ភាពយន្ដរឿង «Elvis of Cambodia» ស្ដីពីឆាកជីវិតអធិរាជសំឡេងមាស ស៊ីន ស៊ីសាមុត។ រូបថត សហការី
ភ្នំពេញ៖ ភាពយន្ដរឿង «Elvis of Cambodia» ស្ដីពីឆាកជីវិតអធិរាជសំឡេងមាស ស៊ីន ស៊ីសាមុត ជាអ្នកចម្រៀងដ៏ពេញនិយម និងមានឥទ្ធិពលបំផុតរបស់កម្ពុជាក្នុងយុគសម័យមាស។
ដោយប្រៀបប្រដូចទៅនឹងកំពូលតារាចម្រៀង Elvis Presley តាមរយៈប្រជាប្រិយភាព និងឥទ្ធិពលវប្បធម៌ដ៏ធំធេងរបស់លោក តន្ត្រីរបស់លោក ស៊ីន ស៊ីសាមុត បានដើរតួយ៉ាងសំខាន់នៅក្នុងវិស័យសិល្បៈដ៏រស់រវើករបស់ប្រទេសក្នុងអំឡុងទសវត្សរ៍ឆ្នាំ ១៩៥០ និង ១៩៦០។
អាជីពរបស់លោកបានធ្លាក់ដល់កម្រិតសូន្យក្នុងរបបសោកនាដកម្មខ្មែរក្រហមនៅចុងទសវត្សរ៍ឆ្នាំ១៩៧០។ ប៉ុន្តែកេរដំណែលរបស់អធិរាជសំឡេងមាសនៅតែបន្តបំផុសគំនិត និងភ្ជាប់ប្រជាពលរដ្ឋកម្ពុជាទូទាំងពិភពលោក។
ភាពយន្តដែលផលិតដោយលោក Chris G Parkhurst និងត្រូវបានចាក់បញ្ចាំងលើកដំបូងនៅថ្ងៃទី ២៥ ខែកក្កដា ឆ្នាំមុន នៅទីក្រុង Melbourne ប្រទេសអូស្ត្រាលី គឺជាភាពយន្តមួយក្នុងចំណោមភាពយន្តខ្មែរចំនួន ៤៨រឿង ដែលនឹងចាក់បញ្ចាំងក្នុងអំឡុងមហោស្រពភាពយន្តអន្តរជាតិកម្ពុជា (CIFF) ថ្ងៃទី ២៥-៣០ ខែមិថុនា។
ក្រុមអ្នករៀបចំកម្មវិធីបានឱ្យដឹងក្រោយសន្និសីទសារព័ត៌មានមួយដែលរៀបចំឡើងនៅសណ្ឋាគារ Rosewood កាលពីថ្ងៃទី ១៩ ថា៖ «មហោស្រពភាពយន្ដលើកទី ១៣ នេះដាក់បញ្ចាំងខ្សែភាពយន្តជម្រើសពីជុំវិញពិភពលោក។ មហោស្រពឆ្នាំនេះនឹងមានភាពយន្តចំនួន ១៥៣ មកពីប្រទេសចំនួន ៤១ ក្នុងនោះមានផលិតកម្មកម្ពុជាចំនួន ៤៨»។
ពួកគេនិយាយថា៖ «អ្នកចូលរួមអាចទស្សនាការបញ្ចាំងភាពយន្ត និងព្រឹត្តិការណ៍ជាង ១២០ ដោយមិនគិតថ្លៃ នៅតាមកន្លែងផ្សេងៗនៅទូទាំងរាជធានីភ្នំពេញ»។
នៅឆ្នាំនេះ លោកស្រី ជា សិរី ទេសាភិបាលធនាគារជាតិនៃកម្ពុជា ឡើងកាន់តួនាទីជា «ប្រធានកិត្តិយស» របស់មហោស្រព (CIFF)។
មុខតំណែងនេះស្រដៀងទៅនឹង «ទូតសុច្ឆន្ទៈ» បង្ហាញពីការយកចិត្តទុកដាក់របស់លោកស្រីចំពោះឧស្សាហកម្មវប្បធម៌ និងច្នៃប្រឌិតនៅកម្ពុជា។
លោកស្រី ជា សិរី មានគោលបំណងលើកកម្ពស់វិស័យភាពយន្តដ៏រឹងមាំសម្រាប់ការអភិវឌ្ឍន៍ប្រកបដោយចីរភាព ហើយនឹងគាំទ្រមហោស្រព CIFF ជាវេទិកាសម្រាប់វិស័យភាពយន្ត និងទេពកោសល្យកម្ពុជា។
កញ្ញា ស៊ីន សេដ្ឋសុជ្ឈតា ចៅស្រីលោកស៊ីន ស៊ីសាមុត ថ្លែងក្នុងសន្និសីទសារព័ត៌មានស្តីពីមហោស្រពភាពយន្តអន្តរជាតិកម្ពុជា (CIFF) លើកទី ១៣។ រូបថត Bophana Centre
មហោស្រព CIFF ដាក់បញ្ចាំងភាពយន្តខ្មែរនៅតាមរោងភាពយន្ដជាច្រើន។ មហោស្រពនេះនឹងបើកឆាកដំបូងជាមួយភាពយន្ដ «Elvis of Cambodia»។
ទោះបីជាមានការប្រឈមក្នុងការថែរក្សាស្នាដៃរបស់លោកដោយសារតែការបំផ្លាញកំណត់ត្រាជាច្រើនក្នុងសម័យខ្មែរក្រហមក៏ដោយ ក៏បទចម្រៀងរបស់លោកនៅតែជាការរំឭកដល់បេតិកភណ្ឌវប្បធម៌ដ៏សម្បូរបែបរបស់កម្ពុជា។
