សៀមរាប: វាគ្រាន់តែជា​រថយន្ដ​ម៉ូដែល​ចាស់ ​១ ​គ្រឿង​ ស្ថិត​ក្នុង​ចំណោម​សម្ភារ​ប្រើ​ប្រាស់​អាយុ​កាល​រាប់​រយ​ឆ្នាំ​ប៉ុណ្ណោះ​ នៅ​ផ្នែក​ម្ខាង​នៃ​​​សារមន្ទីរ​វិមាន​សុខាខេត្ដ​សៀមរាប។

ប៉ុន្ដែ​ក្រោយ​ពេល​​ម្ចាស់​​សារមន្ទីរ​ លោក លី ប៉េងហេង ដែល​ហៅថា តា​ឆ្កួត ជាឈ្មោះ​ត្រូវបាន​មហាជន​ហៅ​ដោយសារ​ទម្លាប់​ប្រមូល​​ទិញ​វត្ថុ​ចាស់ៗ​ បាន​ណែនាំ​ថា រថយន្ដ Volkswagen Beetle 1100 ផលិត​ក្នុងឆ្នាំ​ ១៩៥៨ ធ្លាប់​ជា​កម្ម​សិទ្ធិ​ប្រើ​ប្រាស់​របស់​អធិរាជ​សំឡេង​មាស ស៊ីន ស៊ីសាមុត ហើយរថយន្ដ​រាង​ដូច​អណ្ដើក​នេះ ​ក្លាយ​ជា​តួ​ឯក​មួយ​ក្នុង​សារមន្ទីរ​។

លោក ប៉េងហេង បាន​និយាយថា​៖ «​ភ្ញៀវ​ភាគច្រើន​មិន​ចាប់​អារម្មណ៍​រថយន្ដ​ Volkswagen ១​ គ្រឿង​នេះទេ​។ប៉ុន្ដែ​នៅពេល​ដឹង​ថាវាធ្លាប់​ជា​កម្មសិទ្ធិ​របស់​លោក ស៊ីន ស៊ីសាមុត ក៏មាន​អ្នក​ចាប់​អារម្មណ៍​ច្រើនជាពិសេស​ មនុស្ស​វ័យ​ចាប់​អាយុ ៥០ ឡើង​»។

លោក​បាន​ប្រាប់​ភ្នំពេញ​ប៉ុស្ដិ៍​ថា​៖ «​រថយន្ដ​នេះលោក ស៊ីន ស៊ី​សាមុត ប្រើប្រាស់​នៅ​ក្នុង​ទសវត្សរ៍​ឆ្នាំ ​១៩៦០ រហូត​ដល់​សម័យ​សង្គ្រាម​ក្នុង​ឆ្នាំ​ ១៩៧៥​»។​

ជាភរិយា​លោក ស៊ីន ស៊ីសាមុត លោកយាយ ខាវ ថង​ញ៉ុ​ត ដែល​បច្ចុប្បន្ន​នេះរស់​នៅ​ក្នុង​ភូមិ​ស្ពាន​ថ្មសង្កាត់​ស្ទឹង​តែង ក្រុង​ស្ទឹង​ត្រែង ខេត្ដ​ស្ទឹង​ត្រែង បាន​ឱ្យ​ដឹងថា លោក​យាយ​បាន​ដឹង​អំពី​ព័ត៌មាន​រថយន្ដ Volkswagen ដែល​លោកយាយ និង​លោក​ស៊ីន ស៊ីសាមុតធ្លាប់​ប្រើ​ប្រាស់​នោះ​ដែរ តែ​លោក​យាយ​មិន​ធ្លាប់​បាន​ឃើញ​នោះ​ទេ។

លោកយាយ ថង​ញ៉ុ​ត អាយុ ៨៤ ឆ្នាំ បានប្រាប់ ​ភ្នំពេញ ​ប៉ុស្ដិ៍​ថា​៖ «​ដោយ​មិន​ចាំឆ្នាំ ដំបូងឡើយគាត់និង​ខ្ញុំ​ធ្លាប់​ជិះ​រថយន្ដ Volkswagen ហើយ​ក្រោយមក​គាត់​ប្ដូរ​មក​ជិះ Toyota និង​បន្ដ​មក​ជិះ Mercedes-Benz»។

