The Phnom Penh Post Search

Search form




Logo of Phnom Penh Post newspaper Phnom Penh Post - និស្សិត​ផ្នែក​គ្រប់គ្រង​ នៅ​បាត់ដំបង កាក់​កប​នឹង​គូរ​គំនូរ​ច្នៃ​ម៉ូដ​ឲ្យ​សម្អាងការ




និស្សិត​ផ្នែក​គ្រប់គ្រង​ នៅ​បាត់ដំបង កាក់​កប​នឹង​គូរ​គំនូរ​ច្នៃ​ម៉ូដ​ឲ្យ​សម្អាងការ

Content image - Phnom Penh Post
គំនូរ​​មិនមាន​ផាត់ពណ៌ ជា​ស្នាដៃ​ច្នៃ​ម៉ូដសម្លៀក​បំពាក់ និង​គូរ​ដោយ​​​និស្សិត​ផ្នែក​គ្រប់គ្រង នៅ​ខេត្ត​បាត់ដំបង​។ ហ្វេសប៊ុក

និស្សិត​ផ្នែក​គ្រប់គ្រង​ នៅ​បាត់ដំបង កាក់​កប​នឹង​គូរ​គំនូរ​ច្នៃ​ម៉ូដ​ឲ្យ​សម្អាងការ

បាត់ដំបងៈ ឈុត​តំណាង​ជាតិ ដែល​ត្រូវ​ច្នៃ​ឡើង​យ៉ាង​ប្រណីត ចេញ​ពី​គំនិត​ច្នៃប្រឌិត​របស់​យុវជន​ជា​អ្នក​មាន​កំណើត​កើត​ជា​នៅ​ក្នុង​ភូមិ​រ៉ា ឃុំ​មោង ស្រុក​មោង​ឫស្សី ខេត្ត​បាត់ដំបង ត្រូវ​បាន​មហាជន​ស្ងើច​សរសើរ​ពី​ស្នាដៃ​នេះ​ពេញ​បណ្ដាញ​សង្គម ប៉ុន្តែ​យុវជន​ជា​ម្ចាស់​គំនូរ​ដ៏​ស្រស់​ស្អាត និង​បង្កប់​នូវ​អត្ថន័យ​ក្នុង​សម្លៀក​បំពាក់​នោះ មិន​សូវ​មាន​នរណា​ដឹង​ពី​អត្ត​សញ្ញាណ​របស់​លោក​ឡើយ។

ជា​និស្សិត​ផ្នែក​គ្រប់គ្រង​ឆ្នាំ​ទី ៣ នឹង​បាន​ព្យួរ​ការសិក្សា​សិន ដោយសារ​ការ​មមាញឹក​បម្រើការ​នៅ​ស្ថាប័ន​មួយ​កន្លែង​ក្នុង​ទឹកដី​ខេត្ត​បាត់ដំបង យុវជន​វ័យ ២៦ ឆ្នាំ​រឹទ្ធិ ធារ៉ា មាន​គំនិត​ច្នៃប្រឌិត​ខ្ពស់​ខាង​សម្លៀក​បំពាក់​តំណាង​ជាតិ ម៉ូដ​សក់​ប្រពៃណី​ខ្មែរ​តាម​ជំនាន់​សម័យ​កាល ក៏​ដូចជា​ឈុត​ចូលរួម​ក្នុង​កម្មវិធី​ផ្សេងៗ និង​ជាពិសេស​ឈុត​កូន ក្រមុំ។ យុវជន​ធ្លា​ប់រៀន​ផ្នែក​សិល្បៈ​មួយរយៈ​ខ្លី​រូប​នេះ​ក៏​ធ្លាប់​គូរ​គំនូរ​រូប​មនុស្ស​ជាមួយ​ទេសភាព​ផ្សេងៗ​ផង​ដែរ។

លោក ធារ៉ា ជា​អ្នកមាន​ទេពកោសល្យ​ខ្ពស់​នេះ បាន​រំឭក​ប្រាប់ ភ្នំពេញ ប៉ុស្តិ៍ ថា៖ «ខ្ញុំ​បាន​ចាប់ផ្តើម​គូរ​គំនូរ​តាំង​ពី នៅ​តូច ហើយ​ចាប់ផ្តើម​ផុស​ចូល​ក្នុង​ហ្វេសប៊ុក​ហ្នឹង​ក្នុង​ឆ្នាំ ២០១២។ និយាយ​ទៅ​ចេះ​គូរ​យូរ​ហើយ ហើយ​ខ្ញុំ​ក៏​ធ្លាប់​បាន​រៀន​ផ្នែក​គំនូរ​នេះ​បាន ១ ឆ្នាំ​ផង​ដែរ តែ​ដោយសារ ការងារ​រវល់ ទើប​សម្រេច​ចិត្ត​ផ្អាក​សិន»។

