លោក ទីវ តារារិទ្ធ ជាអ្នកនិយមជិះកង់ផ្លូវឆ្ងាយបែបផ្សងព្រេង នាពេលកន្លងមក។ សហការី
ភ្នំពេញ: លោក ទីវ តារារិទ្ធ ជាអ្នកនិយមជិះកង់ផ្លូវឆ្ងាយបែបផ្សងព្រេង ដែលល្បីល្បាញដោយសារទង្វើសប្បុរសធម៌ កំពុងត្រៀមខ្លួនបង្កើតប្រវត្ដិសាស្ដ្រមួយគឺការធ្វើដំណើររយៈពេលមួយឆ្នាំ ជិះកង់ចម្ងាយ ២ម៉ឺនគីឡូម៉ែត្រពីប្រទេសកម្ពុជាទៅកាន់ទ្វីបអឺរ៉ុប។
បេសកកម្មដ៏មានមហិច្ឆតានេះ គ្រោងនឹងចាប់ផ្តើមនៅខែមិថុនា ក្នុងគោលបំណងរៃអង្គាសប្រាក់ចំនួន ២៥ម៉ឺនដុល្លារអាមេរិក ដល់មន្ទីរពេទ្យកុមារអង្គរ (AHC) ដើម្បីអបអរសាទរខួបលើកទី ២៥ របស់មន្ទីរពេទ្យសម្រាប់ជួយដល់កុមារ។
ការជិះកង់របស់យុវជនរូបនេះ នឹងធ្វើដំណើរឆ្លងកាត់ ២៥ប្រទេស ដោយបញ្ជាក់ពីការប្តេជ្ញាចិត្តក្នុងការរៃអង្គាសប្រាក់ដល់កុមារកម្ពុជាដែលប្រឈមនឹងជំងឺធ្ងន់ធ្ងរ។
លោកបាននិយាយថា៖ «គម្រោងជិះកង់ ២៥ ប្រទេស ចេញពីកម្ពុជាទៅតំបន់អាស៊ី អាស៊ីកណ្ដាល ទៅអឺរ៉ុប គឺជាក្ដីស្រមៃ។ ឥឡូវនេះ ខ្ញុំបានប្រកាសជាផ្លូវការនៅថ្ងៃទី៦ ខែក្រោយនេះ ខ្ញុំនឹងជិះកង់ពីប្រទេសកម្ពុជាទៅអឺរ៉ុប សំចតនៅទីក្រុងប៉ារីស មុនពេលបន្ដបេសកកម្មរៃអង្គាសប្រាក់នៅតំបន់អឺរ៉ុប»។
ការត្រៀមខ្លួន និងបញ្ហាប្រឈម
លោក តារារិទ្ធ បានរៀបរាប់អំពីដំណើរជិះកង់ទៅកាន់អឺរ៉ុបនេះ ដោយចាប់ផ្ដើមពីខេត្ដសៀមរាប ឡាវ ថៃ តែត្រូវហោះឆ្លងកាត់ប្រទេសមីយ៉ាន់ម៉ា ដោយសារប្រទេសនេះមិនអនុញ្ញាត ទៅបង់ក្លាដែស ឥណ្ឌា ប៉ាឡីស្ថាន និងត្រូវបោះរំលងអាហ្កាហ្វនីស្ថាន ដោយសារមិនអនុញ្ញាតដូចគ្នា ទៅដល់តួកគី ជាព្រំប្រទល់រវាងអាស៊ី និងអឺរ៉ុប។
ផែនទីដែលលោក ទីវ តារារិទ្ធ ត្រៀមធ្វើដំណើរឆ្លងកាត់ ២៥ប្រទេស។ សហការី
តំបន់ប្រឈមខ្លាំងជាងគេ ដែលលោក តារារិទ្ធ មានការព្រួយបារម្ភ គឺនៅភូមិភាគខាងលិចប្រទេសឥណ្ឌា នៃតំបន់ហេមពាន្ដ កាស្មៀរទៅប៉ាគីស្ថាន ដែលមានអាកាសធាតុត្រជាក់ខ្លាំងភ្លៀង ខ្យល់ ជាមួយការត្រៀមសម្ភារចាំបាច់សម្រាប់ទប់ទល់នឹងអាកាសធាតុ ៣ រដូវ។
