The Phnom Penh Post Search

Search form




Logo of Phnom Penh Post newspaper Phnom Penh Post - ថ្ងៃ​ពិសាខ​បូជា​ យុវជន​អាច​ចូលរួម​អ្វីខ្លះ ?

ថ្ងៃ​ពិសាខ​បូជា​ យុវជន​អាច​ចូលរួម​អ្វីខ្លះ ?

Content image - Phnom Penh Post
ព្រះសក្យមុនីចេតិយភ្នំឧដុង្គ​ជាទីតម្កល់ព្រះសារីរិកធាតុ​​​។ ហេង ជីវ័ន

ថ្ងៃ​ពិសាខ​បូជា​ យុវជន​អាច​ចូលរួម​អ្វីខ្លះ ?

ភ្នំពេញៈ ថ្ងៃ ១៥​កើត ខែ​ពិសាខ គឺ​ជាថ្ងៃ​ដ៏​វិសេស​វិសាល​បំផុត​មួយ​នៅ​ក្នុង​ពុទ្ធ​សាសនា ដើម្បី​ប្រារព្ធ​រំលឹក​ដល់​ព្រឹត្ដិការណ៍​សំខាន់​ៗចំនួន​ ៣ ​នៃ​ព្រះ​ពុទ្ធអង្គ គឺថ្ងៃ​ប្រសូត ​ត្រាស់ដឹង និង​ចូលបរិ​និព្វាន ហើយថ្ងៃ​នេះ ត្រូវ​បាន​គេ​ហៅ​ថា​ «ថ្ងៃ​ពិសាខ​ ឬវិសាខ​បូជា» ដែល​មាន​ពុទ្ធសាសនិក​ទូទាំង​សកលោក​បាន​បា្ររព្ធ។

តើ​ ថ្ងៃ​ពិសាខ​បូជា​ យុវជន ​និង​ពុទ្ធសាសនិក​ នៅ​កម្ពុជា​ អាច​ចូលរួម​ធ្វើ​ពិធី​បុណ្យ​អ្វីខ្លះ ​ដើម្បី​រំលឹក​ដល់​ព្រះ​ពុទ្ធ​សាសនា?​

លោក វង្ស ភារៈ ​ឧទ្ទេសា​ចារ្យ​ នាយកដ្ឋាន​ស្រាវ​ជ្រាវ​នៃ​ក្រសួង​ធម្ម​ការ​ និង​សាសនា​នឹង​ជា​ព្រឹទ្ធ​បុរស​រង​នៃ​សាកល​វិទ្យាល័យ​ព្រះ​សីហនុរាជ បាន​ប្រាប់​ LIFT-យុវវ័យ ​ថា ​ក្នុង​នាម​ជា​ពុទ្ធ​សាសនិក​ យុវជន​ ជា​អ្នក​បន្ដ​វេន​ គប្បី​នាំ​គ្នា​ទៅ​ចូលរួម​ប្រារព្ធ​ពិធី​ពិសាខ​បូជា​នៅ​វត្ដ​ឲ្យ​បាន​គ្រប់គ្នា​នាល្ងាច​ថ្ងៃ​ ១៥កើត ​ត្រូវ​នឹង​ថ្ងៃ​ ពុធ ​ទី១០ នេះ ហើយ​មិន​ត្រូវ​គិត​ថា​ខ្លួន​នៅ​ក្មេង​មិន​ចេះ​សូត្រ​ធម៌ ​មិនចង់​ទៅ​ធ្វើ​បុណ្យ​នៅ​វត្ដ​នោះទេ​។

លោក ​ភារៈ ​បាន​ថ្លែង​ថា៖ ​«ទោះ​យើង​ជា​យុវជន ​មិន​ចេះ​សូត្រ​ធម៌​ក៏យើង​អាច​ទៅ​វត្ដ​ធ្វើ​បុណ្យ​បាន​ជា​ច្រើន​ពិសេស​ថ្ងៃ​ពិសាខបូជា​នេះ។​ យើង​អាច​ចូល​រួម​ស្តាប់​ព្រះសង្ឃ​សម្ដែង​ព្រះធម៌​ទេសនា ​ជួយ​កិច្ច​ការ​យាយជី​តាជី​នៅ​ក្នុង​វត្ដ ​សម្អាត​វត្ដ ​ចងបដារ​ពាក្យ​ស្លោក ​រហូត​ដល់​វេលា​ពេល​ព្រឹក​ យើង​អាច​រាប់​បាត្រ​ព្រះ​សង្ឃ​ជា​ដើម​»។

លោក​ ភារៈ​បាន​ឲ្យ​ដឹង​ថា ​តាម​ការ​សង្កេត​ឃើញ​របស់​លោក ​ឆ្នាំ​នេះ ​ពិធីបុណ្យ​វិសាខ​បូជា ​ហាក់​មាន​ការ​ផុសផុល​ច្រើន ​ទោះ​មិនទាន់​ដល់​ថ្ងៃ​ប្រារព្ធ​ក៏ដោយ ​ព្រោះ​នៅ​តាម​ស្ថាប័ន​រដ្ឋ ​ឯកជន សាលារៀន ​និង​ទី​សា​ធារ​ណៈ​មួយ​ចំនួន​ បាន​​លើក​បដា ​ពាក្យ​ស្លោក ​និង​បង្កើត​កម្ម​វិធី​រួម​គ្នា​ជាច្រើន​ដើម្បី​ប្រារព្ធ​ពិធី​បុណ្យនេះ​។

