ពិធីបុណ្យផ្កាប្រាក់សាមគ្គី ធ្វើឡើងនាពេលកន្លងមក ដើម្បីប្រមូលថវិកាគាំទ្រដល់ដំណើរការមន្ទីរពេទ្យកុមារអង្គរ។ សហការី
មន្ទីរពេទ្យកុមារអង្គរអំពាវនាវដល់សប្បុរសជនចូលរួមបុណ្យផ្កាប្រាក់សាមគ្គីដើម្បីប្រមូលថវិកាគាំទ្រដល់ដំណើរការមន្ទីរពេទ្យដែលព្យាបាលកុមារដោយឥតគិតថ្លៃជាច្រើនម៉ឺននាក់ក្នុងមួយឆ្នាំៗ។
ពិធីបុណ្យផ្កាប្រាក់សាមគ្គីនេះ នឹងធ្វើឡើងនៅរសៀលថ្ងៃអាទិត្យ ទី៩ ខែមិថុនាខាងមុខនេះ នៅវត្តរាជបូណ៌ ក្នុងក្រុងសៀមរាប។
សូមបញ្ជាក់ថា នេះជាលើកទី១១ ហើយដែលបុណ្យផ្កាប្រាក់បែបនេះ ត្រូវបានរៀបចំឡើងដោយមន្ទីរពេទ្យ និងសម្តេចព្រះព្រហ្មរតនមុនីសិរីសុវណ្ណោ ពិន សែម គណៈមហានិកាយ នៃព្រះរាជាណាចក្រកម្ពុជា និងជាព្រះគ្រូចៅអធិការវត្តរាជបូណ៌ និងថ្នាក់ដឹកនាំខេត្ត។
លោកវេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ បានឲ្យដឹងថា ក្នុងមួយឆ្នាំៗមន្ទីរពេទ្យត្រូវការថវិកាសម្រាប់ដំណើរប្រតិបត្តិការរបស់ខ្លួន ប្រមាណ ៦ លានដុល្លារអាមេរិកហើយថវិកាទាំងនោះប្រមាណជា ៧០ ភាគរយ បានមកពីសប្បុរជននៅក្រៅប្រទេស និង ៣០ភាគរយទៀត បានមកពីសប្បុរសជនក្នុងប្រទេសកម្ពុជា ដែលក្នុងនោះក៏មានថវិកាបានមកពីពិធីបុណ្យផ្កាប្រាក់មហាសាមគ្គីផងដែរ។
លោកបានអំពាវនាវ ដល់សប្បុរសជនទាំងក្នុងនិងក្រៅប្រទេសទាំងអស់ ចូលរួមពិធីបុណ្យព្រមទាំងបរិច្ចាគថវិកាតាមសទ្ធាជ្រះថ្លារៀងៗខ្លួន។
លោកនិយាយថា៖ «ថវិកាដែលទទួលបានពីការរៀបចំពិធីបុណ្យផ្កាប្រាក់នេះ គឺជាចំណែកដ៏សំខាន់បំផុតក្នុងការ សង្គ្រោះជីវិតកុមារប្រកបដោយគុណភាពខ្ពស់ និងក្តីមេត្តាករុណានៅក្នុងមន្ទីរពេទ្យកុមារអង្គរ»។
មន្ទីរពេទ្យកុមារអង្គរត្រូវបានបង្កើតឡើងដោយជនជាតិជប៉ុនតាំងពីឆ្នាំ១៩៩៩ ដែលគិតមកដល់សព្វថ្ងៃនេះបានផ្តល់សេវាពិនិត្យព្យាបាលកុមារបានជិត៣លានករណីនិងបានផ្តល់ការបណ្តុះបណ្តាលជំនាញនិងចំណេះដឹងដល់មន្ត្រីសុខាភិបាលសិស្ស និស្សិតវេជ្ជសាស្ត្រមកពីទូទាំងប្រទេសចំនួនរាប់រយនាក់ក្នុងមួយឆ្នាំៗ។ ក្រៅពីនេះក៏មានការអប់រំផ្នែកសុខភាពដល់ គ្រូបង្រៀននិងប្រជាពលរដ្ឋ រាប់ពាន់នាក់ក្នុងមួយឆ្នាំៗ។
មន្ទីរពេទ្យកុមារនេះគឺជាមន្ទីរមួយទៀតដែលផ្ដល់ការព្យាបាលកុមារដោយឥតគិតថ្លៃ ដូចទៅនឹងមន្ទីរគន្ធបុប្ផាដែរ៕
