ការប្រគល់រង្វាន់ដល់អ្នកឈ្នះជយលាភីពីការប្រឡងស្នាដៃតែងនិពន្ធពានរង្វាន់ព្រះនាងឥន្ទ្រទេវី ឆ្នាំ២០២២ ។ រូបថត ក្រសួងវប្បធម៌
ភ្នំពេញៈ ការប្រឡងជ្រើសរើសស្នាដៃតែងនិពន្ធផ្នែកប្រលោមលោកខ្លី និងកំណាព្យរឿងពានរង្វាន់ព្រះនាងឥន្ទ្រទេវីឆ្នាំ២០២៣ ចាប់ផ្តើមទទួលបេក្ខភាពប្រកួតប្រជែងខណៈការទទួលពាក្យនឹងត្រូវផុតកំណត់រហូតដល់ថ្ងៃទី៣០ ខែមិថុនា ឆ្នាំ ២០២៣ ជាមួយនឹងសំណេរមានប្រធានបទសេរី។
លោកកុក រស់ ប្រធាននាយកដ្ឋានការអាននិងសៀវភៅនៃក្រសួងវប្បធម៌និងវិចិត្រសិល្បៈបានឱ្យដឹងថាការប្រកួតនេះឈរលើគោលការណ៍វិនិច្ឆ័យសំខាន់៣ គឺទី១ អត្ថន័យ(សច្ចធម៌ សីលធម៌ និងគុណធម៌)ទី២អត្ថរូប(វិធីតែង រចនាប័ទ្ម និងសិល្ប៍សោភ័ណ)និងទី៣អត្ថរស(បង្ហាញឱ្យឃើញអំពីការអប់រំ ការអភិវឌ្ឍនិងរក្សានូវតម្លៃអត្តសញ្ញាណជាតិ)។
ឯលក្ខខណ្ឌវិញមាន ៣ចំណុចដែរ គឺអក្ខរាវិរុទ្ធ ត្រូវតាមវចនានុក្រមខ្មែរ(សម្តេចសង្ឃរាជ ជួន ណាត ជោតញ្ញាណ) អក្សរវាយកុំព្យូទ័រ(Font យូនីកូដ Khmer OS Siem Reap, ទំហំ១២ ឬសរសេរដោយដៃក៏បាន)និងខ្នាតក្រដាស A4 គឺចន្លោះពី ១៥ ទៅ៣០ទំព័រ ទាំងលើការតែងនិពន្ធប្រលោមលោកខ្លី និងកំណាព្យរឿងខ្លី។
លោកកុក រស់ បញ្ជាក់ថា៖ «ចំពោះវិធីសាស្ត្រនៃការចម្រាញ់ជម្រុះជ្រើសយកបេក្ខភាពនឹងធ្វើតាម៣ដំណាក់កាលដើម្បីរើសរកបានជើងខ្លាំងចុងក្រោយសម្រាប់ទទួលពានរង្វាន់ប្រចាំឆ្នាំ»។
សម្រាប់ជយលាភីនឹងត្រូវជ្រើសយកពីលេខ១ ទៅដល់លេខ៣ (ប្រលោមលោក៣នាក់និងកំណាព្យ៣នាក់)ដែលត្រូវទទួលបានពានរង្វាន់១ អមដោយទឹកប្រាក់រង្វាន់និងផ្តល់រង្វាន់លើកទឹកចិត្តដែរគឺលេខ៤-៥ (ប្រលោមលោក ២នាក់និងកំណាព្យ២នាក់) ដែលទទួលបានបណ្ណសរសើរ១ អមដោយទឹកប្រាក់រង្វាន់។
បេក្ខជនអាចផ្ញើស្នាដៃរបស់ខ្លួនមកកាន់កម្មវិធីប្រកួតប្រជែងតែងនិពន្ធប្រលោមលោករឿងខ្លី និងកំណាព្យ ពានរង្វាន់ព្រះនាងឥន្ទ្រទេវីឆ្នាំ២០២២ នេះ តាមរយៈលេខតេឡេក្រាមនៃប្រព័ន្ធទូរស័ព្ទរបស់លោក កុក រស់ ០១១ ៨៥០ ០៩៤ កញ្ញា ញឹក ថារី ០១២ ៨០១ ១២២ និងលោក សំអាត សិលា ០៧៨ ៦៦៨ ៩៧៧ ឬតាមអាសយដ្ឋានទំនាក់ទំនងនៃនាយកដ្ឋានសៀវភៅនិងការអាន នៅអគារលេខ៤៤ ផ្លូវសម្តេចប៉ាន សង្កាត់បឹងរាំង ខណ្ឌដូនពេញ រាជធានីភ្នំពេញ។