លោក​បាន​បន្ដ​ថា ​«ខ្ញុំគិត​ថា ការ​យល់​ដឹង​កាន់​តែ​ច្រើន​នេះ ក៏​អាច​បណ្ដាល​មក​ពី​ការ​ផ្សព្វផ្សាយ​នៃ​ប្រព័ន្ធ​ផ្សព្វ​ផ្សាយ​ផ្សេងៗ​ចំពោះ​ថ្ងៃ​បុណ្យ​នេះ ​ទើប​យុវជន ​និង​ពុទ្ធ​សាសនិក ​កាន់តែ​ដឹងពី​ការ​ប្រារព្ធ​ពិធីនេះ​» ។

លោក​ ភារៈ​ បាន​ឲ្យ​ដឹង​ថា ​នៅ​ក្នុង​ខណ្ឌ​ដង្កោ ​ជាខណ្ឌ​ដែល​លោក​​រស់​នៅ ​មុន​ថ្ងៃ​ប្រារព្ធ​ពិធី​បុណ្យ​ពិសាខ​បូជា វត្ដ​អារាម​ ​ពុទ្ធ​បរិស័ទ ​និង​សិស្សា​នុសិស្ស ​នៅ​ទីនោះ​ ​មាន​វត្ដ​ប្រមាណជាង​១០វត្ដ ​បាន​នាំ​គ្នា​បង្កើត​កម្ម​វិធី​ប្រា​រព្ធ​រួម ​ធ្វើ​ក្បួនដង្ហែ​នៅ​តាម​ដងវិថី​ ដែល​អាច​មាន​ឡាន​រហូត​ដល់​រាប់​រយ​ឡាន​ ។

ព្រះតេជគុណ​ កុច ​សារ៉ាត់ ​ចៅអធិការវត្ដ ​ឬស្សី​ជ្រោយ ​ក្នុង​ស្រុក​ស្អាង​ ខេត្ដក​ណ្ដាល ​មាន​សង្ឃដីកា ​ឲ្យ​ដឹង​ដែរថា​ នៅ​វត្ដ​របស់​ព្រះអង្គ​ ក៏​មាន​កម្មវិធី​ជាច្រើន ​និង​ការ​ដង្ហែក្បួន​ឡាន​ក្នុង​ថ្ងៃ​វិសាខបូជា​នេះ​ផងដែរ ​។

ព្រះអង្គបន្ដ​ថា ​«​វត្ដ​អាត្មា ​បាន​ពិភាក្សា​ជា​មួយ​គណៈកម្មការ​វត្ដ ​និង​រៀបចំ​កម្មពិធី​ក្បួន​ដង្ហែដោយឡាន​ និង​កម្ម​វិធី​ពេល​ល្ងាច ​មាន​ព្រះសង្ឃ​ទេសនា ​និង​រាប់​បាន​ព្រះសង្ឃ​នៅ​ពេល​ព្រឹក​ផងដែរ​» ។

បើតាម​ព្រះតេជ​គុណ ​យុវជន ​និង​ពុទ្ធសាសនិក ​អាច​យក​ធូបទាន ​និង​ផ្កាផ្ញី ទៅ​ចូលរួម​ប្រារព្ធ​ពិធីនេះ ​នៅ​វត្ដ​អារាម​នៅ​ល្ងាច​ថ្ងៃ​ ១៥កើត​នោះ​រួម​ជា​មួយ​គ្នា​ក៏បាន​ ។

វិសាខបូជា ​គឺជា​បុណ្យ​ដ៏​ធំ​មួយ ​ក្នុង​ព្រះពុទ្ធ​សាសនា ​ដែល​ប្រទេស​កម្ពុជា ​បាន​ចាត់ទុកជា​បុណ្យជាតិ​។ ជាង​នេះ​ទៀត ​ ប្រទេស​ជិត​២០០​ ដែល​ជា​សមាជិក​នៃ​អង្គការ​សហ​ប្រជា​ជាតិ ​បានអនុម័ត​ និង​ទទួលស្គាល់ វិសាខបូជា​ ជា​បុណ្យ​អន្តរជាតិ ​កាលពី​ឆ្នាំ​១៩៩៩ ​។

អង្គការ​សហប្រជាជាតិ​បាន​ប្រកាស​នៅ​ថ្ងៃ​ទី​១៥ ​ខែ​ធ្នូ ​ឆ្នាំ​១៩៩៩ ​ទទួល​ស្គាល់​វិសាខបូជា​ជា​ពិធីបុណ្យ​អន្តរ​ជាតិ​មួយ​ ដែល​គេ​អាច​ប្រារព្ធ​ធ្វើ​នៅ​តាម​ការិយាល័យ​ទាំង​ឡាយ​របស់​អង្គការ​សហ​ប្រជា​ជាតិ​នៅ​លើ​ភព​លោក​៕

អត្ថបទគួរចាប់អារម្មណ៍