លោកបាននិយាយថា៖ «ខ្ញុំជ្រើសរើសកង់ដែលមានសមត្ថភាពផ្ទុកសម្ភារបានច្រើន ដូចជា ខាងមុខមាន ៣ កាតាប និងខាងក្រោយមាន ៣ កាតាប ជិត ១០០គីឡូក្រាម ដែលបែងចែកជា ៤ ប្រភេទ គឺសម្ភារបោះតង់ ចង្ក្រានជើងឆ្នាំង គ្រឿងអេឡេចត្រូនិក ដូចជា កុំព្យូទ័រ កាមេរ៉ា ជាអាវុធដ៏សំខាន់ក្នុងដំណើរដ៏វែងឆ្ងាយនេះ ឧបករណ៍ជុសជុលកង់ ថ្នាំពេទ្យ រួមទាំងអាហារបម្រុង និងសម្លៀកបំពាក់»។
លោក តារារិទ្ធ បានប៉ាន់ប្រមាណថា ការជិះកង់ឆ្លងកាត់ផ្លូវក្រាលកៅស៊ូ ផ្លូវលំ ផ្លូវភ្នំ ពុះពារឧបសគ្គទាំងស្ថានភាពផ្លូវ អាកាសធាតុ និងសម្ពាធលើកង់ អាចចំណាយពេលរហូតដល់ ១០ ខែ និងត្រូវចំណាយបន្ថែមទៀតក្នុងការផ្សព្វផ្សាយយុទ្ធនាការរៃអង្គាសប្រាក់រហូតដល់មួយឆ្នាំពេញ មុនពេលលោកធ្វើដំណើរតាមយន្ដហោះត្រឡប់មកមាតុប្រទេសវិញ។
លោកបានបញ្ជាក់ថា ទាំងដំណើរជិះកង់ឆ្លងកាត់តំបន់អាស៊ីអាគ្នេយ៍ និងដំណើរទៅកាន់អឺរ៉ុបនាពេលខាងមុខនេះ គ្មានក្រុមការងារហ៊ានរួមដំណើរជាមួយលោកនោះទេ ដោយសារវាមិនសម្រាប់អ្នកជិះកង់ធម្មតាៗនោះទេ។
លោកប្រាប់ថា៖ «វាជាការជិះកង់ដ៏លំបាកខ្លាំង ដោយខ្ញុំត្រូវចេញដំណើរពីព្រឹកព្រលឹមរហូតដល់ព្រលប់ រៀបចំទីកន្លែងបោះតង់ និងគ្រឿងសម្ភារកាត់តវីដេអូដើម្បីធ្វើការផ្សព្វផ្សាយរូបភាព និងវីដេអូក្នុងមួយថ្ងៃៗ»។
លោក ទីវ តារារិទ្ធ។
កំណត់ត្រានៃការធ្វើដំណើរ និងការរៃអង្គាសប្រាក់
ដោយមានគោលការណ៍ធ្វើដំណើរ រៃអង្គាសប្រាក់ និងអេកូទេសចរណ៍ លោក តារារិទ្ធ ផ្ដោតសំខាន់លើការរស់នៅបែបធម្មជាតិ និងផលិតវីដេអូពីតំបន់ធម្មជាតិ។ ដូច្នេះ លោកជ្រើសរើសការរស់នៅបែបធម្មជាតិ បោះតង់ និងសហគម។
លោកបានប្រាប់ភ្នំពេញប៉ុស្ដិ៍ថា៖ «អំឡុងពេលធ្វើដំណើរជាច្រើនខែនោះ ខ្ញុំក៏នឹងថតវីដេអូបង្កើតមាតិកាទេសចរណ៍នៅតាមតំបន់ប្លែកៗជាមួយធម្មជាតិនៃបណ្ដាប្រទេសនីមួយៗ។ ខ្ញុំតែងតែផលិតមាតិកាល្អៗនៅតាមផ្លូវ រៀនអំពីវប្បធម៌ប្រពៃណី របៀបរបបនៃការរស់នៅតាមតំបន់ជាមួយវីដេអូខ្លីៗ និងរូបភាពស្រស់ស្អាត ទាក់ទាញចំណាប់អារម្មណ៍សាធារណៈជនទាំងជាតិ និងអន្ដរជាតិក្នុងការបរិច្ចាគថវិកាជួយកុមារ»។
