.jpg)
លោក តុន ច័ន្ទរិទ្ធិ ម្ចាស់ជយលាភីលេខ ១ ផ្នែករឿងខ្លី នៃស្នាដៃរឿង «សង្គមនេះ»ក្នុងការប្រកួតលើកទី៥ ឆ្នាំ ២០២២។ រូបថត សហការី
ភ្នំពេញៈ ការប្រកួតតែងនិពន្ធនៃពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៦ សម្រាប់ឆ្នាំ ២០២៣ ចាប់ផ្តើមទទួលបេក្ខជនដាក់សា្នដៃប្រកួតប្រជែង ក្រោមប្រធានបទ «ការលោភលន់នាំមកនូវសេចក្តីវិនាស»។
វិទ្យាស្ថានពុទ្ធសាសនបណ្ឌិត្យ បានរៀបចំការប្រកួតពានរង្វាន់អក្សរសិល្ប៍ពុទ្ធសាសនបណ្ឌិត្យនេះឡើង ក្នុងគោលបំណងលើកតម្កើងស្នាដៃអក្សរសាស្ត្រខ្មែរឡើងវិញ ដែលផ្តោតសំខាន់លើផ្នែកប្រលោមលោកខ្លី និងកំណាព្យរឿងខ្លី។
សម្រាប់ជយលាភីរឿងប្រលោមលោកខ្លី និងកំណាព្យរឿងខ្លី នឹងត្រូវផ្តល់ចំណាត់ថ្នាក់ចាប់ពីលេខ ១ ដល់លេខ ៣ ដោយទទួលបានរង្វាន់ជាថវិកា វិញ្ញាបនបត្រ និងការបោះពុម្ពស្នាដៃ។ នេះបើតាមលោក ស សុខនី (Sor Sokny) ប្រធានវិទ្យាស្ថានពុទ្ធសាសនបណ្ឌិត្យ បង្ហើបពីគម្រោងរៀបចំប្រតកួតប្រចាំឆ្នាំ ២០២៣។
លោក ស សុខនី ប្រាប់ពីលក្ខខណ្ឌនៃការដាក់ពាក្យចូលរួមប្រកួតថា៖ «ចំពោះបេក្ខជនម្នាក់អាចដាក់ស្នាដៃបានតែ ១ គត់ និងមិនមែនជាស្នាដៃ ដែលធ្លាប់ទទួលចំណាត់ថ្នាក់ក្នុងពានរង្វាន់ណាមួយពីមុន។ ស្នាដៃរឿងប្រលោមលោកខ្លី ត្រូវវាយអត្ថបទប្រើយូនីកូដខ្មែរក្នុងកុំព្យូទ័រទំហំអក្សរ១២ ពុម្ព Khmer OS Siem Reap ខ្នាតក្រដាស A4 មានចំនួនពី ១០-១៥ ទំព័រ។
ឯកំណាព្យវិញចាប់ពី ៥-១០ ទំព័រ (មានគំរូជូន) ជាសាច់រឿងដែលសរសេរថ្មីសុទ្ធសាធ។ រាល់សំណេរត្រូវគោរពអក្ខរាវិរុទ្ធ តាមវចនានុក្រមខ្មែរ បោះពុម្ពផ្សាយដោយពុទ្ធសាសនបណ្ឌិត្យគ្រាទី៥ ជាចាំបាច់ (ផ្តល់ពិន្ទុជាពិសេស)»។
ចំពោះការដាក់ពាក្យចូលរួមប្រកួត បេក្ខជនត្រូវបញ្ជាក់ពីអាសយដ្ឋាន លេខទូរស័ព្ទ និងអ៊ីមែល ឱ្យបានច្បាស់លាស់ ដើម្បីងាយស្រួល សម្រាប់គណៈកម្មការរៀបចំធ្វើការទំនាក់ទំនង។
ដើម្បីទទួលបាននូវព័ត៌មាននានា អាចចូលទៅកាន់គេហទំព័រ www.budinst.gov.kh។ ការប្រកួតប្រជែងពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៦ ចាប់ផ្តើមទទួលស្នាដៃរបស់បេក្ខជន ចាប់ពីថ្ងៃនេះរហូតដល់ទី៣០ ខែមេសា ឆ្នាំ ២០២៣។
