.jpg)
ស៊ូ សាវឿន៖ ការតែងនិពន្ធ គឺជាការចែករំលែកបទពិសោធន៍ និងបន្សល់ទុកនូវក្បួនខ្នាតផ្សេងៗ
អាជីពជាអ្នកនិពន្ធ ទោះបីជាមិនក្លាយជាអ្នកមានទ្រព្យសម្បត្តិស្ដុកស្ដម្ភក៏ដោយចុះ ប៉ុន្តែនៅតែមានអ្នកធ្វើដោយមិនរួញរា ដែលជាក់ស្តែងដូចជា លោក ស៊ូ សាវឿន ដែលជាអ្នកនិពន្ធម្នាក់ក្នុងចំណោមអ្នកនិពន្ធផ្សេងទៀតដែលមានឆន្ទៈមុតមាំក្នុងវិស័យមួយនេះ។
លោក ស៊ូ សាវឿន បានអះអាងថា៖ «គុណសម្បតិ្តនៃការតែងនិពន្ធ ពិតជាល្អជាងការប្រែសម្រួលស្នាដៃបរទេស។ ការប្រែសម្រួលស្នាដៃបង្កើតបាននូវចំណេះដឹងសកល និងទូលំទូលាយ ធ្វើឱ្យកូនខ្មែររបស់យើងដឹងនិងយល់ព័ត៌មានល្អៗនៅជុំវិញសកលលោក តែការតែងនិពន្ធអាចផ្តល់គុណសម្បត្តិច្រើនជាងនេះ ពិសេសជួយលើកតម្កើងអក្សរសាស្ត្រជាតិ អត្តសញ្ញាណជាតិ កិត្តិយសរបស់ជាតិសាសន៍ខ្លួនឯង»។
លោកបន្តថា៖ «ខ្ញុំគិតថា ការតែងនិពន្ធបង្ហាញអំពីឆន្ទៈពិតៗនៃការលើកស្ទួយសេដ្ឋកិច្ចជាតិ តាមរយៈការចែករំលែកបទពិសោធន៍ពិតនៅក្នុងសង្គមរបស់យើង។ ខ្ញុំអាចនិយាយថា សេដ្ឋកិច្ចដែលរីកចម្រើនដោយសារចំណេះដឹងពិត ជំនាញពិត បទពិសោធន៍ពិត គឺជាគ្រឹះពិតប្រាកដសម្រាប់សង្គមជាតិយើង»។
បច្ចុប្បន្ននេះ ក្រៅពីជាអ្នកនិពន្ធហើយនោះ លោក ស៊ូ សាវឿន ក៏ជាសហស្ថាបនិក និងក្រុមប្រឹក្សាភិបាលក្រុមហ៊ុន K Asia ផងដែរ ដែលលោកចូលរួមបង្កើតជាមួយនឹងមិត្តភក្តិ ហើយក្រៅពីនេះទៀត អ្នកនិពន្ធរូបនេះក៏ជាវាគ្មិនដែលចូលរួមចែករំលែកចំណេះដឹង និងបទពិសោធន៍តាមបណ្ដាក្រុមហ៊ុន ស្ថាប័នមួយចំនួនផងដែរ។
លោក ស៊ូ សាវឿន បានប្រាប់ពីហេតុផលដែលធ្វើឱ្យលោកចាប់អាជីពជាអ្នកនិពន្ធសៀវភៅថា លោកចូលចិត្តការចែករំលែក ចូលចិត្តការប្រមូលផ្តុំគំនិតនិងបទពិសោធន៍ រួមនឹងចូលចិត្តធ្វើកិច្ចការមានប្រយោជន៍សម្រាប់មនុស្សច្រើនជំនាន់។
លោកបានបញ្ជាក់ថា៖ «នៅពេលមានបទពិសោធន៍ ទោះបីល្អឬមិនល្អ ឱ្យតែយើងចែករំលែកដល់អ្នកដទៃ នោះនឹងជួយដាស់តឿន ក្រើនរំឭក និងជួយបង្ហាញផ្លូវអំពីកិច្ចការដែលគួរធ្វើនិងកិច្ចការដែលមិនគួរធ្វើ។ ការចែករំលែក គឺជាឧបករណ៍ជួយយើងនិងអ្នកដទៃឱ្យរីកចម្រើន ជាគន្លឹះអភិវឌ្ឍខ្លួនយ៉ាងល្អប្រសើរ ហើយជាប្រភពនៃគំនិតប្រកបដោយភាពច្នៃប្រឌិត»។
លោកបន្ថែមថា៖ «តាមគំនិតរបស់ខ្ញុំ ការចែករំលែកបណ្តុះការគិត បណ្តុះការវិភាគ បណ្តុះការសិក្សាឈ្វេងយល់ បណ្តុះទម្លាប់ចង់ចេះចង់ដឹង។ កាលណាយើងចែករំលែក យើងនឹងសម្អិតសម្អាង ជ្រើសរើសគំនិតនិង សាច់រឿង ល្អៗសម្រាប់បញ្ចូលទៅក្នុងខួរ ក្បាលរបស់យើង»។
ទាក់ទងនឹងចំណូលចិត្តចំពោះការប្រមូលផ្តុំគំនិតនិងបទពិសោធន៍វិញ លោក ស៊ូ សាវឿន បានបញ្ជាក់ថា លោកចូលចិត្តចំណាយពេលវេលាជាមួយមិត្តភក្តិ ផឹកកាហ្វេជជែកគ្នាលេង ពិសេសផ្តោតលើការវែកញែកគំនិត បទពិសោធន៍និងការអនុវត្តការងារប្រចាំថ្ងៃទូទៅ។
