ភ្នំពេញៈ ប្រតិភូសិល្ប:នៃប្រទេសកម្ពុជាបានចូលរួមសម្តែងក្នុងព្រឹត្តិការណ៍អបអរសាទរខួបអនុស្សាវរីយ៍ទី ៦៥ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជានិងសាធារណរដ្ឋប្រជាមានិតចិននៅសណ្ឋាគារ Legendale នៃរដ្ឋធានីប៉េកាំង ប្រទេសចិន ដែលមានការចូលរួមពីភ្ញៀវកិត្តិយសប្រមាណ ៣០០ នាក់។ នេះបើយោងតាមក្រសួងវប្បធម៌ និងវិចិត្រសិល្បៈនៅថ្ងៃទី ២១ ខែកក្កដានេះ។
ឆ្នាំ ២០២៣ នេះគឺជាឆ្នាំគម្រប់ខួប ៦៥ ឆ្នាំនៃចំណងការទូតរវាងកម្ពុជានិងចិន ហើយក៏ជាឆ្នាំមិត្តភាពកម្ពុជា-ចិន។ ចាប់តាំងពីថ្ងៃបង្កើតទំនាក់ទំនងការទូតជាផ្លូវការមក ថ្នាក់ដឹកនាំនៃប្រទេសទាំង ២ បានបង្កើនមិត្តភាពយ៉ាងពិសេស និងយ៉ាងជិតស្និទ្ធជាបន្តបន្ទាប់រហូតមកដល់ពេលបច្ចុប្បន្ន។
ជាកិត្តិយសសម្រាប់ប្រតិភូសិល្ប:នៃព្រះរាជាណាចក្រកម្ពុជា គឺបាននាំយកផ្ទាំងទស្សនីយភាពរបាំអប្សរា របាំសុវណ្ណមច្ឆា របាំមណីមេខាលា និងរបាំផ្លិត សម្តែងជូនថ្នាក់ដឹកនាំជាន់ខ្ពស់ក៏ដូចជាភ្ញៀវកិត្តិយសនៅរដ្ឋធានីប៉េកាំង នាឱកាសអបអរសាទរខួបអនុស្សាវរីយ៍លើកទី ៦៥ នៃការបង្កើតទំនាក់ទំនងការទូតរវាងប្រទេសទាំង ២។
ព្រឹត្តិការណ៍នេះត្រូវបានរៀបចំឡើងដោយមានការសហការរវាងស្ថានឯកអគ្គរាជទូតកម្ពុជាប្រចាំប្រទេសចិន និងសមាគមប្រជាជនចិនដើម្បីមិត្តភាពជាមួយបរទេស៕
