ភ្នំពេញៈ កម្មវិធីមហោស្រពល្ខោនបាសាក់ទូទាំងប្រទេស ឆ្នាំ ២០២២ ក្រោមប្រធានបទ «វប្បធម៌សន្តិភាព» ដែលរៀបចំឡើងនៅរោងមហោស្រពនាយកដ្ឋានសិល្បៈទស្សនីយភាព រយៈពេល ២ ថ្ងៃ ត្រូវបានបិទបញ្ចប់នៅល្ងាចថ្ងៃទី ៤ តុលា ក្រោមអធិបតីភាពលោកស្រី ម៉ិញ កុសនី រដ្ឋលេខាធិការក្រសួងវប្បធម៌ និងវិចិត្រសិល្បៈ។ រាជធានី-ខេត្តចំនួន ៣ ឈ្នះជយលាភី ក្នុងការប្រកួតប្រជែង នៃកម្មវិធីមហោស្រពនេះ។
ក្រុមល្ខោនបាសាក់មកពីខេត្តកែប ឈ្នះពានរង្វាន់លេខ ១ ទទួលបានពានមាស ១ អមជាមួយទឹកប្រាក់ចំនួន ១០ លានរៀល និងថវិកាសប្បុរសជន ៣ លានរៀល។ ក្រុមល្ខោនបាសាក់មកពីខេត្តកំពង់ចាម ជាប់លេខ ២ ទទួលបានពានប្រាក់ ១ អមនឹងទឹកប្រាក់ ៧ លានរៀល ព្រមទាំងថវិកាសប្បុរសជន ២ លានរៀល និងក្រុមល្ខោនបាសាក់មកពីរាជធានីភ្នំពេញ ជាប់លេខ ៣ ទទួលបានពានសំរឹទ្ធ ១ អមជាមួយទឹកប្រាក់ចំនួន ៤ លានរៀល និងថវិកាសប្បុរសជន ១ លានរៀល។
ឯចំណាត់ថ្នាក់កិត្តិយស ២ ក្រុម ទទួលបានប្រកាសនីយបត្រ អមជាមួយទឹកប្រាក់ក្នុង ១ ក្រុម បានចំនួន ៣ លានរៀល និងថវិកាសប្បុរសជន ក្នុង ១ ក្រុម ចំនួន ១ លានរៀល គឺក្រុមល្ខោនបាសាក់មកពីខេត្តកណ្តាល និងខេត្តបន្ទាយមានជ័យ។
លោកស្រី ម៉ិញ កុសនី រដ្ឋលេខាធិការក្រសួងវប្បធម៌ និងវិចិត្រសិល្បៈ បានសម្តែងការអបអរសាទរដ៏ស្មោះចំពោះសិល្បករ សិល្បការិនី ល្ខោនបាសាក់ ទាំងអស់ ដែលទទួលបានជយលាភី ក្នុងមហោស្រពល្ខោនបាសាក់ទូទាំងប្រទេស ឆ្នាំ ២០២២ នេះ។ ជាពិសេស លោកស្រីបានលើកទឹកចិត្តដល់សិល្បករ សិល្បការិនី ដែលមិនទទួលបានពានរង្វាន់ និងសុំបន្តការខិតខំប្រឹងប្រែងបន្ថែមទៀត ដើម្បីរួមចំណែកលើកស្ទួយវិស័យសិល្បៈទស្សនីយភាពឱ្យកាន់តែរីកចម្រើន ប្រកបដោយនិរន្តរភាព។
លោកស្រីរដ្ឋលេខាធិការ លើកឡើងថា៖ «ដូចដែលយើងទាំងអស់គ្នាបានដឹងហើយថា មហោស្រពល្ខោនបាសាក់មិនគ្រាន់តែជាវេទិកាប្រកួតប្រជែងយកពានរង្វាន់នោះទេ ប៉ុន្តែគឺជាទីកន្លែងជួបជុំសិក្សាស្វែងយល់ វាស់ស្ទង់សមត្ថភាព និងការចែករំលែកបទពិសោធ និងចំណេះដឹងផងដែរ»។
លោកស្រីបន្ថែមថា៖ «ដូចនេះ គោលដៅសំខាន់ នៃការរៀបចំមហោស្រពល្ខោនបាសាក់ គឺដើម្បីផ្តល់ឱកាសក្នុងការសិក្សាពីចំណុចខ្លាំង និងចំណុចខ្សោយ លើផ្នែកតាក់តែងនិពន្ធរឿង ការដឹកនាំដំឡើងរឿង និងការសម្តែងជាដើម សំដៅពង្រឹងសមត្ថភាព និងលើកកម្ពស់វិស័យសិល្បៈទស្សនីយភាពមួយនេះ ដើម្បីឈានទៅដល់ការប្រកួតប្រជែងលើឆាកអន្តរជាតិ»។
