The Phnom Penh Post Search

Search form




Logo of Phnom Penh Post newspaper Phnom Penh Post - ទស្សនៈ​យុវជន៖ យុវជន​ ៣ នាក់​បង្ហាញ​ក្ដី​បារម្ភ​ចំពោះ​សុវត្ថិភាព​ធ្វើ​ដំណើរ​ពេល​យប់

ទស្សនៈ​យុវជន៖ យុវជន​ ៣ នាក់​បង្ហាញ​ក្ដី​បារម្ភ​ចំពោះ​សុវត្ថិភាព​ធ្វើ​ដំណើរ​ពេល​យប់

Content image - Phnom Penh Post

ទស្សនៈ​យុវជន៖ យុវជន​ ៣ នាក់​បង្ហាញ​ក្ដី​បារម្ភ​ចំពោះ​សុវត្ថិភាព​ធ្វើ​ដំណើរ​ពេល​យប់

ភ្នំពេញៈ បើ​ទោះ​ជា​ក្រសួង​មហាផ្ទៃ​ប្រកាស​ឲ្យ​រឹត​បន្តឹង​បទល្មើស​ប្លន់​ក្ដី​ក៏​ក្រុម​ចោរ​ប្រដាប់​អាវុធ​នៅ​តែ​បន្ត​មាន​នៅ​តាម​រាជធានី​ និង​បណ្ដា​ខេត្ត​នានា​ជា​បន្ត​បន្ទាប់។​ មិន​តែ​ប៉ុណ្ណោះ​កាលពី​បី​ថ្ងៃ​មុន​នេះ​ក្រុម​ចោរប្លន់​មួយ​ក្រុម​ថែម​ទាំង​បាន​បាញ់​ក្រុម​សមត្ថកិច្ច​នគរបាល​ស្រុក​ស្នួល​ ខេត្ត​ក្រចេះ​ពីរ​នាក់​ឲ្យ​រងរបួស​ទៀត​ផង​។

ជាក់ស្ដែង​កាលពី​វេលា​ម៉ោង ១២:៣០ នាទី​យប់​រំលង​អធ្រាត្រ​ឈាន​ចូល​ថ្ងៃ​អង្គារ​ម្សិលមិញ​យុវនារី​ ២ ​នាក់​ត្រូវ​បាន​ក្រុម​ចោរ​ប្រដាប់​អាវុធ​ពាក់​ឯកសណ្ឋាន​ក្លែង​បន្លំ​ជា​សមត្ថកិច្ច​ ៣ ​នាក់​ភ្ជង់​ប្លន់​យក​ម៉ូតូ​ម៉ាក​ Honda Scopy មួយ​គ្រឿង​ទៅ​បាត់​នៅ​ចំណុច​ផ្លូវ​ក្រោម​ដី​នៃ​ស្ពាន​អាកាស​ ៥ ​មករា​ស្ថិត​ក្នុង​សង្កាត់​ផ្សារ​ដេប៉ូ ៣ ខណ្ឌ​ទទួលគោក រាជធានី​ភ្នំពេញ​។ ​នេះ​បើ​តាម​ការ​ប្រាប់​ឲ្យ​ដឹង​ពី​មន្ត្រី​នគរបាល​មូលដ្ឋាន​កាលពី​ម្សិលមិញ។

យុវជន​ ៣ នាក់​ដែល LIFT បាន​ធ្វើ​ការ​សម្ភាស៍​កាល​ពី​ព្រឹក​ថ្ងៃ​នេះ​ ជា​សិស្ស និស្សិត​ ដែល​កំពុង​សិក្សា​ និង​ធ្វើ​ការ​ ​វេន​យប់​ បាន​បង្ហាញ​ថា ពួកគេ​នៅ​តែ​មាន​ក្ដី​បារម្ភ​ចំពោះ​សុវត្ថិភាព​ ក្នុង​ការ​ធ្វើ​ដំណើរ​ ទៅ​កាន់​ទី​កន្លែង​នានា​ក្នុង​ទី​ក្រុង​ភ្នំពេញ នា​ពេល​យប់​នៅ​ឡើយ ខណៈ​​មាន​ព័ត៌មាន​ជា​ច្រើន​បាន​ឲ្យ​ឃើញ​ពី​តថភាព​ស្ដែង​អំពី​ទង្វើ​បាញ់​ប្លន់​ជាច្រើន​ករណី​​កន្លង​មក ពិសេស​ចំពោះ​ករណី​បាញ់​ប្លន់​យក​ម៉ូតូ ខ្សែ ក និង​ទូរស័ព្ទ ជាដើម។