ការប្រកួតពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៥ ប្រចាំឆ្នាំ ២០២២ ត្រូវបានធ្វើឡើងក្រោមប្រធានបទ «សីលធម៌នៃការរស់នៅ»។
បើតាមសេចក្តីប្រកាសលទ្ធផលចេញ ដោយក្រសួងធម្មការ និងសាសនា កាលពីថ្ងៃទី ៣០ ខែសីហា ឆ្នាំ ២០២២ ជយលាភីផ្នែករឿងខ្លីមាន ៣ រូប ចំណាត់ថ្នាក់លេខ ១ បានទៅលោក តុន ច័ន្ទរិទ្ធិ ជាមួយស្នាដៃរឿង «សង្គមនេះ» លេខ ២ បានទៅលោក ពៅ មករា ជាមួយស្នាដៃរឿង «នរតី» និងលេខ ៣ បានទៅកញ្ញា ភុយ រតនា ជាមួយស្នាដៃរឿង «ចង្កៀងក្នុងផ្ទះ»។
ចំណែកឯជយលាភី៣រូប ផ្នែកកំណាព្យវិញ លេខ ១ បានទៅលោក ជួន ខ្មៅ ជាមួយស្នាដៃកំណាព្យរឿង «កូននាគ» លេខ ២ បានទៅលោក មឿង ពិសិត ជាមួយស្នាដៃកំណាព្យរឿង «ដីម៉ែ» និងលេខ ៣ បានទៅលោក ភិរម្យ ដារ៉ា ជាមួយស្នាដៃកំណាព្យរឿង «ជំនោរគង្គា»។
លោក តុន ច័ន្ទរិទ្ធិ ម្ចាស់ជយលាភីលេខ ១ ផ្នែករឿងខ្លី នៃស្នាដៃរឿង «សង្គមនេះ» និងជាអ្នកនិពន្ធឯករាជ្យ មានស្រុកកំណើត នៅខេត្តបាត់ដំបង និងលោក មឿង ពិសិត ជយលាភីលេខ ២ ផ្នែកកំណាព្យរឿងខ្លី ជាមួយស្នាដៃរឿង «ដីម៉ែ» មានស្រុកកំណើតនៅខេត្តពោធិ៍សាត់ ក៏បានចែករំលែកបទពិសោធ ឬបច្ចេកទេសខ្លះៗ សម្រាប់បេក្ខជនជំនាន់ក្រោយ ដើម្បីបង្កើតស្នាដៃត្រៀមចូលរួមការប្រកួតពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៦ នៅឆ្នាំ ២០២៣ នេះផងដែរ។
លោក តុន ច័ន្ទរិទ្ធិ បង្ហាញអារម្មណ៍សប្បាយរីករាយ ដោយស្នាដៃរបស់លោក ទទួលបានជយលាភីលេខ ១ ផ្នែករឿងខ្លីក្នុងការប្រកួតពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៥ ប្រចាំឆ្នាំ ២០២២ ថា ពានរង្វាន់នេះល្អក្នុងការលើកស្ទួយវិស័យអក្សរសាស្រ្ត ជាពិសេសនោះ រៀងរាល់ការប្រកួតនៃឆ្នាំនីមួយៗ តែងមានការកំណត់ប្រធានបទដោយក្រុមអ្នករៀបចំការប្រកួត។
លោក តុន ច័ន្ទរិទ្ធិ បង្ហើបពីបទពិសោធផ្ទាល់ខ្លួនឱ្យដឹងថា៖ «ក្នុងនាមជាអ្នកសរសេរ ត្រូវចេះបង្កើតគំនិតច្នៃប្រឌិតខ្លួនឯង និងធ្វើយ៉ាងណា ឱ្យសមស្របតាមស្ថានភាពនៃសង្គម ដើម្បីទាក់ទាញទាំងអ្នកអាន និងគណៈកម្មការវាយតម្លៃស្នាដៃ ហើយក៏ត្រូវផ្តោតទៅលើធាតុសំខាន់៣យ៉ាង ជាចាំបាច់នៃការតែងនិពន្ធ គឺអត្ថន័យ អត្ថរូប និងអត្ថរស»។
