ភ្នំពេញៈ លោក ចាន់ សោភ័ន វិចិត្រករ ដែលមានគំនិតច្នៃប្រឌិតខ្ពស់ផ្នែកសិល្បៈទម្រង់បុរាណ បង្ហើបពីគម្រោងការខ្លួនថា ចង់ស្រាវជ្រាវនិងចងក្រងសៀវភៅក្រឡាក្បាច់គោមហូលខ្មែរនៅខេត្តក្នុងប្រទេសខ្មែរ និងក្រៅប្រទេស សរុបចំនួន ៦ កន្លែង ប្រសិនបើទទួលបានការគាំទ្រនិងឧបត្ថម្ភពីសំណាក់មហាជនតាមចិត្តសទ្ធាយ៉ាងហោចម្នាក់ចំនួន ៤ ០០០ រៀល។
វិចិត្រករ ចាន់ សោភ័ន ដែលកើតក្នុងគ្រួសារកសិករ រស់នៅស្រុកកំពង់ត្របែក ខេត្តព្រៃវែង បានបញ្ចប់ការសិក្សាបរិញ្ញាបត្រផ្នែកសូនរូប និងវិចិត្រកម្មនៅសាកលវិទ្យាល័យភូមិន្ទវិចិត្រសិល្បៈឆ្នាំ ២០១០ និងបានបញ្ចប់ថ្នាក់បរិញ្ញាបត្រជាន់ខ្ពស់ផ្នែកសិល្បៈនៅសាកលវិទ្យាល័យ Sang Myung ប្រទេសកូរ៉េខាងត្បូង ឆ្នាំ ២០១៤។
លោក ចាន់ សោភ័ន ដែលបច្ចុប្បន្នជាសាស្ត្រាចារ្យបង្រៀនសិល្បៈនៅសាកលវិទ្យាល័យភូមិន្ទវិចិត្រសិល្បៈបានឱ្យដឹងថា ដោយមើលឃើញថា ទម្រង់សិល្បៈប្រពៃណីខ្មែរ ១ ប្រភេទ គឺសិប្បកម្មចាក់ក្រឡាក្បាច់ហូលខ្មែរ មិនទាន់មានសំណៅឯកសារច្បាស់លាស់ណាមួយស្តីពីរូបមន្តសិល្បៈវប្បធម៌នេះ ទើបជំរុញចិត្តលោកចង់ចងក្រងរៀបចំជាសៀវភៅ ដើម្បីបន្សល់ទុកឱ្យកូនខ្មែរជំនាន់ក្រោយសិក្សាស្វែងយល់បន្ត។
លោកបញ្ជាក់ថា៖ «នាពេលអនាគតដ៏ខ្លីខាងមុខនេះ ខ្ញុំសង្កេតឃើញហានិភ័យនៃក្បាច់ក្រឡាគោមហូលខ្មែរទាំងអស់របស់ខ្មែរយើង បើមិនមានការជួយគាំពារ និងឧបត្ថម្ភទេ វានឹងត្រូវស្លាប់ម្តងទៀតជាមិនខាន។ ដូច្នេះ ជាក្តីបារម្ភរបស់ខ្ញុំ ក្នុងនាមជាកូនខ្មែរ កើតលើដែនដីខ្មែរមួយនេះ ចង់ចងក្រងវាទុកជាកេរមរតកអមតៈ សម្រាប់កូនខ្មែរជំនាន់ក្រោយឱ្យបានស្គាល់ និងបានយល់អ្វីជារបស់ដូនតាខ្លួនដែលមានរាប់ពាន់ឆ្នាំ។ចង់បណ្តុះគំនិតដល់ពួកគាត់ឱ្យចេះស្រឡាញ់និងជួយគាំទ្របន្តទៀតកុំឱ្យបាត់បង់»។
ចំពោះទីកន្លែងដែលនឹងត្រូវស្រាវជ្រាវសាកសួររកទិន្នន័យបន្ថែមសម្រាប់ចងក្រងសៀវភៅនោះលោក ចាន់ សោភ័ន ឱ្យដឹងថា៖ «ចំពោះតំបន់ត្រូវចុះទៅស្រង់រកទិន្នន័យទី១ នៅខេត្តតាកែវ ទី២ នៅខេត្តសៀមរាប ទី៣ នៅខេត្តព្រៃវែង ទី៤ នៅខេត្តបន្ទាយមានជ័យ ទី៥ នៅតំបន់កោះដាច់ និងទី៦ នៅខេត្តសុរិន្ទ និងខេត្តប៊ូរីរ៉ាំ នៃប្រទេសថៃ»។
ដោយសារគម្រោងចងក្រងសៀវភៅនេះ មិនមែនជាកិច្ចការមានទ្រង់ទ្រាយតូច ហើយក៏មិនងាយស្រួលដូចជាការគិតស្រមៃនោះ ទើបទាមទារឱ្យមានការជួយជ្រោមជ្រែងពីស្ថាប័នពាក់ព័ន្ធ ឬសហគមន៍នានា ដែលមានចិត្តស្រឡាញ់មរតកវប្បធម៌នេះ ជាពិសេសរឿងកញ្ចប់ថវិកា ដើម្បីផ្គត់ផ្គង់ការសិក្សាស្រាវជ្រាវ និងចងក្រង ខណៈលោក ចាន់ សោភ័ន ពុំអាចមានលទ្ធភាពគ្រប់គ្រាន់ធ្វើតែម្នាក់ឯងនៅឡើយ។
