លោក ហ៊ុន សែន ថ្លែងក្នុងពិធីបិទបញ្ចប់កញ្ចក់កាមេរ៉ាថតខ្សែភាពយន្តភាគរឿង កូនប្រុសក្រោមពន្លឺព្រះចន្ទពេញបូណ៌មី កាលពីថ្ងៃទី ៩ ខែតុលា ឆ្នាំ ២០២៣។ រូបថត SHS
ភ្នំពេញៈ ខ្សែភាពយន្តភាគរឿង «កូនប្រុសក្រោមពន្លឺព្រះចន្ទពេញបូណ៌មី» ដែលជាខ្សែភាពយន្តភាគនិយាយពីជីវិតតស៊ូរបស់អតីតនាយករដ្ឋមន្ត្រីលោក ហ៊ុន សែន ដែលត្រូវបានផលិត និងថតចេញជាភាពយន្តភាគរយៈពេលជាង ១ ឆ្នាំ ត្រូវបានប្រកាសបិទបញ្ចប់កញ្ចប់កាមេរ៉ាថតកាលពីថ្ងៃទី ៩ តុលា ឆ្នាំ ២០២៣ ក្រោមអធិបតីភាពលោកហ៊ុន សែន។
លោក ហ៊ុយ វាសនា ប្រធានគណៈកម្មការផលិតខ្សែភាពយន្តភាគនេះថ្លែងនាពិធីនោះថា ខ្សែភាពយន្តនេះបានចាប់ផ្តើមថតនៅដើមខែកុម្ភៈ ឆ្នាំ ២០២២ រហូតមកដល់ពាក់កណ្តាលខែសីហាឆ្នាំ ២០២៣ ថតបានចំនួន ១ ២៩៦ ឈុតឆាក ដែលស្មើនឹង ១០០% នៃសាច់រឿងសរុបដោយប្រើពេល ១៩ ខែ។
លោកថា៖ «រឿងកូនប្រុសក្រោមពន្លឺព្រះចន្ទពេញបូណ៌មី គឺជាជីវប្រវត្តិពិតរបស់សម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលរឿងនេះបានចំណាយដើមទុនច្រើនជាងគេបំផុតនៅក្នុងប្រវត្តិសាស្ត្រខ្សែភាពយន្តភាគរបស់ប្រទេសកម្ពុជា ក្នុងនោះចំណាយថវិកាផលិតអស់ចំនួន ៥ លាន ២៧ ម៉ឺន ៦ ៤០០ ដុល្លារអាមេរិក ក្រោមការឧបត្ថម្ភថវិកាផ្ទាល់របស់សម្តេចតេជោ ហ៊ុន សែន»។
ក្នុងពិធីបិទបញ្ចប់កញ្ចក់កាម៉េរាថតខ្សែភាពយន្តភាគនេះ លោក ហ៊ុន សែន ថ្លែងថា៖ «រឿងភាគប្រវត្តិសាស្ត្រ រឿងកូនប្រុសក្រោមពន្លឺព្រះចន្ទពេញបូណ៌មីនេះ បើថតគ្រប់ព្រឹត្តិការណ៍ប្រវត្តិសាស្ត្រទាំងអស់ អាចឈានដល់ជាង ៣០០ ភាគ ហើយមានតួអង្គច្រើនជាងនេះទៀតដែលយើងមិនអាចរៀបរាប់អស់ តែយើងមិនមានលទ្ធភាពធ្វើបែបនេះទេ»។
ទោះយ៉ាងណាលោកថា៖ «បើទោះបីជារឿងនេះវាឆ្លុះបញ្ចាំងមិនគ្រប់គ្រាន់អស់នូវអ្វីដែលវាបានកើតមាន ប៉ុន្តែខ្ញុំក៏មានសំណូមពរដែរថា សុំកុំឱ្យមានរឿងប្រវត្តិហ៊ុន សែនដល់ទៅ ២។ ... ព្រោះអ្វីដែលខ្ញុំខ្លាចបំផុតគឺរឿងប្រវត្តិសាស្ត្របានបញ្ចូលគំនិតរបស់អ្នកនិពន្ធ ហើយធ្វើឱ្យរឿងក្លាយជារឿងខុសពីការពិត»៕
