The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​និពន្ធ​ស្ត្រី៖ ​ក្ដី​ស្រឡាញ់​ជា​ចលករ​មួយ​ជំរុញ​ទឹកចិត្ត​ឱ្យ​ទៅ​ដល់​គោល​ដៅ​

អ្នក​និពន្ធ​ស្ត្រី៖ ​ក្ដី​ស្រឡាញ់​ជា​ចលករ​មួយ​ជំរុញ​ទឹកចិត្ត​ឱ្យ​ទៅ​ដល់​គោល​ដៅ​

Content image - Phnom Penh Post
កញ្ញា ស្រុង ចាន់រតនា និងស្នាដៃសៀវភៅដែលបាននិពន្ធកន្លងមក ។ រូបថត សហការី

អ្នក​និពន្ធ​ស្ត្រី៖ ​ក្ដី​ស្រឡាញ់​ជា​ចលករ​មួយ​ជំរុញ​ទឹកចិត្ត​ឱ្យ​ទៅ​ដល់​គោល​ដៅ​

ភ្នំពេញៈអ្នក​និពន្ធ​ជា​ស្ត្រី​កញ្ញា​ ស្រុង ចាន់​រតនា បាន​និពន្ធ​សៀវ​ភៅ​៥​ចំណង​ជើង​រួចមក​ហើយ​។​កញ្ញា ​ចាន់​រតនា ​អះ​អាង​ថា​ សេច​ក្ដី​ស្រ​ឡាញ់​ក្នុង​ការ​អភិវឌ្ឍ​គំនិត​រៀន​គូរ ​រៀន​គិត រៀន​សរសេរ ​តាំង​ពីក្មេង​វ័យ បាន​ជំរុញ​ទឹក​ចិត្ត​ឱ្យ​កញ្ញា​ក្លាយ​ជា​អ្នក​និពន្ធ​ អ្នក​សរសេរ​សៀវភៅ​ម្នាក់​ដែល​កំពុង​ដណ្ដើម​ការគាំទ្រ​ពី​អ្នក​អាន ​ខណៈ​សៀវ​ភៅ​របស់​កញ្ញា មាន​សៀវ​ភៅ​រឿង​ខ្លី​ សៀវភៅ​កំណត់​ត្រា​ល្អៗ​ក្នុង​ជីវិត​ សៀវភៅ​លើក​ទឹក​ចិត្ត​មនុស្ស​ឱ្យ​ជ​ម្នះ​ការ​លំបាក និង​សៀវភៅ​ប្រលោម​លោក​ជា​ដើម​។​

​អ្នក​និពន្ធ ​ចាន់​រតនា ​បាន​ប្រាប់​ឱ្យដឹង​ថា​៖«​ខ្ញុំ​ចាប់​ផ្តើម​ប្រឡូក​ក្នុង​វិស័យ​និពន្ធ​ ដំបូង​ឡើយ​គ្រាន់តែ​សាក​ល្បង​បង្ហោះ​អត្ថបទ​លើក​ទឹក​ចិត្ត​ និង​ដឹកនាំ​មនុស្ស​ឱ្យ​គិត​លើផ្លូវ​វិជ្ជមាន ​លុះ​ក្រោយ​មក​បាន​បោះ​ពុម្ព​ស្នាដៃ​ទី​១​ជា​ប្រភេទ​ប្រលោម​លោក​ចំណង​ជើង​ថា វិថី​ជីវិត​។គ្រា​ដំបូង​គ្រាន់តែ​ចង់​ឃើញ​ប្រលោម​លោក​វិថី​ជីវិត​ចេញ​ជា​សៀវ​ភៅ ​ប៉ុន្តែ​ក្រោយ​ទទួល​បាន​ការ​គាំទ្រ​ពី​អ្នក​អាន​ក៏មាន​កម្លាំង​ចិត្ត​ដើរ​លើ​ផ្លូវ​នេះ​បន្ត​រហូត​ចេញ​បាន​ស្នា​ដៃ​ជា​បន្ត​បន្ទាប់​សរុប​៥​ស្នា​ដៃ​»​។​