លោកថ្លែងថា៖ «ចំណង់ចំណូលចិត្តនេះធ្វើឱ្យខ្ញុំទទួលបានគំនិតថ្មីៗបទពិសោធន៍ល្អៗ និងគន្លឹះចាំបាច់សម្រាប់ការងារ ការរស់នៅ និងការប្រកបមុខរបរជាដើម។ ការតែងនិពន្ធត្រូវផ្សារភ្ជាប់នឹងបទពិសោធន៍ពិត គំនិតពិត និងគ្រប់រសជាតិទាំងនៅក្នុងជីវិតការងារនិងជីវភាពរស់នៅប្រចាំថ្ងៃ»។
ចំពោះវិស័យតែងនិពន្ធកម្ពុជាអ្នកនិពន្ធរូបនេះលើកឡើងថា ការតែងនិពន្ធចាប់ផ្តើមមានភាពរស់រវើក និងផុសផុលគួរឱ្យកត់សម្គាល់ ហើយវាជាចំណុចគួរឱ្យស្ញប់ស្ញែង ព្រោះវាមិនត្រឹមតែជាសិល្បៈនៃការចែករំលែក ថែមទាំងជាកិច្ចខិតខំប្រឹងប្រែងបន្សល់ទុកនូវក្បួនខ្នាតផ្សេងៗសម្រាប់កូនចៅជំនាន់ក្រោយ។ ស្រុកទេសមួយដែលមានអ្នកចងក្រងឬតែងនិពន្ធច្រើន ស្រុកទេសនោះ នឹងសម្បូរទៅដោយគំនិត បទពិសោធន៍ និងរបៀបធ្វើការល្អៗ ហើយវានឹងជួយឱ្យចំណេះដឹងក្លាយជាប្រភពសេដ្ឋកិច្ចគ្រួសារ និងសង្គមជាតិយ៉ាងល្អប្រសើរ។
លោកថា៖ «ខ្ញុំកោតសរសើរចំពោះកិច្ចប្រឹងប្រែងរបស់រាជរដ្ឋាភិបាល ដែលបង្កើតបរិយាកាសបើកទូលាយ ហើយធ្វើឱ្យមានភាពផុសផុលនៅក្នុងវិស័យតែងនិពន្ធ។ ខ្ញុំស្គាល់ក្មេងៗដែលទើបតែកំពុងរៀននិងបញ្ចប់ថ្នាក់ទី ១២ ថែមទាំងស្គាល់មនុស្សវ័យចំណាស់ដែលចូលនិវត្តន៍ពីការងារ សុទ្ធតែបានផ្តល់តម្លៃលើការងារតែងនិពន្ធ។ នេះជារឿងល្អសម្រាប់សង្គមជាតិ ទោះបីការតែងនិពន្ធខ្លះមិនល្អសម្រាប់សង្គម ប៉ុន្តែពិតជាបានបង្ហាញផ្លូវខ្លះៗសម្រាប់មនុស្សជាតិ»។
ចាប់តាំងពីអ្នកនិពន្ធ ស៊ូ សាវឿន ឈានជើងចូលជាអ្នកនិពន្ធមក លោកបានបង្កើតស្នាដៃជាសៀវភៅមាន ៧ ចំណងជើង រួមមាន៖ផ្លូវអ្នកខ្លាំង, ជម្រើសផ្លូវដើរ, ជួយខ្លួនឯង, ៣៦៥ ថ្ងៃច្នៃគំនិត, ក្តាប់ឱកាស, តិចនិកលក់និងសិល្បៈលក់។ សម្រាប់សៀវភៅ «តិចនិកលក់ និងសិល្បៈលក់» ទាំង ២ ចុងក្រោយនេះ លោកសរសេរអំពីបទពិសោធន៍ផ្ទាល់ខ្លួនរបស់លោកចន្លោះឆ្នាំ ២០១៣ ដល់ពេលបច្ចុប្បន្ន ដែលសៀវភៅទាំង ២ នេះមានបំណងជួយដល់ម្ចាស់ក្រុមហ៊ុន សហគ្រាស និងអ្នកធ្វើការឱ្យចេះពីរបៀបលក់ និងដឹកនាំក្រុមការងារលក់បានល្អ។
លោកបានបញ្ជាក់ថា ចំណែកសៀវភៅ ៥ ចំណងជើងផ្សេងទៀត គឺស្ថាប័នផ្សេងសុំសិទ្ធិបោះពុម្ពផ្សាយ ដែលសៀវភៅទាំងនោះនិយាយពាក់ព័ន្ធនឹងការអភិវឌ្ឍបុគ្គលិកលក្ខណៈ អត្តចរិត ភាពជាអ្នកដឹកនាំខ្លួនឯង និងធ្វើជាបុគ្គលដែលស្គាល់ខ្លួនឯងច្បាស់។
អ្នកនិពន្ធ ស៊ូ សាវឿន បានផ្ដល់អនុសាសន៍ថា៖ «ការតែងនិពន្ធ ថ្វីដ្បិតមិនបង្កើតលទ្ធផលភ្លាមៗ ប៉ុន្តែវាជាកិច្ចខិតខំប្រឹងប្រែងផ្លាស់ប្តូរខ្លួនឯង និងសង្គមជាតិទាំងមូលតាមរយៈមរតកចំណេះដឹង និងបទពិសោធន៍ជីវិតជាក់ស្តែង។ ការក្លាយខ្លួនជាអ្នកតែងនិពន្ធក៏មិនងាយស្រួលពេកដែរ គឺទាមទារការស្រឡាញ់ពិតៗ ថែមទាំងហ៊ានលះបង់រឿងដែលអ្នកដទៃពិបាកលះបង់ ឧទាហរណ៍ពេលវេលាដើរលេងសប្បាយជាដើម»៕
