អ្នកស្រី អ៊ុក ចាន់វល័ក្ខណ៍ អ្នកធ្វើការ៉េមឆាជាបង្អែម។ រូបថត សហការី
សៀមរាបៈ មានប្រភពចេញពីប្រទេសថៃ ការ៉េមឆាជាបង្អែមលាងមាត់ដែលប្លែក មានសោភណភាពទាក់ទាញ និងមានការគាំទ្រច្រើន។ នៅក្នុងប្រទេសថៃ ការ៉េមឆា ជាបង្អែមដ៏ពេញនិយមមួយ ដែលគេស្គាល់ថាជាប្រភេទ Street Food ហើយវាមានភាពល្បីល្បាញខ្លាំងក្នុងឆ្នាំ ២០១២។
ដោយមើលឃើញពីឱកាសនេះ ស្ត្រីខ្មែរ ១រូប គឺអ្នកស្រី អ៊ុក ចាន់វល័ក្ខណ៍ បានទៅរៀនធ្វើការ៉េមឆាពីប្រទេសថៃផ្ទាល់ និងបានមកចាប់ផ្ដើមបើកអាជីវកម្មនេះ នៅខេត្តសៀមរាបក្នុងឆ្នាំ ២០១៤ នៅផាប់ស្ត្រីត (Pub Street) ដែលជាតំបន់មានចរន្ដទេសចរបរទេសខ្លាំង ជាទីតាំងដែលស្ត្រីរូបនេះចាប់ផ្ដើមមុខរបររបស់ខ្លួន។
ក្នុងការចាប់ផ្ដើមនេះ អ្នកស្រីត្រូវចំណាយដើមទុនអស់ច្រើន ដោយសារតែម៉ាស៊ីនសម្រាប់ធ្វើការ៉េមឆា មានតម្លៃថ្លៃ ដូច្នេះអ្នកស្រីត្រូវសន្សំប្រាក់សម្រាប់ធ្វើដើមទុននេះប្រមាណជា ៤ពាន់ដុល្លារ។
បើតាមអ្នកស្រី អ៊ុក ចាន់វល័ក្ខណ៍ កាលពីពេលចាប់ផ្ដើមដំបូងៗ អ្នកស្រីមិនមានជាទីតាំងណាមួយច្បាស់លាស់នៅឡើយទេ ដោយគ្រាន់តែមានរទេះផ្សារភ្ជាប់នឹងម៉ូតូ ដែលអ្នកស្រី និងស្វាមី ជិះលក់ចល័ត។ ម្យ៉ាងក៏ដោយសារពេលនោះមិនទាន់មានការរៀបចំដងផ្លូវ Pub Street ដូចបច្ចុប្បន្នផង និយាយរួមគឺម៉ូតូរ៉ឺម៉កកង់៣ អាចជិះចូលទៅក្នុងទីធ្លានោះបាន។
ប៉ុន្តែក្រោយពីមានការរៀបចំ និងមានការហាមប្រាមឱ្យធ្វើចរាចរណ៍លើដងផ្លូវតំបន់ Pub Street ទើបអ្នកស្រី និងស្វាមីរៀបចំជាតូបតូចមួយ នៅជាប់នឹងដងផ្លូវដែលមានភ្ញៀវទេសចរដើរឆ្លងកាត់ខ្វែងខ្វាត់។
យូរៗម្ដង ភ្ញៀវដែលដើរឆ្លងកាត់តែងឈប់មើលការធ្វើការ៉េមរបស់អ្នកស្រី អ៊ុក ចាន់វល័ក្ខណ៍ និងសាកភ្លក្សបង្អែមមួយនេះ។ ភាពរហ័សរហួនរបស់អ្នកស្រីក្នុងការឆាការ៉េមនៅលើបន្ទះដែក ព្រមទាំងភាពចម្រុះពណ៌ នៃការ៉េមដែលធ្វើចេញពីផ្លែឈើ កាន់តែទាក់ភ្នែកអ្នកដើរឆ្លងកាត់ឱ្យបង្វែរការចាប់អារម្មណ៍មកមើលតូបការ៉េមរបស់អ្នកស្រី។ នៅថ្ងៃខ្លះ កូនស្រីអាយុ៨ឆ្នាំរបស់អ្នកស្រីក៏ឆ្លៀតមកជួយលក់ ជួយហៅភ្ញៀវផងដែរ។