យ៉ាងណាមិញលោក​យាយ​មិន​ធ្លាប់​បាន​ឃើញ​រថយន្ដ​ដែល​ត្រូវបាន​ដាក់​តាំង​នៅ​សារមន្ទីរ​វិមាន​សុខា​នោះទេ​ ដោយ​លោក​យាយ​គ្រាន់តែ​ឮ​ដំណឹង​រថយន្ដ​របស់​ស្វាមី​តាម​រយៈ​ការ​និយាយ​ប្រាប់​ពី​អ្ន​កដទៃ​។

ភរិយា​អធិរាជ​សំឡេង​មាស​ អ្នកស្រី ថង​ញ៉ុត បាន​ឱ្យ​ដឹង​ថា ដោយសារ​តែ​សុខភាព​មិន​អំណោយ​ផលលោក​យាយ​មិន​អាច​ធ្វើ​ដំណើរ​ទៅ​មើល​វត្ថុ​អនុស្សាវរីយ៍​រវាង​អ្នក​ស្រីនិង​តារា​ចម្រៀង​ល្បី​ ដែល​បន្សល់​តែ​សំឡេង​ដ៏​ក្រអួន​ក្រអៅ​បាន​ឡើយ​។

យ៉ាងណាមិញការ​រ៉ាយ​រ៉ាប់​របស់​លោក ប៉េងហេង អំពី​វត្ថុ​ប្រើ​ប្រាស់​បុគ្គល​ល្បី​តាំងពី​ជំនាន់​ទសវត្សរ៍​ឆ្នាំ​ ១៩៦០ មិន​ត្រូវបាន​យក​ចិត្ដ​ទុក​ដាក់​ខ្លាំង​ពី​មនុស្ស​អាយុ​ខ្ទង់​ ៤០​ ចុះ​ក្រោម​ឡើយហើយ​មនុស្ស​ខ្លះ​ទៀត​ក៏​មិន​ជឿ​ថាវាជា​កម្មសិទ្ធិ​របស់​អធិរាជ​សំឡេង​មាសស៊ីន ស៊ីសាមុត ថែម​ទៀត​។

លោក​បានឱ្យ​ដឹងថា ពេល​លោក​រៀបរាប់​អំពី​ប្រវត្ដិ​រថយន្ដ​ អ្នក​ខ្លះ​ក៏​ជឿ​ ហើយ​អ្នក​ខ្លះ​ទៀត​ក៏​មិនជឿ​ ដែល​លោក​អះអាង​ថាវាជា​ការ​គិត​របស់​មនុស្ស​ម្នាក់ៗដោយ​មិន​អាច​បង្ខិត​បង្ខំ​ឱ្យ​អ្នក​ដទៃ​ជឿ​បាន​ទេ​។

លោក ប៉េងហេង​ ​ចំណាយ​ពេល​វេលា​ប្រមាណ ៣ ទសវត្សរ៍ ប្រមែប្រមូល​វត្ថុ​ចាស់​ៗ​ជា​ច្រើនរយ​មុខដូចជា ​គ្រឿង​អេឡិច​ត្រូនិកដែល​​ផលិត​នៅ​គ្រប់សម័យ​កាលគ្រប់​តំបន់តាំងពីផលិត​ផល​ក្នុង​ស្រុករហូត​ដល់​ក្រៅស្រុក​ជាច្រើនប្រភេទ​មានចំនួន​រាប់​រយ​មុខ​តាំង​​ពី​ឆ្នាំ ១៩៩៨ មក។

គ្រឿង​អេឡិចត្រូនិក​ចាស់ៗចាប់​ពី​ទូកក្ដោង​គំរូខ្នាតតូចផលិត​ឆ្នាំ ១៦២០ ​កង់​បុរាណ​ម៉ាក BS ផលិត​ឆ្នាំ ១៨៧៦​ កាមេរ៉ា​ខ្នាត​ដ៏​តូច​បំផុត​​ផលិត​ឆ្នាំ​១៩៣៧ទូរទស្សន៍និងវិទ្យុ​ក្នុង​ទសវត្សរ៍​ទី៥០ ​រហូតដល់​ម៉ូឌីឡែត​ កង់​ម៉ាស៊ីន​ ម៉ូតូទូរស័ព្ទ​ ម៉ាស៊ីនចាក់​ឌីសវីដេអូ​ និង​រថយន្ដ​ Volkswagen ម៉ូដែល V1010 ឆ្នាំ ១៩៣៨ និង​គ្រឿង​អេឡិចត្រូនិកមាន​រាប់​រយ​មុខ​ទៀត។