ភាពយន្តឯកសារមួយមានចំណងជើងថា «Elvis of Cambodia: The Legacy of Sinn Sisamouth» ត្រូវបានផលិតឡើងដើម្បីអបអរសាទរជីវិត និងកេរដំណែលរបស់លោក ស៊ីន ស៊ីសាមុត។
ភាពយន្តនេះស្វែងយល់ពីការរួមចំណែកយ៉ាងសំខាន់របស់លោក ស៊ីន ស៊ីសាមុតចំពោះតន្ត្រី និងវប្បធម៌ខ្មែរ ដោយមានបទសម្ភាសជាមួយក្រុមគ្រួសារ តន្ត្រីករសហសម័យ និងអ្នកគាំទ្ររបស់លោក។
វាមានគោលបំណងលើកឡើងពីឥទ្ធិពលនៃតន្ត្រីរបស់លោកមកលើជនភៀសខ្លួនកម្ពុជា និងប្រវត្តិសាស្ត្ររបស់ប្រទេស។
កម្មវិធីពិសេសទាំងពីរនៅឆ្នាំនេះ នឹងផ្តោតលើការបំផុសគំនិតយុវជនឱ្យបន្តក្តីសុបិន និងអាជីពរបស់ពួកគេ ឱ្យសិក្សា និងខិតខំប្រឹងប្រែង ដើម្បីឈានទៅរកជីវិតកាន់តែប្រសើរ និងការទទួលស្គាល់។
កម្មវិធីពិសេសៗនៃមហោស្រព CIFF លើកទី១៣ គឺ«ការសិក្សាពេញមួយជីវិត» (LIFELONG LEARNING) និង «វិថីឆ្ពោះទៅអូឡាំពិក» (ROAD TO OLYMPIA)។
កម្មវិធី «ការសិក្សាពេញមួយជីវិត» ក្រោមភាពជាដៃគូជាមួយស្ថានទូតអូស្ត្រាលីប្រចាំកម្ពុជា បានសាទរនូវថាមពលនៃការអប់រំ និងការងារដែលបំផុសគំនិត ហើយកម្មវិធីពិសេសនេះក៏បង្ហាញនូវមាតិកា ពីភាពជាយុវវ័យលើកដំបូង មាតិកាកំប្លែងបែបកម្សាន្ត រហូតដល់ការបំពេញក្តីស្រមៃនៃអាជីពការងារ។
សន្និសីទសារព័ត៌មានស្តីពីមហោស្រពភាពយន្តអន្តរជាតិកម្ពុជា (CIFF) លើកទី ១៣ កាលពីថ្ងៃទី ១៩ ឧសភា។ រូបថត Bophana Centre
កម្មវិធី «វិថីឆ្ពោះទៅអូឡាំពិក» នឹងបង្ហាញនូវខ្សែភាពយន្តបំផុសគំនិតជាច្រើនទាក់ទងនឹងសមិទ្ធផលរឿងរ៉ាវនៅកម្ពុជា (STORIES IN CAMBODIA) ដោយផ្ដោតលើភាពយន្តដែលផលិតនៅក្នុង និងអំពីប្រទេសកម្ពុជា។
ដៃគូផ្លូវការនៃមហោស្រព CIFF លើកទី ១៣ រួមមានអង្គការសហប្រជាជាតិនៅកម្ពុជា សហការជាមួយ UNDP និង WFP ស្ថានទូតឥណ្ឌា និងស្ថានទូតអូស្ត្រាលីប្រចាំនៅកម្ពុជា។
លោក Pablo Kang ភារធារីអូស្ត្រាលីប្រចាំនៅកម្ពុជា បានឱ្យដឹងថា៖ «យើងមានសោមនស្សរីករាយក្នុងការឧបត្ថម្ភដល់មហោស្រពភាពយន្តអន្តរជាតិកម្ពុជាក្នុងឆ្នាំនេះ ដើម្បីអបអរសាទរខួបគម្រប់ ៣០ ឆ្នាំ នៃពានរង្វាន់អូស្ត្រាលីនៅកម្ពុជា (Australia Awards in Cambodia)»។
លោកបានបន្ដថា៖ «ការឧបត្ថម្ភនេះបញ្ជាក់ពីការយកចិត្តទុកដាក់របស់យើងក្នុងការផ្លាស់ប្តូរវប្បធម៌ និងការគាំទ្រវិស័យសិល្បៈ ឆ្លុះបញ្ចាំងពីគុណតម្លៃស្នូលរបស់យើងក្នុងការជំរុញទំនាក់ទំនងរវាងប្រទេសអូស្ត្រាលី និងកម្ពុជា ក៏ដូចជាការទទួលស្គាល់នូវឧត្តមភាព»។
រំឭកដល់ ប៊ីវ ឆៃលាង (TRIBUTE TO BIV CHHAY LEANG) នាំមកនូវការគោរពដ៏ពិសេសចំពោះលោក ប៊ីវ ឆៃលាង តាមរយៈការរំលេចនូវខ្សែភាពយន្តមួយចំនួនរបស់គាត់ដែលនៅរស់រានមានជីវិតពី «យុគមាស» នៃភាពយន្តខ្មែរ រួមមាន រឿង «ចន្ទគ្រឹះហ្វា» និង «រតនាវង្ស»៕
