ភ្នំពេញៈ ក្រាន់តែពិធិករប្រកាសបើកសម្ពោធសៀវភៅ ប្រលោមលោកឆាករូបភាព មានចំណងជើងថា «រាជិនីសំឡេងមាស» ដែលបរិយាយពីជីវិត និងអាជីពរបស់កំពូលអ្នកចម្រៀងស្រី ដ៏ល្បីល្បាញ ១រូបគឺលោកស្រី រស់ សេរីសុទ្ធា ចេញផ្សាយជាភាសាខ្មែរភ្លាមនោះ សម្ទុះនៃវត្តមានអ្នកចូលរួមមានយ៉ាងច្រើនកុះកររាប់រយនាក់ ឃើញភាគច្រើនគឺជាស្រទាប់យុវវ័យ។
កម្មវិធីសម្ពោធសៀវភៅប្រលោមលោកឆាករូបភាព មានចំណងជើងថា «រាជិនីសំឡេងមាស» បានប្រារព្ធធ្វើនៅមជ្ឈមណ្ឌលបុប្ផាណា កាលពីល្ងាចថ្ងៃទី៣០ ខែវិច្ឆិកា ឆ្នាំ២០២២ ដោយមានវត្តមានភ្ញៀវកិត្តិយសអ្នកស្រី រស់ សាបឿន (ROS SABOEUN) ជាបងស្រីបង្កើតលោកស្រី រស់ សេរីសុទ្ធា លោកស្រី ឌី សាវេត (DY SAVETH) តារាសម្តែងជើងចាស់ និងជាតារាផ្ការីកគ្រប់រដូវ។ កញ្ញា ស៊ីន សេដ្ឋសុជ្ឈតា (SIN SETSOCHHATA) ជាចៅស្រីតារាចម្រៀងអធិរាជសំឡេងមាស លោកតា ស៊ីន ស៊ីសាមុត (SIN SISAMUTH)។
សៀវភៅប្រលោមលោកឆាករូបភាពកម្រាស់ ២០០ ទំព័រ មានចំណងជើងថា «រាជិនីសំឡេងមាស» ដែលជាការបរិយាយអំពីជីវិត និងអាជីពរបស់កំពូលអ្នកចម្រៀងស្រីដ៏ល្បីល្បាញ ១ រូប កាលពីសម័យទសវត្សរ៍ទី៦០-៧០ លោកស្រី រស់ សេរីសុទ្ធា បានចេញផ្សាយជាភាសាខ្មែរ និងបើកសម្ពោធកាលពីល្ងាចថ្ងៃទី៣០ ខែវិច្ឆិកា ឆ្នាំ២០២២ ដោយគ្រឹះស្ថានបោះពុម្ពផ្សាយខ្មែរមានឈ្មោះថា «អវតារ-Avatar» បានទិញសិទ្ធិបកប្រែជាភាសាខ្មែរពីអ្នកនិពន្ធជាផលិតករល្បីជនជាតិអាមេរិក។
សៀវភៅប្រលោមលោករូបភាពនេះ និពន្ធដោយផលិតករ កម្មវិធីទូរទស្សន៍អាមេរិក លោក ហ្គ្រីហ្គូរី ខាហ៊ីល (Gregory Calhill) និងរចនារូបភាព ដោយវិចិត្រករស្រីអាមេរិក ខេត បូម៉ាន (Kat Baumann)។
ជាមួយការបកប្រែជាភាសាខ្មែរ សៀវភៅ «រាជិនីសំឡេងមាស» គឺជារឿងរ៉ាវជីវិតមួយ ដែលមានបញ្ចូលទេពកោសល្យដ៏កម្រ សេចក្តីក្លាហាន ការឈឺចាប់ ភាពជូរចត់ រឿងខកចិត្ត និងការតាំងចិត្ត ម្ចាស់បទចម្រៀងនៃពិភពយុគសម័យមាសនៃតន្រ្តីក្នុងប្រទេសកម្ពុជា មានកម្រងចម្រៀងចំនួន ៤៧បទ អមដោយឯកសារពន្យល់មានទំហំ ២៤ X ១៧ សង់ទីម៉េត្រ ពណ៌ធម្មជាតិ និងមានក្របទន់បត់សងខាង។
សៀវភៅ «រាជិនីសំឡេងមាស» ជាភាសាខ្មែរលក់ ១ក្បាល តម្លៃ ១២ ដុល្លារ ខណៈការបោះពុម្ពលើកទី១ នេះមានចំនួន ២ ៥០០ក្បាល។