លោក ឈាង ឆដាភ័ក្ត្រ ប្រធានស្តីទីនាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈប្រាប់ ភ្នំពេញ ប៉ុស្តិ៍ កាលពីថ្ងៃទី ៤ ខែតុលា ក្នុងការប្រកួតផ្តាច់ព្រ័ត្រកម្មវិធីមហោស្រពល្ខោនបាសាក់ទូទាំងប្រទេសឆ្នាំ២០២២ ថា ទាំង ៥ក្រុម បានពីការជម្រុះចេញពីក្រុមចូលរួមចំនួន ១០ ក្រុម ដែលបានដាក់ពាក្យចូលរួម មកពីបណ្តាពីរាជធានី-ខេត្ត។ ក្រុមទាំង ៥ បានប្រកួតគ្នានៅវគ្គផ្តាច់ព្រ័ត្រ ដើម្បីទទួលជយលាភីចុងក្រោយចំនួន ៣ ក្រុម គឺលេខ ១ លេខ ២ លេខ ៣ និងចំនួន ២ ក្រុម ទទួលពានជយលាភីកិត្តិយស។
លោក ឆដាភ័ក្ត្រ ប្រាប់ថា៖ «ក្រុមសិល្បៈល្ខោនបាសាក់ចំនួន ៥ ក្រុម ដែលមកពីខេត្តកណ្តាល ខេត្តកំពង់ចាម រាជធានីភ្នំពេញ ខេត្តបន្ទាយមានជ័យ និងខេត្តកែប។ ក្រុមទាំង ៥ បានប្រកួតប្រជែងគ្នានៅវគ្គផ្តាច់ព្រ័ត្រក្នុងកម្មវិធីមហោស្រពល្ខោនបាសាក់ទូទាំងប្រទេសប្រចាំឆ្នាំ ២០២២ ចំនួន ២ ថ្ងៃ។ កាលពីថ្ងៃទី ៣ ខែតុលា មានក្រុមសិល្បៈល្ខោនបាសាក់សម្តែងចំនួន ៣ ក្រុម និងចំនួន ២ ក្រុម បានសម្តែង កាលពីព្រឹកថ្ងៃទី ៤ ខែតុលា ឆ្នាំ ២០២២»។
លោក ឈាង ឆដាភ័ក្ត្រ ក៏បញ្ជាក់ដែរថា ក្រុមល្ខោនបាសាក់ ដែលបានដាក់ពាក្យ និងផ្ញើវីដេអូសម្តែងរបស់ខ្លួនមកចូលរួមមានចំនួន ១០ ក្រុម មកពី ៨ រាជធានី-ខេត្ត។ ក្នុងនោះ មាន រាជធានីភ្នំពេញ ១ ក្រុម ខេត្តកណ្តាល ៣ ក្រុម ខេត្តកែប ១ ក្រុម ខេត្តកំពង់ស្ពឺ ១ ក្រុម ខេត្តត្បូងឃ្មុំ ១ក្រុម ខេត្តកំពង់ចាម ១ ក្រុម ខេត្តកំពង់ឆ្នាំង ១ ក្រុម និងខេត្តបន្ទាយមានជ័យ ១ ក្រុម។
កម្មវិធីមហោស្រពល្ខោនបាសាក់ទូទាំងប្រទេស ឆ្នាំ ២០២២ បានបញ្ចប់ការប្រកួតដ៏ស្វិតស្វាញ ដោយមានការត្រួតពិនិត្យវីដេអូសម្ដែងរបស់ក្រុមនីមួយៗយ៉ាងល្អិតល្អន់ និងវាយតម្លៃ ដោយស្មារតីយកចិត្តទុកដាក់ខ្ពស់ ពីគណៈកម្មការមេប្រយោគចំនួន៥រូប រួមមាន លោកសំ សំអាង លោកឯល ប៉ុនណុល លោកណុប សម្បត្តិ លោកស្រី ឈូក ចាន់ដារ៉ា និងលោកស្រី អ៊ុយ លតាវណ្ណ។ គណៈកម្មការមេប្រយោគចំនួន ៥រូប បានផ្ដល់ពិន្ទុយ៉ាងសុក្រឹត យុត្តិធម៌ មិនលម្អៀងជូនដល់ក្រុមប្រកួតទាំងអស់ដើម្បីជ្រើសយក ៥ ក្រុមចុងក្រោយ ទៅប្រកួតសម្ដែងផ្ទាល់ក្នុងវគ្គផ្ដាច់ព្រ័ត្រនៅសាលមហោស្រពនាយកដ្ឋានសិល្បៈទស្សនីយភាព។
លោក សំ សំអាង ប្រធានគណៈកម្មការមេប្រយោគក្នុងកម្មវិធីមហោស្រពល្ខោនបាសាក់ទូទាំងប្រទេសនេះ បង្ហើបនាថ្ងៃបញ្ចប់ការប្រកួតមហោស្រពល្ខោនបាសាក់នោះថា៖ «ក្រោយពីចប់កម្មវិធីនេះទៅ យើងក៏ចង់ស្នើដល់ក្រសួងផងដែរ ដើម្បីជួយសម្រួលដល់ការរៀបចំពេលក្រោយៗទៀត ឱ្យមានភាពងាយស្រួលទាំងអស់គ្នា»។
