.jpg)
មន្ត្រីជំនាញធ្វើសន្និសីទសារព័ត៌មាន កាលពីព្រឹកថ្ងៃទី ២៨ ខែវិច្ឆិកា ឆ្នាំ ២០២២ ពីគម្រោងរៀបចំពិព័រណ៍សៀវភៅកម្ពុជា។ ហុង មិនា
ភ្នំពេញៈ បណ្ណាល័យជាតិកម្ពុជា និងក្រសួងពាក់ព័ន្ធនានា គ្រោងនឹងរៀបចំពិព័រណ៍សៀវភៅកម្ពុជាលើកទី៩ ក្រោមប្រធានបទ «មួយថ្ងៃអាន មួយថ្ងៃដឹង» ដែលប្រារព្ធធ្វើរយៈពេល ៣ ថ្ងៃ ចាប់ពីថ្ងៃទី ៩ ដល់ទី ១១ ខែធ្នូ ឆ្នាំ ២០២២ នៅបរិវេណបណ្ណាល័យជាតិ។
លោកស្រី ខ្លូត វិបុលឡា ប្រធានបណ្ណាល័យជាតិកម្ពុជា ថ្លែងនៅក្នុងសន្និសីទសារព័ត៌មាន កាលពីព្រឹកថ្ងៃទី ២៨ ខែវិច្ឆិកា ឆ្នាំ ២០២២ ថា ពិព័រណ៍នេះ នឹងដាក់តាំងបង្ហាញសៀវភៅចំនួន ១៩៧ ស្តង់ បើធៀបកាលពីឆ្នាំ ២០១៩ មានជាង ១៤០ ស្តង់។
លោកស្រីថ្លែងថា ពិព័រណ៍សៀវភៅកម្ពុជា ត្រូវបានប្រារព្ធធ្វើឡើងប្រកបដោយភាពជោគជ័យចំនួន ៨ លើកមកហើយ ដែលទទួលបានការគាំទ្រយ៉ាងពេញទំហឹងពីសំណាក់យុវជន និងប្រជាពលរដ្ឋខ្មែរ ខណៈអ្នករៀបចំពិព័រណ៍នៅឆ្នាំ ២០២២ មានការរំពឹងទុកថា នឹងមានចំនួនអ្នកចូលរួមប្រមាណ ១០ ម៉ឺននាក់ នៅក្នុងរយៈពេល ៣ថ្ងៃនៃកម្មវិធីនេះ។
លោកស្រីថា ដោយសារតែជួបវិបត្តិកូវីដ ១៩ ពិព័រណ៍សៀវភៅកម្ពុជា ត្រូវបានផ្អាកចំនួន ២ ឆ្នាំ គឺក្នុងឆ្នាំ ២០២០ និងឆ្នាំ ២០២១ តែនៅឆ្នាំ ២០២២ នេះបញ្ហាកូវីដ ១៩ ហាក់មានសភាពធូរស្រាលច្រើននោះ ទើបគណៈកម្មការ បានសម្រេចបន្តការរៀបចំឡើងវិញ ដោយមានសកម្មភាពជាច្រើនក្នុងរយៈពេល ៣ ថ្ងៃ នៅដើមខែធ្នូខាងមុខនេះ។
លោក គីម ពេជ្រពីនន់ អនុរដ្ឋលេខាធិការនៃក្រសួងវប្បធម៌ និងវិចិត្រសិល្បៈ បានថ្លែងនៅក្នុងសន្និសីទសារព័ត៌មាននេះដែរថា គោលបំណងនៃការបង្កើតពិព័រណ៍សៀវភៅកម្ពុជាឡើង គឺចង់ផ្សព្វផ្សាយពីការបោះពុម្ពផ្សាយស្នាដៃទាំងចាស់ និងថ្មីដើម្បីលើកស្ទួយការអាន និងការសរសេរ ការបណ្តុះស្មារតីប្រជាជនខ្មែរឱ្យមានទម្លាប់ និងបានយល់ដឹងពីគុណតម្លៃនៃការអានសៀវភៅ ដែលជាចំណេះដឹងដ៏សម្បូរបែប។
លោក ពេជ្រពីនន់ ថ្លែងថា៖ «ការបង្កើននូវវិធីនិទានរឿង និងគូរគំនូរជារូបភាពផ្សេងៗដល់កុមារដើម្បីទាក់ទាញ ឬបណ្តុះទឹកចិត្តកុមារឱ្យមានទម្លាប់អាន ឬមើលសៀវភៅតាំងពីតូចទៅ។ ម្យ៉ាងទៀតការតាំងពិព័រណ៍ ចង់បង្ហាញពីការគាំទ្រដល់វិស័យបោះពុម្ពផ្សាយទាំងនៅក្នុងប្រទេសកម្ពុជា និងអន្តរជាតិ និងចង់បង្ហាញពីការលើកទឹកចិត្តដល់កវី អ្នកនិពន្ធ អ្នកស្រាវជ្រាវ វិចិត្រករ ឱ្យបង្កើនការខិតខំតាក់តែងស្នាដៃរបស់ខ្លួនប្រកបដោយភាពច្នៃប្រឌិតថ្មីៗបន្ថែមទៀត»។