យ៉ាងណាមិញ ម្ដងកាល លោកត្រូវការកន្លែងសម្រាកស្រួលដោយចាំបាច់លោកត្រូវការទីកន្លែងសាកថាមពលគ្រឿងអេឡេចត្រូនិក បោកគក់សម្លៀកបំពាក់ និងកត្ដាអាកាសធាតុជាដើម។
ដោយសារតែការធ្វើដំណើរនេះមានរយៈពេលយូរ និងត្រូវការសម្ភារៈច្រើន លោក តារារិទ្ធ ដ៏បានអំពាវនាវសុំជំនួយសម្រាប់ចំណាយផ្ទាល់ខ្លួនរបស់លោក មុនពេលបិទការទទួលជំនួយផ្ទាល់ខ្លួន និងបើកជំនួយជាមួយគណនីផ្ទាល់របស់មន្ទីរពេទ្យនៅពេលលោកចេញដំណើរនៅថ្ងៃទី ៦ ខែមិថុនា។
ការគាំទ្រ និងការទទួលស្គាល់
អ្នកស្រី ស៊ិនកេត អរុណ ជាមន្ដ្រីជាន់ខ្ពស់ផ្នែករៃអង្គាសប្រាក់របស់មន្ទីរពេទ្យកុមារអង្គរ បានឱ្យដឹងអំពីអារម្មណ៍រីករាយដែលមើលឃើញយុវជនកម្ពុជាហ៊ានបង្កើតប្រវត្ដិសាស្ដ្ររបស់ខ្លួនក្នុងការជិះកង់ឆ្លងកាត់ទ្វីប និងរៃអង្គាសប្រាក់ជួយកុមារកម្ពុជា។
អ្នកស្រី បាននិយាយថា៖ «ក្នុងនាមខ្ញុំជាអ្នកតំណាងឱ្យមន្ទីរពេទ្យកុមារអង្គរ ទាំងថ្នាក់់ដឹកនាំ ក៏ដូចជាបុគ្គលិក រួមទាំងអាណាព្យាបាល និងកុមារដែលសម្រាកព្យាបាលនៅទីនេះ ខ្ញុំពិតជាមានអារម្មណ៍រំភើបចិត្ដខ្លាំងមែនទែនពេលទទួលបានដំណឹងប្អូនត្រៀមដំណើរដ៏វែងឆ្ងាយនេះដើម្បីកុមារ។ យើងខ្ញុំពិតជាមានការកោតសរសើរចំពោះការប្ដេជ្ញាចិត្ដខ្ពស់ និងលះបង់ខ្ពស់បំផុតដែលមិននឹកស្មានដល់»។
អ្នកស្រី បានបន្ដថា លោក តារារិទ្ធ បានធ្វើកិច្ចការយ៉ាងច្រើនចំពោះបុព្វហេតុកុមារ រួមទាំងការប្រថុយប្រថានជីវិត និងចំណាយពេលវេលា ក៏ដូចជាថវិកាផ្ទាល់ខ្លួន។
យ៉ាងណាមិញ អ្នកស្រី អរុណ លើកឡើងថា មន្ទីរពេទ្យក៏សម្ដែងនូវការព្រួយបារម្ភចំពោះបញ្ហាសុខសុវត្ថិភាព សុខភាពអំឡុងពេលធ្វើដំណើររបស់លោក តារារិទ្ធ ដោយសារវាជាលក្ខណៈផ្សងព្រេង ម្នាក់ឯង និងវែងឆ្ងាយណាស់រហូតដល់រយៈពេលមួយឆ្នាំ។