យុវជន​ប៉ិនប្រសប់​ខាង​ច្នៃ​ម៉ូដ​សម្លៀកបំពាក់​បានបញ្ជាក់​ឲ្យ​ដឹង​ដែរ​ថា ខ្លួន​ធ្លាប់បាន​ប្រឡង​ផ្នែក​គំនូរ​បាន ២ ដង​រួច​ហើយ ដោយ​ប្រលង​លើក​ទី ១ នៅ​ទី​រួម​ខេត្ត​បាត់ដំបង សាខា​កាក​បាទ​ក្រហម ក្នុង​កម្មវិធី​សុវត្ថិភាព​ចរាចរណ៍​ផ្លូវ​គោក ដោយ​ទទួល​បាន​ជយ​លាភី​លេខ ១ កាល​ពី​ឆ្នាំ ២០១២ និង​លើក​ទី ២ នៅ​ទីក្រុង​ភ្នំពេញ មជ្ឈមណ្ឌល​ស៊ូ (Soo Art Center) ក្នុង​កម្មវិធី​ជ្រើសរើស​វិចិត្រករ​ស្នាដៃ​ឆ្នើម ប្រធាន​បទ «សម្រស់ និង​ក្តី​ស្រឡាញ់» មិន​បាន​ទទួល​ជយ​លាភី​អ្វី​ទេ ដោយ​គ្រាន់​តែ​បាន​រង្វាន់​លើក​ទឹកចិត្ត​ក្នុង​ឆ្នាំ ២០១៨ នេះ​ឯង។

Content image - Phnom Penh Post
យុវជន​ រីទ្ធិ ធារ៉ា ​ម្ចាស់​ស្នាដៃគំនូ​​រអាយុ ២៦ ឆ្នាំ​។ ហ្វេសប៊ុក

ក្នុង​អាជីព​ជា​អ្នក​គូរ​យ៉ាង​ចំណាន​ខាង​ច្នៃ​ម៉ូដ​ក៏ដូចជា គូរគំនូរ ជាការ​ងារ​ដែល​ធ្វើ​នៅ​ពេល​ទំនេរ​ពី​ការងារ​ចម្បង​នោះ​លោក រឹទ្ធិ ធារ៉ា ក៏បាន​បង្ហើប​ថា មិន​ទាន់​មាន​ទីផ្សារ​ច្នៃ​ម៉ូដ​ឲ្យ​បវរកញ្ញា​តំណាង​ជាតិ​ទៅ​ប្រកួត​នៅ​ឡើយ​ទេ ប៉ុន្តែ​បែរ​ជា​ទាក់​ទាញ​បណ្តា​សម្អាងការ​ជាច្រើន​ឲ្យ​ច្នៃ​ជា​រ៉ូប កូន​ក្រមុំ ដូចជា​សម្អាងការ​សុភមង្គល​ជាដើម។

លោក រឹទ្ធិ ធារ៉ា បាន​បន្ត​ប្រាប់​ពី​ចំណាប់អារម្មណ៍​ដែល​នាំ​ឲ្យ​ខ្លួន​បាន​គូរគំនូរ​ទាំង​អស់​នេះ​ឡើង​មក​ថា៖ «អាច​ថា​មក​ពី​ខ្ញុំ​មាន​ដុង​ខាង​គូរ​ពី​កំណើត និង​ឃើញ​ថា សិល្បៈ​វប្បធម៌​របស់​យើង​ល្អ ហើយ​មាន​ច្រើន​ប្រភេទ​ក៏មាន​ចិត្ត​ស្រឡាញ់ ហើយ​ណាមួយ​ចង់​បង្កើត​អ្វី​មួយ​ដែល​ថ្មី​ទាក់​ទង​នឹង​វប្បធម៌ និង​សិល្បៈ​របស់​យើង​ហ្នឹង ចង់​ឲ្យ​ក្មេងៗ​ក៏​ដូចជា​បងប្អូន​ខ្មែរ​យើង​ទាំង​អស់​បាន​ឃើញ​ពី​សិល្បៈ​ខ្មែរ ហើយ​ណាមួយ​ចង់​កែច្នៃ​ឲ្យ​កាន់​តែ​ប្លែក​ជាង​មុន​ដែរ»។

វិចិត្រករ​ខ្មែរ ដែលមាន​ជំនាញ​ខាង​ច្នៃ​សម្លៀកបំពាក់ និង​គំនូរ​ផ្សេងៗ​ដូចជា​រូប​ទេសភាព រូប​មនុស្ស បាន​បរិយាយ​បន្ថែម​ថា ខ្លួន​ធ្លាប់​បាន​ច្នៃ​ឈុត​តំណាង​ជាតិ​ស្នើ​ទៅ​ក្នុង​កម្មវិធី​ប្រកួត​បវរកញ្ញា​ដែរ ប៉ុន្តែ​ដូចជា​មិន​បាន​ទទួល​ដំណឹង​តប​មក​វិញ ក៏បាន​ផ្អាក​គូរ​ឈុត​តំណាង​ជាតិ បែរមក​គូរ​ឈុត​មង្គលការ​វិញ ព្រោះ​ខាង​សម្អាងការ​ត្រូវការ​ច្រើន។

យុវជន​វ័យ ២៦ ឆ្នាំ ដែលជា​និស្សិត​ផ្នែក​គ្រប់គ្រង លោក រឹទ្ធិ ធារ៉ា បាន​បង្ហាញ​ពី​តម្លៃ​គំនូរ​ដែល​លោក​ច្នៃ​ប្រឌិត​រំលេច​លើ​ក្រដាស កន្លង​មក​ថា៖ «ក្នុង​ឈុត​ដែល​សាមញ្ញ​បំផុត​តម្លៃ ១០ ដុល្លារ និង​ចំពោះ​ឈុត ដែល​មាន​ម៉ូដ​ច្រើន​តម្លៃ​ខ្ពស់​បំផុត ៣០ ដុល្លារ ដោយ​ខ្ញុំ​មិន​បាន​ថែម​ពណ៌​អ្វី​ទាំង​អស់​គ្រាន់​តែ​ច្នៃ​ចេញ​ជា​ម៉ូដ​ប៉ុណ្ណោះ»៕

អត្ថបទគួរចាប់អារម្មណ៍