លោក​បាន​និយាយថា​៖ «​រថយន្ដ​ទាំង​អស់​ ១២ គ្រឿងខ្ញុំ​បាន​លក់​អស់​ហើយនៅ​សល់​តែ​ ១ ​គ្រឿង​នេះដែល​ជា​វត្ថុ​អនុស្សាវរីយ៍ដ៏​មាន​តម្លៃ​មិន​អាច​កាត់​ថ្លៃ​បាន។ដោយ​សារ​វាមាន​ប្រវត្ដិ​ ខ្ញុំ​ចេះ​តែ​ទុក​ឱប​ៗ​រហូត​ដល់​សព្វ​ថ្ងៃ​។ខ្ញុំ​នឹង​មិន​លក់​វា​នោះទេដរាប​ណាខ្ញុំ​នៅ​មាន​ជីវិត​»។

តាម​រយៈ​បង​ថ្លៃ​​លោកប៉េង​ហេងបាន​ទិញ​រថយន្ដ​ Volkswagen Beetle 1100 ពី​លោកសវណ្ណពុធជា​អតីត​ផលិតករ​ភាពយន្ដ​ ក្នុងឆ្នាំ​ ១៩៩៨។

លោកបាន​ប្រាប់​មូលហេតុ​ដែល​អតីត​ផលិតករ​រូប​នេះ​ដាច់​ចិត្ដ​លក់​រថយន្ដ​អធិរាជ​សំឡេង​មាស​ថា​៖ «​ពេល​នោះគាត់​កុន​លុយ​ ហើយ​ណា​មួយ​គាត់​បាន​បែក​បាក់​ជាមួយ​ភរិយាដែល​ធ្វើ​ដំណើរ​ទៅ​អាមេរិក​។គាត់​នៅ​ទីនេះខូច​ចិត្ដ​ និង​បាន​សម្រេច​ចិត្ដ​លក់​រថយន្ដ​នោះ​ឱ្យ​ខ្ញុំ​។គាត់​បាន​ស្លាប់​ប៉ុន្មាន​ឆ្នាំ​មុន​ហើយ​»។

រថយន្ដ​ស៊េរី​ចាស់​ម៉ូដែល​ឆ្នាំ​ ១៩៥៨ នេះ ត្រូវ​បាន​កែកុន​ប្រមាណ ៥០ ភាគរយ​ ពី​គំរូ​ដើមក្រោយ​ពេល​លោកប៉េងហេងបាន​ទិញ​ពី​អតីត​ផល​ភាពយន្ដ​សតវត្សរ៍​ឆ្នាំ​ ១៩៨០​។

លោក​បាន​ឱ្យ​ដឹងថា ម៉ាស៊ីន​ត្រូវបាន​ផ្លាស់ប្ដូរ​ពី​ក្រោយ​មក​ដាក់​មុខដោយសារ​ជំនាន់​នោះ​ប៉ុល​ពតវា​កម្ទេច​ម៉ាស៊ីន​ហើយហើយ​ក៏​បាន​ដាក់​ម៉ាស៊ីន​ខុស​ទៀត​។លោ​ក​បាន​ផ្លាស់​ប្ដូរ​ម៉ាស៊ីន​ខុស​នោះដាក់​ម៉ាស៊ីន​ថ្មី​ជំនួស​វិញ​រួច​រាល់​ ដែល​បើកបរ​បាន​។

លោក ប៉េងហេង ហៅ​តាឆ្កួត បាន​បន្ដថា​៖ «ពេល​ម្ចាស់​មុន​យក​មក​ក្នុង​ឆ្នាំ​ ១៩៧៩ មាន​កាង​ហ្ស៊ីន​ តែ​ពេល​ខ្ញុំ​ទិញ​មក​យក​ជួស​ជុល​ឡើង​វិញជាង​បាន​ដោះ​កាង​លក់​ឱ្យ​អេត​ចាយរួមទាំង​ស្លាក​លេខ​ទៅ​បាត់​។សរុប​មកយើង​កែ​កាងកែ​កង់កញ្ចប់​ផ្នែក​ខ្លះ​។នេះ​ជា​ហេតុ​ដែល​អ្នក​ខ្លះ​បញ្ចេញ​ទស្សនៈ​បែប​នេះ​បែប​នោះ​។តែ​ខ្ញុំ​មិន​ចាប់​អារម្មណ៍​នោះទេ​»។

