The Phnom Penh Post Search

Search form

Logo of Phnom Penh Post newspaper Phnom Penh Post - ការ​កែ​ច្នៃ​ឧបករណ៍​ផ្ទះ​បាយ​ពីធាង​ទ្រាំង​ ទទួល​បាន​ការ​ចាប់​អារម្មណ៍​ពីអតិថិ​ជន

ការ​កែ​ច្នៃ​ឧបករណ៍​ផ្ទះ​បាយ​ពីធាង​ទ្រាំង​ ទទួល​បាន​ការ​ចាប់​អារម្មណ៍​ពីអតិថិ​ជន

Content image - Phnom Penh Post
ដើមទ្រាំង (ឆ្វេង) និងអ្នកភូមិនៅខេត្តេព្រះវិហារ ពេលកំពុងច្នៃធាងទ្រាំងធ្វើជាឧបករណ៍ប្រើប្រាស់ផ្សេងៗ។ រូបថត Traing Processing Group

ការ​កែ​ច្នៃ​ឧបករណ៍​ផ្ទះ​បាយ​ពីធាង​ទ្រាំង​ ទទួល​បាន​ការ​ចាប់​អារម្មណ៍​ពីអតិថិ​ជន

ព្រះវិហារៈ​ កាល​ពីពេលមុនៗ​មក​ធាង​ទ្រាំង​មិន​ត្រូវ​បាន​ប្រជា​ពលរដ្ឋ​ខ្មែរ​​ចេះ​យក​ម​ក​កែច្នៃ​ធ្វើជា​សម្ភារ​សម្រាប់​ប្រើប្រាស់​ក្នុង​ផ្ទះបាយ​ឡើយ​ តែ​អ្វី​ដែល​គេឧស្សាហ៍​ឃើញ​គឺនៅ​តំបន់​ខ្លះ​ ប្រជា​ពលរដ្ឋ​គ្រាន់តែ​យក​ធាង​ទ្រាំង​មក​ធ្វើជា​ស្នា​ ធ្វើ​ឆ្អឹង​ទ្រូ ឆ្អឹង​លប​ដង​សន្ទូច​ស្ទូច​ត្រី​តែ​ប៉ុណ្ណោះ​។​

ក៏ប៉ុន្តែ​នៅ​ប៉ុន្មាន​ឆ្នាំ​មកនេះ​គេ​ឃើញ​មាន​ពលរដ្ឋ​មួ​យចំនួន​ចេះ​កែច្នៃ​ធាង​ទ្រាំង​ដែល​កាប់​ចេញ​ពី​ដើម​យកមក​ធ្វើជា​វត្ថុ​ប្រើ​ប្រាស់​បម្រើ​ក្នុង​ជីវភាព​ប្រចាំថ្ងៃ​ដូចជា​ចង្កឹះ ស្លាប​ព្រា វែក​បាយ វែក​សម្ល​ និង​វត្ថុ​ផ្សេងៗ​ទៀត​ដែល​សម្ភារ​កែច្នៃ​ពី​រុក្ខ​ជាតិ​ដើម​ទ្រាំង​នេះ​បាន​បង្ហាញ​ពី​គុណ​តម្លៃ​ធម្មជាតិ​យ៉ាង​មាន​ប្រយោជន៍​ផ្សារ​ភ្ជាប់​នឹង​ជីវិត​មនុស្ស​ដ៏​វិសេស​វិសាល​ក្រែ​លែង​។​

​ក្នុង​កាយ​វិការ​ដៃ​ឆ្វេង​ចាប់​បន្ទះ​ធាង​ទ្រាំងស្តើង​ទំហំ ​២ ​ធ្នាប់​ដៃ​ ប្រវែង​ជាង ​​​១​ ម៉ែត្រទាញ​ទៅ​ទាញ​មក​​ ខណៈ​អ្នក​ខ្លះ​ទៀត​កំពុង​កាន់​កាំបិត​បន្ទោះ​ពុះ​ច្រៀក​ធាង​រុក្ខ​ជាតិនេះ​ដែល​នោះ​ គឺ​ជា​សកម្ម​ភាព​​ប្រជាសហ​គម​ន៍មាន​គ្នាប្រមាណ ៣០ ​គ្រួសារ​ កំពុង​កែច្នៃ​ដោយ​ដៃ​ធ្វើ​សម្ភារ​ប្រើ​ប្រាស់​ចេញ​ពី​ដើម​ទ្រាំង​មាន​ដូចជា​ស្លាប​ព្រា ចង្កឹះ វែក​បាយ​ដាវ ព្រះ​ខ័ន ផ្លែ​លំពែង និង​សម្ភារ​ផ្សេងៗ​ទៀត​នៅ​ក្នុង​ភូមិ​សង្កែ ឃុំ​សង្កែ ស្រុក​ឆែប​ខេត្ត​ព្រះវិហារ។ ​ ​