យុវជន ពូ នាង ​​មាន​ទី​លំនៅ​ម្ដុំ​ទួល​សង្កែ​ កំពុង​ធ្វើ​ការ​ងារ​នៅ​ក្រុម​ហ៊ុន​​ឯកជន​មួយ​ក្នុង​ទី​ក្រុង​ ភ្នំពេញ ​ក្បែរ​សាលា​រចនា ក្នុង​តួ​នាទី​ជា​ Graphic Designer និង​ធ្លាប់​ទទួល​បាន​បទ​ពិសោធន៍​បាត់​ម៉ូតូ​​ផង​នោះ​ បាន​ប្រាប់​ឲ្យ​ដឹង​ថា៖«កុំ​​រម្លឹក​ដល់​រឿង​​បាត់​ម៉ូតូ​នេះ​ឡើង​នាំ​ឈឺ​ចាប់ រឿង​សុវត្ថិភាព​ហ្នឹង​ហើយ​ដែល​ជា​បញ្ហា​ជាង​គេ​ ដូច​ដឹង​ស្រាប់​ហើយ​ ឥលូវ​ចង់​ទៅ​ណា​មក​យប់​ព្រលប់​ លែង​ហ៊ាន​ទៅ​ណា​ហើយ»។

លោក​បន្ដ​ថា ឲ្យ​តែ​ចេញ​ពី​ធ្វើ​ការ​ក្នុង​អំឡុង​ ម៉ោង​ ៩ ម៉ោង​ ​១០ យប់​ឡើង​ទៅ គឺ ​ភ្នែក​នៅ​កញ្ចឹង​ក​តែ​ម្ដង​។ ដូច​ឃើញ​ស្រាប់​ ឥលូវ​នេះ​មិន​មែន​ដូច​មុន​គ្រាន់​តែ​គំរាម​យក​ទ្រព្យ ប៉ុន្ដែ​ឥលូវ​បាញ់​យកៗ​តែ​ម្ដង​ បាញ់​ដូច​សត្វ​ចាប​អញ្ចឹង។

យុវជន​ ស្រី​ ភក្ដី និស្សិត​អក្សរសាស្រ្ដ​អង់គ្លេស​ នៃ​សាកល​វិទ្យា​ល័យ​ជាតិ​គ្រប់គ្រង ​បាន​ឲ្យ​ដឹង​ដែរ​ថា លោក ក៏​ធ្លាប់​ជួប​ប្រទះ​ករណី​នេះ​ដែរ​ ម៉ូតូ​ ហុងដា ស៊េរី ២០១៣ មួយ​គ្រឿង​របស់​លោក​ ត្រូវ​បាត់​ភ្លាមៗ​ បន្ទាប់​ពី​លោក​ចូល​ទៅ​ផឹក​កាហ្វេ ​ជាមួយ​មិត្ដភក្តិ។

លោកថា៖ «សព្វថ្ងៃ​នេះ ​សុវត្ថិភាព​ក្នុង​ការ​ធ្វើ​ដំណើរ​នៅ​ពេល​យប់​ នៅ​មាន​កម្រិត​ មាន​ផ្លូវ​មួយ​ចំនួន​មិន​មាន​សុវត្ថិភាព​គ្រប់​គ្រាន់​តែ​ម្ដង​ ​ផ្លូវ​ដែល​មាន​សុវត្ថិភាព​មាន​តែ​ផ្លូវ​ធំ​មួយ​ចំនួន​ នៅ​ពី​មុខ​ស្ថាប័ន​រដ្ឋ​ធំៗ​ប៉ុណ្ណោះ​ ប៉ុន្ដែ​ដល់​ពេល​យប់​ជ្រៅ​នៅ​តែ​​មិន​មាន​សុវត្ថិភាព»។

កញ្ញា ស្រី​ អូន រស់​នៅជិត​ផ្សារ​​ស្ទឹង​មាន​ជ័យ និង​កំពុង​ធ្វើ​ការ​​វេន​យប់​នៅ​ផ្ដុំ​ផ្សារ​ដេប៉ូ បាន​ឲ្យ​ដឹង​ដែរ​ថា ​ការ​ធ្វើ​ដំណើរ​នៅ​ពេល​យប់​ព្រលប់​ ជាពិសេស ​នៅ​អំឡុង​កណ្ដាល​អធ្រាត្រ គឺ​មិន​មាន​សុវត្ថិភាព​តែ​ម្ដង ព្រោះ​​មាន​ក្មេង​ទំនើង​ និង​បក្ស​ពួក​ ជា​ច្រើន​តែង​តែ​ជិះ​ម៉ូតូ មក​គំរាម​ប្លន់​អ្នក​ដែល​ធ្វើ​ដំណើរ​ពេល​យប់។

ស្រី​ អូន បញ្ជាក់​ថា «ដូច​ករណី​ដែល​ខ្ញុំ​បាន​ជួប​ផ្ទាល់​មួយ​ ​ពេល​ដែល​ខ្ញុំ​​ជិះ​ម៉ូតូ​ចេញ​ពី​ធ្វើ​ការ​​តាម​បណ្ដោយ​ផ្លូវ​ក្រោយ​ពេទ្យ​រុស្សី មាន​ក្រុម​ក្មេង​ទំនើង​មួយ​ក្រុម​បាន​ទាញ​កាំភ្លើង​គំរាម​ ប្លន់​យក​ម៉ូតូ​ និង​សម្ភារៈ​ផ្សេង​ដែល​មាន​តម្លៃ​ពី​ខ្ញុំ​ និង​មិត្ដ​ភក្ដិ​ម្នាក់​ទៀត​ដែល​ជិះ​ម៉ូតូ​ជាមួយ​គ្នា»៕

អត្ថបទគួរចាប់អារម្មណ៍