ភ្នំពេញៈ ពានរង្វាន់ព្រះនាងឥន្ទ្រទេវីចំណាត់ថ្នាក់លេខ ១ លើវិញ្ញាសាប្រលោមលោកខ្នាតខ្លីបានទៅលើ៖«រឿងបណ្តឹងសហគមន៍» ជាស្នាដៃរបស់អ្នកនិពន្ធលោក ហ៊ុយ សារ៉ាត់ គ្រូបង្រៀនភាសាខ្មែរនៅស្រុកក្រគរខេត្តពោធិ៍សាត់។
លោក ហ៊ុយ សារ៉ាត់បានប្រាប់ពីបទពិសោធន៍ដែលឈានដល់ការដណ្ដើមបានជយលាភីដូច្នេះថា “ចំពោះវិធីសាស្ត្រដែលទទួលបានពាននេះគឺ សរសេរដោយឆ្លុះបញ្ចាំងពីតថភាពពិតក្នុងសង្គម។ លោកថា ការសរសេរក៏មានគ្រោងឆ្អឹងឱ្យបានត្រឹមត្រូវ ទើបមិនចាកប្រធានរឿង។ ក្រៅពីនេះខ្ញុំយល់ពីអត្តចរិតសង្គមបានច្រើន ហើយតួអង្គជាគំរូដល់សង្គម”។
លោកបន្តថា៖ «ការសរសេររឿងនេះជាការផ្តល់ជាទស្សនទានដល់អ្នកអាន អ្នកស្តាប់ការបង្កើតបញ្ហានិងដោះស្រាយបានសមរម្យ ពោលគឺប្រើសិល្ប៍វិធីសរសេរបានក្បោះក្បាយ»។
លោកក៏បានផ្ដាំផ្ញើជូនអ្នកដែលមានបំណងចង់ចូលរួមប្រកួតប្រជែងដណ្ដើមពានរង្វាន់ផ្នែកនិពន្ធយ៉ាងនេះថា៖ «ខ្ញុំសូមផ្តាំដល់អ្នកដែលចង់ដាក់ស្នាដៃប្រកួតប្រជែងដណ្តើមពាននានា ត្រូវប្រឹងអានសៀវភៅឱ្យបានច្រើន ជាពិសេសរឿងប្រលោមលោកចាស់ៗពីមុន ព្រោះវាជាទុនដ៏ស្រសើរ។ ព្យាយាមស្វែងយល់ពីស្នាដៃជយលាភីចាស់ៗ ហើយសាកសួរពួកគាត់ពីបទពិសោធន៍បន្ថែមទៀត»។
លោកបានប្រាប់ថា សម្រាប់ឆ្នាំថ្មីនេះ លោកមិនទាន់ប្រាកដថានឹងចូលរួមប្រកួតប្រប្រជែងម្ដងទៀតនោះទេ៖ «ខ្ញុំមិនប្រាកដចិត្តថានឹងដាក់ស្នាដៃប្រកួតប្រជែងដែរឬអត់ទេ ព្រោះចង់ផ្តោតលើការសរសេរអត្ថបទស្គ្រីបរឿងនិងសរសេរទំនុកច្រៀងសិន តែក៏គិតថា ចង់ចូលរួមប្រកួតនៅពុទ្ធសាសនបណ្ឌិត្យផងដែរ»។
សូមរំឭកថា លោក ហ៊ុយ សារ៉ាត់ បានបញ្ចប់ការសិក្សាផ្នែកអក្សរសាស្ត្រខ្មែរនៅសាកលវិទ្យាល័យ នៅខេត្តបាត់ដំបង។ លោកក៏ធ្លាប់ប្រកួតចំនួន ២ ស្ថាប័នរួចមកហើយដែរ ទី១ គឺ ពានរង្វាន់ព្រះនាងឥន្ទ្រទេវី នៅឆ្នាំ ២០២១ តែមិនទទួលបានជោគជ័យនោះទេ។ នៅឆ្នាំ ២០២២ លោកបានដាក់ស្នាដៃទៅក្នុងកម្មវិធី មហោស្រពអក្សរសិល្ប៍ខ្មែរលើកទី៥ ក៏មិនទទួលបានជោគជ័យដូចគ្នា៕