​លោក ​មាស ហឿ អាយុ​ ៦៤​ ឆ្នាំ​ ជា​អ្នក​កែច្នៃ​ធាង​ទ្រាំង​ហើយ​ក៏​ជា​ប្រធាន​សហ​គមន៍​ដែរ​នោះ​បាន​រៀបរាប់​ប្រាប់ ​ភ្នំពេញ​ ប៉ុស្តិ៍​ថា លោក​រួមជា​មួយ​អ្នក​ដែល​រស់នៅ​ក្នុង​ភូមិ​-​ឃុំ​សង្កែ ស្រុក​ឆែប​ប្រមាណ​ជា​ ៣០​ គ្រួសារ​កំពុង​ផលិត​កែច្នៃ​ធាង​ទ្រាំង​ដោយ​ដៃផ្ទាល់​ហើយ​ការ​ផលិត​នេះ​ពួក​លោក​បាន​ធ្វើ​ចាប់​តាំងពី​ឆ្នាំ​២០១៨​មក​ម្ល៉េះ​។​

ចំពោះ​សម្ភារ​ដែល​លោក​កែច្នៃ​នេះ​មាន​ដូច​ជា ចង្កឹះ សម​ ស្លាប​ព្រា វែក​បាយ ​វែក​សម្ល វែក​ឆា ដាវ ​ព្រះ​ខ័ន ផ្លែលំពែង​ជា​ដើម​ តែ​នៅ​ពេល​នោះ​ទាំង​រូប​លោក​ទាំង​អ្នក​ផលិត​ផ្សេង​ទៀត​នៅ​មិន​ទាន់​អាច​ផលិត​ឱ្យបាន​ត្រឹម​ត្រូវ​ទៅតាម​ក្បួន​ខ្នាត​នៅ​ឡើយ​ទេ​ ពោលគឺ​នៅ​វែង​ខ្លី​មិន​អាច​ចរាចរ​​លក់​ដូរ​នៅ​លើ​ទីផ្សារ​បាន​ទូលំ​ទូលាយ​ឡើយ​។​

​លោក​បន្ត​ថា​ លុះ​ដល់​ដើម​ឆ្នាំ​ ២០១៩ ​ទើប​មាន​អង្គការ​ក្នុង​ស្រុក​មួយ​ឈ្មោះថា ​​កម្ម​វិធី​ផ្លាស់​ប្ដូរ​បទ​ពិសោធន៍​អនុ​ផល​ព្រៃ​ឈើ​ (NTFPEP) (Non-Tim​ber Forest Products Exchang Program) ដែល​ទទួល​ជំនួយ​ពី​ប្រទេស​ស្វ៊ីស​បានមក​ជួយ។ ​ចាប់ពី​ពេល​នោះ​មក​អង្គការ​នេះ​បាន​ជួយ​បង្ហាត់​បង្រៀន​ដល់​អ្នក​កែច្នៃ​ផលិត​ផល​ទាំង​នោះ​ឱ្យ​ចេះ​ធ្វើ​ទៅ​តាម​ក្បួន​ខ្នាត​ត្រឹម​ត្រូវ​​ ហើយ​ក្រុម​លោក​ក៏ត្រូវ​បាន​ប្រមូល​ចូលគ្នា​បង្កើត​បាន​ជា​សហ​គមន៍​មួយ​មាន​ឈ្មោះ​ថា​ សហ​គមន៍​កែច្នៃ​ដើម​ទ្រាំង​។

