ភ្នំពេញៈ ក្រុមនិស្សិតកូនខ្មែរនៅអាមេរិក ទទួលបានអាហារូបករណ៍សម្រាប់ការសិក្សាមួយជីវិត ពីមូលនិធិមហាសេដ្ឋី Bill Gates (Bill Gates Foundation) សិក្សាសាកលវិទ្យាល័យ California State University-Long Beach (CSULB) ១៥ នាក់បានមកទស្សនកិច្ចនៅកម្ពុជា ចាប់ផ្តើមពីចុងសប្តាហ៍មុន ដើម្បីចែករំលែកបទពិសោធន៍ជោគជ័យជាមួយនិស្សិតកម្ពុជា នៅសាកលវិទ្យាល័យ ភ្នំពេញអាមេរិកកាំង (AUPP)។
ក្នុងចំណោមនោះ និស្សិតកូនខ្មែរជើងឯកគណិតវិទ្យានៅអាមេរិក ដែលបានប្រកួតជាប់លេខ ១ ក្នុងចំណោមគូប្រជែងជាង ២ លាននាក់ សម រ៉ាន់ដា ក៏បានចែករំលែកមកនិស្សិតខ្មែរ នូវរបៀបរៀនយ៉ាងដូចមេ្តច ក្នុងការទទួលបានជោគជ័យ សម្រាប់ស្វែងរកអាហារូបករណ៍ ដែលពោរពេញដោយការប្រកួតប្រជែងយ៉ាងខ្លាំង នៅសហរដ្ឋអាមេរិកផងដែរ។
គេហទំព័រយុវវ័យ LIFT មិនអាចទាក់ទងធ្វើការសម្ភាសជាមួយ យុវជន សម រ៉ាន់ដា បានទេនៅថ្ងៃចន្ទនេះ អំពីការចែករំលែកបទពិសោធន៍ក្នុងជំនួបជាមួយនិស្សិតនៅ AUPP ប៉ុន្តែ លោក Alex Morales សាស្រ្តាចារ្យផ្នែកវប្បធម៌ និងអរិយធម៌ខ្មែរ នៃសាកលវិទ្យាល័យ Long Beach ដែលបានដឹកនាំក្រុមនិស្សិតមួយក្រុមនេះមកកម្ពុជា បានប្រាប់ថា៖ «នេះគឺជា ទស្សនៈកិច្ចមកកម្ពុជាលើកទី ៣១។ ខ្ញុំសង្ឃឹមថា សាកលវិទ្យាល័យ CSULB នឹងអាចធ្វើការផ្លាស់ប្តូរនិស្សិតទៅវិញទៅមកជាមួយសាកលវិទ្យាល័យនានាទៀត នៅកម្ពុជា»។
លោក Alex Morales ក៏បានធ្វើការវាយតម្លៃលើកម្រិតសិក្សាអប់រំនៅកម្ពុជាដែរថា «សិស្ស-និស្សិតកម្ពុជាភាគច្រើនពុំមានថវិកាគ្រប់គ្រាន់សម្រាប់ចូលរៀននៅសាលាឯកជនទេ។ ពោល គឺពួកគេត្រូវចូលរៀននៅសាលារដ្ឋ ដែលធនធាន និងបរិក្ខារសិក្សានៅមានការខ្វះខាតនៅឡើយ។ ជាពិសេសនៅកម្រិតបឋមសិក្សា និងមធ្យមសិក្សា ដែលជាមូលហេតុនាំឲ្យពួកគេទទួលបានចំណេះដឹង និងជំនាញមូលដ្ឋានមិនគ្រប់គ្រាន់»។
លោកបានអំពាវនាវឲ្យ ក្រសួងអប់រំធ្វើការវិនិយោគបន្ថែមទៀតទៅលើវិស័យអប់រំ ដើម្បីបង្កើនទាំងបរិមាណនិងគុណភាពនៃធនធានសម្រាប់ការបង្ហាត់បង្រៀន ព្រមទាំងផ្តល់ការបណ្តុះបណ្តាល ប្រាក់ខែបន្ថែមទៅដល់បុគ្គលិកអប់រំ ដើម្បីជួយលើកកម្ពស់ការងាររបស់ពួកគាត់ផងដែរ។
លោក Morales បន្តថា «ក្រៅពី រ៉ាន់ដា ខ្ញុំជឿថា នៅមាននិស្សិតខ្មែរជាច្រើនទៀតដែលពូកែ និងឆ្លាតវាងវៃ ហើយអ្វីដែលពួកគេកំពុងតែខ្វះគឺឱកាស និងការឈានចាប់យកឱកាសប៉ុណ្ណោះ»។
គួរបញ្ជាក់ថា យុវជន សម រ៉ាន់ដា គឺជានិស្សិតឆ្នើមចេញពីរដ្ឋ Texas ដែលទទួលបានអាហារូបករណ៍សម្រាប់ការសិក្សាមួយជីវិត ពីមូលនិធិ Bill Gates។
បច្ចុប្បន្ន កូនខ្មែររស់នៅអាមេរិករូបនេះ កំពុងបន្តការសិក្សាថ្នាក់បរិញ្ញាប័ត្រផែ្នកជីវសាស្រ្ត និងពាណិជ្ជសាស្រ្តនៅសាលា Wharton Business School នៃសាកលវិទ្យាល័យ Pennsylvania ដែលជាសាលាពាណិជ្ជសាស្រ្តលំដាប់លេខ ១ លើពិភពលោក៕
