.jpg)
ឈុតប្លែកៗអ្នកចូលរួមកម្មវិធី Cosplay ធ្វើនៅឯ CJCC នាពេលកន្លងមក។ ហ្វេសប៊ុក
ភ្នំពេញៈ កម្មវិធីរៃអង្គាសប្រាក់សប្បុរសធម៌លើកដំបូងដើម្បីគាំទ្រដល់អង្គការវិចិត្រករខ្មែរដើម្បីកុមាររបស់ក្រុមនិស្សិតនៃសាកលវិទ្យាល័យផ្នែក ទំនាក់ទំនងនិងប្រព័ន្ធផ្សព្វផ្សាយនៃសាកលវិទ្យាល័យបញ្ញាសាស្ត្រ នឹងប្រារព្ធធ្វើឡើងក្នុងគោលបំណងចង់បង្កើតកម្មវិធីបង្រួបបង្រួមនិស្សិត និងសាធារណជនតាមរយៈការសម្ដែងមួយឈ្មោះថា Cosplay នាថ្ងៃទី ៤ ខែសីហា ឆ្នាំ ២០១៨ ខាងមុខ។
បើតាម Lorena Banares ជា ជំនួយការព្រឹទ្ធបុរស និងជាសាស្ត្រាចារ្យនៅផ្នែកទំនាក់ទំនង និងប្រព័ន្ធផ្សព្វផ្សាយនៃសាកលវិទ្យាល័យបញ្ញាសាស្ត្របានឲ្យដឹងពីគោលនៃការរៀបចំកម្មវិធីនេះថា៖ «គោលបំណងនៃ កម្មវិធីនេះគឺដើម្បីបង្រួបបង្រួមនិស្សិត និងសាធារណជនតាមរយៈការសម្ដែងមួយឈ្មោះថា COSPLAY CHARITY EVENT ដើម្បីគាំទ្រដល់អង្គការ វិចិត្រករខ្មែរដើម្បីកុមារ (The Khmer Artist for Children Organization) ដែលបានផ្តល់ការហ្វឹកហ្វឺនផ្នែកសិល្បៈរូបភាពដល់កុមារដែលជាជនរងគ្រោះដោយសារការជួញដូរមនុស្ស និងការរំលោភបំពានលើកុមារ។ នេះជាលើកដំបូងរបស់និស្សិតផ្នែកទំនាក់ទំនង និងប្រព័ន្ធផ្សព្វផ្សាយនៃសាកលវិទ្យាល័យ បញ្ញាសាស្ត្រទាំងអស់គ្នា»។
ជំនួយការព្រឹទ្ធបុរសរូបនេះបន្តឲ្យដឹងទៀតថា៖ «ការចូលរួមក្នុងកម្មវិធី និស្សិតផ្នែកទំនាក់ទំនង និងប្រព័ន្ធផ្សព្វផ្សាយទាំងអស់ របស់យើងតម្រូវឲ្យស្លៀកពាក់ត្រាប់តាមតួអង្គនានា ដែលពួកគេពេញចិត្ត ដោយមានដូចជា រឿង STAR WARS រឿង WALKING DEAD រឿង FROZEN រឿងAVENGERS រឿង ANIME រឿង JUSTICE LEAGUE រឿង POKEMON និងតួអង្គរបស់ MR. BEAN ជាដើម ហើយយើងក៏តម្រូវឲ្យមានការទិញសំបុត្រម្នាក់ ១ សន្លឹកដើម្បីចូលរួមកម្មវិធីនេះទៀតផង ខណៈសំបុត្រ ១ សន្លឹកតម្លៃ ១ ដុល្លារ»។
ឈុតប្លែកៗរបស់អ្នកចូលរួមកម្មវិធី Cosplay ធ្វើនៅឯបរទេស។ ហ្វេសប៊ុក
ចំពោះកម្មវិធីនេះនឹងត្រូវរៀបចំធ្វើឡើងនៅថ្ងៃទី ៤ សីហា ឆ្នាំ ២០១៨ មានទីតាំងស្ថិតនៅឯបន្ទប់សាលរបស់សាកលវិទ្យាល័យបញ្ញាសាស្ត្រ ឬ Srey Dim Hall of PUC South Campus ចាប់ផ្តើមពីម៉ោង ២ រសៀល ខណៈនិស្សិតដែលចង់ចូលរួមអាច ធ្វើទំនាក់ទំនងជាវសំបុត្របានតាមគេហទំព័រ https://www.facebook.com/puc.fcma/ ឬអាចទាក់ទងតាមលេខទូរស័ព្ទ 076 3444 492/ 077 992- 234 ។
កម្មវិធីនេះទំនងអាចរៀបចំជាលក្ខណៈប្រចាំឆ្នាំ បើតាម Lorena Banares បង្ហើបឲ្យដឹងថា៖ «យើងក៏សង្ឃឹមថា អាចនឹងមានការរៀបចំបែបនេះជាប្រចាំឆ្នាំផងដែរ សម្រាប់និស្សិតយើង ប្រសិនបើអាចទៅរួចនោះ»៕