​បន្ទាប់​ពីសហ​ការ​ជាមួយ​អង្គការ​នេះ​រយៈ​ពេល ​១ ​ឆ្នាំមក ​បាន​ធ្វើឱ្យ​សហ​គម​ន៍របស់​លោក​ចេះតែ​មាន​គំនិត​អភិវឌ្ឍ​ន៍​ពី ១ ថ្ងៃ​​ ទៅ ១ ថ្ងៃ ​រហូត​ធ្វើឱ្យ​ផលិត​ផល​ធ្វើ​ពី​ធាង​ទ្រាំង​របស់​សហ​គម​ន៍​ទទួល​បាន​ការ​ចាប់​អារម្មណ៍​ទាំង​ក្នុង​ខេត្ត​ព្រះវិហារ​ទាំង​នៅ​ខេត្ត​សៀម​រាប ​ពិសេស​នៅ​រាជ​ធានី​ភ្នំពេញ​តែ​ម្តង​។​

​លោក​បាន​ប្រាប់​ថា​៖ «​កាលពី​មិន​ទាន់​មាន​អង្គការ​ចូល​មកជួយ​បង្ហាត់​បង្រៀន​យើង​ចេះ​តែធ្វើ​ទៅ​តាម​ទម្លាប់​មិន​ធ្វើ​តាម​ក្បួន​ខ្នាត​អី​ទេ​ មាន​វែង​មាន​ខ្លី​អ៊ីចឹង​ទៅហើយ​ទីផ្សារ​ក៏​ទៅតាម​ហ្នឹង​ដែរ​ គឺ​យើង​លក់​ផលិត​ផល​របស់​យើង​អត់​សូវ​ដាច់​ទេ​។​ ដល់​តែ​យើង​ទទួល​បាន​ការ​បង្ហាត់​បង្រៀន​ឱ្យ​ដឹង​ពី​ខ្នាត​ពី​របៀប​ច្នៃ​ប្រឌិត​ពី​អង្គការ (NTFPEP) ហើយ​យើង​យក​របស់​គេ​មក​សិក្សា​គឺ​សហ​គមន៍​យើង​ក៏មាន​ការ​រីក​ចម្រើន​ច្រើន​ទាំង​ផ្នែក​ផលិត​ ទាំង​ការ​រចនា​រូបរាង​ផលិត​ផល​របស់​យើង​»​។​

​បើ​តាម​លោក ​មាស ហឿ​ ក្រោយ​ពី​អង្គការ​ ​(NTFPEP) បញ្ចប់​គម្រោង​ក៏​មាន​អង្គ​ការ USAID ចូលមក​ជួយ​សហ​គម​ន៍​វិញ​ម្ដង​នៅ​ដើម​ឆ្នាំ​ ២០២២ ​ដោយ​បាន​ជួយ​បង្ហាត់​បង្រៀន​ពី​វិធី​ប្រមូល​យក​អនុផល​ព្រៃឈើ​ឱ្យមាន​និរន្ត​រភាព​។​ មាន​ន័យ​ថា ​ធ្វើ​យ៉ា​ងណា​ចេះ​កាប់​យក​ដើម​រុក្ខជាតិ​ទាំង​នេះ​ទៅតាម​លក្ខណៈ​បច្ចេក​ទេស​ដោយ​មិន​ឱ្យ​រេច​រឹល​។ ​ជា​មួយ​គ្នា​នេះ​គេថែម​ទាំង​បាន​ជួយ​ស្វែងរក​ទីផ្សារ​លក់​ផលិត​ផល​ក៏ដូច​ជា​ជួយ​បង្ហាត់​បង្រៀន​ពី​របៀប​ផលិត​ដែលមាន​ខ្នាត​រង្វាស់​ និង​មាន​គុណ​ភាព​ល្អ​ត្រឹម​ត្រូវ​ទៀត​ផង​។