ក្នុងសំណើនោះ ទី១ ចង់ឱ្យក្រសួង មានការរៀបចំជាសិក្ខាសាលាស្តីពីសិល្បៈល្ខោនបាសាក់ តាមមូលដ្ឋាននានា នៃរាជធានី និងខេត្តនីមួយៗ។ ទី២ ចង់បើកវគ្គបណ្តុះបណ្តាលស្តីពីទម្រង់សិល្បៈល្ខោនបាសាក់ ឱ្យបានច្បាស់លាស់ទៅដល់សហគមន៍ ដែលមានក្រុមល្ខោនបាសាក់។
នាឱកាសថ្ងៃបើកកម្មវិធីមហោស្រពលោ្ខនបាសាក់ កាលពីថ្ងៃទី ៣ ខែតុលា ឆ្នាំ ២០២២ លោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ ក៏បានថ្លែងថា ក្នុងនាមជាថ្នាក់ដឹកនាំក្រសួង ពិតជាមានសេចក្តីសោមនស្ស រីករាយយ៉ាងក្រៃលែង និងមានមោទនភាពជាពន់ពេកដោយបានឃើញវត្តមានក្រុមសិល្បករល្ខោនបាសាក់ជាច្រើនមកពីបណ្តារាជធានី-ខេត្ត បានដាក់ពាក្យចូលរួមប្រកួតប្រជែងសមត្ថភាពរបស់ខ្លួន។
លោកស្រីថា វិធីសាស្រ្តនៃការដឹកនាំរឿង សិល្ប៍វិធីនៃការតាក់តែងនិពន្ធរឿង និងសមត្ថភាពនៃការសម្តែង ក្នុងកម្មវិធីមហោស្រពល្ខោនបាសាក់ ទូទាំងប្រទេសឆ្នាំ ២០២២ នេះ ក្រោមការខិតខំ និងយកចិត្តទុកដាក់របស់ប្រមុខរាជរដ្ឋាភិបាល ដោយមានក្រសួងវប្បធម៌ និងវិចិត្រសិល្បៈ ជាសេនាធិការ។
លោកស្រី ភឿង សកុណា បញ្ជាក់ថា៖ «ខ្ញុំសូមចាត់ទុក មហោស្រពល្ខោនបាសាក់ទូទាំងប្រទេសឆ្នាំ ២០២២ នេះ មិនត្រឹមតែជាវេទិកាសម្រាប់ការបង្ហាញការបញ្ចេញនូវសមត្ថភាព និងទេពកោសល្យរបស់ក្រុមនីមួយៗតែប៉ុណ្ណោះទេ ប៉ុន្តែនេះគឺជាពេលវេលាមួយដ៏ល្អសម្រាប់សិល្បករទាំងក្នុង និងក្រៅប្រព័ន្ធ មានឱកាសបានជួបជុំគ្នា និងផ្លាស់ប្តូរនូវបទពិសោធថ្មីៗ រវាងគ្នា និងគ្នា។
ខ្ញុំជឿជាក់ថា នេះជាវេទិកាមួយដ៏សំខាន់ សម្រាប់ផ្សព្វផ្សាយជូនដល់មហាជនគ្រប់ស្រទាប់ថ្នាក់បានទស្សនា និងស្វែងយល់បន្តិចម្តងៗអំពីទម្រង់សិល្បៈខ្មែរជាច្រើន ដែលទាមទារឱ្យមានការចូលរួមយកចិត្តទុកដាក់ ថែរក្សា និងលើកស្ទួយ»។
សម្រាប់ទិសដៅការងារទៅមុខ ដើម្បីពង្រឹង និងពង្រីកវិសាលភាពនៃវិស័យសិល្បៈទស្សនីយភាពនៅកម្ពុជា ក្នុងនាមជាថ្នាក់ដឹកនាំក្រសួងវប្បធម៌ និងវិចិត្រសិល្បៈ លោកស្រី ភឿង សកុណា បានបញ្ជាក់ពីការយកចិត្តទុកដាក់ខ្ពស់សម្រាប់វិស័យសិល្បៈថា៖«ខ្ញុំសូមគាំទ្រយ៉ាងពេញទំហឹង ចំពោះសកម្មភាពវប្បធម៌ ក្នុងគោលបំណងថែរក្សា និងលើកស្ទួយសិល្បៈល្ខោនបាសាក់។
ជាពិសេស ការបង្កើតឱ្យមានមហោស្រព ឬព្រឹត្តិការណ៍វប្បធម៌នានា គឺជាការផ្សព្វផ្សាយ និងផ្តល់ឱកាសដល់សហគមន៍ យុវជន យុវនារី ដើម្បីចូលរួមថែរក្សា ការពារនូវសម្បត្តិវប្បធម៌ជាតិ របស់ខ្លួន ដូចពាក្យថា កិច្ចថែរក្សាការពារបេតិកភណ្ឌវប្បធម៌ គឺជាភារកិច្ចរបស់កូនខ្មែរគ្រប់ៗរូប»៕