The Phnom Penh Post Search

Search form




Logo of Phnom Penh Post newspaper Phnom Penh Post - ជនជាតិ​អាមេរិក​នៅ​ខ្មែរ​ជាង ១០ ឆ្នាំ​បង្កើត​កម្មវិធីត្រួត​ពិនិត្យ​អក្ខរាវិរុទ្ធខ្មែរ​

ជនជាតិ​អាមេរិក​នៅ​ខ្មែរ​ជាង ១០ ឆ្នាំ​បង្កើត​កម្មវិធីត្រួត​ពិនិត្យ​អក្ខរាវិរុទ្ធខ្មែរ​

Content image - Phnom Penh Post
លោក វ៉េល ណាថាន​ (Nathan Wells) ជនជាតិ​អាមេរិក (ស្តាំ) ឈរជាមួយក្រុមការងារ។​​

ជនជាតិ​អាមេរិក​នៅ​ខ្មែរ​ជាង ១០ ឆ្នាំ​បង្កើត​កម្មវិធីត្រួត​ពិនិត្យ​អក្ខរាវិរុទ្ធខ្មែរ​

លោក វ៉េល ណាថាន​ (Nathan Wells) ជនជាតិ​អាមេរិក​​បាន​មក​រស់​នៅ​ប្រទេស​កម្ពុជា​តាំង​ពី​ឆ្នាំ​ ២០០៣ ​បាន​បង្កើត​កម្មវិធី​ត្រួត​ពិនិត្យ​អក្ខរាវិរុទ្ធ​ខ្មែរ​ (Khmer Spelling Checker) ដើម្បី​ជួយ​សម្រួល​ដល់​ការ​​សរសេរ​​ភាសាខ្មែរ​ឲ្យ​កាន់​តែ​មាន​ភាព​ត្រឹម​ត្រូវ​ទៅ​តាម​វេយ្យាករណ៍ខ្មែរ​​។

លោក ណាថាន បាន​ប្រាប់​មក​គេហទំព័រ​ យុវវ័យ​ LIFT នៃ​កាសែត​ភ្នំពេញ​បុស្ដិ៍​ នៅ​ថ្ងៃ​ពុធ​នេះ​ថា លោក​សម្រេច​ចិត្ដ​បង្កើត​កម្មវិធី​នេះ​ឡើង​ គឺ​ក្នុង​គោល​បំណង់​ជួយ​សម្រួល​ដល់​ការ​សរសេរ​អក្ខរាវិរុទ្ធ​ឲ្យ​កាន់​តែ​មាន​ភាព​ត្រឹម​ត្រូវ។

លោក​បន្ដ​ថា «ខ្ញុំ​ជា​គ្រូ​បង្រៀន​មួយ​រូប​ ដោយ​ខ្ញុំ​បាន​ឃើញ​សៀវភៅ​ដែល​ខ្ញុំ​យក​មក​បង្រៀន​សិស្ស​ នៅ​​មិន​ទាន់​មាន​ការ​សរសេរ​បាន​ល្អ​ និង​ត្រឹម​ត្រូវ​តាម​វេយ្យាករណ៍​ខ្មែរ​ ដូច្នេះ​ខ្ញុំ​ក៏​បាន​បង្កើត​កម្មវិធី​នេះ​ឡើង»។

Content image - Phnom Penh Post

មក​នៅ​ស្រុក​ខ្មែរ​ជាមួយ​គ្រួសារ​មាន​កូន​ ៣ ​នាក់​ក្នុង​បន្ទុក​ លោក​ ណាថាន់​ បាន​ព្យា​យាម​សិក្សា​ភាសាខ្មែរ​ដែល​ជា​ភាសារ​មួយ​ ពិបាក​សិក្សា​នៅ​លើ​ពិភព​លោក ប៉ុន្ដែរ​លោក​បាន​ព្យាយាម​សិក្សា​ភាសា​មួយ​នេះ​ទាំង​នៅ​ខ្មែរ​នឹង​នៅ​អាមេរិក​។

លោក​ថា «ពិត​មែន​ភាសាខ្មែរ​ គឺជា​ភាសា​ដែល​ពិបាក​សិក្សា​មួយ​ ខ្ញុំ​បាន​រៀន​តាំង​ពី​ខ្ញុំ​មក​នៅ​ស្រុក​ខ្មែរ​ដំបូង​ក្នុង​ឆ្នាំ​ ២០០៣»។

ក្នុង​វ័យ​ ៣៣ ​ឆ្នាំ​អាច​និយាយ​ភាសាខ្មែរ​បាន​ច្បាស់​សឹង​ដូច​ជន​ជាតិ​ខ្មែរ​ក្នុង​ស្រុក​លោក​ថា «ក្រៅ​ពីបាន​បង្កើត​កម្មវិធី​ត្រួត​ពិនិត្យ​អក្ខរាវិរុទ្ធ​ ខ្ញុំ​ក៏​បាន​ជួយ​បកប្រែ​សៀវភៅ​ពី​ភាសា​អង់គ្លេស​ទៅ​​ភាសាខ្មែរ​ឲ្យ​អង្គការ​មួយ​ចំនួន​ក្នុង​​ស្រុក​ខ្មែរ​ផងដែរ។ ចំណែក​ឯ​កម្មវីធី​​ត្រួត​ពិនិត្យ​អក្ខរាវិរុទ្ធ​នេះ​គឺ​បាន​ដាក់​ឲ្យ​ប្រើ​ប្រាស់​ដោយ​មិន​គិត​កម្រៃ​ឡើយ»។

Content image - Phnom Penh Post

កម្មវិធី​ត្រួត​ពិនិត្យ​អក្ខរាវិរុទ្ធ​ខ្មែរ​នេះ​អាច​ប្រើ​បាន​ជាមួយ​នឹង​កម្មវិធី Microsoft Word ២០១០-២០១៣ និង​អាច​ស្គាល់ ឬ អាច​ដំឡើង​ប្រើប្រាស់​បាន​ជាមួយ​នឹង​ប្រភេទ Window 64-bit និង 32-bit ប៉ុណ្ណោះ។

លោក វ៉េល ណាថាន ដែល​កំពុង​ស្នាក់​នៅ​​ម្ដុំ​ទឹកដី​ភ្នំពេញថ្មី បាន​បន្ថែម​ថា​ «ទៅ​ថ្ងៃ​​មុខ​ខ្ញុំ​​នឹង​​ប្រឹង​ប្រែង​កែ​សម្រួល​ និង​ស្វែង​រក​កម្មវិធី​ថ្មី​ៗ​ជាច្រើន​ថែម​ទៀត​ ដើម្បី​ជួយ​សម្រួល​ដល់​អក្ខរាវិរុទ្ធ​ខ្មែរ​។ ជាពិសេស​ក៏​រង់ចាំ​ទទួល​មតិ​កែ​តម្រូវ​ ឬ​ចូលរួម​ពី​កូន​ខ្មែរ​ដើម្បី​បង្កើន​ប្រសិទ្ធិភាព​លើ​ការងារ​នេះ​ដែរ»៕

អត្ថបទគួរចាប់អារម្មណ៍