លោក​ មាស ​ហឿ បាន​ឱ្យ​ដឹង​ទៀត​ថា​ សហ​គមន៍​របស់​លោក​ធ្លាប់​បាន​នាំ​យក​សម្ភារ​ធ្វើ​ពី​ធាង​ទ្រាំង​​កែច្នៃ​ដោយ​ដៃ​សុទ្ធ​សាធ​នេះ​​ទៅ​តាំង​ពិ​ព័រណ៍​នៅ​ខេត្ត​សៀម​រាប ​នៅ​អំឡុង​ឆ្នាំ​ ២០២២ ​នេះ ហើយ​ត្រូវបាន​អ្នក​ចូល​ទស្សនា​ក្នុង​ពិធី​នោះ​​កោតសរសើរ ​និង​បាន​ទិញ​ផលិត​ផល​ពី​សហ​គមន៍រ​បស់​លោក​អស់ៗ​ពីស្ដង់​លក់​តែម្តង​។​ ក្រៅពី​នេះ​សហ​គមន៍​របស់​លោក​ក៏បាន​នាំយក​ផលិត​ផល​កែច្នៃ​ពី​ធាង​ទ្រាំង​នេះ​មក​តាំង​ពិ​ព័រណ៍​នៅ​រាជ​ធានី​ភ្នំពេញ​ ​និង​មាន​​អតិថិ​ជន​ជួយ​ទិញ​ជាច្រើន​ផង​ដែរ​។​

​លោក ​មាស ហឿ ឱ្យ​ដឹង​ថា ដើម​ទ្រាំង​គេ​មិន​អាច​យក​មក​កែច្នៃ​ធ្វើ​អ្វី​បានទេ​ តែ​ធាង​របស់​វា​មាន​ខ្លឹម​ ហើយ​គេ​អាច​យក​មក​កែច្នៃ​ធ្វើជា​សម្ភារ​ផ្សេងៗ​បាន​ច្រើន​ប្រភេទ​ណាស់​។​ ធាង​ទ្រាំង​មាន​ប្រវែង​ចាប់ពី ៣​ ម៉ែត្រ​ ដល់​ជាង ​៥ ​ម៉ែត្រ​ហើយ​ក្នុង​ ១ ​ធាង ​គេ​អាច​យក​មក​កែច្នៃ​ធ្វើជា​ចង្កឹះ​បាន​ ១០ ​គូ និង​អាច​កែច្នៃ​ជា​វែក​បាយ ​វែក​ឆា សម​ ស្លាប​ព្រា ព្រះ​ខ័ន ​ដាវ ផ្លែ​លំពែង​ និង​សម្ភារ​សម្រាប់​ប្រើ​ប្រាស់​ក្នុង​ជីវ​ភាព​ប្រ​ចាំថ្ងៃ​បាន​ច្រើន​ទៀត​ដូចជា​ ក​ញ្ជើ ច​ង្អេរ​ ជាដើម។ ​រីឯ​ស្លឹក​របស់​វា​គេ​យក​មក​ធ្វើជា​កន្ទេល​ដេក​បាន​ទៀត​ផង​។

បើ​ទាក់​ទង​នឹង​អ​បិ​យ​ជំនឿ​វិញ​ លោក​ មាស ហឿ​ ប្រាប់ថា​ គេ​អាច​យក​មកធ្វើ​ជា​ដាវ ព្រះ​ខ័ន​ សម្រាប់​ដាក់​តាំង​ក្នុង​ផ្ទះ​ ដើម្បី​បណ្តេញ​ខ្មោច​ព្រាយ​បិ​សាច​បាន​ទៀត​ផង​។​ ដើម​ទ្រាំង​មាន​រូបរាង​ស្រដៀង​ដើម​ត្នោត​ដែរ​ និង​មាន​អាយុ​ពី​៧០ ​ទៅ ​៨០ ​ឆ្នាំ ​វា​នឹង​​ងាប់​ទៅវិញ ​ប៉ុន្តែ​គេ​អាច​យក​ផ្លែ​វា​មក​បណ្តុះ​កូន​បាន​។​