លោកស្រី ហួត សុជាតា (Huot Socheata) ស្ថាបនិកគ្រឹះស្ថានអវតារ (Avatar) បង្ហើបឱ្យដឹងថា៖ «ចំណូល១ផ្នែកបានពីការលក់សៀវភៅនេះ នឹងត្រូវជូនដល់គ្រួសារអ្នកស្រី រស់ សាបឿន ដែលជាបងស្រីបង្កើតរបស់លោកស្រី រស់ សេរីសុទ្ធា»។
លោកស្រី ហួត សុជាតា បន្តថា៖ «ថ្ងៃបើកសម្ពោធនាល្ងាចថ្ងៃទី៣០ វិច្ឆិកា ឆ្នាំ២០២២ នេះ យើងលក់បានចំនួនប្រមាណ១០ ភាគរយ ហើយក៏មានការបញ្ជាទិញតាមអនឡាញ ដែលពួកគាត់មិនទាន់បានយកសៀវភៅក៏ច្រើនផងដែរ»។
នាល្ងាចថ្ងៃបើកសម្ពោធសៀវភៅ «រាជិនីសំឡេងមាស» ក្នុងទសវត្សរ៍ទី៦០ -៧០ អ្នកស្រី រស់ សេរីសុទ្ធា នោះលោកស្រី ឌី សាវេត តារាសម្តែងជើងចាស់ ឬផ្ការីកគ្រប់រដូវ មានវ័យ ៧៨ឆ្នាំ ធ្លាប់បានសម្តែងបទចម្រៀងរបស់លោកស្រី រស់ សេរីសុទ្ធា ជាច្រើនបទនោះ សម្តែងនូវក្តីរំភើបចិត្តខ្លាំង នាពេលអញ្ជើញចូលរួមជាភ្ញៀវកិត្តិយសនៃការបើកសម្ពោធសៀវភៅ។
លោកស្រី ឌី សាវេត លើកឡើងថា៖ «ចំពោះខ្ញុំ កាលពីសម្តែង ក្នុងបទចម្រៀងរបស់គាត់ [រស់ សេរីសុទ្ធា] នោះ មិនត្រឹមតែហាត់សម្តែងឱ្យត្រូវសាច់រឿងនៃបទចម្រៀងទេ ថែមទាំងរៀនច្រៀង សម្រាប់បទខ្លះទៀតផង»។
អ្នកស្រី រស់ សាបឿន បងស្រីបង្កើតអ្នកស្រី រស់ សេរីសុទ្ធា ថ្លែងពីអារម្មណ៍ដ៏រំភើបថា៖ «ខ្ញុំពិតជាសប្បាយចិត្តខ្លាំងណាស់ រកអ្វីមកប្រៀបផ្ទឹមពុំបានទេ ដោយសារមានការរៀបចំបោះពុម្ពជាសៀវភៅស្តីពីប្អូនស្រីរបស់ខ្ញុំ»។
លោក ជា សុភាព (Chea Sopheap) នាយកប្រតិបត្តិមជ្ឈមណ្ឌលបុប្ផាណា សម្តែងនូវការភ្ញាក់ផ្អើលខ្លាំង ពេលឃើញសម្ទុះនៃការចូលរួមរបស់យុវជនខ្មែរ និងបានជាវសៀវភៅ «រាជិនីសំឡេងមាស» យកទៅអានផងដែរនោះ។
លោក ជា សុភាព បញ្ជាក់ថា៖ «សម្រាប់ខ្ញុំត្រេកអរក្នុងចិត្ត នៅពេលឃើញយុវវ័យជំនាន់ក្រោយយើងចាប់អារម្មណ៍លើសៀវភៅបែបនេះ។ នេះមានន័យថា ជាសញ្ញាដ៏ល្អមួយបង្ហាញពីជម្រៅទឹកចិត្តរបស់កូនខ្មែរ ហាក់មានទំនោរងាកមកចូលចិត្តអានសៀវភៅខ្មែរ ស្តីពីសិល្បៈវប្បធម៌ខ្មែរជាអត្តសញ្ញាណរបស់ជាតិខ្មែរ»។
