.jpg)
លោកលី តារា ជាអ្នកបង្ហាញពីចំណុចគន្លឹះអានសៀវភៅ។ រូប សហការី
ភ្នំពេញៈ យុគសម័យបានផ្លាស់ប្ដូរពីសម័យកាល ១ ទៅសម័យកាល ១ ទៀត ស្របតាមការវិវត្តរបស់បច្ចេកវិទ្យា និងការរស់នៅរបស់មនុស្ស។ របត់សង្គមបានអភិវឌ្ឍនូវផ្នត់គំនិតមនុស្សឱ្យចាប់យកអ្វីដែលថ្មីសម្រាប់ខ្លួនដើម្បីបង្កើនសមត្ថភាព ទាំងចំណេះដឹងនិងចំណេះធ្វើ។ ការអានជាកត្តាសំខាន់សម្រាប់សិស្ស និស្សិត និងមនុស្សផ្សេងទៀតដែលត្រូវពង្រីកចំណេះដឹងក្នុងជំនាញ និងមុខរបររបស់ខ្លួន។
ទោះបីជាការអានមានភាពចាំបាច់សម្រាប់ជីវភាពរបស់ខ្លួនក៏ពិតមែន ប៉ុន្តែការអាននៅតែមានកម្រិតសម្រាប់កម្ពុជា។ សិស្សានុសិស្ស និស្សិតភាគច្រើនដែលបានអានសៀវភៅ គឺដោយសារតែបំពេញកិច្ចការស្រាវជ្រាវ ការសិក្សាដែលលោកគ្រូអ្នកគ្រូ ឬសាលាដាក់ឱ្យធ្វើ។ ប៉ុន្តែក៏មានសិស្ស និស្សិតមួយចំនួន បានជក់ចិត្តនឹងការអាននេះផងដែរ។ សិស្ស និស្សិត និងប្រជាពលរដ្ឋភាគច្រើន តែងនិយាយថា រាល់ពេលអាន តែងតែធ្វើឱ្យខ្លួនមានអារម្មណ៍ខ្ជិល និងងងុយគេងជាដើម។
ឆ្លើយតបនឹងវិធីសាស្ត្រអានឱ្យមានប្រសិទ្ធភាពនេះ លោក លី តារា ជាអ្នកនិពន្ធ ដែលចាប់ពីឆ្នាំ ២០១៣ ដល់ឆ្នាំ ២០១៦ បានអានសៀវភៅ ៧៧៩ ក្បាលបានប្រាប់ពីគន្លឹះអានសៀវភៅរបស់ខ្លួនដូច្នេះថា៖ «វិធីសាស្ត្រដែលខ្ញុំមាន ហើយបានច្នៃសម្រាប់ខ្លួនឯងគឺទី ១ ជ្រើសរើសចំណងជើងសៀវភៅហើយឈ្មោះអ្នកនិពន្ធ មើលទៅលើចំនួនទំព័រសៀវភៅសរុប បន្ទាប់មកមើលទៅលើចំនួនជំពូកឬមេរៀនក្នុងសៀវភៅសរុប។ បន្តមកទៀតមើលទៅលើទំព័ររបស់ជំពូកឬមេរៀនថា ប្រហែលមានប៉ុន្មានជាមធ្យម ហើយក្នុង ១ ទំព័រមានប្រហែលប៉ុន្មានជួរ និង១ជួរមានប្រហែលប៉ុន្មានពាក្យ?»។
លោកថា៖ «គោលបំណងដែលធ្វើបែបនេះគឺដើម្បីគណនាធៀបនឹងពេលវេលាជាក់ស្ដែងដែលខ្ញុំមានដើម្បីអានសៀវភៅ ១ ក្បាលនោះឱ្យចប់ ព្រោះសៀវភៅខ្លះមានដល់ ២០០ ទំព័រដូច្នេះខ្ញុំត្រូវគណនាមើលថា ត្រូវចំណាយពេលវេលាប៉ុន្មានម៉ោងដើម្បីអានសៀវភៅហ្នឹងឱ្យបានចប់។ អ៊ីចឹងទៅខ្ញុំត្រូវអានឱ្យចប់ ព្រោះខ្ញុំមិនចង់អានដាច់ៗទេបើថា សៀវភៅនោះអាន៤ម៉ោង ចប់ គឺខ្ញុំអានឱ្យចប់តែម្ដង»។