​លោក​​ពោល​ថា​៖ «​ផលិត​ផល​មាន​ប្រមាណ ​៧០ ​ភាគរយ ​ត្រូវបាន​គេ​និយម​ប្រើ​ប្រាស់​ពិសេស​នៅ​រាជធានី​ភ្នំពេញ​តែម្តង​ ព្រោះ​ខ្ញុំ​មាន​ម៉ូយ​នៅ​ទីក្រុង​ភ្នំពេញ​ចាំ​ទទួល​យក​ទៅ​លក់​បន្ត​។​ ក្នុង​ ១ ​ឆ្នាំ​ អាច​រក​ចំណូល​បាន​ពី​ ១០ ​ទៅ​១៥ ​លាន​រៀល​ តែ​យើង​ត្រូវ​បែង​ចែក​ភាគ​រយ​ឱ្យ​អ្នក​ផលិត​ ១​ ផ្នែក​។ បើ​និយាយ​ពី​ចំណូល​មិន​បាន​ច្រើន​ទេ​តែ​អាច​ជួយ​បន្ថែម​លើ​មុខរបរ​ផ្សេង​ទៀត ​​ប៉ុន្តែ​ក៏​មាន​ការ​ប្រកួត​ប្រជែង​លើ​ទីផ្សារ​ដែរ​ ដូច្នេះ​យើង​ត្រូវ​តែ​ខំ​​កែច្នៃ​ឱ្យ​មាន​គុណ​ភាព​ល្អ​ជាង​មុន​»​។​

លោក​បាន​បញ្ជាក់​ថា ទោះជា​យ៉ាង​ណា ​ប្រាក់​ដែល​សហ​គមន៍​របស់​លោក​លក់​បាន​ត្រូវ​ដក​ ១ ​ចំណែក​​ ជូនទៅ​មន្ត្រី​សហគមន៍​ព្រៃ​ឈើ​ដើម្បី​ឱ្យ​គាត់​យក​ទៅ​ប្រើការ​ក្នុងការ​មើល​ថែ​រក្សា​ព្រៃឈើ​ព្រោះ​ពួក​គាត់​ត្រូវ​បញ្ចេញ​កម្លាំង​ក្នុង​ការ​ដើរល្បាត​ព្រៃ។​ អនុ​ផល​ព្រៃ​ឈើ​ដើម​ទ្រាំង​ដែល​សហ​គម​ន៍របស់​លោក​ទាញ​យក​មក​ប្រើប្រាស់​នោះ​ស្ថិត​នៅ​ក្នុងព្រៃ​សហ​គម​ន៍ដែល​ខាង​រដ្ឋបាល​ព្រៃ​ឈើ​មើល​ថែ​រក្សា​លើ​ផ្ទៃដី​សរុប​ចំនួន​ ២ ៧១៨ ​ហិក​តា​ ស្ថិត​នៅ​ក្នុង​ស្រុក​ឆែប​ ខេត្ត​ព្រះវិហារ​។

លោក​ថា ​ព្រៃ​សហគម​ន៍​នោះ​មាន​ចម្ងាយ​តែ​ជាង​ ១ ​គីឡូម៉ែត្រ​ប៉ុណ្ណោះ​ពីភូមិ​សង្កែ​ ឃុំ​សង្កែ ​ហើយ​លោក​អាច​ដឹក​ធាង​ទ្រាំង​តាម​គោ​យន្ត​បាន​ដោយ​មិន​ចំណាយ​ពេល​យូរ​ឡើយ​។​« សម្រាប់​អ​នា​គត​សហ​គម​ន៍ខ្ញុំ​មាន​គម្រោង​បង្រៀន​ដល់​ក្មេងៗ​ជំនាន់​ក្រោយ​ឱ្យ​ពួក​គេ​ចេះ​ថែរ​ក្សា​ និង​ដាំ​ដុះ​ដើម​ទ្រាំង​ឱ្យបាន​ច្រើន​ព្រោះ​ដើម​ទ្រាំង​មាន​ប្រ​យោ​ជន៍​ណាស់​»។​

​ពាក់​ព័ន្ធ​នឹង​ការ​លក់​ផលិត​ផល​សម្ភារ​ផ្ទះ​បាយ​ច្នៃពី​ដើម​ទ្រាំង​នេះ​ត្រូវបាន​យុវតី​ម្នាក់​រស់នៅ​រាជ​ធានី​ភ្នំពេញ​​ប្រាប់ ​ភ្នំពេញ ​ប៉ុស្តិ៍​ ដោយ​សុំ​មិនឱ្យ​បញ្ចេញ​ឈ្មោះ​ថា ​នាង​ជា​ឈ្មួញ​កណ្តាល​ដែល​ទទួល​ទិញ​ផលិត​ផល​របស់​សហគម​ន៍នេះមក​លក់​បន្ត​នៅ​រាជ​ធានី​ភ្នំពេញ​ ហើយ​ផលិតផ​ល​កែច្នៃ​ដោយដៃ​ផ្ទាល់​នេះ​ កំពុងតែ​មាន​ការ​ពេញ​និយម​ពី​សំណាក់​អតិថិ​ជន​ជា​ខ្លាំង​។​