ក្នុងនាមជាតារាចម្រៀងសម័យថ្មីកញ្ញា ស៊ីន សេដ្ឋសុជ្ឈតា សម្តែងពីអារម្មណ៍ខ្លួនថា មានសេចក្តីត្រេកអរខ្លាំងណាស់ នៅពេលឃើញសៀវភៅ «រាជិនីសំឡេងមាស» បានបោះពុម្ពផ្សាយចេញជារូបរាងនៅថ្ងៃនេះ។ កញ្ញា ស៊ីន សេដ្ឋសុជ្ឈតា លើកឡើងថា៖ «ទោះបីជា ខ្ញុំជាមនុស្សជំនាន់ក្រោយមែនក្តី ក៏នាងខ្ញុំ នៅតែមានការគាំទ្រមរតកដើម ដែលចម្រៀងជំនាន់លោកយាយ រស់ សេរីសុទ្ធា ដែលជាដៃគូចម្រៀងរបស់លោកតានាងខ្ញុំ រហូតមក»។
ទឹកដមសំឡេងដ៏ពីរោះក្រអួនក្រអៅរបស់លោកស្រី រស់ សេរីសុទ្ធា ក្នុងបទចម្រៀងរាប់រយបទ នៅចន្លោះឆ្នាំ១៩៦៧ និងឆ្នាំ១៩៧៥ បានធ្វើឱ្យលោកស្រី រស់ សេរីសុទ្ធា ទទួលបាននូវគោរមងារពីសម្ដេចព្រះនរោត្តម សីហនុ នោះថាជា «រាជិនីសំឡេងមាស» នៃកម្ពុជាដូចសិល្បកររួមជំនាន់ជាច្រើននាក់ទៀតដែរ ក្រោយលោកស្រីបានស្លាប់ក្នុងរបបខ្មែរក្រហម។
លោកស្រី រស់ សេរីសុទ្ធា កើតនៅថ្ងៃទី៦ ខែវិច្ឆិកា ឆ្នាំ១៩៤៧ នៅភូមិដំណាក់ហ្លួង ឃុំវត្តគរ ស្រុកសង្កែ ខេត្តបាត់ដំបង។ លោកស្រី រស់ សេរីសុទ្ធា បានបាត់ខ្លួននៅក្នុងឆ្នាំ១៩៧៧ នៅភូមិសំបួរ[ ត្រពាំងខ្លុង] ឃុំដំបូករូង ស្រុកភ្នំស្រួច ខេត្តកំពង់ស្ពឺ។
ចំពោះបទចម្រៀងរបស់លោកស្រី រស់ សេរីសុទ្ធា ច្រៀងនោះមានជាចង្វាក់គ្រប់ប្រភេទមិនថាបទមនោសញ្ចេតនាទន់ភ្លន់ ឬញាក់កន្រ្តាក់អារម្មណ៍ ដែលរួមមានដូចជាបទបូឡេរ៉ូ អាហ្គោហ្គោ និងរ៉ុកខេនរ៉ូលជាដើម នៅទសវត្សរ៍ទី៦០-៧០ មានចំនួនសរុបមានប្រមាណ ៥០០បទ។
លោកស្រី សុជាតា ក៏ធ្លាប់រៀបរាប់ពីដំណើរដើមទងនៃការទិញសិទ្ធិបកប្រែសៀវភៅ ប្រលោមលោកឆាករូបភាពនេះ ប្រាប់ភ្នំពេញប៉ុស្តិ៍ តាមឆាតហ្វេសប៊ុកថា៖ «ទាក់ទងនឹងគម្រោងបកប្រែសៀវភៅនេះ ដំបូងឡើយបងឃើញការផ្សព្វផ្សាយ តាមបណ្ដាញសង្គមរបស់សៀវភៅ «The Golden Voice» បងក៏ទាក់ទងសួរនាំគេថា តើមានគ្រឹះស្ថានបោះពុម្ពសម្រាប់ភាសាខ្មែរហើយឬនៅ ហើយចម្លើយគឺនៅទេ។ ម្ល៉ោះហើយ ទើបមានការណាត់ជជែក ជាមួយអ្នកនិពន្ធ ២-៣ ដង ពីការទិញសិទ្ធិបកប្រែ។ យើងក៏រកបានការព្រមព្រៀងគ្នាដោយមិនពិបាក»។
គ្រឹះស្ថានអវតារ ទើបនឹងបង្កើតនៅឆ្នាំ ២០២២ នេះ ហើយគ្រោងបោះពុម្ពសៀវភៅអក្សរសិល្ប៍ខ្មែរ និងអន្តរជាតិគឺប្រភេទប្រលោមលោក ដែលមានប្រជាប្រិយ និងគ្រប់រសជាតិ ដូចជារឿងបែបស៊ើបអង្កេតបែបផ្សងព្រេង និងសៀវភៅឆាករូបភាព (Comic ឬ Graphic Novel) ព្រមទាំងសៀវភៅម៉ង់ហ្កា (Manga) ផងដែរ៕