លោក លី តារា បន្តថា ប៉ុន្តែបើសៀវភៅនោះ ត្រូវចំណាយពេលវេលាអានដល់ ៦ ម៉ោង ឬក្រោម ១០ ម៉ោង គឺលោកព្យាយាមអានឱ្យចប់តែម្ដង ហើយបើសៀវភៅនោះត្រូវចំណាយពេលលើសពី ១០ ម៉ោងលោកនឹងអាន ២ ទៅ ៣ ដងឬអាចថា ដល់ ៥ ដងក៏មាន។
ជាធម្មតាភ្នែកពេលសម្លឹងអានសៀវភៅគឺក្រសែភ្នែករត់ទៅតាមជួរ ឬបន្ទាត់សៀវភៅនីមួយៗ អ្នកខ្លះអាចសម្លឹងមើលបានច្រើនពាក្យ អ្នកខ្លះក៏សម្លឹងមើលបានតិចពាក្យ។
ចំណុចនេះ លោកថា៖ «អ្នកខ្លះអាចមើលពីដើមបន្ទាត់រហូតដល់ចុងបន្ទាត់ គឺអាចចន្លោះពី ១៦ ទៅ ២០ ពាក្យ។ ខ្ញុំនិយាយនេះ ចំពោះពាក្យជាភាសាអង់គ្លេស ប៉ុន្តែសម្រាប់ខ្ញុំ ខ្ញុំអាចសម្លឹងអាន បានចន្លោះពី ១០ ទៅ ១៤ ពាក្យ ព្រោះក្នុងចន្លោះហ្នឹង ខ្ញុំអាចយល់ពីអត្ថន័យរបស់សៀវភៅបាន គឺខ្ញុំសង្កេតឃើញខ្លួនឯងថា ខ្ញុំឆាប់ចាប់បាននិងយល់បានល្អជាងពីការសម្លឹងមើលពី ១៥ ទៅ ២០ ពាក្យ»។
ការជ្រើសរើសប្រភេទសៀវភៅមកអានជារឿងចាំបាច់ សម្រាប់មនុស្សម្នាក់ដែលចង់មានទម្លាប់អានសៀវភៅឱ្យបានល្អ និងមិនមានអារម្មណ៍ធុញទ្រាន់ ពេលចាប់អានសៀវភៅ ឬឯកសារចំណេះដឹងនានា។
លោក លី តារា បានបញ្ជាក់បន្ថែមទៀតថា៖ «សៀវភៅដែលខ្ញុំអានភាគច្រើន ទាក់ទងទៅនឹងវិស័យការងារ ការធ្វើអាជីវកម្ម ការត្រៀមខ្លួនសម្រាប់អាជីពការងារទាក់ទងនឹងផ្នែកការធ្វើទីផ្សារ ការលក់យីហោ (Bran-ding) និងមួយចំនួនទៀតទាក់ទងទៅនឹងសហរដ្ឋអាមេរិក។ មូលហេតុដែលខ្ញុំអានច្រើនពីអាមេរិក ព្រោះមានឯកសារជាច្រើនដែលខ្ញុំអានមានក្នុងបណ្ណាល័យអេឡិចត្រូនិកដែលអាចឱ្យយើងបើកអានសេរីទូទាំងពិភពលោកបាន»។
សូមបញ្ជាក់បន្ថែមថា លោក លី តារា ជាអ្នកនិពន្ធខ្មែរវ័យក្មេង ១ រូប ដែលមានសមត្ថភាពនិពន្ធសៀវភៅជាភាសាបរទេសក្នុង ១ ឆ្នាំចន្លោះពី ២ ទៅ ៤ ចំណងជើង ហើយជាអ្នកស្រឡាញ់ និងចូលចិត្តអាន។
លោកអានសៀវភៅដែលបានកត់ចំណាំទុកក្នុងឆ្នាំ ២០១៣ ដល់ ២០១៦ បានចំនួន ៧៧៩ ក្បាល។ ពីឆ្នាំ ២០១៧ ដល់ឆ្នាំ ២០១៩ លោកមិនបានរាប់ចំនួនទេ ហើយចាប់ពីថ្ងៃទី ១ ខែតុលា ឆ្នាំ ២០២០ មកដល់ពេលនេះ លោកអានសៀវភៅបានចំនួន ២២៥ ក្បាល។ ចំពោះសៀវភៅដែលលោក លី តារា ជ្រើសរើសយកមកអានភាគច្រើនមានកម្រាស់ចន្លោះចាប់ពី ១០០ ទំព័រទៅ ៣០០ ទំព័រ៕
