់សិប្បកម្ម។ យើងត្រូវការធ្វើរោងចក្រ ឬទីតាំងហ្នឹងឱ្យបានសមរម្យ ទើបខាងឧស្សាហកម្ម ក៏ដូចជាពាណិជ្ជកម្ម គេចេញបញ្ជិកាផ្សេងៗឱ្យយើង»។
ទោះជាអ្នកស្រីទទួលស្គាល់ថា សហគ្រាសប្រេងកូឡាប្រេងខ្យល់ពុំបានបង្កើតប្រាក់ចំណេញអ្វីច្រើនក្នុងអំឡុងពេលជាង ១០ ឆ្នាំនេះក្ដី ក៏អ្នកស្រីប្ដេជ្ញាថានឹងបន្តមុខរបរ និងរូបមន្តគ្រួសារនេះដល់អ្នកជំនាន់ក្រោយឱ្យបានគង់វង្ស។
អ្នកស្រី សុគន្ធា បានប្រាប់ថា៖ «ខ្ញុំកំពុងតែរៀបចំកូនមកចាប់អាជីវកម្មនេះបណ្ដើរៗក្នុងគោលបំណងចង់ឱ្យគាត់មកបន្តវេនតែម្ដង»។
សហគ្រិនស្ត្រីដែលបន្តមរតករូបមន្តគ្រួសារ និងផលិតផលប្រេងកូឡាប្រេងខ្យល់ខ្មែររូបនេះ មានមោទនភាពដែលបានចូលរួមក្នុងការលើកមុខមាត់ប្រទេសជាតិ។
អ្នកស្រីថា៖ «ខ្ញុំចង់ឱ្យនៅស្រុកខ្មែរមានផលិតផលខ្មែរ ដាក់ក្នុងផ្ទះ ក្នុងកាបូប ក្នុងកាតាប ក្នុងឡាន ដើម្បីធ្វើជាគ្រូពេទ្យប្រចាំរបស់គាត់។ គាត់គ្រាន់តែលាប គ្រាន់តែហិតក៏ជាសះស្បើយដែរ ឬបានពន្យារពេលការឈឺចាប់ខ្លះដែរ។ នេះជាការរួមចំណែករបស់ខ្ញុំ»៕