មន្ទីរពេទ្យនឹងរក្សាទំនាក់ទំនង ផ្ដល់ការគាំទ្រ ជំនួយផ្សេងៗអំឡុងពេលធ្វើដំណើរ ដូចជា បញ្ហាសុខភាពឈឺស្កាត់ ជួបគ្រោះថ្នាក់ដោយប្រការណាមួយ ដែលមន្ទីរពេទ្យនឹងធ្វើការទាក់ទងទៅកាន់ប្រទេសសាម៉ីក្នុងការជួយឱ្យអស់ពីលទ្ធភាព។
អ្នកស្រី អរុណ បានប្រាប់ភ្នំពេញប៉ុស្ដិ៍ថា៖ «មន្ទីរពេទ្យក៏បានស្នើទៅរាជរដ្ឋាភិបាលកម្ពុជាចូលរួមចំណែកគាំទ្រលើសកម្មភាពមួយនេះដែរ ពីព្រោះប្រជាជនយើងដែលហ៊ានលះបង់បែបនេះ ក៏ជាកិត្ដិយសមួយសម្រាប់ជាតិយើងដែរ»។
រាជរដ្ឋាភិបាលបានផ្ដល់ឯកសារផ្សេងៗដល់លោក តារារិទ្ធ សម្រាប់សដាក់ស្នើទៅកាន់ក្រសួងមហាផ្ទៃ ក្រសួងការបរទេស និងក្រសួងពាក់ព័ន្ធផ្សេងៗ ហើយលោកក៏អាចយកឯកសារតាមខ្លួន។
អ្នកស្រីបញ្ជាក់ថា បេសកកម្មរបស់មន្ទីរពេទ្យកុមារអង្គររយៈពេល ២៥ ឆ្នាំមកនេះ បានព្យាបាលជំងឺកុមារជិត ៣ លានករណី ហើយក្នុងនោះកុមារកើតជំងឺមហារីកបានទទួលការព្យាបាលប្រមាណ ៨០០ នាក់ចាប់ផ្ដើមពីមន្ទីរពេទ្យទទួលព្យាបាលមហារីកកាលពី ១០ ឆ្នាំមុន។
គម្រោងចុងក្រោយបំផុត
កាលពីឆ្នាំ២០២៣ លោក តារារិទ្ធ បានជិះកង់ជាលក្ខណៈផ្សងព្រេង ក្នុងរយៈចម្ងាយជាង ៩ពាន់គីឡូម៉ែត្រ ឆ្លងកាត់បណ្តាប្រទេសអាស៊ានមួយចំនួន ដូចជា វៀតណាម ឡាវ ថៃ ម៉ាឡេស៊ី និងសិង្ហបុរី ដើម្បីរៃអង្គាសប្រាក់រួមចំណែកជួយកុមារនៅមន្ទីរពេទ្យកុមារអង្គរដូចគ្នា។
គោលដៅរបស់គាត់គឺដើម្បីរៃអង្គាសប្រាក់ចំនួន ៥ម៉ឺនដុល្លារសម្រាប់មន្ទីរពេទ្យដែលផ្តល់សេវាថែទាំសុខភាពសំខាន់ៗដល់កុមាររងពីជំងឺមហារីក និងជំងឺធ្ងន់ធ្ងរផ្សេងទៀត។
ពេញមួយដំណើររបស់លោក តារារិទ្ធ បានប្រឈមមុខនឹងបញ្ហាជាច្រើន រួមទាំងការខូចខាតកង់ និងជំងឺ។
ទោះបីជាមានឧបសគ្គទាំងនេះក៏ដោយ ក៏លោកនៅតែប្តេជ្ញាចិត្តចំពោះបុព្វហេតុជួយដលើកុមារ ដោយទីបំផុតលោកអាចរៃអង្គាសប្រាក់បានជិត ៦ម៉ឺនដុល្លារ ដោយរយៈពេល ៣ ខែរហូតដល់ថ្ងៃទី ២៦ ខែសីហា៕