ទោះបីលទ្ធផលពី១ឆ្នាំ ទៅ១ឆ្នាំ មានការកើនចំនួនបេក្ខជនប្រកួតពានរង្វាន់ព្រះនាងឥន្ទ្រទេវីនេះយ៉ាងណាក្តី ក៏ក្រុមគណៈកម្មការរៀបចំនិងអនុគណៈកម្មការកំណែទាំង២ផ្នែកនៅតែឃើញចំណុចល្អនិងចំណុចខ្វះខាតរបស់បេក្ខជនជារឿយៗរាល់លើក។ ហេតុដូច្នេះក្រុមគណៈកម្មការរៀបចំនិងអនុគណៈកម្មការកំណែ បានផ្តល់ជាអនុសាសន៍ខ្លះៗ សម្រាប់ជាគ្រឹះមូលដ្ឋានដល់បេក្ខជនជំនាន់ក្រោយៗ ដើម្បីត្រៀមដាក់ស្នាដៃប្រកួតនៅឆ្នាំ២០២៣ ខាងមុខនេះ។
សារជាអនុសាសន៍ជុំវិញស្នាដៃរបស់បេក្ខជន មានការយល់ឃើញស្របគ្នាពីសំណាក់លោក កុក រស់ ប្រធាននាយកដ្ឋានសៀវភៅ និងការអាននៃក្រសួងវប្បធម៌ និងវិចិត្រសិល្បៈ លោក សេង សំអាន ប្រធានអនុគណៈកម្មការកំណែផ្នែកកំណាព្យរឿង និងលោក យូ សុភា សមាជិកអនុគណៈកម្មការកំណែផ្នែកប្រលោមលោកខ្នាតខ្លី ដើម្បីឱ្យស្មេរទាំង២ផ្នែក ត្រៀមស្នាដៃប្រកួតពានរង្វាន់ព្រះនាងឥន្ទ្រទេវីលើកក្រោយៗគឺត្រូវគោរពគោលការណ៍មូលដ្ឋានតែងនិពន្ធសំខាន់ ៣ចំណុច គឺអត្ថន័យ អត្ថរូប និងអត្ថរស ទើបអាចឆក់ចំណាប់អារម្មណ៍គណៈកម្មការរៀបចំទាំងអស់បាន។
លោកយូ សុភា ស្នើដោយទទូចដល់អ្នកនិពន្ធប្រលោមលោកថា៖«សូមអ្នកនិពន្ធ និងកវីទាំងអស់ តោងយកការពិនិត្យមើលឡើងវិញម្តងហើយ ម្តងទៀតអំពីស្នាដៃរបស់ខ្លួនឱ្យបានច្បាស់លាស់ ក្រោយពីបញ្ចប់ស្នាដៃខ្លួន និងសួរខ្លួនឯងថា តើស្នាដៃនេះ បានគោរពលក្ខខណ្ឌនៃការកំណត់របស់គណៈកម្មការរៀបចំការប្រកួតហើយឬនៅ? ការទម្លាប់ធ្វើសកម្មភាពទាំងប៉ុន្មាននេះ ខ្ញុំជឿជាក់ថាស្នាដៃរបស់បងៗឬប្អូនៗនិស្សិតដែលត្រៀមស្នាដៃសម្រាប់ការប្រកួតលើកក្រោយនឹងទទួលបានជោគជ័យជាក់ជាមិនខាន»។
ឯលោក សេង សំអាន បានលើកជាសំណូមពរសម្រាប់កវីនិពន្ធកំណាព្យថា៖«កវីដែលនិយមតែងកំណាព្យរឿងឬប្រលោមកំណាព្យ គប្បីគោរពច្បាប់តែងកាព្យឱ្យបានជាប់លាប់។ត្រូវចេះស្វែងយល់ពីកាលអាកាសនៃការតែងនិពន្ធឱ្យបានត្រឹមត្រូវនិងចៀសវាងការប្រើពាក្យពេចន៍ថ្មីណាដែលខ្លួននៅមិនទាន់យល់ដឹងន័យបានច្បាស់ឬប្រើប្រាស់ពាក្យប្រាសចាកន័យដែលនាំឱ្យតម្លៃស្នាដៃខ្លួនមានភាពរឹងត្អឹង»។