បើតាមការរៀបរាប់របស់អ្នកស្រី អ៊ុក ចាន់វល័ក្ខណ៍ ជិត១០ឆ្នាំមកនេះ របរការ៉េមឆាជាប្រភពចំណូលដ៏សំខាន់សម្រាប់ទ្រទ្រង់ជីវភាពគ្រួសារអ្នកស្រី ជាពិសេសកូនៗរបស់អ្នកស្រីទាំង ២នាក់។
អ្នកស្រី អ៊ុក ចាន់វល័ក្ខណ៍ បានប្រាប់ថា ៖ «កាលពីមុនកូវីដ ខ្ញុំអាចរកបាន ១យប់២០ម៉ឺនទៅ ៦០ម៉ឺនរៀល តែក្រោយកូវីដនេះដោយសារភ្ញៀវអត់ទាន់ត្រឡប់មកវិញអស់ ១យប់បានត្រឹម២០ម៉ឺនអីទេ។»
សម្រាប់វត្ថុធាតុដើម អ្នកស្រីបញ្ជាក់ថា មិនមានអ្វីត្រូវត្រៀមដូចធ្វើនំផ្សេងៗទេ ពោលគឺគ្រាន់តែទិញគ្រឿងលាយមួយចំនួនដូចជា ទឹកដោះគោស្រស់ ទឹកដោះគោខាប់ ផ្លែឈើ និងគ្រឿងផ្សេងៗទៀត យកមកទុកប៉ុណ្ណោះ។ ម្យ៉ាងដោយសារវាជាប្រភេទបង្អែមដែលត្រូវធ្វើភ្លាមៗ ដូច្នេះហើយក្រៅពីពេលលក់ ការ៉េមទៅ អ្នកស្រីនៅសល់ពេលច្រើនសម្រាប់ធ្វើការងារផ្ទះ។
ដោយសារតែវត្ថុធាតុដើមច្រើន និងមានតម្លៃថ្លៃគួរសម ផាត់ថ្លៃចំណាយអ្នកស្រីអាចចំណេញបាន ៤០% ពីការលក់ ដែលប្រាក់ចំណេញនេះសមល្មមសម្រាប់ផ្គត់ផ្គង់ការសិក្សារបស់កូនៗ។ បើតាមអាជីវកររូបនេះ ការលក់គឺចាប់ផ្ដើមពីម៉ោង៣រសៀលទៅ រហូតដល់ម៉ោង១២យប់ ព្រោះតំបន់ Pub Street អ៊ូអរ និងមានភ្ញៀវនៅលេងកម្សាន្ដរហូតដល់ទៀបភ្លឺ។ ដោយឡែក អ្នកស្រីក៏មានបំណង ចង់ពង្រីករបរនេះបន្តទៀតដែរ ព្រោះតែតម្រូវការជីវភាពក៏កាន់តែច្រើន ស្របពេលដែលកូនៗ អ្នកស្រីក៏កាន់តែធំ។ ម្យ៉ាងទៀត អ្នកស្រីថា របរនេះងាយស្រួលរកព្រោះជារបរដែលផ្ដល់សេវាកម្មដល់ភ្ញៀវទេសចរ ដូច្នេះអ្នកស្រីអាចទទួលបានប្រាក់ត្រឡប់ភ្លាមៗ ដោយមិនមានការជំពាក់ដូចរបរផ្សេងទេ។
ប៉ុន្តែយ៉ាងណា ការធ្វើអាជីវកម្មដែលពឹងលើភ្ញៀវទេសចរក៏មានគុណវិបត្តិផងដែរ។ អ្នកស្រី អ៊ុក ចាន់វល័ក្ខណ៍ បានរៀបរាប់ថា៖ «អ្នករកស៊ីនៅទីនេះ ភាគច្រើនពឹងលើភ្ញៀវបរទេស អីចឹងហើយគេក៏មិនចេះតែមកលេងរាល់ខែដែរ គេមានពេល មានវេលារបស់គេដូចគ្នា...អីចឹងហើយនៅខែដែលគេធ្វើការ យើងក៏រកមិនសូវរកបានដែរ រហូតទាល់តែដល់ខែគេសម្រាកពីការងារ ទើបយើងអាចលក់បានច្រើនវិញ»។
បើទោះជាយ៉ាងនេះក៏ដោយ អ្នកស្រី អ៊ុក ចាន់វល័ក្ខណ៍ នៅតែពេញចិត្ត និងប្រឹងប្រែងប្រកបរបរលក់ការ៉េមឆា ដោយមិនបោះបង់ចោលឡើយ ព្រោះរបរនេះជារបរស្នូលដែលអាចឱ្យអ្នកស្រីចិញ្ចឹមបីបាច់កូនឱ្យទទួលបានការសិក្សាល្អ៕