លោក ច័ន្ទរិទ្ធិ បន្តថា៖ «យើងត្រូវយកបទពិសោធចាស់ៗដែលខ្វះខាត និងធ្លាប់ឆ្លងកាត់ទាំងឡាយមកមើលឡើងវិញ ដើម្បីបង្កើតសា្នដៃថ្មីមួយ ដែលអាចទាក់ទាញចំណាប់អារម្មណ៍ក្រុមគណៈកម្មការ និងអាចឈានដល់ការទទួលបានផលល្អជាប់ជយលាភីទៀតផង។ តួយ៉ាងដូចជារូបខ្ញុំ ទម្រាំតែស្នាដៃខ្លួនឯងនេះ ទទួលបានជយលាភីនោះ គឺខ្ញុំក៏ត្រូវឆ្លងកាត់ការដាក់សា្នដៃប្រកួតច្រើនដងដែរ»។
លោក មឿង ពិសិត ក៏ត្រៀមស្នាដៃ សម្រាប់ការចូលរួមប្រកួតប្រជែង ពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៦ ប្រចាំឆ្នាំ ២០២៣ សាជាថ្មីម្តងទៀតដែរ ដោយលោកគ្រោងនឹងដាក់ប្រកួតផ្នែករឿងខ្លីវិញម្តង។
លោកមឿង ពិសិត បញ្ជាក់ថា៖ «ការប្រកួតលើកទី៦ នៅឆ្នាំ ២០២៣ ខ្ញុំនឹងចូលរួមប្រកួតប្រជែងលើសា្នដៃរឿងខ្លីវិញម្តង ដោយសារកាលពីឆ្នាំ ២០២២ ខ្ញុំបានដាក់ និងជាប់ជាជយលាភីលេខ ២ ផ្នែកកំណាព្យរឿងខ្លីរួចហើយ»។
លោកមឿង ពិសិត បានចែករំលែកអំពីបទពិសោធផ្ទាល់ខ្លួន ទៅដល់បេក្ខជនដែលត្រៀមបង្កើតស្នាដៃចូលរួមប្រកួតក្នុងឆ្នាំ ២០២៣ ថា៖ «សម្រាប់ជាអ្នកនិពន្ធ ត្រូវយកចិត្តទុកដាក់ខ្លាំង ទៅលើស្នាដៃអ្នកនិពន្ធចាស់ៗ ឬរៀមច្បង។ កាលណាបានអានស្នាដៃរបស់ពួកគាត់ច្រើននោះ យើងក៏ទទួលបាននូវបទពិសោធជាការបង្ហាញផ្លូវផ្នែកតែងនិពន្ធដល់យើងក៏ច្រើនដែរ។ ក្រោយមកយើង អាចមានគំនិតច្នៃប្រឌិត ឬបង្កើតស្នាដៃថ្មីមួយដែលជារបស់ខ្លួនឯងបាន និងត្រូវគោរពតាមគោលការណ៍នៃសិល្បិ៍វិធីតែងនិពន្ធ»។
នៅឆ្នាំ ២០១៨ ការប្រកួតពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី១ ក្រោមប្រធានបទ «សុខដុមនីយកម្មក្នុងសង្គមតាមរយៈសាសនា» លើកទី២ នៅឆ្នាំ ២០១៩ ក្រោមប្រធានបទ «ពុទ្ធទស្សនៈក្នុងការអភិវឌ្ឍសង្គមខ្មែរ»។ លើកទី៣ ធ្វើនៅឆ្នាំ ២០២០ ក្រោមប្រធានបទ «ទោសនៃសុរា» លើកទី៤ នៅឆ្នាំ ២០២១ ក្រោមប្រធានបទ «ការមិនមានរោគជាលាភដ៏ប្រសើរ» និងលើកទី៥ នៅឆ្នាំ ២០២២ ក្រោមប្រធានបទ «សីលធម៌នៃការរស់នៅ»៕
