ក្រុងម៉ូស៊ុល: នៅលើបន្ទះក្តារខៀនពណ៌សនៅក្នុងបន្ទប់រៀនមួយក្នុងទីក្រុងម៉ូស៊ុលដែលរងការបំផ្លិចបំផ្លាញនោះ ពាក្យថា «ស្រាវជ្រាវជាថ្មីរុករកវិធីបង្កើតស្នាមញញឹម» បង្ហាញពីកិច្ចការប្រកបដោយការរំជើបរំជួលចិត្តរបស់ក្រុមគ្រូបង្រៀនអ៊ីរ៉ាក់ដែលព្យាយាមព្យាបាលស្នាមរបួសផ្លូវចិត្តនៃក្រុមសិស្សានុសិស្សរបស់ពួកគេបន្ទាប់ពីក្រុមរដ្ឋអ៊ិស្លាម (IS) បានត្រួតត្រាប្រកបដោយភាពសាហាវឃោរឃៅរួចមក។
ក្រុមគ្រូបង្រៀនអ៊ីរ៉ាក់រាប់សិបនាក់ ដែលភាគច្រើនកំពុងព្យាយាមប្រយុទ្ធប្រឆាំងជំងឺបាក់ស្បាតដោយខ្លួនឯង.បានប្រមូលផ្តុំគ្នានៅសាកលវិទ្យាល័យមួយ ជាទីដែលគ្រូបង្វឹកម្នាក់លោក Nazem Shaker ព្យាយាមដឹកនាំពួកគេនៅក្នុងការស្វែងរកវិធីសាស្ត្រជួយក្មេងៗជាសិស្សដែលកំពុងប្រឈមជាមួយជំងឺបាក់ស្បាតឲ្យចេះទប់ទល់បញ្ហានេះជាច្រើនខែបន្ទាប់ពីក្រុម IS ត្រូវបានបណ្តេញចេញពីទីក្រុងដែលត្រូវបានបំផ្លិចបំផ្លាញ។
លោក Shaker បានគូរគំនូរ «ដើមឈើបង្ហាញពីវដ្តនៃបញ្ហា» នៅលើបន្ទះក្តារដែលឫសគល់របស់បញ្ហានោះគឺជាពាក្យរំឭកដូចជាៈ «ក្រុមសាច់ញាតិត្រូវបានគេសម្លាប់» «ឃើញការសម្លាប់ដោយកាត់កដោយផ្ទាល់ភ្នែក» «ការបំផ្លិចបំផ្លាញ» និង «ភាពក្រីក្រ»។
លោកសង្ឃឹមថា តាមរយៈកម្មវិធីលេងល្បែង និយាយត្រាប់ និងកីឡានោះ ក្រុមគ្រូបង្រៀននឹងមានលទ្ធភាពកាន់តែខ្លាំងក្នុងការជួយក្រុមសិស្សបានសម្រេចគោលដៅនានាដែលបានគ្រោងនៅលើសាខាផ្នែកខាងលើនៃដ្យ៉ាក្រាម ជាចំណុចបង្ហាញពី «ក្តីសង្ឃឹម» និង «សុទិដ្ឋិនិយម» ចូលរួមក្នុងបំណងប្រាថ្នាដើម្បីបង្កើតឲ្យមានស្នាមញញឹមជាថ្មី។ លោកថ្លែងថា៖ «វិធីសាស្ត្ររស់នៅជួបជុំគ្នា និងលុបបំបាត់អំពើហិង្សាគឺជាមេរៀនគន្លឹះដែលត្រូវយកទៅបង្រៀនពួកគេ៕