​សៀវ​ភៅ​ដែល​មាន​ចំណង​ជើង​ថា “​វិថី​ជីវិត​” មាន​កម្រាស់ ​៣០០​ទំព័រ ជា​ប្រភេទ​សៀវភៅ​ប្រលោម​លោក​។ អត្ថ​ន័យ​អប់រំ​ក្នុង​សៀវភៅ​នេះ ​បាន​បង្ហាញ​ពី​ការ​តស៊ូ​ប្រឹង​ប្រែង​ដើរទៅ​រកក្ដី​ស្រមៃ​ដោយ​មិន​បោះបង់​។ ការ​អាច​សម្រេច​ក្ដី​ស្រមៃ​របស់​ខ្លួន​បាន​ អ្នក​និពន្ធ​បាន​បង្ហាញ​ថា ​គួរ​ទុក​សេ​ចក្ដី​ស្រឡាញ់​ឬ​ស្នេហា​មួយ​ឡែក​សិន កុំ​បណ្ដោយ​ខ្លួន​ឱ្យ​លង់​លក់​ក្នុង​ស្នេហា ​ទើប​អាច​សម្រេច​គោល​បំណង ឬ​សេចក្ដី​ស្រមៃ​របស់​ខ្លួន​បាន​។​

​អ្នក​និពន្ធ​ ចាន់​រតនា ​បាន​បញ្ជាក់​ទៀត​ថា​៖«​រាល់​ស្នាដៃ​នីមួយៗ​ដែល​ខ្ញុំ​បាន​សរសេរគឺ​សុទ្ធសឹង​តែមាន​លាក់​បង្កប់​នូវ​អនុ​ស្សា​វរីយ៍​រៀងៗ​ខ្លួន ហើយ​ខ្ញុំ​បាន​ផ្តល់​ក្តី​ស្រឡាញ់​ទៅ​លើ​ស្នាដៃ​ទាំង​នេះ​ស្មើៗ​គ្នា​»​។

​អ្នក​និពន្ធ​ស្ត្រី​​វ័យកណ្ដាល​រូបនេះ​បន្ត​ទៀត​ថា៖«​ចំណែក​សៀវ​ភៅជា​អ្នក​ធ្វើការ​ ជា​ដៃគូ​ដ៏​ល្អ​សម្រាប់​អ្នក​ធ្វើការ​ឱ្យគេ​ដូច​ពួក​យើង​។ វា​មាន​ចម្លើយ​ជាច្រើន​សម្រាប់​បុគ្គ​លិក​ដែល​ជួប​បញ្ហា​ដូច​ខ្ញុំ​។​មិន​ចុះ​សម្រុង​ជាមួយ​នឹង​ថ្នាក់​លើ មិន​ចូល​ចិត្ត​ចរិត​អ្នក​រួម​ការងារ ចេញ​យោ​បល់​អី​ក៏​គេ​កប់​ចោល​។ តាម​ពិត​ខ្ញុំ​ជា​ពេជ្រ​នៅ​កន្លែង​ងងឹត​សោះ​។ ខ្ញុំ​មិន​ធ្វើ​អំពូល​ភ្លើង​ឱ្យ​កន្លែង​ងងឹត​នោះទេ​ ខ្ញុំ​ត្រូវធ្វើ​គ្រាប់​ពេជ្រ​។ ខ្ញុំ​ក៏​មិន​ទៅ​ធ្វើការ​ដើម្បី​ឈ្នះ​ពួក​អែប​អប​មេ ​និយាយ​តែ​ដើម​គេ​នោះដែរ ខ្ញុំ​មាន​គោល​ការណ៍​របស់ខ្ញុំ​។ បើ​គេ​ថា​ខ្ញុំ​ចេញ​ពី​កន្លែង​កខ្វក់​នោះ​ព្រោះតែ​ចាញ់​គេ ខ្ញុំ​នឹង​ឱ្យ​ពេល​វេលា​ប្រាប់​ពួកគេ​ថា ​អ្ន​កណា​ឈ្នះ​ឱ្យ​ប្រាកដ​។​ខ្ញុំ​នឹង​បង្ហាញ​ពន្លឺ​គ្រាប់​ពេជ្រ​នៅ​ថ្ងៃ​ខាង​មុខ​»​។​