ក្រោយ​ពី​រៀបចំ​ទីតាំង​ទុក​ដាក់​ឱ្យ​បាន​ត្រឹម​ក្នុង​ទូ​កញ្ចក់​រួចលោកប៉េងហេងគ្រោង​លាប​ពណ៌ Volkswagen Beetle 1100​ ទៅជា​ពណ៌​ស​គំរូ​ដើម​វិញ​។ភ្ញៀវ​នៅតែ​អាច​មក​ប៉ះ​ស្ទាប​ និង​ថតរូប​អនុស្សាវរីយ៍​​បាន​ដដែល​ លើកលែង​តែ​ការ​បើក​ទ្វារ​ចូល​អង្គុយ​ខាង​ក្នុង​ ដោយសារ​តែ​វា​អាច​បង្ក​ការ​បាក់​ត្រចៀក​ទ្វារ​រថយន្ដ​។

ក្រៅពី​រថយន្ដ​ Volkswagen Beetle 1100 របស់​អធិរាជ​សំឡេង​មាស ស៊ីន ស៊ីសាមុត សារមន្ទីរ​វិមាន​សុខារបស់លោក លី ប៉េង​ហេង នៅ​មាន​វត្ថុ​ចាស់​ៗ​អាយុ​កាល​ពី ២០០ ទៅ ៣០០ ឆ្នាំ​ច្រើន​ប្រភេទ​ទៀត ដែល​អាច​ទាក់​ទាញ​ចំណាប់​អារម្មណ៍​ភ្ញៀវ​ជាតិ និង​អន្ដរជាតិ​។

លោកបាន​និយាយថា​៖ «​ខ្ញុំ​បាន​ប្រមូល​ទិញប្រភេទ​ម៉ូតូ​ កង់​ដាក់​ម៉ាស៊ីននិង​កង់ធម្មតា​ជាង ១០០ គ្រឿង​។ម៉ាស៊ីន​ជា​ច្រើន​ម៉ូដែល​ចំនួន​ប្រមាណ ៣០០ គ្រឿង​ នាឡិកា​ប៉ោល​ចំនួន​ ១០០ គ្រឿង​ ទូរស័ព្ទ​ ១០០ គ្រឿង ​វិទ្យុជិត ៨០ គ្រឿង​ និង​ឧបករណ៍​ផ្សេង​ៗ​ជា​ច្រើនប្រភេទ​ទៀត​សរុបជិត ១ ពាន់មុខ​»។

លោក​​បន្ដ​​ថា​ កង់​ម៉ាស៊ីន​ម៉ាក Whizzer ផលិតឆ្នាំ ១៩៣៩ ម៉ូតូម៉ូប៊ីឡែត​ម៉ាស៊ីន២ម៉ាក Super Cross និង​កង់​ម៉ាក​ Rolls-Royce ផលិត​ឆ្នាំ១៩៣៥ម៉ាស៊ីន​ចាក់​ស៊ីឌី​ផលិតឆ្នាំ១៩០៦។

​មន្ទីរវិមានសុខាចំណាយ​ពេ​ល​ធ្វើ​ដំណើរ​ ៥នាទីពី​ក្រុង​អង្គរនិង​ ១០ នាទី​ពី​ព្រះអង្គ​ចេក​ព្រះ​អង្គចមដែល​មាន​ទីតាំង​នៅភូមិ​ត្រពាំងសេះសង្កាត់​គោក​ចកក្រុង​សៀមរាបចូល​តាម​ច្រក​ទី២ពី​វត្ត​ថ្មីហៅវត្ត​ក្បាល​ខ្មោច ​ជា​កន្លែង​​ប្រមូល​ផ្តុំ​ទៅ​ដោយ​របស់​របរ​ចាស់ៗ ​និង​អាយុ​កាល​ជិត ៣០០ ឆ្នាំ​ សម្រាប់​មហាជន​ថតរូប​មុន​​ទុកជាអនុស្សាវរីយ៍ដែល​វិល​ត្រឡប់​ទៅ​កាន់​អតីត​កាល។

សម្រាប់​ភ្ញៀវ​ទេសចរ​ជាតិតម្លៃ​សំបុត្រ ៥ ០០០ រៀល​ម្នាក់ និង ២​ ម៉ឺន​រៀល ​សម្រាប់​ភ្ញៀវ​បរទេស​ម្នាក់​ ហើយ​ចំពោះ​ការ​ថត​រូប​មុន​អាពាហ៍ពិពាហ៍ ឬ Pre-wedding មានតម្លៃ ៤០ ម៉ឺន​រៀល​។​

សម្រាប់​ព័ត៌មាន​លម្អិតសូម​ទៅកាន់​ហ្វេសប៊ុក VimeanSokha​៕