ចំណែកម្ចាស់ជយលាភីលេខ១ ពានរង្វាន់ព្រះនាងឥន្ទ្រទេវីឆ្នាំ២០២២ លោក ហ៊ុយ សារ៉ាត់ មកពីខេត្តពោធិ៍សាត់ ជាមួយស្នាដៃប្រលោមលោកខ្លីរឿង«បណ្តឹងសហគមន៍»នោះក៏ស្នើសុំឱ្យដល់បេក្ខជនជំនាន់ក្រោយៗឱ្យយកគំរូស្នាដៃរបស់កវីនិងអ្នកនិពន្ធរៀមច្បងសម្រាប់ធ្វើជាបទពិសោធន៍និងគោរពតាមលក្ខខណ្ឌរបស់គណៈកម្មការរៀបចំការប្រកួត រួមទាំងរក្សាការតាំងចិត្តខ្លួនឯងឱ្យបានខ្ពស់ កុំមានការបោះបង់ចោលការចូលរួម។
លោក សារ៉ាត់ បញ្ជាក់ថា៖ «ទោះបីជារូបខ្ញុំទទួលបានជយលាភីលេខ១ ផ្នែកប្រលោមលោកខ្លីឆ្នាំ២០២២ នេះមែនក្តី ក៏រូបខ្ញុំធ្លាប់ទទួលបរាជ័យម្តងហើយកាលពី១១ឆ្នាំមុន។ ឆ្នាំ២០១១ ខ្ញុំធ្លាប់បានដាក់ប្រកួតលើកទី១ ដោយលទ្ធផលមិនបានជាប់រង្វាន់អ្វីឡើយសូម្បីតែរង្វាន់កិត្តិយស។ឯការឈ្នះពានរង្វាន់លេខ១ ឆ្នាំ២០២២នេះ គឺជាការដាក់ពាក្យប្រកួតលើកទី២របស់ខ្ញុំ។ យ៉ាងណាស្នាដៃរឿង«បណ្តឹងសហគមន៍»នេះ ខ្ញុំគិតថា ចំណុចខ្វះខាតឬភាពឆកល្វែងនៃការតែងនិពន្ធនៅតែមានដូចប្រសាសន៍របស់អនុគណៈកម្មការកំណែទាំង២ លោកបានលើកឡើងមុននេះអ៊ីចឹងដែរ»។
ជយលាភីពានរង្វាន់ព្រះនាងឥន្ទ្រទេវីឆ្នាំ២០២២ មានចំនួន១០រូប គឺផ្នែកប្រលោមលោកខ្នាតខ្លី៥រូប និងផ្នែកកំណាព្យរឿង៥រូប។
ផ្នែកប្រលោមលោកខ្នាតខ្លីលេខ១ បានទៅលោក ហ៊ុយ សារ៉ាត់ មកពីខេត្តពោធិ៍សាត់រឿង «បណ្តឹងសហគមន៍» លេខ២ បានទៅលោក សុវណ្ណ សិរីវុឌ្ឍ មកពីរាជធានីភ្នំពេញ រឿង «សំនៀងប៊ិឡានី» លេខ៣ បានទៅលោក ពៅ មករា មកពីរាជធានីភ្នំពេញរឿង «ថ្ងៃរះហើយពុក»។ ឯលេខ៤ បានទៅលោក តុន ច័ន្ទរិទ្ធ មកពីខេត្តបាត់ដំបងរឿង «បាសាក់» និងលេខ៥ បានទៅលោកសៀងឈុនលីមកពីខេត្តកំពង់ស្ពឺ រឿង «ក្រាំងតាត្រាវ»។
ផ្នែកកំណាព្យរឿងលេខ១ បានទៅលោកភិរម្យ ដារ៉ា មកពីខេត្តស្ទឹងត្រែង និពន្ធរឿង «គុណការងារ» លេខ២ បានទៅលោកមឿន សំណាង មកពីខេត្តឧត្តរមានជ័យ និពន្ធរឿង «អ្នកគ្រូជាយដែន» ឯលេខ៣ បានទៅលើលោក ជួន ខ្មៅ មកពីខេត្តព្រះសីហនុ និពន្ធរឿង«មេស្រុក»។ លេខ៤ បានទៅលោក ចំរើន សុភ័ក្រ មកពីខេត្តកំពត និពន្ធរឿង «ព្យុះជីវិតនាងរស្មី» និងលេខ៥ បានទៅលោក សាម សុនិត មកពីខេត្តកំពង់ចាមនិពន្ធរឿង «សន្សើមសន្តិភាព»។
ការប្រឡងប្រជែងពានរង្វាន់ព្រះនាងឥន្ទ្រទេវីឆ្នាំ២០២២ មានបេក្ខជនដាក់ពាក្យចូលរួមប្រកួតសរុបចំនួន ១០៤ស្នាដៃ ដោយមានប្រលោមលោកខ្នាតខ្លី៧៦ស្នាដៃនិងផ្នែកកំណាព្យរឿង២៨ស្នាដៃ។នេះបើយោងទៅតាមការបញ្ជាក់ពីលោកកុក រស់ ប្រធាននាយកដ្ឋានសៀវភៅ និងការអាន៕