​ចំណែក​ឯ​សៀវភៅ​ដែលមាន​ចំណង​ជើង​ថា“​ជា​អ្នក​ធ្វើការ​”សៀវ​ភៅ​នេះ​មាន​កម្រាស់​៤០​០ទំព័រគឺជា​ប្រភេទ​សៀវភៅ​ទស្សនៈ​។ សៀវភៅ​នេះ​បាន​ផ្ដល់​អត្ថន័យ​អប់រំ​ ដាស់តឿ​ន​មនុស្ស​ទៅធ្វើ​ការ​ដើម្បី​អ្វី​? គន្លឹះ​ដើម្បី​ធ្វើការ​សម្រេច​ចិត្ត និង​ដោះ​ស្រាយ​បញ្ហា​នៅ​កន្លែង​ធ្វើការ​។ ក្រៅពីនេះ​នៅមាន​សៀវភៅ​៣​ផ្សេង​ទៀ​តដូច​ជា សៀវភៅ​“​បេះដូង​ស​”មាន​កម្រាស់​៣៦២​ទំព័រ​ គឺជា​ប្រភេទ​សៀវ​ភៅ​ប្រលោម​លោក​ខ្លីមាន​ចំនួន​៦​រឿង​។សៀវភៅ​មាន​ចំណង​ជើង​ថា​“​សំណោក​អនុស្សាវ​រីយ៍​”​មាន​កម្រាស់ ២៣១​ទំព័រ​គឺជា​ប្រភេទ​សៀវភៅ​ប្រលោម​លោកដែល​ផ្ដល់​អត្ថន័យ​អប់រំក្នុង​ការគិត​ឱ្យ​ច្បាស់​លាស់​មុន​សម្រេច​ចិត្តដើរ​ចេញពី​អតីត​កាល​។​ចំពោះ​សៀវ​ភៅ​ដែល​មាន​ចំណង​ជើង​ថា“​អនុស្សា​វរីយ៍​៣៤​ឆ្នាំ​”មាន​កម្រាស់​៩៦​ទំព័​រគឺជា​ប្រភេទ​សៀវភៅ​មួយ​បែប​ដែល​អ្នក​និពន្ធ​កត់​ត្រា​ទុក​គ្រប់​រឿង​រ៉ាវ​ល្អៗ​ក្នុង​ជីវិត​រស់់នៅ​ប្រចាំ​ថ្ងៃ​តាំង​ពីក្មេង​រហូត​ដល់​ប​ច្ចុ​ប្បន្ន​។

​កញ្ញា ចាន់​រតនា​ មានស្រុ​កកំណើត​នៅក្នុង​ខេត្ត​កំពង់​ចាម​។ កញ្ញា​ជា​កូន​ទី​៣​ក្នុង​ចំណោម​បងប្អូន​ចំនួន៤​​នាក់(​ស្រី ២​នាក់​) នៅ​ក្នុង​គ្រួសារ​ដែល​មាន​ឪពុក​ម្ដាយ​ជា​អាជីវករ​។ អ្នក​និពន្ធ​ចាន់​រតនា ​បានបញ្ចប់​ការសិក្សា​ថ្នាក់​បរិញ្ញា​បត្រ​ភាសា​អង់​គ្លេស​ពីសា​កល​វិទ្យា​វិទ្យា​ល័យ​មួយ​នៅ​ក្នុង​រាជ​ធានី​ភ្នំពេញ​។ បច្ចុប្បន្ន​ជា​អ្នកនិ​ពន្ធ និ​ង​មាន​អាជីវ​កម្ម​ផ្ទាល់​ខ្លួន ​និង​រស់នៅ​ក្នុង​ទីក្រុង​ភ្នំពេញ​៕

អត្ថបទគួរចាប់អារម្មណ៍