The Phnom Penh Post Search

Search form




Logo of Phnom Penh Post newspaper Phnom Penh Post - និស្សិត​​ប្រើ​ពន្លឺ​អំពូល​ភ្លើង​ពណ៌ស​យូរពេក​ក្នុង​ការ​អាន​សៀវភៅ ​អាច​ប្រឈម​បញ្ហា​ភ្នែក?

និស្សិត​​ប្រើ​ពន្លឺ​អំពូល​ភ្លើង​ពណ៌ស​យូរពេក​ក្នុង​ការ​អាន​សៀវភៅ ​អាច​ប្រឈម​បញ្ហា​ភ្នែក?

Content image - Phnom Penh Post
យុវជន កែវ គឹម​ហៀង និង​យុវតី ល័ក្ខ សុផាវត្ដី មាន​បញ្ហា​ម៉្ញូប​ភ្នែក។

និស្សិត​​ប្រើ​ពន្លឺ​អំពូល​ភ្លើង​ពណ៌ស​យូរពេក​ក្នុង​ការ​អាន​សៀវភៅ ​អាច​ប្រឈម​បញ្ហា​ភ្នែក?

ភ្នំពេញៈ យុវតី ល័ក្ខ សុផាវត្ដី និស្សិត​ផ្នែក​គ្រប់​គ្រប់​ពាណិជ្ជកម្ម​ នៃសា​​កលវិទ្យល័យ ភ្នំពេញ​អាមេរិកាំង​បាន​ឲ្យ​ដឹង​ថា៖ «ការ​រៀន​សូត្រ​នៅ​ជិត​អំពូល​ ពន្លឺ​ពណ៌​ស​ខ្លាំង​យូៗ​ទៅ​ វា​អាច​ធ្វើ​ឲ្យ​យើង​ឈឺ​ភ្នែក​ខ្លាំង ពេល​នេះ​ ខ្ញុំ​ពាក់​វ៉ែនតា កម្រិត ៤០០ ដឺក្រេ។ ប៉ុន្ដែ​ឥឡូវ ម៉ាក់​ខ្ញុំ​គាត់​បាន​ផ្លាស់​អំពូល​ព័ណ៌​ទឹក​ក្រូចឲ្យ​ខ្ញុំ»។

យុវជន កែវ គឹម​ហៀង បច្ចុប្បន្ន​ក៏​ជា​យុវជន​ម្នាក់​ ដែល​កំពុង​ប្រើ​ប្រាស់​ វ៉ែន​តា ដែល​មាន​ដឺ​ក្រេ​ខ្ពស់​រហូត​ដល់​ជាង​ ២០០ ដឺក្រេ​ដែរ​នោះ​បាន​​ឲ្យ​ដឹង​ដែរ​ថា​៖ «ការ​ឡើង​ដឺ​ក្រេ​ខ្ពស់ ​ដូច្នេះ​​ប្រហែល​ជា​មក​ពី​កាល​​ដែល​ខ្ញុំ​នៅ​រៀន​វិទ្យាល័យ​ ប្រឹង​មើល​សៀវ​ភៅ​​ ក្រោម​ពន្លឺ​ពណ៌​ស ច្រើន​ពេក ហើយ​មិន​បាន​ពាក់​វ៉ែន​តា ឲ្យ​ទៀង​ទាត់ ​ដូច្នេះ​ បាន​ជា​ដឺក្រេ​ឡើង​ខ្ពស់​ដូច្នេះ​»។

និស្សិតទាំងពីរ​ខាង​លើ ក៏​មិន​ខុស​គ្នា​ពី​ ​សិស្ស​-និស្សិត​​​មួយ​​ចំនួន​ទៀត ដែល LIFT បាន​ធ្វើ​ការ​សម្ភាស៍​ ពិសេស​យុវជន​​ប្រឹង​​​រៀន​​ដល់​​​យប់​ជ្រៅ និង​ ក្រោក​ឡើង​រៀន​ពេល​ទាប​ភ្លឺ​ ដោយ​ការ​ប្រើ​ប្រាស់​ពន្លឺ​ភ្លើង​ពណ៌ស​ខ្លាំង​ពេក​​ គួប​ផ្សំ​ជា​មួយ​ការ​ជះឥទ្ធិពល​ពី​​ការ​មើល​កញ្ចក់​​ពន្លឺ ស្មាត​ហ្វូន និង​ អេក្រង់​កំព្យូទ័រ​​ផង​នោះ​ ភាគច្រើន​​កំពុង​ប្រឈម​នឹង​បញ្ហា​ស្រវាំង​ភ្នែក ឬ ម៉្ញូប ទាំង​វ័យ​ក្មេង​ឈាន​ដល់​ការ​ពាក់​​វ៉ែន​តា​ ដែល​មាន​​ដឺ​ក្រេ​ខ្ពស់​ៗ​។

លោក​ វេជ្ជបណ្ឌិត ចក្ខុរោគ សូរ ចំរើន នៃ​មន្ទីរ​ពេទ្យ​កាល់ម៉ែត បាន​​ប្រាប់​ថា​៖ «​ជា​ទូទៅ​ នៅ​មិន​ទាន់​មាន​ឯកសារ​ណា​បាន​និយាយ​ថា ​រៀន​ច្រើន​​បណ្ដាល​ឲ្យ​ប៉ះពាល់​ដល់​ភ្នែក​នោះ​ទេ​។ ប៉ុន្ដែ​ ក៏​មាន​ឯកសារ​​មួយ​ចំនួន បាន​និយាយ​ដែរ​ថា អំពូល​ភ្លើង​ពណ៌​ស​ គឺ​មិន​សូវ​ល្អ​សម្រាប់​​ភ្នែក​​ដែរ។ បើ​យើង​ប្រើ​អំពូល​ពណ៌​ផ្សេង​ ដូចជា ​ពណ៌​លឿង​វា​ល្អ​ជាង​អំពូល​ព័ណ៌​ស»​។

លោក​​បន្ត​​ថា «ជា​ការ​គត់​សំគាល់​របស់​ខ្ញុំ​​ បើ​មើល​អំពូល​ពណ៌​ស​ ​យូរពេក​ ​អាចម៉្ញូប​ខ្លះ​មែន ប៉ុន្ដែ​នៅ​មិន​ទាន់​មាន​ឯកសារ​​ណា​បញ្ជាក់​ជាក់​លាក់​​នៅ​ឡើយ​ទេ»។

យោងតាមការ​​ចុះ​ផ្សាយ​ក្នុង​ទស្សនាវដ្ដី​ ​ Opthalmology នៅ​សប្តាហ៍​នេះ បាន​បង្ហាញដែរ​​ថា មនុស្ស​ ៤,៨ ពាន់​លាន​នាក់ ឬ​ ៤៩,៨ ភាគរយ​ នឹងត្រូវ​តែ​ពាក់​វែនតា​ម៉្ញូប​នៅ​ឆ្នាំ ២០៥០​ ខណៈ​នៅ​ឆ្នាំ ២០១០ ​មនុស្ស ២៨,៣ ភាគរយ ឬ​ ២ ពាន់​លាន​នាក់​ កើត​ជំងឺម៉្ញូប​ភ្នែក នៅទូទាំង​ពិភព​លោក​។ វា​ដោយ​សារតែ​ការ​ចំណាយ​ពេល​ច្រើន​សម្លឹង​អេក្រង់​កុំព្យូទ័រ ថេប្លិត និង​ទូរស័ព្ទ ហើយ​គ្មាន​​វេលា​ចេញ​ក្រៅ​គ្រប់​គ្រាន់​៕

អត្ថបទគួរចាប់អារម្មណ៍