លោកស្រី ខ្លូត វិបុលឡា បញ្ជាក់បន្ថែមថា ការរៀបចំគឺនៅតែមានរបៀបវារៈខ្លះដូចជាឆ្នាំមុនៗដដែលទេ តែអ្វីដែលប្រែប្រួលគឺសកម្មភាពរៀបចំ។ នៅឆ្នាំនេះ មានការភ្ញាក់ផ្អើលខ្លាំង ដោយសារមានបណ្តាគ្រឹះស្ថានបោះពុម្ពជាច្រើនមានចំនួនជិត ១ ០០០ នៃគ្រឹះស្ថានបោះពុម្ព ឬក្រុមហ៊ុន បានទំនាក់ទំនងមកដើម្បីដាក់ស្តង់ (Booth)។
លោកស្រីថ្លែងថា៖ «យើងបានស្នើទៅកាន់សាលាក្រុងរាជធានីភ្នំពេញរួចហើយ ដើម្បីសុំទីតាំងនៅខាងក្រៅបន្ថែម សម្រាប់ការរៀបចំចំនួនស្តង់ប្រមាណ ១៩៧ ស្តង់ ព្រោះថាបរិវេណបណ្ណាល័យជាតិមានទំហំតូច»។
លោក ហុក សុទ្ធិ ប្រធានសមាគមបណ្ណារក្ស និងឯកសារវិទូកម្ពុជា និងជានាយកអង្គការស៊ីប៉ា (Sipar) បានថ្លែង ដោយសង្កេតឃើញថា មានសៀវភៅចំនួន ២ ប្រភេទ មានភាពលេចធ្លោជាងគេ សម្រាប់អ្នកចូលរួមក្នុងចំណោមចំនួនរាប់ម៉ឺននាក់នាឆ្នាំកន្លងមក បានជាវសៀវភៅប្រភេទរឿងប្រលោមលោក (Novel books) និងសៀវភៅប្រភេទដែលជាការណែនាំសម្រាប់ការគ្រប់គ្រងខ្លួនឯងឱ្យក្លាយជាបុគ្គលជោគជ័យ (Personal Management books)»។
ពិព័រណ៍សៀវភៅកម្ពុជា ក៏ជាសកម្មភាពសង្គមវប្បធម៌ ដែលត្រូវបានរៀបចំប្រចាំឆ្នាំនៅបណ្ណាល័យជាតិ ដោយគណៈកម្មការពិព័រណ៍សៀវភៅកម្ពុជា មានការសហការជាមួយក្រសួងវប្បធម៌ និងវិចិត្រសិល្បៈ ក្រសួងអប់រំ យុវជន និងកីឡា និងក្រសួងព័ត៌មាន រួមទាំងមានសមាគមបណ្ណាល័យកម្ពុជាសមាគមអ្នកបោះពុម្ពផ្សាយសៀវភៅនៅកម្ពុជា អង្គការ និងស្ថាប័នដៃគូជាច្រើនទៀត។
លោក កុក រស់ ប្រធាននាយកដ្ឋានសៀវភៅ និងការអាននៃក្រសួងវប្បធម៌ និងវិចិត្រសិល្បៈ បានឱ្យដឹងថា៖ «ដោយសារការយល់ដឹងពីសារៈសំខាន់នៃការអានសៀវភៅ និងការរៀបចំពិព័រណ៍សៀវភៅកម្ពុជា និងមានការសហការផ្សព្វផ្សាយបានទូលំទូលាយ នាពេលកន្លងមក សម្ទុះនៃក្រុមសិស្ស និស្សិត ភ្ញៀវជាតិ និងភ្ញៀវអន្តរជាតិ បានចូលរួមច្រើន។
លោក កុក រស់ ថ្លែងថា៖ «យើងតែងតែប្តូរប្រធានបទនោះ គឺក្នុងគោលបំណងដើម្បីទាក់ទាញចំណាប់អារម្មណ៍អ្នកចូលរួម ឬអ្នកទស្សនាគាំទ្រតែប៉ុណ្ណោះ»៕