​កញ្ញា​បាន​បញ្ជាក់ថា​​៖ «​ផលិត​ផល​របស់​គាត់​ជា​សម្ភារ​ផ្ទះបាយ​ហើយ​ឥឡូវនេះ​មានអតិថិ​ជន​ស្គាល់​ច្រើន​។​ យើង​លក់​ក្នុង​ ១ ​ថ្ងៃ​ មិនសូវ​ដាច់​ទេ​ តែ​យើង​លក់​ដាច់​ពេល​ចេញ​ទៅ​តាំង​ពិ​ព័រណ៍​ព្រោះ​ភ្ញៀវ​គាត់​ឃើញ​ ហើយ​គាត់​ស្គាល់​ ព្រោះ​សម្ភារ​នោះ​កែច្នៃ​ពី​ដើម​រុក្ខ​ជាតិ​ពិតៗ​ បើ​យើង​ប្រើ​ទៅ​វា​លើក​គុណ​តម្លៃ​ឱ្យ​ជីវិត​យើង​»​។​

​លោក​ សាត់ ជី​ម ជា​ប្រធាន​ភូមិ​សង្កែ ក្នុង​ឃុំ​សង្កែបាន​ប្រាប់ ​ភ្នំពេញ​ ប៉ុស្តិ៍​ថា នៅ​ក្នុង​ភូមិ​របស់​លោក​មាន​សហ​គមន៍​កែច្នៃ​ផលិត​ផល​សម្ភារ​ប្រើ​ប្រាស់​ក្នុង​ផ្ទះ​បាយ​ធ្វើ​ពី​ដើម​ទ្រាំង​ ហើយ​ផលិត​ផល​ទាំង​នោះ​លោក​សង្កេត​ឃើញ​ថា ​មាន​សេវា​កម្ម​លក់​ល្អ​។ ​មាន​ន័យ​ថា ​ផលិត​ផល​របស់​សហ​គមន៍​មួយ​នេះ​កំពុង​មាន​ការ​ទទួល​ស្គាល់​នៅលើ​ទីផ្សារ​ជា​បណ្តើរៗ​ហើយ​។ ​ក្នុង​ ១ ឆ្នាំៗ ពួក​គាត់​អាច​រក​ចំណូល​បាន​ពី ​៦០​ ទៅ ​៧០ ​ភាគ​រយ​ នៃ​ផលិត​ផល​កែច្នៃ​នេះ​រួមផ្សំ​ពី​កា​រងារ​ធ្វើស្រែ​ចម្ការ​របស់​ពួក​គាត់​។

ផលិត​ផល​ទាំង​នោះ​ ត្រូវ​បាន​សហ​គមន៍​ផ្ទាល់​នាំ​យក​ទៅ​លក់នៅ​ខេត្ត​សៀមរា​ប ទី​រួម​ខេត្ត​ព្រះវិហារ​ ខេត្ត​មណ្ឌល​គិរី និង​នៅ​រាជ​ធានី​ភ្នំពេញ​។​

​លោក​ថ្លែងថា​​៖ «​ពួកគាត់​ធ្វើ​នៅ​តាម​ផ្ទះ​និង​ជា​ក្រុម​ហើយ​គាត់​មាន​ក្រុម​ការងារ​របស់​គាត់​យ​ក​ទៅ​លក់​។​ បើ​នរណា​ធ្វើបាន​តិច​ក៏​ទទួល​ប្រាក់​បាន​តិច​ទៅតាម​ហ្នឹង​ទៅ​។ ​ខ្ញុំ​មើល​ឃើញ​ថា​ មុខរបរ​មួយ​នេះ​បាន​ជួយ​ដល់​ជីវភាព​របស់​ពួក​គាត់​បាន​មួយ​កម្រិត​ដែរ​»​៕

អត្ថបទគួរចាប់អារម្មណ៍