លោក ចាន់ សោភ័ន បានព្រលយជាការស្នើសុំការឧបត្ថម្ភពីមហាជនតាមចិត្តសទ្ធាថា៖ «ខ្ញុំអាចសុំអ្នកក្នុងម្នាក់ ៤ ០០០ រៀល បានទេ សម្រាប់គម្រោងរៀបចំសៀវភៅក្រឡាក្បាច់គោមហូលខ្មែរ!»។
លោក ចាន់ សោភ័ន ក៏រំឭកដែរថា កាលលោកទើបតែបញ្ចប់ការសិក្សាកម្រិតអនុបណ្ឌិត នៅកូរ៉េ ដែលខាងសាលាបានស្នើឱ្យលោកបង្រៀននៅសាកលវិទ្យាល័យទីនោះជាមួយប្រាក់ខែជាង ៣ ពាន់ដុល្លារឯណោះ តែលោកនៅតែសម្រេចចិត្តវិលត្រឡប់មកស្រុកខ្មែរ ដើម្បីនាំយកជំនាញ និងចំណេះមកបណ្តុះបណ្តាលបន្តដល់កូនខ្មែរ។
វិចិត្រករ ចាន់ សោភ័ន ដែលមានវ័យ ៤០ ឆ្នាំរូបនេះ ក៏បញ្ជាក់ពីគោលបំណងនៃការរៀបចំចងក្រងសៀវភៅនេះថា ជាក្តីប្រាថ្នាមួយដែលមានក្នុងចិត្តយូរណាស់មកហើយ។ លោកអះអាងថា តាំងពីបុរាណមក ឬអាចនិយាយបានថា តាំងពីមុន ស.វ ទី១ មុនគ្រិស្តសករាជ ដែលប្រជាជនខ្មែរចេះត្បាញរវៃរួចទៅហើយ តែគ្មានឯកសារសោះ គឺគេបានរកឃើញតែសំណៅអាចម៍អំបោះ និងត្រល់ខ្លះៗប៉ុណ្ណោះ។
លោក សោភ័ន រៀបរាប់ថា៖ «រៀបចំសៀវភៅក្រឡាក្បាច់គោមហូលខ្មែរជាសេចក្តីប្រាថ្នាយូរមកហើយរបស់ខ្ញុំ។ ជាងនេះទៅទៀត អ្វីដែលជំរុញទឹកចិត្តរបស់ខ្ញុំបំផុតគឺពណ៌ក្បាច់នៃសំពត់ហូលទាំងនោះធ្វើឱ្យទឹកចិត្តរបស់ខ្ញុំចង់ដឹងបន្ថែមនូវអ្វីៗជារបស់ដូនតាខ្មែរមាននិងនៅសម័យខ្មែរក្រហម សង្គ្រាមចុងក្រោយបានធ្វើឱ្យឯកសារ និងវត្ថុមានតម្លៃទាំងអស់នេះរលាយស្ទើរទាំងស្រុង។ លុះដល់សព្វថ្ងៃ ស្រុកទេសមានឯករាជ្យ សុខសន្តិភាព ប្រទេសខ្មែរ មានការរីកចម្រើនគ្រប់វិស័យ សំពត់ហូលខ្មែរ បានរស់រានចាប់កំណើតឡើងមកវិញ និងសម្បូរបែប»។
លោកបន្ថែមថា៖ «តែគួរឱ្យស្តាយជាពន់ពេកណាស់ នៅសម័យចុងក្រោយនេះ ទីផ្សារសេរី ត្រូវបានបើកចំហ ក្រណាត់សូត្រ និងសំពត់ហូលបរទេស ត្រូវបាននាំចូលយ៉ាងគំហុក និងមានតម្លៃថោកជាងរបស់នៅក្នុងស្រុកផលិតដោយដៃ ដែលបង្ខំឱ្យអ្នកតម្បាញជាច្រើនបោះបង់អាជីពពីដូនតាចោល ដោយរត់មកធ្វើការងារនៅតាមរោងចក្រ និងធ្វើចំណាកស្រុកទៅក្រៅប្រទេសផងដែរ»។
សម្រាប់បងប្អូនខ្មែរដែលមានក្តីស្រឡាញ់ចំពោះសិល្បៈទម្រង់បុរាណ និងចង់ឃើញការចងក្រងសៀវភៅក្រឡាក្បាច់គោមហូលខ្មែរលេចចេញជារូបរាងបានឆាប់នោះ អាចចូលរួមឧបត្ថម្ភតាមចិត្តសទ្ធាជាមួយវិចិត្រករ ចាន់ សោភ័ន តាមរយៈគណនីធនាគារ ABA 001 388 306-Chan Sophorn៕